И ВЕРА дела аменге бари сила. На пример, иако о Сатана мангела те уништинел амаро амалипе е Јеховаја, и вера поможинела аменге те ачхава „са о јагале стреле е Лошноскере“ (Еф. 6:16). Ако иси амен вера, шај те икљова ко крајо е проблеменцар со дикхјона аменге баре сар планине. О Исус вакерѓа пле учениконге: „Ако тумари вера тани бари само кобор јекх синапово зрно, ка вакерен акале планинаке: ’Преместин тут акатар адари‘, хем ка преместинел пе“ (Мат. 17:20). Адалеске со и вера шај те керел позорало амаро амалипе е Јеховаја, шукар тано те размислина башо акала пучиба: Сој тани и вера? Соске ваљани те ценина о чачипе те шај те овел амен вера? Сар шај те бајрара амари вера? Хем касте ваљани те овел амен вера? (Рим. 4:3).

Те овел амен вера на значинела само те верујна или те признајна кај адава со вакерела и Библија тано точно. Чак „о демонија да верујнена [кај иси Девел] хем тресинена“ (Јак. 2:19). Тегани, сој тани и вера?

Баши вера и Библија истакнинела дуј буќа. Прво, „и вера тани те овел пе силно уверимо кај ка случинел пе адава со надинаја амен“ (Евр. 11:1а). Ако иси тут вера, ту сиан силно уверимо кај са со вакерела о Јехова тано чаче хем кај ка исполнинел пе. На пример, о Јехова вакерѓа е Израелцонге: „Ако шај те пхаген мло сојуз е дивеа хем мло сојуз е раќаја, те шај те на овел ни диве ни рат ко право време, тегани ка шај те пхагел пе мло сојуз е Давидеа, мло слуга“ (Ерем. 33:20, 21). Дали некогаш сумнинѓан тут кај о кхам нане те икљол или нане те перел? Ако сиан сигурно кај о кхам ка икљол секова диве, ваљани ли те сумнине тут кај окова со створинѓа са о буќа ка исполнинел адава со ветинѓа? Сигурно кај на! (Иса. 55:10, 11; Мат. 5:18).

Дујто, и вера тани „јасно доказ кај чаче постојнела адава со на дикхела пе“. Значи и вера тани доказ башо буќа со на дикхаја лен, ама сепак постојнена (Евр. 11:1б). Те дикха јекх пример. Замислин кај јекх чхаво пучела тут: „Котар џанеа кај постојнела о воздух?“ Иако о воздух на дикхјола, веројатно ка поможине е чхавеске те размислинел башо буќа со сикавена кај чаче постојнела о воздух, сар на пример, о дишибе, и бавлал со пхудела хем слично. Кеда о чхаво ка уверинел пе кај акала буќа постојнена, ов ка хаљовел кај шај те верујнел ко нешто со на дикхјола. Слично, и вера темелинела пе ко силна доказија (Рим. 1:20).

Адалеске со и вера темелинела пе ко доказија, те шај некас те овел вера, прво мора шукар те џанел о чачипе (1. Тим. 2:4). Ама адава нане доволно. О апостол Павле пишинѓа: „Е вилеа верујнела пе“ (Рим. 10:10). Значи нане доволно само те верујна ко чачипе, него исто аѓаар ваљани те ценина ле. Само тегани ка ова поттикниме те сикава вера, јавере лафенцар амаре животоја те кера бахтале е Јехова (Јак. 2:20). Некој со нане таро вило благодарно башо чачипе шај те отфрлинел чак о најсилна доказија адалеске со одбинела те менинел пло верување или мангела  те керел сар ов со ка одлучинел (2. Пет. 3:3, 4; Јуда 18). Баш адалеске ко библиско време на развинѓе сарине вера иако дикхле несаве чудија таро Девел (4. Мој. 14:11; Јован 12:37). О Јехова преку пло свети дух дела вера само адаленге со мангена о чачипе повише таро ховајбе (Гал. 5:22; 2. Сол. 2:10, 11).

Јекх таро адала со сине лен бари вера сине о цари о Давид (Евр. 11:32, 33). Ама, асавки вера на сине саринен тари лескири фамилија. На пример, размислин башо Елијав, е Давидескоро најпхуро пхрал. Кеда о Голијат асала сине е Израелцонге, о Давид вознемиринѓа пе. Тегани о Елијав укоринѓа е Давиде хем адалеа ки адаја прилика сикавѓа кај нане ле вера ко Јехова (1. Сам. 17:26-28). Никој на бијанѓовела вераја, а нашти ни те наслединел вера таро пле родителија. Спрема адава, е Давиде сине ле вера соске сине паше амал е Девлеа.

Ко 27 Псалм, о Давид откринела сар ало џи ко адава те овел ле добором силно вера (1 стихо). Ов хор размислинела сине башо адава сар о Јехова англедер поможинѓа леске кеда соочинѓа пе душманенцар (2, 3 стихо). Ов бут ценинела сине е Јеховаскоро свето шатори (4 стихо). О Давид обожавинела сине е Девле ко свето шатори заедно е јаверенцар (6 стихо). Таро вило молинела пе сине е Јеховаске (7, 8 стихо). О Давид исто аѓаар мангља те овел сикавдо башо е Девлескере друмија (11 стихо). И вера сине леске добором важно со чак пучља: „Коте ка овав сине те на овел ман сине вера?“ (13 стихо).

Шај те овел тут исто сар е Давидескири вера ако размислинеа хем постапинеа аѓаар сар со пишинела ко 27 Псалм. Те шај те овел тут вера важно тано шукар те џане о чачипе. Адалеске, кобор повише проучинеа е Девлескоро Лафи хем о библиска публикацие добором полокхе ка овел туке те развине акаја особина со авела таро е Девлескоро духо (Пс. 1:2, 3). Џикоте проучинеа, одвојн туке време хор те размислине. Ако размислинаја башо адава со проучинаја, амари благодарност спрема о Јехова ка бајрол. А кобор повише бајрола амари благодарност, добором побари желба ка овел амен те сикава вера аѓаар со ка фалина е Девле ко амаре состанокија хем аѓаар со ка вакера баши надеж е јаверенге (Евр. 10:23-25). Исто аѓаар, амари вера сикаваја ла адалеа со понадари да молинаја амен е Јеховаске хем на откажинаја амен (Лука 18:1-8). Адалеске, стално молин тут е Јеховаске хем нека овел тут доверба кај ов грижинела пе туке (1. Сол. 5:17; 1. Пет. 5:7). И вера поттикнинела амен ко постапке, а преку амаре постапке амари вера овела позорали (Јак. 2:22).

И рат англедер те мерел, о Исус вакерѓа пле учениконге: „Верујнен ко Девел хем верујнен ки  манде“ (Јован 14:1). Адалеске ваљани те сикава вера ко Јехова хем ко Исус. Сар шај те сикаве вера ко Исус? Те дикха трин начинија.

Прво, дикх ки откупнина сар поклон таро Девел со денѓа ле туке лично. О апостол Павле вакерѓа: „Живинава спрема и вера со иси ман ко е Девлескоро Чхаво, кова со мангља ман хем денѓа пло живото манге“ (Гал. 2:20). Ако сикавеа вера ко Исус, ту цврсто верујнеа кај и откупнина шај те поможинел туке, кај ој тани темели те простинен пе тле гревија, кај дела тут надеж башо вечно живото хем кај тани најбаро доказ кобор бут мангела тут о Јехова (Рим. 8:32, 38, 39; Еф. 1:7). Акава ка поможинел туке те на дикхе негативно ки туте (2. Сол. 2:16, 17).

Дујто, ов попаше е Јеховаја аѓаар со ка молине тут леске ко темели е Исусескере жртвакоро. Адалеске со иси откупнина, амен шај те молина амен е Јеховаске „довербаја... те шај о Девел те сикавел аменге милост хем шукарипе со на заслужинаја ле кеда ваљани аменге помош“ (Евр. 4:15, 16; 10:19-22). И молитва бајрарела амари одлучност те борина амен против о искушение те кера грево (Лука 22:40).

Трито, шун е Исусе. О апостол Јован пишинѓа: „Окова со сикавела вера ко Чхаво, иси ле вечно живото. Окова со на шунела е Чхаве, нане те дикхел живото, него е Девлескири холи ачхола упри лесте“ (Јован 3:36). Приметин кај спрема о лафија таро акава стихо, те на шунел пе тано спротивно таро адава те сикавел пе вера. Спрема адава, сикавеа вера ко Исус адалеа со шунеа ле. А шунеа ле аѓаар со икереа тут ко е „Христосескоро закони“, јавере лафенцар ко лескере поуке хем заповедија (Гал. 6:2). Исто аѓаар, дикхела пе кај шунеа ле кеда применинеа о упатствија со дела лен о Исус преку „о верно хем разборито робо“ (Мат. 24:45). Ако шунеа е Исусе, ка овел тут сила те издржине проблемија кола со дикхјона опасна хем страшна сар бура (Лука 6:47, 48).

Јекх пути, јекх мануш вакерѓа е Исусеске: „Иси ман вера! Ама поможин манге те овел ман панда побари вера“ (Мар. 9:24). Џи негде ле сине ле вера, ама акава мануш сине скромно хем џанља кај ваљани леске панда вера. Слично сар акава мануш, сарине амен ка ова ко ситуацие коте со ка ваљанел аменге повише вера. Освен адава, сарине амен шај панда акана те кера позорали амари вера. Сар со дикхлем ки акаја статија, амари вера кераја ла позорали кеда проучинаја е Девлескоро Лафи хем кеда хор размислинаја баши лесте. А аѓаар бајрола амари благодарност спрема о Јехова. Амари вера исто аѓаар ка овел позорали кеда фалинаја е Јехова заедно е пхраленцар хем е пхењенцар, кеда вакераја е јаверенге баши амари надеж хем кеда молинаја амен истрајно. А адалеа со кераја амари вера позорали, добинаја и најбари награда — ачховаја ко е Девлескоро мангипе (Јуда 20, 21).