1, 2. а) Сар одговоринѓа о Исус кеда о Петар вакерѓа леске те овел милостиво спрема песте? (Дикх и слика ко почеток тари статија.) б) Соске о Исус одговоринѓа аѓаар?

КИ ЈЕКХ прилика, о Исус вакерѓа пле учениконге нешто со вознемиринѓа лен. Ола мислинѓе кај ов ка обновинел о царство е Израелеске, ама о Исус вакерѓа ленге кај панда хари ка цидел муке хем ка мерел. О апостол Петар одма вакерѓа леске: „Ов милостиво спрема туте, Господаре. Адава никогаш нане те случинел пе туке“. О Исус одговоринѓа леске: „Наш мандар, Сатано! Ту сиан манге бар сопкибаске, соске тле мисле нане е Девлескере, него манушикане“ (Мат. 16:21-23; Дела 1:6).

² Адале лафенцар, о Исус јасно сикавѓа кај е Јеховаскоро размислибе разликујнела пе таро размислибе акале светоскоро кова сој тано ко васта е Сатанаске (1. Јов. 5:19). О Петар охрабринѓа е Исусе те овел ле о себично стави кова со буте манушен таро акава свето иси лен. Ама, о Исус џанља кај о Јехова мангља ов те спреминел пе башо муке хем башо мерибе кола со аџикерена ле сине. О одговор  со денѓа е Петареске сикавѓа кај о Исус прифатинѓа е Јеховаскоро размислибе, а отфрлинѓа е светоскоро.

3. Соске тано полокхо те размислина сар о мануша таро свето а на сар о Јехова?

³ А сар тано аменцар? Дали размислинаја сар о Јехова или сар о мануша таро свето? Сар христијања, бут трудинаја амен те кера е Јеховаскири волја амаре понашибаја. Ама, сар тано амаре размислибаја? Дали трудинаја амен те размислина сар о Јехова, или јавере лафенцар те дикха ко буќа сар со дикхела ов? Ваљани бут те трудина амен те шај те успејна ко адава. Тари јавер страна, бут локхо тано те размислина сар о мануша ко свето, соске о духо е светоскоро тано околу аменде (Еф. 2:2). Исто аѓаар, о мануша ко свето бут пути концентриринена пе само ки песте хем амен да шај те ова ко искушение те размислина сар ленде. Чаче, бут полокхо тано те размислина сар о мануша таро свето него сар о Јехова.

4. а) Со ка случинел пе ако мукхаја о свето те влијајнел упро амаро размислибе? б) Со ка сикљова ки акаја статија?

⁴ Ако мукхаја о свето те влијајнел упро амаро размислибе, веројатно ка ова себична хем ка манга коркори те одлучина сој исправно, а сој погрешно (Мар. 7:21, 22). Адалеске тано бут важно те трудина амен те размислина сар о Девел, а на сар о мануша таро свето. Акаја статија ка поможинел аменге ко адава. Ка кера лафи башо некобор причине кола со сикавена кај ако дикхаја ко буќа сар со дикхела о Јехова, адава на ограничинела амен превише него тано корисно аменге. Исто аѓаар, ка дикха сар шај те на мукха акава свето те обликујнел амен, или јавере лафенцар те влијајнел упри аменде. А ки јавер статија ка сикљова со шај те поможинел аменге те размислина сар о Јехова.

5. Соске несаве мануша на мангена никој те влијајнел упри ленде?

⁵ Несаве мануша на мангена никој те влијајнел упро ленгоро размислибе. Ола вакерена: „Ме шај коркори те размислинав“. Акалеа веројатно мангена те вакерен кај кеда одлучинена нешто ко пумаро живото на мангена никој те мешинел пе ленге хем кај адава уствари тано ленгоро право. На мангена некој те контролиринел лен или те чхивел лен силаја те овен сар о јавера. * (Дикх и фуснота.)

6. а) Сави слобода дела амен о Јехова? б) Дали акаја слобода нане ограничими?

⁶ Шукар тано те џана кај ако прифатинаја е Јеховаскоро размислибе, адава на значинела кај нашти те овел амен амаро стави хем мислење. Ко 2. Коринќаните 3:17 пишинела: „Коте сој тано е Јеховаскоро духо, адатхе тани и слобода“. О Јехова дела амен слобода те ова личностија саве со амен мангаја те ова. Шај коркори те бирина кола буќа ка интересинен амен хем те одлучина со ка свиџинел пе аменге, а со на. Уствари, о Јехова керѓа амен аѓаар. Ама акава на значинела кај иси амен слобода со нане ограничими. (Читин 1. Петрово 2:16.) Кеда ваљани те џана дали нешто тано исправно или погрешно, о Јехова мангела те користина лескоро Лафи те водинел амен. Дали адава превише ограничинела амен или тано башо амаро шукарипе?

7, 8. Дали адава со ка дикха ко буќа сар о Јехова превише ограничинела амен? Вакер пример.

 ⁷ Те дикха јекх споредба. О родителија трудинена пе те сикавен пумаре чхавен те овен лен шукар мерилија. Шај сикавена лен те овен поштена, буќарне хем те грижинен пе е јаверенге. Акала буќа на ограничинена превише ленгири слобода, него аѓаар о родителија спреминена пумаре чхавен те овен успешна ко живото. Кеда о чхаве ка бајровен хем ка џан песке кхерал, ка шај коркори те анен одлуке. Ако одлучинена те живинен спрема о шукар мерилија со сикавѓе лен ленгере родителија, побари тани и веројатност кај ка анен шукар одлуке, а аѓаар ка избегинен бут проблемија, секирацие хем разочарувања.

⁸ Сар шукар родители, о Јехова мангела лескере чхавен те овел лен о најшукар живото со шај (Иса. 48:17, 18). Адалеске дела амен начелија кола со поможинена аменге те ова чиста ко морално поглед хем шукар те постапина е јаверенцар. Ов поттикнинела амен те сикљова те размислина сар лесте хем те живина спрема лескере мерилија. Акава на ограничинела амен превише, него керела амен помудра хем поможинела аменге те ана пошукар одлуке (Пс. 92:5; Изр. 2:1-5; Иса. 55:9). Понадари да шај те овел амен амаро лично вкус, а ко исто време те ана одлуке со ка керен амен бахтале (Пс. 1:2, 3). Кеда размислинаја сар о Јехова, адава користинела аменге ко бут начинија.

9, 10. Со сикавела кај е Јеховаскоро размислибе тано бут пошукар таро е светоскоро?

⁹ Јавер причина соске мангаја амаро размислибе те овел послично сар е Јеховаскоро тано адалеске со лескоро размислибе тано бут пошукар таро е светоскоро. Несаве ко свето дена советија башо адава саво понашибе тано исправно ко морално поглед, сар те овел амен бахтали фамилија, сар те ова успешна ки кариера хем башо јавера подрачја ко живото. Ама повише таро адала советија тане спротивна таро е Јеховаскоро размислибе. На пример, о свето бут пути поттикнинела е манушен те дикхен само пли корист хем те дикхен ко неморал сар нешто прифатливо. А понекогаш вакерела кај о брачна партнерија ка овен побахтале ако одвојнена пе или развединена пе башо несаве потикне причине. Асавке советија тане спротивна таро адава со сикавела и Библија. Ама, дали о советија со дела о свето авдиве тане попрактична тари Библија?

¹⁰ О Исус вакерѓа: „И мудрост дикхела пе таро лакере постапке“ (Мат. 11:19). Иако о свето напредујнѓа бут ки технологија, панда нане решиме о побаре проблемија кола со чхинавена амен те ова бахтале, сар сој о војне, о расизам хем о криминал. Освен адава, о свето прифатинела о неморално понашибе. Бут џене тане свесна кај асавко стави уништинела о фамилие,  керела проблемија састипаја хем анела јавера лошна последице. Тари јавер страна, е Девлескере слуге кола со размислинена сар о Јехова иси лен побахтало фамилијарно живото, пошукар састипе хем иси лен шукар односија пумаре пхраленцар хем пхењенцар ко цело свето (Иса. 2:4; Дела 10:34, 35; 1. Кор. 6:9-11). Акава бут шукар сикавела кај е Јеховаскоро размислибе тано бут пошукар таро е светоскоро.

11. Кој обликујнѓа е Мојсејескоро размислибе хем саво сине о резултати?

¹¹ Е Јеховаскере верна слуге таро пурано време џанена сине кај е Јеховаскоро начин сар размислинела тано пошукар. На пример, иако о Мојсеј сине сикавдо „баши са и египетско мудрост“, ов џанља кај и чачутни мудрост авела таро Јехова (Дела 7:22; Пс. 90:12). Адалеске молинѓа е Јехова: „Вакер манге, молинава тут, башо тле друмија“ (2. Мој. 33:13). Адалеске со о Мојсеј мукхља о Јехова те обликујнел лескоро размислибе, о Јехова користинѓа ле ко јекх посебно начин те шај те керел пли намера. Исто аѓаар, ко е Девлескоро Лафи баши лесте вакерела пе кај тано мануш баре вераја (Евр. 11:24-27).

12. Ки каскири мудрост о Павле темелинела сине пле одлуке?

¹² О апостол Павле сине интелегентно хем школујмо мануш, хем керела сине лафи најхари ко дуј чхибја (Дела 5:34; 21:37, 39; 22:2, 3). Ама, ов отфрлинѓа и мудрост таро свето хем анѓа одлуке со темелинена пе ко е Девлескоро Лафи. (Читин Дела 17:2; 1. Коринќаните 2:6, 7, 13.) Адалеске, о Павле сине успешно ки служба хем аџикерела сине те добинел и вечно награда (2. Тим. 4:8).

13. Сави одговорност иси секоле јекхе амендар?

¹³ Јасно, е Девлескоро размислибе тано бут пошукар таро е светоскоро. Ако живинаја спрема е Девлескере мерилија, ка ова чаче бахтале хем успешна. Ама, о Јехова на чхивела амен силаја те размислина сар лесте. Ни „о верно хем разборито робо“ ни о старешине на контролиринена амаре мисле (Мат. 24:45; 2. Кор. 1:24). Ама, секова јекх амендар тано одговорно те менинел пло размислибе те шај те дикхел ко буќа сар о Јехова. Сар шај те кера адава?

14, 15. а) Башо со ваљани те размислина ако мангаја те дикха ко буќа сар о Јехова? б) Соске на смејнаја те мукха о ставија таро свето те влијајнен упри амари годи? Вакер пример.

¹⁴ Ко Римјаните 12:2 пишинела: „Ма мукхен понадари да те обликујнел тумен акава свето, него менинен тумен аѓаар со ка менинен тумаро начин сар размислинена, те шај те овен увериме со мангела о Девел те керен — буќа сој тане шукар, совршена хем прифатлива леске“. Таро акава стихо сикљоваја кај бизи разлика кој обликујнѓа амаро размислибе англедер те сикљова о чачипе, шај те менина ле те овел сар е Девлескоро. Иако упро начин сар размислинаја џи негде влијајнела и генетика хем амаре искуствија ко живото, амари годи шај понадари да те менинел пе. Асавке промене бут ка зависинен таро адава башо со биринаја те размислина. Ако хор размислинаја башо адава сар о Јехова дикхела ко буќа, ка уверина амен кај лескоро размислибе тано секогаш исправно. Тегани ка овел амен желба те дикха ко буќа сар со дикхела о Јехова.

 ¹⁵ Ама, ако мангаја те менина o начин сар размислинаја те шај те размислина сар о Јехова, на смејнаја те мукха те обликујнел амен акава свето. Акава значинела кај мора те чхинава те дикха, те читина хем те шуна буќа кола сој тане против е Девлескоро размислибе. Те шај те хаљова кобор тано важно акава те дикха јекх пример хајбаја. Некој со мангела те овел посасто шај ка одлучинел те хал пошукар хајбе. Ама цело трудо ка овел џабе ако исто аѓаар редовно хала румимо хајбе. Слично, цело амаро трудо те сикљова те размислина сар о Јехова ка овел џабе ако хранинаја амари годи штетно ставенцар таро акава свето.

16. Таро со ваљани те аракха амен?

¹⁶ Шај ли целосно те избегина о ставија таро свето? На, џи негде сием изложиме ки ленде соске нашти дословно те икљова таро свето (1. Кор. 5:9, 10). Чак кеда проповединаја, шунаја сар о мануша вакерена погрешна ставија хем ховавне верувања. Ама, иако нашти целосно те избегина асавке погрешна ставија, на ваљани те размислина баши ленде или те прифатина лен. Исто сар о Исус, ваљани одма те отфрлина о мисле кола со о Сатана мангела те овен амен. Освен адава, шај те аракха амен аѓаар со ка избегина те изложина амен бизи потреба ко ставија таро свето. (Читин Изреки 4:23.)

17. Со ка поможинел аменге бизи потреба те на изложина амен ко размислибе акале светоскоро?

¹⁷ На пример, ваљани шукар те бирина амаре амален. И Библија предупрединела кај ако оваја паше амала околенцар со на служинена е Јеховаске, ка почмина те размислина сар ленде (Изр. 13:20; 1. Кор. 15:12, 32, 33). Исто аѓаар, ваљани те пазина сави забава биринаја. Ако на дикхаја емисие хем филмија кола со ширинена и теорија баши еволуција, или коленде со иси насилство или неморал, нане те отрујна амари годи ставенцар кола сој „против о пенџарибе башо Девел“ (2. Кор. 10:5).

18, 19. а) Соске мора те аракха амен таро ставија е светоскере кола со ширинена пе ко начин со нане локхо те приметинел пе? б) Кола пучиба ваљани те пуча амен хем соске?

 ¹⁸ Несаве ставија таро свето ширинена пе ко начин со нане локхо те приметинел пе. На пример, несаве информацие ко медиумија вакерена пе ко начин колеа со дела пе поддршка башо несаве политичка ставија. А несаве емисие хем статие индиректно поттикнинена е манушен те чхивен песке целија хем те прифатинен о мерилија коленге о свето воодушевинела пе. Несаве филмија хем лила поттикнинена е манушен те мислинен кај најважно тано те угодинен песке хем пле фамилијаке. Ола сикавена асавке ставија сар разумна хем исправна. Ама, адала ставија тане спротивна таро адава со вакерела и Библија. Ки лате пишинела кај амен хем амари фамилија ка ова чаче бахтале ако највише таро са мангаја е Јехова (Мат. 22:36-39). Исто аѓаар, несаве парамиса, цртана филмија хем емисие чхавенге, иако побаро дело лендар шај те овен прифатлива, бизо те приметинел пе шај те влијајнен упро чхаве те прифатинен неморално понашибе.

¹⁹ Акава на значинела кај на смејнаја те уживина ки шукар забава. Ама ваљани те пуча амен: „Дали приметинава о ставија акале светоскере чак кеда ширинена пе ко начин со нане локхо те приметинел пе? Дали аракхава мле чхавен хем ман аѓаар со на дикхава хем на читинава нешто со шај те овел аменге штетно? Дали поможинава мле чхавенге те размислинен сар о Јехова те шај те на влијајнен ленге о ставија таро акава свето?“ Ако дикхаја и разлика машкар е Девлескоро размислибе хем о размислибе таро свето, нане те мукха те обликујнел амен акава свето.

20. Таро со зависинела кој ка обликујнел амаро размислибе?

²⁰ На ваљани те бистра кај иси само дуј стране котар со добинаја информацие — јекх страна о Јехова, а и јавер о Сатана хем лескоро свето. Кој обликујнела тут? Окова кастар со добинеа информацие. Ако прифатинаја о размислибе таро акава свето, ов ка обликујнел амен те размислина хем те постапина себично. Адалеске тано бут важно те бирина со дикхаја, со читинаја, со шунаја хем башо со размислинаја.

21. Со ка дикха ки јавер статија?

²¹ Ки акаја статија дикхлем кај ако мангаја те овел амен е Јеховаскоро размислибе, мора те избегина е светоскере ставија. Мора исто аѓаар те пхера амари годи е Девлескере мисленцар те шај са повише те размислина сар лесте. Ки јавер статија ка дикха сар шај те кера адава.