1, 2. а) Соске тано мудро те ова тари е Јеховаскири страна? б) Со ка дикха ки акаја статија?

МУДРО тано те ачхова паше е Јеховаја. Никој нане добором моќно, мудро хем пхердо мангипаја сар амаро Девел! Амен секогаш мангаја те ова леске верна хем те ова тари лескири страна (Пс. 96:4-6). Ама несаве со служинена сине е Девлеске на успејнѓе те ачховен леске верна.

² Ки акаја статија ка дикха о примерија несаве манушенгере кола со вакерена сине кај тане тари е Јеховаскири страна, ама ко исто време керена сине буќа со о Јехова мрзинела лен. О поуке со сикљоваја таро ленгере примерија шај те поможинен аменге те ачхова верна е Јеховаске.

3. Соске о Јехова пробинѓа те поможинел е Каинеске хем со вакерѓа леске?

³ Размислин башо пример е Каинескоро. Ов на обожавинела сине ховавне девлен, ама о Јехова на прифатинѓа лескири жртва. Соске? Адалеске со о Јехова дикхља  кај о лошнипе почминѓа те мукхел корења ко вило е Каинескоро (1. Јов. 3:12). О Јехова предупрединѓа е Каине: „Ако почминеа те кере адава сој шукар, нане ли те прифатинав тут? Ама ако на кереа адава сој шукар, о грево гаравела пе ко удар хем мангела те астарел тут. А ту, ка навасине ле ли?“ (1. Мој. 4:6, 7). Јавере лафенцар, о Јехова вакерѓа е Каинеске: „Ако каинеа тут хем ачховеа тари мли страна, тегани ме да ка овав тари тли страна“.

4. Со керѓа о Каин кеда о Јехова денѓа ле прилика те овел тари лескири страна?

⁴ Те менинел сине о Каин пло начин сар размислинела, о Јехова палем ка прифатинел ле сине. Ама, о Каин на шунѓа е Девле. Лескоро погрешно размислибе хем и себично желба керѓе погрешно те постапинел (Јак. 1:14, 15). Кеда о Каин сине потерно, ов никогаш шај на мислинѓа кај ка противинел пе е Јеховаске. Ама, ов на шунѓа кеда о Јехова предупрединѓа ле, бунинѓа пе против о Девел хем мударѓа пе пхрале!

5. Со шај те керел те нашава е Јеховаскири милост?

⁵ Слично сар о Каин, авдиве да шај те случинел пе несаво христијани те вакерел кај служинела е Јеховаске, ама те керел буќа со мрзинела лен о Јехова (Јуда 11). Ов шај редовно џала ки служба хем ко состанокија. Ама, ко исто време ов шај те мукхел о неморална желбе, и алчност хем и омраза те водинен лескере мисле (1. Јов. 2:15-17; 3:15). А адава шај те анел џи ко грево. О јавера шај на џанена башо со размислинаја или со кераја, ама о Јехова џанела. Ов џанела дали служинаја леске цело вилеа. (Читин Еремија 17:9, 10.)

6. Сар поможинела аменге о Јехова те победина о погрешна желбе?

⁶ Чак кеда кераја грешке, о Јехова на откажинела пе сигате амендар. Ако почминаја те џа ко опасно друмо, о Јехова вакерела аменге: „Иранен тумен ки манде, хем ме ка иранав ман ки туменде“ (Мал. 3:7). О Јехова џанела кај иси амен слабостија коленцар со мора те борина амен. Ама, ов мангела те ачхова зорале хем те противина амен е лошнипаске (Иса. 55:7). Ако кераја адава, ов ветинела кај ка поможинел аменге хем ка дел амен и сила која со ваљани аменге те победина амаре погрешна желбе (1. Мој. 4:7).

7. Сар руминѓа о Соломон пло амалипе е Јеховаја?

⁷ Кеда сине терно, о Соломон сине паше е Јеховаја. О Јехова денѓа ле бари мудрост хем јекх посебно задача — те градинел јекх шужо храми ко Ерусалим. Ама, о Соломон руминѓа пло амалипе е Јеховаја (1. Цар. 3:12; 11:1, 2). Ко е Девлескоро закони пишинела сине кај е царе на ваљани те овен ле „бут ромња те шај те на цидел лескоро вило ко погрешно друмо“ (5. Мој. 17:17). О Соломон на шунѓа акава закони. Ов леља песке 700 ромња хем 300 наложнице (1. Цар. 11:3). Бут таро акала ромња на сине Израелке хем обожавинена сине ховавне девлен. Адава исто аѓаар сикавела кај о Соломон на шунѓа о закони кова со забранинела сине е Израелцонге те лен песке ромња таро јавера народија (5. Мој. 7:3, 4).

8. Сар о Соломон вреџинѓа е Девле?

⁸ Хари по хари, о Соломон чхинавѓа те мангел е Јеховаскере законија. Адалеске,  ов почминѓа те керел баре гревија. Градинѓа жртвеникија е ховавне девленге, и Астарта хем о Хемос, хем дела сине ленге жртве заедно пле ромњенцар. О Соломон чак керѓа акала жртвеникија ки планина карши о Ерусалим, и диз ки која со керѓа о храми е Јеховаске (1. Цар. 11:5-8; 2. Цар. 23:13). Шај о Соломон ховавела сине коркори пес кај о Јехова ка пхандел пле јакхја англо лошна буќа со керела лен са џикоте дела жртве ко храми.

9. Саве сине о последице адалеске со о Соломон на шунѓа е Девле?

⁹ Ама, о Јехова никогаш на пхандела пле јакхја англо грево. И Библија вакерела: „О Јехова хољанѓа е Соломонеске адалеске со цидинѓа пло вило таро Јехова“. О Девел пробинѓа те поможинел е Соломонеске. Ов „сикавѓа пе леске дуј пути хем денѓа леске заповед те на џал пало јавера девела, ама ов на шунѓа адава со заповединѓа леске о Јехова“. Адалеске, нашавѓа е Јеховаскири милост хем ов чхинавѓа те поможинел леске. О Јехова на мукхља е Соломонескоро потомство те владинел упро цело Израел хем адале потомство сине ле баре проблемија бут берша (1. Цар. 11:9-13).

10. Со шај те руминел амаро амалипе е Јеховаја?

¹⁰ Таро пример е Соломонескоро сикљоваја кај, ако сием паше околенцар со на хаљовена хем на поштујнена е Девлескере начелија, ола шај те влијајнен ко амаро размислување хем те руминен амаро амалипе е Јеховаја.  Несаве лендар шај тане дело таро собрание, ама нане паше е Јеховаја. Или, шај тане аменге фамилија, комшие, колеге или соученикија кола со на служинена е Девлеске. Ако амаре паше амала на живинена спрема е Јеховаскере начелија, хари похари шај те циден амен таро Јехова.

11. Со шај те поможинел аменге те бирина шукар друштво?

¹¹ Читин 1. Коринќаните 15:33. Повише мануша иси лен несаве шукар особине. Иси мануша кола со на служинена е Јеховаске, ама на керена секогаш лошна буќа. Шај пенџареа асавке манушен. Дали акава значинела кај тане шукар друштво? Размислин: Сар влијајнена ко тло однос е Јеховаја? Дали поможинена туке те ове попаше е Девлеа? Сој тано важно ко живото акале манушенге? Башо со керена лафи? Дали керена лафи само баши мода, паре, електронска уредија, забава хем јавера слична буќа? Дали бут пути критикујнена е јаверен? Дали мангена те вакерен безобразна шале? О Исус вакерѓа: „О муј вакерела адава солеа тано пхердо о вило“ (Мат. 12:34). Ако дикхеа кај о мануша коленцар со накхеа време лошно влијајнена ко тло амалипе е Јеховаја, одлучно кер нешто! Ма накх ленцар бут време хем ако тано потребно чхинав те дружине тут асавке амаленцар (Изр. 13:20).

12. а) Со вакерѓа о Јехова е Израелцонге кратко откеда иклиле таро Египет? б) Со вакерѓе о Израелција кеда о Јехова родинѓа лендар те овен леске верна?

¹² Шај исто аѓаар те сикљова таро адава со случинѓа пе откеда о Јехова ослободинѓа е Израелцон таро Египет. Џикоте о народо сине кхедимо англи планина Синај, о Јехова сикавѓа пе ленге ко јекх впечатливо начин. Ола дикхле јекх темно облако, громија, чуро хем шундило јекх силно звуко сар тари шинг (2. Мој. 19:16-19). Пало адава о Јехова вакерѓа кај ов тано Девел со родела само леске те служинен. Ов ветинѓа кај ка овел верно околенцар со сикавена кај мангена ле хем со шунена лескере заповедија. (Читин 2. Мојсеева 20:1-6.) Јавере лафенцар о Јехова вакерѓа ленге: „Ако овена тари мли страна, ме ка овав тари тумари страна“. Те ове сине машкар о Израелција адатхе, сар ка реагирине сине кеда ка шуне е Јеховаскере лафија? Шај ка вакере сине адава со вакерѓе о Израелција: „Ка икера са о заповедија со денѓа амен о Јехова“ (2. Мој. 24:3). Ама кратко пало адава, случинѓа пе нешто со чхивѓа ко испит и верност е Израелцонгири. Со случинѓа пе?

13. Со чхивѓа ко испит е Израелцонгири верност?

¹³ О Израелција дарандиле кеда дикхле е Девлескири бари моќ. Ола родинѓе о Мојсеј те уклел ки планина Синај хем те керел лафи е Јеховаја ко ленгоро анав (2. Мој. 20:18-21). Ама, о време накхела сине, а о Мојсеј на хулило тари планина. Изглединела сине кај о Израелција ачхиле коркори ки пустина бизо водачи. Со ка керен сине? Дикхјола пе кај е Израелцонгири вера превише зависинела сине таро ленгоро водачи, о Мојсеј. Астарѓа лен паника хем вакерѓе е Аронеске: „Кер аменге девел кова со ка џал англи аменде, соске на џанаја со уло адале Мојсејеа, о мануш со икалѓа амен тари египетско пхув!“ (2. Мој. 32:1, 2).

14. Сар о Израелција ховавѓе коркори пес хем сар реагиринѓа о Јехова?

 ¹⁴ О Израелција џанена сине кај тано погрешно те обожавинен идолија (2. Мој. 20:3-5). Ама сигате бистерѓе адава, керѓе песке златно телцо хем почминѓе те обожавинен ле. Иако на шунѓе е Јеховаскири заповед, ола ховавѓе коркори пес кај панда тане тари е Јеховаскири страна. О Арон чак вакерѓа кај адава со обожавинѓе е телцо тано „свеченост ки чест е Јеховаске“. Со керѓа о Јехова? Ов вакерѓа е Мојсејеске кај о мануша руминдиле хем мукхле о друмо ко кова со вакерѓа ленге те џан. О Јехова добором бут хољанѓа со чак мангља те уништинел цело нација (2. Мој. 32:5-10).

15, 16. Сар сикавѓе о Мојсеј хем о Арон кај тане тари е Јеховаскири страна? (Дикх и слика ко почеток тари статија.)

¹⁵ Ама, о Јехова тано милостиво Девел. Ов одлучинѓа те на уништинел е Израелцон. Наместо адава, ов денѓа ленге прилика те сикавен кај мангена те овен тари лескири страна (2. Мој. 32:14). Кеда о Мојсеј дикхља сар о Израелција викинена, гиљавена хем кхелена англо телцо, ов пхагља о телцо хем керѓа ле право. Тегани викинѓа: „Кој тано тари е Јеховаскири страна? Нека авел ки манде!“, хем са о левитија кхединѓе пе околу о Мојсеј (2. Мој. 32:17-20, 26).

¹⁶ Иако о Арон сине адава со керѓа о златно телцо, ов каинѓа пе, хем заедно е јавере левитенцар биринѓа те овел тари е Јеховаскири страна. Акала верна мануша сикавѓе кај нане тари страна е манушенгири со грешинѓе. Акава сине мудро избор, соске о исто диве некобор милје џене со обожавинѓе е златно телцо сине уништиме. Ама, окола со биринѓе те овен тари е Јеховаскири страна ачхиле џивде хем о Јехова ветинѓа кај ка дел лен берекетија (2. Мој. 32:27-29).

17. Со сикљоваја таро адава со пишинѓа о Павле башо обожавибе идолија?

¹⁷ Со сикљоваја амен таро акава? О апостол Павле вакерѓа кај са адава случинѓа пе те шај те овел аменге сар пример никогаш те на обожавина идолија. Ов исто аѓаар вакерѓа кај асавке извештаија тане пишиме „сар предупредување аменге со живинаја ко крајо акале светоскоро“. Пало адава вакерѓа: „Адалеске, кој мислинела кај терѓола, те пазинел те на перел!“ (1. Кор. 10:6, 7, 11, 12). Таро адава со вакерѓа о Павле дикхаја кај чак адала со служинена е Јеховаске шај те почминен те керен адава сој лошно. Шај чак те ховавен коркори пес кај панда тане паше е Јеховаја. Ама, само адалеске со некој мангела те овел паше е Јеховаја или вакерела кај леске верно на значинела кај иси ле е Јеховаскири милост (1. Кор. 10:1-5).

18. Со шај те цидел амен таро Јехова хем саве шај те овен о последице?

¹⁸ Адалеске со о Мојсеј на хулило тари планина Синај кеда о Израелција мислинѓе кај ка хулел, почминѓе те секиринен пе. Амен да шај те почмина  те секирина амен ако о крајо на авела ко време кеда амен мислинѓем кај ка авел. Шај те почмина те мислина аменге кај и бут шужи иднина која со ветинѓа аменге о Јехова тани бут дур или превише шукар те шај те овел чаче. Кеда размислинаја аѓаар, амаре желбе хем целија шај те овен аменге поважна тари е Јеховаскири волја. Ако на пазинаја, шај те цида амен таро Јехова хем те почмина те кера буќа кола со никогаш на мислинѓем кај ка кера лен.

19. Со на ваљани никогаш те бистра хем соске?

¹⁹ О Јехова родела амендар те ова леске послушна хем само ле те обожавина ле (2. Мој. 20:5). Соске родела акава амендар? Адалеске со мангела амен. Ако на кераја адава со мангела о Јехова, ка кера адава со мангела о Сатана, а адава ка овел аменге ки штета. О Павле вакерѓа: „Нашти те пиен и чаша е Јеховаскири хем и чаша е демоненгири. Нашти те хан тари е ’Јеховаскири софра‘ хем тари е демоненгири софра“ (1. Кор. 10:21).

20. Сар шај те поможинел аменге о Јехова чак ако кераја грешке?

²⁰ О Каин, о Соломон хем о Израелција сине лен прилика те каинен пе хем те менинен пе (Дела 3:19). Таро акава дикхаја кај о Јехова на откажинела пе сигате таро мануша кеда ка грешинен. На пример, ов сине милостиво хем простинѓа е Аронеске. Авдиве, о Јехова мангипаја предупрединела амен те шај те заштитинел амен таро погрешна постапке. Адава керела ле преку и Библија, о публикацие хем преку јавера христијања. Ако шунаја кеда о Јехова предупрединела амен, шај те ова сигурна кај о Јехова ка сикавел аменге милост.

21. Со ваљани те кера кеда амари верност башо Јехова тани чхивди ко испит?

²¹ Е Јеховаскоро шукарипе со на заслужинаја ле иси ле цел (2. Кор. 6:1). Адава шукарипе дела амен прилика „те откажина амен таро са адава со нане спрема е Девлескири волја хем таро желбе е светоскере“. (Читин Тит 2:11-14.) Ко акава свето секогаш ка овен ситуацие кола со ка чхивен ко испит амари верност башо Јехова. Адалеске, ов одлучно целосно те ачхове тари е Јеховаскири страна хем ма бистре кај „таро Јехова, тло Девел, ваљани те дара, ваљани леске те служине, ки лесте те икере тут“ (5. Мој. 10:20).