1-3. а) Сар ваљани те дикха ко чачипе? Вакер пример. (Дикх о слике ко почеток тари статија.) б) Со ка дикха ки акаја статија?

АВДИВЕ тано нормално о мануша те иранен несаве производија со кинена. А кеда кинена производија преку интернет, панда почесто иранена лен. Соске керена адава? Шај на свиџинела пе ленге о производ со кинѓе ле или палем сине оштетимо. Адалеске одлучинѓе те менинен ле или те роден те иранен ленге о паре.

² Амен никогаш на кераја акава е чачипаја тари Библија. Откеда „кинѓем“ ле, никогаш на мангаја те „бикина“ ле, или јавере лафенцар, откеда сиклилем о чачипе, никогаш на мангаја те мукха ле. (Читин Изреки 23:23; 1. Тим. 2:4.) Сар со дикхлем ки англуни статија, жртвујнѓем бут време те шај те сикљова о чачипе. Исто аѓаар, шај откажинѓем амен тари кариера со шај сине те анел аменге бут паре. Хем шај руминдиле амаре односија е јаверенцар, менинѓем амаро начин сар размислинаја хем постапинаја, или чхинавѓем те кера адетија хем традицие со на мангела лен о Јехова. Ама, увериме сием кај нијекх жртва со керѓем ла нане повредно таро берекетија со добинѓем лен.

³ О Исус вакерѓа јекх споредба башо трговцо со родела  сине бисерија. Кеда аракхља јекх скапоцено бисери, ов одма бикинѓа са со сине ле те шај те кинел ле. Адава бисери претставинела сине о чачипе башо е Девлескоро Царство. Преку акаја споредба о Исус сикавѓа кобор скапоцено ка овел о чачипе околенге со родена ле (Мат. 13:45, 46). Кеда сиклилем о чачипе — о чачипе башо е Девлескоро Царство хем са о јавера скапоцена чачипа тари Библија — амен да сием сине спремна те жртвујна са те шај те добина ле. Са џикоте ценинаја о чачипе, никогаш нане те „бикина“ ле. Ама, жално тано адава со несаве Девлескере слуге чхинавѓе те ценинен о чачипе, па чак мукхле ле. На мангаја нешто асавко те случинел пе аменцар! Ваљани те шуна о совет тари Библија те живина спрема о чачипе. (Читин 3. Јованово 2-4.) Акава значинела амаре животоја те сикава кај о чачипе аменге најважно таро са. Ама, соске хем сар некој шај те „бикинел“ о чачипе? Со ка поможинел аменге те на кера акаја грешка? Сар шај те ова панда поодлучна те живина спрема о чачипе?

4. Соске несаве мануша ко прво веко „бикинѓе“ о чачипе?

⁴ Ко време е Исусескоро, несаве со ко почеток прифатинѓе о чачипе, пало несаво време чхинавѓе те живинен спрема лесте. На пример, откеда о Исус керѓа чудо хем парварѓа буте манушен, ола геле пали лесте џи ки јавер страна таро Галилејско Море. Ама тегани о Исус вакерѓа нешто со вознемиринѓа лен: „Ако на хана о тело е манушикане Чхавескоро хем на пиена лескоро рат, нане те добинен живото“. Наместо те роден таро Исус те објаснинел ленге со мислинѓа, ола вакерѓе: „Акала лафија тане пхаре! Кој шај те шунел лен?“ Адалеске бут џене таро лескере ученикија иранѓе пе ко буќа со мукхле лен хем чхинавѓе те џан пали лесте (Јован 6:53-66).

5, 6. а) Соске несаве авдиве откажинѓе пе таро чачипе? б) Сар шај некој те овел цидимо таро чачипе?

⁵ Жално тано адава со авдиве да несаве мукхле о чачипе. Соске? Шај сметинѓа лен несави промена ко хаљојбе башо несаво библиско стихо, или нешто со вакерѓа или керѓа несаво пхрал коле со иси ле побаре одговорностија ки организација. Јаверенге шај на свиџинѓа пе кеда некој денѓа лен совет тари Библија, или шај сине лен сериозно проблеми некасаја таро собрание. А јавера палем, шај верујнѓе ко ховавне сикљојба е отпадниконгере хем е јаверенгере со вакерена ховајба аменге. Акала тане некобор причине соске несаве свесно цидинѓе пе таро Јехова хем таро собрание (Евр. 3:12-14). Кобор пошукар ка овел сине те овел лен доверба ко Исус, сар со сине е Петаре! Кеда о јавера мануша сине вознемириме таро е Исусескере лафија, о Исус пучља пле апостолен дали ола да мангена те џан песке. О Петар вакерѓа леске: „Господаре, касте те џа? Ки туте тане о лафија башо вечно живото“ (Јован 6:67-69).

⁶ Јавера сине цидиме таро чачипе хари по хари, шај чак бизо те приметинен со случинела пе ленге. Асавке мануша тане сар јекх чамцо кова со хари по хари о бранија цидена ле дур таро брего. И Библија вакерела аменге те пазина никогаш те на ова „цидиме тари вера“ (Евр. 2:1). Обично, некој  сој тано цидимо таро чачипе на керела адава намерно. Ама, ов мукхела лескоро амалипе е Јеховаја те слабонел, а сар со накхела о време шај чак те нашавел ле. Со шај те поможинел аменге те на случинел пе акава аменцар?

7. Со ка поможинел аменге никогаш те на „бикина“ о чачипе?

⁷ Ако мангаја понадари да те живина спрема о чачипе, мора те прифатина хем те шуна са со вакерела аменге о Јехова. О чачипе ваљани те овел аменге најважно ко живото хем те шуна о библиска начелија ко са со кераја. О Давид ки молитва ветинѓа е Јеховаске: „Ка џав ко тло чачипе“ (Пс. 86:11). О Давид сине одлучно понадари да те џал ко чачипе, амен да мора те ова одлучна. Ако на сием, шај те почмина те жалина пало буќа кола со жртвујнѓем лен башо чачипе хем шај чак те манга те ирана несаве лендар. Ама нашти те бирина кола чачипа тари Библија ка прифатина, а кола ка отфрлина. Амен мора те живина спрема о „цело чачипе“ (Јован 16:13). Ки англуни статија дикхлем панџ буќа кола со шај жртвујнѓем башо чачипе. Акана ка дикха со ка поможинел аменге никогаш те на ирана амен ко буќа со мукхлем лен пали аменде (Мат. 6:19).

8. Со шај те случинел пе ако на користинаја мудро амаро време? Вакер пример.

⁸ Време. Ако на мангаја те ова цидиме таро чачипе, мора мудро те користина амаро време. Ако на пазинаја, шај те трошина превише време ки рекреација, ко несаво хоби, ко Интернет или ко дикхибе телевизија. На значинела кај акала буќа тане погрешна, ама ола шај те лен амаро време кова со англедер користинаја ле сине башо проучибе хем баши служба. Нешто слично случинѓа пе е Емаке. * (Дикх и фуснота.) Ој панда таро тикнипе мангела сине граста хем користинела сине секоја прилика те палдел лен. Ама, пало несаво време лакири совест почминѓа те мучинел ла соске бут време накхавела сине ко пло хоби. Адалеске, ој одлучинѓа те менинел о буќа сој лаке најважна ко живото. И Ема исто аѓаар сине охрабрими таро искуство е пхењакоро Кори Велс, која со англедер акробатски палдела сине грастен. * (Дикх и фуснота.) Е Ема акана иси ла повише време башо духовна активностија, баши пли фамилија хем пле амала кола со исто аѓаар тане Сведокија. Акана ој осетинела пе попаше е Јеховаја хем бахтали тани со џанела кај мудро користинела пло време.

9. Сар шај те авел џи ко адава о материјална буќа те овен аменге превише важна?

⁹ Материјална буќа. Ако мангаја понадари да те живина спрема о чачипе, мора те пазина о материјална буќа те на овен аменге превише важна.  Кеда сиклилем о чачипе, халилем кај тано бут поважно те служина е Јеховаске, а на те кхеда аменге материјална буќа. Сием сине бахтале со откажинѓем амен таро адала буќа башо чачипе. Ама сар со накхела о време, шај дикхаја сар јавера кинена песке о најневе електронска уредија или сар уживинена ко јавера буќа со кинена пе паренцар. Шај ка почмина те мислина кај пропуштинаја нешто шукар ко живото. Адалеске шај те на ова више задоволна адалеа со иси амен хем о материјална буќа те овен аменге поважна тари служба башо Јехова. Акава сетинкерела амен ко адава со уло е Димасеа. Ов замангља о свето добором бут со чак мукхља пли задача со керела ла сине е Павлеа (2. Тим. 4:10). Шај о Димас мангела сине о материјална буќа повише тари служба башо Девел. Или шај на мангела сине више те керел жртве те шај те служинел е Павлеа. Со сикљоваја амен таро акава? Шај англедер бут мангаја сине о материјална буќа. Ако на пазинаја, адава мангипе шај палем те бајровел ки аменде хем те овел добором силно со шај те нашава амаро мангипе башо чачипе.

10. Со на ваљани те мукха те влијајнел упри аменде?

¹⁰ Односија е јавере манушенцар. Ако мангаја понадари да те живина спрема о чачипе, на смејнаја те мукха окола со на служинена е Јеховаске те влијајнен упри аменде. Кеда сиклилем о чачипе, амаре односија е амаленцар хем е фамилијаја кола со нане е Јеховаскере сведокија менинѓе пе. Несаве шај поштујнѓе амаре неве верувања, а о јавера шај противинѓе пе аменге (1. Пет. 4:4). Нормално, трудинаја амен те понашина амен шукар амаре фамилијаја хем те ова љубезна. Ама на смејнаја те накха преку е Јеховаскере мерилија те шај те угодина ленге. Хем сар со сикљоваја таро 1. Коринќаните 15:33, амаре паше амала ваљани те овен адала со мангена е Јехова.

11. Со ка поможинел аменге те ачхова чиста англо е Јеховаскере јакхја?

¹¹ Мисле хем постапке со нане чиста. Те шај те живина спрема о чачипе, ваљани те ова света, или чиста англо Јехова. (Иса. 35:8; читин 1. Петрово 1:14-16.) Кеда сиклилем о чачипе, керѓем промене те шај те живина спрема о библиска мерилија. Несаве керѓе бут баре промене. Ама понадари да ваљани те пазина никогаш те на отфрлина амаро чисто начин сар живинаја хем те почмина те живина неморално. Со ка поможинел аменге те борина амен против о искушение те кера нешто неморално? Размислин башо адава кобор бари цена платинѓа о Јехова те шај те ова света. Ов денѓа о скапоцено живото пле мангле Чхавескоро, о Исус Христос! (1. Пет. 1:18, 19). Те шај те ачхова чиста англо е Јеховаскере јакхја, никогаш на ваљани те бистра кобор тани скапоцено е Исусескири откупно жртва.

12, 13. а) Соске тано важно те дикха ко празникија сар со дикхела о Јехова? б) Со ка дикха ко наредна пасусија?

¹² Адетија хем традицие со на мангела о Јехова. Некој тари фамилија, колеге или соученикија шај те пробинен те вклучинен амен ко ленгере прославе, сар на пример роденденија или празникија. Со ка поможинел аменге те на пера ко притисок те учествујна ко адетија хем празникија со на мангела лен о Јехова? Ваљани секогаш  те овен аменге јасна о причине соске о Јехова на мангела адала прославе. Бут ка поможинел аменге ако истражинаја ко амаре публикацие башо адава котар авена несаве празникија. Ако размислинаја башо библиска причине соске на славинаја акала празникија, ка ова увериме кај кераја окова „сој тано прифатливо е Господареске“ (Еф. 5:10). Ако иси амен доверба ко Јехова хем ко лескоро Лафи, нане те дара со ка мислинен аменге о јавера (Изр. 29:25).

¹³ Надинаја амен кај вечно ка џа ко чачипе. Со ка поможинел аменге те ова панда поодлучна понадари да те џа ко чачипе? Те дикха трин буќа.

14. а) Сар адава со понадари да ка проучина и Библија ка поможинел аменге никогаш те на „бикина“ о чачипе? б) Соске ваљанена аменге и мудрост, и поука хем о хаљојбе?

¹⁴ Прво, понадари да проучин и Библија хем хор размислин башо адава со сикљовеа. Редовно одвојн време башо акава, соске аѓаар повише ка ценине о чачипе хем ка ове поодлучно никогаш те на мукхе ле. Освен со вакерела аменге те кина о чачипе, е Девлескоро Лафи исто аѓаар поттикнинела амен те кина „и мудрост, и поука хем о хаљојбе“ (Изр. 23:23). Нане доволно само те пенџара о чачипе тари Библија, него ваљани хем те живина спрема лесте. О хаљојбе поможинела аменге те поврзина о неве буќа адалеа со више џанаја ле. И мудрост поттикнинела амен те постапина спрема адава со џанаја. Понекогаш, о чачипе дела амен поука, или сикавела амен саве промене ваљани те кера. Ваљани те ова одлучна сигате те прифатина адава, соске и Библија баши асавки поука вакерела кај тани поскапоцено таро сребро (Изр. 8:10).

15. Ки сави смисла о чачипе тари Библија заштитинела амен сар јекх појас?

¹⁵ Дујто, ов одлучно секова диве те икере тут ко чачипе. И Библија спорединела о чачипе појасеа со пхиравела ле војнико (Еф. 6:14). Ко библиско време, о појас заштитинела сине е војникоскири половина кеда сине ки борба. Ама, о појас мора сине те овел шукар стегимо. Ако на сине шукар стегимо, нашти сине те заштитинел ле. Ки сави смисла о чачипе заштитинела амен сар појас? Ако пхираваја цело време о чачипе сар јекх појас, ов ка заштитинел амен таро погрешно размислување хем ка поможинел аменге те ана мудра одлуке. Кеда иси амен несаво сериозно проблеми или сием ко искушение те кера нешто погрешно, о чачипе тари Библија ка керел те ова панда поодлучна те постапина исправно. Исто сар јекх војнико со никогаш нане те џал сине ки борба бизо пло појас, аѓаар амен да никогаш на ваљани  те мукха о чачипе. Мора те ова одлучна те икера амен ко чачипе ко са со кераја. Освен о појас, јекх јавер важно бути со пхиравела сине пеа о војнико сине лескоро мачи. Те дикха сар шај амен да те кера нешто слично.

16. Сар адава со сикаваја о чачипе е јаверен поможинела аменге те ова поодлучна те џа ко чачипе?

¹⁶ Трито, сикав е јаверен башо чачипе тари Библија кобор со шај повише. И Библија тани споредими мачеа. Исто сар јекх војнико со шукар икерела пло мачи, амен да ваљани шукар те икера о духовно мачи, е Девлескоро Лафи (Еф. 6:17). Секова јекх амендар шај те овел пошукар учители аѓаар со „исправно ка сикавел хем ка објаснинел о лафи е чачипаскоро“ (2. Тим. 2:15). Кеда користинаја и Библија те сикава е јаверен, тегани панда повише пенџараја хем замангаја о чачипе. Аѓаар, оваја панда поодлучна понадари да те џа ко чачипе.

17. Соске о чачипе тано скапоцено туке?

¹⁷ О чачипе тано скапоцено поклон таро Јехова. Адава поклон поможинела аменге те ова паше амала амаре Дадеа сој ко небо, а адава тано највредно нешто ко амаро живото. О Јехова џи акана сикавѓа амен башо бут буќа, ама адава тано само почеток! Ов ветинела аменге кај ка сикавел амен ки цели вечност. Адалеске, ценин о чачипе сар јекх скапоцено бисери. Понадари да „кин о чачипе хем никогаш ма бикин ле“. Тегани, слично сар о Давид, ка икере тут ко ветување со денѓан ле е Јеховаске: „Ка џав ко тло чачипе“ (Пс. 86:11).