1. Со осетинѓа о Давид башо Јехова, хем ко со поттикнинѓа ле адава?

О ЦАРИ О ДАВИД пишинѓа: „Баро тано о Јехова хем заслужинела и најбари фалба“ (Пс. 145:3). Ов мангља е Јехова хем адава мангипе поттикнинѓа ле те фалинел ле „машкар о кхедимо народо“ (Пс. 22:22; 40:5). Сигурно ту да мангеа е Јехова хем сложинеа тут е лафенцар со вакерѓа лен о Давид: „Ов фалимо Јехова, Девла амаре дадескоро о Израел, ки цели вечност!“ (1. Лет. 29:10-13).

2. а) Сар шај те фалина е Јехова? б) Сој тано некаске амендар пхаро те керел, хем со ка дикха акана?

² Јекх начин сар авдиве фалинаја е Јехова тано аѓаар со коментиринаја ко амаре состанокија. Ама, буте амаре пхраленге хем пхењенге адава тано чаче пхаро. Ола мангена те коментиринен, ама и дар чхинавела лен ко адава. Сар шај те побединен пумари дар? Кола практична советија шај те поможинен аменге те да коментарија со ка охрабринен е јаверен? Англедер те одговорина ко акала пучиба, те дикха штар важна причине соске коментиринаја ко состанокија.

3-5. а) Спрема Евреите 13:15, соске коментиринаја ко состанокија? б) Дали мора сарине те коментирина ко исто начин? Објаснин.

³ О Јехова сариненге аменге денѓа и чест те фалина ле (Пс. 119:108). О коментарија со даја лен ко состанокија тане дело тари амари жртва колаја со фалинаја е Девле, хем никој јавер нашти те дел акаја жртва  аменге ко тхан. (Читин Евреите 13:15.) Дали о Јехова родела секова јекх те дел исто врста „жртва“, јавере лафенцар те коментиринел ко исто начин? На, на родела адава!

⁴ О Јехова џанела кај саринен иси амен различна способностија хем околностија, хем бут ценинела о жртве со шај те да лен леске. Размислин саве жртве прифатинѓа таро Израелција. Несаве лендар шај сине те пренесинен бакхро или бузни. Ама, ако некој сине чороло шај сине те дел „дуј грлице или дуј терне гулубија“. А ако нашти сине те дел ни адава, о Јехова прифатинела сине јекх „десеток тари ефа шукар мелимо варо“ (3. Мој. 5:7, 11). Иако о варо на сине добором скупо, о Јехова ценинела сине адаја жртва ако сине „шукар мелимо варо“.

⁵ Амаро милостиво Девел авдиве да дикхела ко амаре жртве ко исто начин. Кеда коментиринаја, ов на аџикерела сарине амен те џана те кера шукар лафи сар о Аполо или те ова уверлива сар о Павле (Дела 18:24; 26:28). Са со мангела о Јехова тано те трудина амен те коментирина најшукар со шај. Сетин тут ки удовица со денѓа дуј тикне паре. Ој сине скапоцено е Јеховаске соске денѓа о најшукар со шај сине (Лука 21:1-4).

6. а) Спрема Евреите 10:24, 25, сар шај е јаверенгере коментарија те влијајнен упри аменде? б) Сар шај те сикаве кај ценинеа о коментарија со охрабринена тут?

⁶ Амаре коментаренцар охрабринаја амен јекх јекхеа. (Читин Евреите 10:24, 25.) Сарине амен уживинаја кеда шунаја различна коментарија ко амаре состанокија. Уживинаја кеда о тикне чхаве коментиринена едноставна хем искрена лафенцар. Охрабриме сием кеда некој таро вило коментиринела башо несаво библиско чачипе кова со халило ле. А воодушевинаја амен околенге со кхедена храброст те коментиринен иако тане лаџутне или само со почминѓе те сикљовен амари чхиб (1. Сол. 2:2). Сар шај те сикава кај ценинаја ленгоро трудо? Откеда ка завршинел о состанок шај те благодарина ленге башо охрабрувачка коментарија. Јавер начин тано аѓаар со амен да ка коментирина. Тегани на само со амен ка ова охрабриме, него амен да ка охрабрина е јаверен (Рим. 1:11, 12).

7. Сави корист иси амен таро амаре коментарија?

⁷ Амен да иси амен корист кеда коментиринаја (Иса. 48:17). Ко кова начин? Прво, ако чхиваја аменге цел те коментирина,  тегани иси амен панда јекх причина шукар те спремина амен башо состанокија. Кеда шукар спреминаја амен, похор хаљоваја е Девлескоро Лафи хем ка џана сар те икера амен ко адава со сикљоваја ле. Дујто, веројатно панда повише ка уживина ко состанокија соске учествујнаја ки ленде. Хем трито, кеда трудинаја амен те коментирина, обично повише време памтинаја адава со вакерѓем.

8-9. а) Сар со пишинела ко Малахија 3:16, сар осетинела пе о Јехова кеда коментиринаја? б) Со шај понадари да те овел некаске пхаро те керел?

⁸ О Јехова тано бахтало кеда кераја лафи баши амари вера. Шај те ова увериме кај о Јехова шунела амен хем бут ценинела о трудо со даја ле те шај те коментирина ко состанокија. (Читин Малахија 3:16.) Ов сикавела адава аѓаар со дела амен берекети кеда дикхела кај трудинаја амен те кера лескири волја (Мал. 3:10).

⁹ Чаче иси амен шукар причине те коментирина ко состанокија. Ама, несаве шај понадари да дарана те вазден пло вас. Ако ту да осетинеа тут аѓаар, ма обесхрабрин тут. Те дикха несаве библиска начелија хем некобор примерија, а исто аѓаар несаве практична советија со шај сариненге аменге те поможинен панда повише те коментирина ко состанокија.

10. а) Соске несаве дарана те коментаринен? б) Ако дараја те коментарине која шукар особина шај иси тут?

¹⁰ Дали кочинѓовеа тари дар секова пути кеда мислинеа те вазде тло вас? Ако оја, на осетинеа тут само ту аѓаар. Уствари, повише џене амендар џинегде дарана кеда коментиринена. Те шај те победине и дар, најангле ваљани те хаљове и причина соске дараја. Дали дараја кај ка бистре адава со мангеа те вакере или кај нане те де о точно одговор? Дали мислинеа кај тло коментари нане те овел добором шукар сар е јаверенгере коментарија? Асавки дар шај те овел шукар знако, соске сикавела кај сиан понизно хем кај дикхеа е јаверен сар побаре тутар. О Јехова бут мангела и понизност  (Пс. 138:6; Фил. 2:3). Ама, ов исто аѓаар мангела те фалине ле хем те охрабрине тле пхрален хем пхењен ко состанокија (1. Сол. 5:11). Ов мангела тут хем ка дел туке и храброст со ваљани туке.

11. Кола мисле тари Библија шај те поможинен аменге?

¹¹ Размислин башо некобор буќа коленде со сетинкерела амен и Библија. Ој вакерела кај сарине амен грешинаја. Понекогаш ка вакера нешто со на ваљани или ка вакера нешто ко погрешно начин (Јак. 3:2). Ни о Јехова ни амаре пхраља хем пхења на аџикерена амендар те ова совршена (Пс. 103:12-14). Ола тане амари духовно фамилија хем чаче мангена амен (Мар. 10:29, 30; Јован 13:35). Ола хаљовена кај кеда коментиринаја, нане секогаш те вакера аѓаар сар со мангаја.

12-13. Со сикљоваја таро Неемија хем таро Јона?

¹² Размислин башо несаве примерија тари Библија со шај те поможинен туке те победине тли дар. Сетин тут ко Неемија. Ов служинела сине ки палата јекхе моќно царескири. О Неемија сине разочаримо соске шунѓа кај о ѕидија таро Ерусалим сине рушиме хем о порте сине тхаре (Неем. 1:1-4). Сигурно кочиндило тари дар кеда о цари пучља ле соске тано добором разочаримо! О Неемија сигате молинѓа пе хем пало адава одговоринѓа леске. Кеда шунѓа сој и бути, о цари керѓа бут буќа те шај те поможинел е Девлескере народоске (Неем. 2:1-8). Размислин исто аѓаар башо Јона. Кеда о Јехова бичхалѓа ле те предупрединел е манушен ки Ниневија, о Јона добором бут дарандило со нашља ки спротивно страна (Јона 1:1-3). Ама, адалеске со поможинѓа ле о Јехова, о Јона гело хем проповединѓа ленге. А о лафија со вакерѓа лен сине башо ленгоро шукарипе (Јона 3:5-10). Таро Неемија сикљоваја кај тано важно те молина амен англедер те одговорина. А таро Јона сикљоваја кај о Јехова ка поможинел амен те служина леске бизи разлика кобор бут дараја. Уствари, нијекх собрание нане пострашно таро Ниневијција!

¹³ Кола практична советија шај те поможинен туке те де охрабрувачка коментарија ко состанокија? Те дикха некобор предлогија.

14. Соске ваљани шукар те спремина амен башо состанокија, хем кеда шај те кера адава?

¹⁴ Спремин тут башо секова состанок. Ако англедер планиринеа хем шукар спреминеа тут, ка осетине тут посигурно кеда ка манге те коментирине (Изр. 21:5). Џанѓола пе, секоле јекхе амендар иси ле различно распоред кеда спреминела пе башо состанокија. И Елоиз, јекх удовица со иси ла повише таро 80 берш, почминела те спреминел пе баши Стражарско кула панда ко почеток таро курко. Ој вакерела: „Повише уживинава ко состанокија ако доволно англедер проучинава о материјали“. И Џој, која со керела бути цело работно време, одвојнела време сабота те спреминел и статија тари  Стражарско кула. Ој вакерела: „Мангава о материјали те овел манге свежо ко мисле“. О Ајк, јекх старешина кова сој зафатимо хем служинела сар пионери вакерела: „Халиљум кај манге пошукар те проучинав некобор пути ко курко наместо те накхавав цело материјали таро јекх пути“.

15. Сар шај шукар те спремине тут башо состанокија?

¹⁵ Сар шај шукар те спремине тут башо состанокија? Англедер те почмине те проучине, молин е Јехова те дел тут свети дух (Лука 11:13; 1. Јов. 5:14). Тегани одвојн некобор минутија те дикхе о материјали — о наслов, о поднасловија, о слике хем о рамке. Џикоте проучинеа секова пасус, читин кобор со шај повише таро стихија сој денде. Размислин хор башо информацие хем посебно концентририн тут ко мисле башо кола со мангеа те коментирине. Кобор пошукар спреминеа тут, добором побари корист ка овел тут хем ка овел туке полокхе те коментирине (2. Кор. 9:6).

16. Кола електронска алатке иси ки чхиб со хаљовеа ла, хем сар користинеа лен?

¹⁶ Ако иси тут прилика, користин о електронска алатке кола со иси ки чхиб со хаљовеа ла. Преку пли организација, о Јехова дела акала буќа те шај те поможинел аменге те спремина амен башо состанокија. И апликација JW Library^® поможинела аменге те перава публикацие проучибаске ко амаро мобилно уред. Тегани шај те проучина лен — или барем те читина лен или те шуна лен — ко било кова време хем ко било кова тхан. Несаве користинена акаја апликација те шај те проучинен џикоте тане ки пауза ки бути, ко одмор ки школа или џикоте тане ко друмо. Ки компјутерско програма Watchtower Library или ки ОНЛАЈН БИБЛИОТЕКА Watchtower шај бут локхе те аракха информацие башо несаве мисле таро материјали кова со мангаја похор те проучина ле.

17. а) Соске тано шукар те спремине некобор коментарија? б) Со сиклиљан таро видеоклипи Ов е Јеховаскоро амал — спремин туке коментари?

¹⁷ Ако шај, спремин некобор коментарија башо материјали со проучинела пе. Соске? Адалеске со о водители шај нане те дел тут те коментирине секова пути кеда ка вазде тло вас. О јавера веројатно ка вазден пло вас ко исто време хем о водители шај ка ваздел некас јавере. Те шај о состанок те завршинел ко време, о водители шај ка ваљани те ограничинел кобор коментарија ка ден пе ко јекх пасус. Адалеске, ма хољан или ма разочарин тут ако на коментиринеа панда ко почеток. Ако спреминѓан туке некобор одговорија, ка овел тут повише прилике те коментирине. На пример, шај те вазде тло вас те читине несаво стихо. Ама, ако шај, спремин тут те де коментари тле лафенцар. *

18. Соске ваљани те да кратка коментарија?

 ¹⁸ Де кратка коментарија. Бут пути о коментарија кола со највише охрабринена тане кратка хем едноставна. Адалеске, чхив туке цел те де кратка коментарија. Пробин те на овен повише таро 30 секундија (Изр. 10:19; 15:23). Ако бершенцар редовно коментиринеа ко состанокија, важно тано тле одговорија те овен кратка хем адалеа те де шукар пример е јаверенге. Ако тле коментарија трајнена некобор минутија хем кереа лафи башо бут буќа, о јавера шај те овен обесхрабриме хем те мислинен кај нашти те коментиринен сар туте. Исто аѓаар, ако амаре коментарија тане кратка, ка шај повише џене те учествујнен ко состанок. Посебно ако прво одговоринеа ко несаво пучибе, трудин тут тло одговор те овел едноставно хем директно. Ма раскажин цело пасус. Откеда ка керел пе лафи баши главно мисла, шај те коментирине башо јавера да буќа. (Дикх и рамка „ Башо со шај те коментиринав?“)

19. Сар шај о водители те поможинел туке те коментирине, ама со ваљани ту те кере?

¹⁹ Вакер е водителеске ко кова пасус мангеа те коментирине. Шукар тано те вакере леске акава англедер о состанок. Кеда ка авел време те коментирине ко адава пасус, вазде тло вас сигате хем доволно упре те шај о водители те дикхел тут.

20. Ки која смисла о состанокија тане сар јекх ручко шукар амаленцар?

²⁰ Дикх ко состанокија сар јекх ручко шукар амаленцар. Замислин туке кај несаве пхраленцар таро собрание договоринѓен тумен те хан заедно хем секој те анел нешто. Шај ка овел тут хари стрес, ама сигурно ка кере несаво хајбе кова со ка свиџинел пе сариненге. О Јехова, амаро Домаќини, спреминѓа аменге пхерди софра шукар буќенцар ко амаре состанокија (Пс. 23:5; Мат. 24:45). Ов тано бахтало кеда амен да анаја едноставно поклон, о најшукар со шај те да. Адалеске, спремин тут шукар хем коментирин кобор со шај повише ко состанокија. Тегани на само со ка ха тари е Јеховаскири софра него исто аѓаар ка ане поклон те делине е собраниеа.