1, 2. Ки сави ситуација сине о Евреија ко Ерусалим ко крајо тари ефтато визија со дикхља о Захарија?

ПАЛИ ефтато визија, е Захарија сине ле бут буќа башо кола со шај сине те размислинел. Ов сигурно сине охрабримо адалеске со о Јехова ветинѓа кај ка уништинел е лошна манушен. Ама, ништо на менинѓа пе. Бут џене панда сине лошна хем на сине поштена, а о храми панда на сине завршимо. Соске о Евреија сигате откажинѓе пе тари задача со денѓа лен о Јехова? Дали иранѓе пе ко Ерусалим само те овел лен пошукар живото?

² О Захарија џанља кај о Евреија со иранѓе пе ко Ерусалим сине е Девлескере слуге. О Јехова поттикнинѓа лен те мукхен пло кхер хем пли бути ко Вавилон (Езра 1:2, 3, 5). Ола мукхле и пхув која со шукар џанена ла сине те шај те селинен пе ко тхан кова со повише џене лендар никогаш на дикхле ле. Акале Евреенге добором сине важно те градинен палем о храми  со сине спремна те циден јекх опасно друмо коте со ваљани сине те накхен 1.600 километрија таро планине хем карпеста тхана.

3, 4. Саве проблемија сине е Евреен кола со иранѓе пе ко Ерусалим?

³ Замислин туке о баро друмо со ваљани сине те накхен о Евреија таро Вавилон џи ко Ерусалим. Сине лен бут време те размислинен хем те керен лафи башо пло нево кхер. О попхуре вакерена сине ленге кобор сине шужо о Ерусалим хем о храми (Езра 3:12). Те ове сине ленцар, сар ка осетине тут сине кеда прво пути ка дикхе о Ерусалим? Дали ка ове сине тажно кеда ка дикхе сине о рушевине учхарде диво чарјаја хем о пхаге ѕидија таро Ерусалим коте со англедер сине порте хем куле? Шај ка споредине сине о пхаге ѕидија е баре хем силна ѕидонцар со сине ко Вавилон. Ама, о Евреија на сине обесхрабриме. Соске? Адалеске со о Јехова поможинѓа ленге хем заштитинѓа лен џикоте сине ко друмо. Кеда ресле ко Ерусалим, градинѓе жртвенико ко тхан коте со сине о храми хем почминѓе секова диве те ден жртве е Јеховаске (Езра 3:1, 2). Сине лен бари ревност хем спремна сине баши бути. Изглединела сине кај ништо нашти те обесхрабринел лен.

⁴ Ола на ваљани сине само те градинен о храми, него исто аѓаар те градинен песке кхера хем дизја. Исто аѓаар, ваљани сине те садинен о ниве те шај те овел лен со те хан пле фамилијаја (Езра 2:70). Аџикерела лен сине бут бути. Пало кратко време, але о душмања хем мангле те чхинавен лен ки бути. О душмања противинѓе пе ленге 15 берш, адалеске о Евреија хари похари обесхрабринѓе пе (Езра 4:1-4). Јавер проблеми сине адава со ко 522 берш а.а.е., о персиско цари денѓа заповед те чхинавел пе е градибаја ко Ерусалим. Изглединела сине кај и диз нане никогаш палем те овел градими (Езра 4:21-24).

5. Сар поможинѓа о Јехова пле народоске?

⁵ О Јехова џанља кај лескере народоске ваљанѓа храброст хем сила. Ов денѓа е Захаријаске и последно визија те шај те уверинел лен кај мангела лен хем кај ценинела са адава со керена леске. Ов ветинѓа ленге кај ка заштитинел лен ако понадари да керена и бути со денѓа ла ленге. Башо градибе е храмескоро о Јехова вакерѓа: „Аѓаар ка овел ако шунена е Јеховаскоро гласо, тумаро Девел“ (Зах. 6:15).

6. а) Сар почминѓа и офтото визија? (Дикх и слика ко почеток тари статија.) б) Соске е грастен сине лен различно боја?

⁶ И последно таро офто визие со дикхља о Захарија шај највише те бајрарел амари вера. (Читин Захарија 6:1-3.) Трудин тут те замислине туке со дикхља о Захарија. „Машкар дуј планине“ керде таро бакари иклиле граста кола со цидена штар воена кочие. Е грастен сине лен различно боја, адалеске шај сине локхе те разликујнен пе о јавачија. О Захарија пучља: „Сој акава?“ (Зах. 6:4). Амен да мангаја те џана о одговор соске акаја визија влијајнела упри аменде да.

7, 8. а) Со претставинена о дуј планине? б) Соске о планине тане таро бакари?

⁷ Ки Библија, о планине шај те  претставинен царствија или владе. О планине со дикхља о Захарија тане слична сар о дуј планине со дикхља лен о Даниел. Јекх лендар преставинела е Јеховаскири вечно власт упро са, а и јавер о месијанско Царство коте со Цари тано о Исус (Дан. 2:35, 45). Откеда уло цари о Исус ко 1914 берш, солдуј планине иси лен посебно улога те шај те исполнинел пе е Девлескири намера е Пхувјаја.

⁸ Соске о планине тане таро бакари? О бакари тано бут вредно хем сјајно метали. О Јехова вакерѓа е Израелцонге те користинен ле кеда градинена сине о свето шатори хем пало адава о храми ко Ерусалим (2. Мој. 27:1-3; 1. Цар. 7:13-16). Адава со о дуј симболична планине тане таро бакари сикавела кобор тано величествено е Девлескоро владибе хем о месијанско Царство. Ола ка керен о мануша те осетинен пе безбедна хем ка анен ленге бут берекетија.

9. Кој тане о јавачија, хем која тани ленгири задача?

⁹ Со претставинена о воена кочие хем ленгере јавачија? О јавачија тане ангелија, веројатно различна групе ангелија. (Читин Захарија 6:5-8.) Ола икљовена таро „Господари е цело Пхувјакоро“ јекхе посебно задачаја. О ангелија тане бичхалде ко одредиме тхана те заштитинен е Девлескере народо, посебно таро Вавилон, „и северно пхув“. Акале визијаја, о Јехова уверинѓа пле слуген кај никогаш повише нане те овен робија ко Вавилон. Замислин туке кобор сине утешиме адала со градинена сине о храми ко време е Захаријаскоро! Ола џанле кај ленгере душмања нашти те чхинавен лен.

10. Сар шај те поможинел аменге о пророштво е Захаријаскоро башо воена кочие хем ленгере јавачија?

¹⁰ Авдиве, о Јехова панда користинела пле ангелен те заштитинел хем те поможинел пле слугенге (Мал. 3:6; Евр. 1:7, 14). Ко 1919 берш, е Девлескоро народо сине ослободимо таро симболично ропство е Баре Вавилонескоро. Таро адава берш, о душмања са пле силенцар трудинена пе те чхинавен те ширинел пе и чачутни религија (Отк. 18:4). Ама, ола на успејнѓе ко адава. На ваљани те дара кај е Јеховаскоро народо ка овел палем ко ропство е ховавне религијакоро, адалеске со о ангелија заштитинена е Јеховаскере организација (Пс. 34:7). Наместо адава, понадари да ка ова бахтале хем ревна џикоте служинаја е Јеховаске. О пророштво е Захаријаскоро уверинела амен кај сием заштитиме таро дуј планине.

11. Соске на ваљани те дара кеда ка нападинен е Девлескере народо?

¹¹ Панда хари, о политичка силе акале светоскере колеа со владинела о Сатана, ка кхеден пе заедно те шај те уништинен е Девлескере народо  (Езек. 38:2, 10-12; Дан. 11:40, 44, 45; Отк. 19:19). Ко пророштво е Езекиелескоро башо акала војске вакерела пе кај тане сар облакија со учхарена и Пхув. Ола авена грастенцар хем баре хољаја те нападинен е Девлескере народо (Езек. 38:15, 16). * (Дикх и фуснота.) Ваљани ли те дара лендар? На! Аменцар тани е Јеховаскири војска. Ки бари неволја, е Јеховаскере ангелија ка заштитинен лескере народо хем ка уништинен саринен со противинена пе леске (2. Сол. 1:7, 8). Адава ка овел чаче посебно диве! Ама, кој ка водинел е Јеховаскере војска?

12, 13. а) Со вакерѓа о Јехова е Захаријаске те керел? б) Котар џанаја кај о мануш сој викимо Фиданка тано о Исус Христос?

¹² Само о Захарија дикхља о офто визие. Ама, пало адава керѓа нешто со о јавера да шај сине те дикхен ле хем аѓаар охрабринѓа адален со градинена сине е Девлескоро храми. (Читин Захарија 6:9-12.) О Јехова вакерѓа е Захаријаске те кхедел сребро хем злато таро трин мурша со иранѓе пе таро Вавилон — о Хелдај, о Товија хем о Једај — те шај те керел јекх круна (Зах. 6:11). Дали акаја круна сине керди е управителеске о Зоровавел, кова со сине таро е јудаскоро племе хем авела сине таро Давид?  На. О Јехова вакерѓа е Захаријаске те чхивел и круна е првосвештеникоске со викинела пе сине Исус, е Јоседекоскоро чхаво. Акава веројатно изненадинѓа саринен.

¹³ Дали о првосвештенико уло цари адалеске со добинѓа и круна? На. Ов на авела сине таро Давид, адалеске нашти сине те овел цари. Адалеа со о Јехова денѓа и круна леске сикавѓа кај ки иднина некој ка овел вечно цари хем првосвештенико. Баши лесте пишинела кај тано и Фиданка. И Библија вакерела кај адаја Фиданка тано о Исус Христос (Иса. 11:1; Мат. 2:23, фус.).

14. Со керела о Исус сар Цари хем Првосвештенико?

¹⁴ О Исус тано Цари хем Првосвештенико. Ов водинела е Јеховаскере војска таро ангелија хем керела са со ваљани те шај е Девлескоро народо те осетинел пе безбедно ко акава насилно свето (Ерем. 23:5, 6). Панда хари, ов ка побединел е народон те шај те поддржинел е Јеховаскоро владибе хем те заштитинел е Јеховаскере народо (Отк. 17:12-14; 19:11, 14, 15). Ама, англедер те авел адава време, о Исус ваљани те завршинел јекх важно задача.

15, 16. а) Сар сине чистимо е Девлескоро народо ко амаро време, хем кој керѓа адава? б) Со ка случинел пе ко крајо таро илјада берша коленде со ка владинел о Христос?

¹⁵ О Исус сине чхивдо те овел Цари хем Првосвештенико, а исто аѓаар добинѓа задача те „градинел е Јеховаскоро храми“. (Читин Захарија 6:13.) Ко 1919 берш, ов керѓа акаја задача аѓаар со ослободинѓа е Девлескере народо таро ропство е ховавне религијакоро, о Баро Вавилон. О Исус чистинѓа о собрание ко духовно поглед хем чхивѓа јекх „верно хем разборито робо“. Акаја група помазиме пхраља водинена о чисто обожавање ки Пхув (Мат. 24:45). Исто аѓаар, о Исус понадари да поможинела е Девлескере народо те служинел е Девлеске ко исправно начин (Мал. 3:1-3).

¹⁶ О Исус хем о 144.000 царија хем свештеникија ка владинен илјада берша. Тегани, ола ка поможинен е верна манушенге те овен совршена. Кеда акала царија хем свештеникија ка завршинен пли задача, ки Пхув ка ачховен само адала со служинена е Јеховаске. Ко адава време, секова  мануш ка служинел е чачутне Девлеске ко исправно начин!

17. Ко со уверинѓа о Јехова е Евреен хем сар влијајнѓа акава упри ленде?

¹⁷ Сар влијајнѓа и порака е Захаријаскири упро Евреија ко адава време? О Јехова ветинѓа кај ка поможинел лен хем ка заштитинел лен те шај те завршинен о храми. Адава со ветинѓа о Јехова денѓа лен надеж. Ама, шај понадари да пучена пе сине сар шај хари мануша те завршинен добором бари бути. Адалеске о Захарија вакерѓа ленге нешто со поможинѓа ленге ма те даран хем ма те сумнинен пе. Освен о Хелдај, о Товија хем о Једај, о Јехова вакерѓа ленге кај јавера да верна мануша „ка авен хем ка градинен е Јеховаскоро храми“. (Читин Захарија 6:15.) О Евреија сине увериме кај о Јехова поможинела ленге. Адалеске ола храбро почминѓе те керен бути ко храми иако о персиско цари забранинѓа те градинел пе о храми. Акаја забрана сине сар јекх бари планина англо ленгоро друмо, ама о Јехова цидинѓа ла хем о храми сине завршимо ко 515 берш а.а.е. (Езра 6:22; Зах. 4:6, 7). Акала лафија со вакерѓа о Јехова сикавена исто аѓаар ко нешто бут побаро со случинела пе ко амаро време.

18. Сар о лафија таро Захарија 6:15 исполнинена пе авдиве?

¹⁸ Авдиве, милионија мануша служинена е Јеховаске. Ола тане бахтале со дена леске пумаро време, сила хем материјална средствија. Аѓаар ола поддржинена о чисто обожавање (Изр. 3:9). Шај те ова сигурна кај о Јехова ценинела адава со верно поддржинаја ле. Ма бистре кај о Хелдај, о Товија хем о Једај анѓе сребро хем злато хем о Захарија керѓа круна лендар. О Јехова вакерѓа акаја круна те ачховел сар спомен башо прилог со денѓе акала трин мурша (Зах. 6:14). О Јехова никогаш нане те бистрел адава со кераја леске хем о мангипе со сикаваја леске (Евр. 6:10).

19. Сар ваљани те влијајнен упри аменде о визие со дикхља о Захарија?

¹⁹ Ко акала последна диве, е Јеховаскоро народо керѓа бут бути. Акава шај сине те керен адалеске со иси лен о берекети таро Јехова хем о водство таро Христос. Бахтале сием со шај те ова дело тари јекх стабилно, безбедно хем вечно организација. Џанаја кај ка исполнинел пе е Јеховаскири намера са о мануша ки Пхув те служинен леске ко исправно начин. Адалеске, те ценина амаро тхан со иси амен ки е Јеховаскири организација хем те шуна о гласо е Јеховаскоро. Ако кераја адава, ка заштитинел амен амаро Цари хем Првосвештенико хем о ангелија. Те да амендар са те поддржина о чачутно обожавање. О Јехова ка заштитинел амен џи ко крајо акале светоскоро хем ки цело вечност.