Е МОЈСЕЈЕСКОРО закони дозволинела сине е манушенге те ден несаве заклетве аѓаар со ка вакерен „Дава совли ко Девел“ или „Дава совли ко е Девлескоро анав“. Ама, ко време е Исусескоро, о Евреија добором пути дена сине заклетва со уло ленге навика те ден совли башо скоро са со ка вакерен. Ола керена сине адава те шај о јавера те верујнен ко ленгере лафија. Ама, о Исус дуј пути осудинѓа акаја навика. Ов вакерѓа: „Кеда ка вакерен: ’Оја‘, адава нека значинел ’оја‘, а кеда ка вакерен: ’На‘, адава нека значинел ’на‘“ (Мат. 5:33-37; 23:16-22).

Ко јекх теолошко речнико пишинела кај адава со ко Талмуд тано детално објаснимо кола заклетве мора сине те икерен лен, а кола шај сине те на икерен лен, поможинела аменге те дикха кобор често о Евреија дена сине заклетва те сикавен кај адава со вакерена тано чаче.

На сине само о Исус адава со осудинѓа акаја погрешно навика. На пример, о еврејско историчари Јосиф Флавиј баши јекх еврејско секта вакерѓа: „Избегинена те ден совли хем верујнена кај о дејбе заклетва тано полошно таро ховајбе“. Ола мислинена сине кај ако некој мора те дел заклетва те шај о јавера те верујнен ле, тегани ов ховавела сине. Ко еврејско апокрифно лил Мудрост Сирахова (23:11) пишинела нешто слично: „О мануш со често дела совли, пхердо тано беззаконие“. О Исус вакерѓа кај на ваљани те да заклетва башо буќа со нане важна. Ако секогаш вакераја о чачипе, на ваљани те да совли те шај те сикава е јаверенге кај адава со вакераја тано чаче.