О МЕТЕОРОЛОГО внимателно дикхела и радарско слика. Ов дикхела кај авела са попаше јекх опасно бура ко јекх подрачје коте со живинена бут мануша. Адалеске со секиринела пе баши е манушенгири безбедност, ов керела са со шај те предупрединел лен англедер те овел бут касно.

Слично аѓаар, о Јехова авдиве предупрединела са е манушен ки Пхув кај авела јекх „бура“ која тани бут поопасно таро било кова невреме со шај те шунен ле ки несави временско прогноза. Сар керела адава? Хем соске шај те ова сигурна кај дела доволно време е манушенге те спреминен пе баши адаја „бура“? Те шај те добина о одговор, најангле те дикха саве предупредувања денѓа о Јехова ко пурано време.

Ко пурано време, о Јехова денѓа предупредувања башо различна „буре“, јавере лафенцар, осуде со сине ле намера те анел лен упро окола со намерно пхагена сине лескере заповедија (Изр. 10:25; Ерем. 30:23). Ки секоја ситуација, предупрединела сине е непослушна манушен доволно време англедер хем вакерела ленге сине кола промене мора те керен (2. Цар. 17:12-15; Неем. 9:29, 30). Адалеске со мангља те постапинен исправно, о Девел бут пути користинела сине пле верна слуген ки Пхув те шај те вакерен лескере осуде хем те поможинен е манушенге те хаљовен кај одма ваљани те керен нешто (Амос 3:7).

Јекх асавко верно слуга сине о Ное. Ов бершенцар бизи дар предупрединела сине е неморална хем насилна манушен, кола со живинена сине ко лескоро време, кај ка овел Потоп (1. Мој. 6:9-13, 17). Освен адава, вакерела ленге сине со мора те керен те шај те спасинен пе — добором бут со ки Библија баши лесте пишинела кај „проповединела сине е Девлескоро праведно друмо“ (2. Пет. 2:5).

Иако о Ное керѓа са со шај, о мануша ко адава време на мангле те шунен е Девлескоро хабери со вакерела ле сине ленге. Ола сикавѓе кај нане лен нисави вера. Сар последица, муле кеда „ало о Потоп хем ингарѓа саринен“ (Мат. 24:39; Евр. 11:7). Сар со авела сине ленгоро крајо, никој лендар нашти сине те вакерел кај о Девел на предупрединѓа лен.

Понекогаш о Јехова предупрединела сине е манушен кратко англедер те анел пле осуде. Ама, чак тегани дикхела сине те дел доволно време те шај те керен промене. На пример, ко пурано Египет ко време предупрединела сине англедер те анел секоја таро деш неволје. Ов бичхалѓа е Мојсее хем е Ароне те предупрединен е фараоне хем лескере слуген баши ефтато неволја — кукудик со ка керел бари штета. Адалеске со ки диз ваљани сине тајсутно диве те перел и кукудик, дали шај сине те вакерел пе кај о Девел денѓа лен доволно време те гаравен пе хем те спасинен пе тари бура? И Библија вакерела: „Са е фараонескере слуге со дарандиле таро е Јеховаскоро лафи, гаравѓе пле слуген хем пле стока ко кхера, а окола со на чхивѓе е Јеховаскоро лафи ко пло вило, мукхле пле слуген хем пле стока ко ниве“ (2. Мој. 9:18-21). Јасно тано кај о Јехова денѓа лен доволно време хем окола со сигате реагиринѓе сине спасиме таро најстрашна последице тари акаја неволја.

О Јехова предупрединѓа е фараоне хем лескере слуген исто аѓаар англедер те анел и дешто неволја (2. Мој. 4:22, 23). Ама, ола на шунѓе адава предупредување. Адалеске, ленгере првобијаме чхаве муле. Кобор жално! (2. Мој. 11:4-10; 12:29). Дали шај сине те шунен о предупредување англедер те овел бут касно? Оја! О Мојсеј ко време предупрединѓа е Израелцон баши дешто неволја хем денѓа лен упатствија сар те спасинен пумаре фамилиен (2. Мој. 12:21-28). Кобор џене шунѓе акала упатствија? Спрема несаве  проценке, трин милионија мануша. Освен о Израелција, сине вклучиме Египќанија хем поединција таро јавера народија. Сарине ола сине спасиме тари е Девлескири осуда хем иклиле таро Египет (2. Мој. 12:38, фус.).

Сар со шај те дикха таро акала примерија, о Јехова секогаш дела сине доволно време е манушенге те шунен лескере предупредувања (5. Мој. 32:4). Соске керела сине адава? О апостол Петар објаснинѓа кај о Јехова „на мангела никој те овел уништимо него саринен те овел лен прилика те каинен пе“ (2. Пет. 3:9). О Девел чаче грижинела пе сине е манушенге. Ов мангља те каинен пе хем те керен о промене со ваљани англедер те ресел лен лескири осуда (Иса. 48:17, 18; Рим. 2:4).

Авдиве да са о мануша мора одма те шунен о важно предупредување со вакерела пе ко цело свето. Џикоте сине ки Пхув, о Исус вакерѓа кај о авдисутно свето ка овел уништимо ки јекх „бари неволја“ (Мат. 24:21). Баши осуда со ка овел ки иднина, о Исус денѓа јекх детално пророштво коте со опишинѓа со ка дикхен хем со ка доживинен лескере следбеникија џикоте авела са попаше адава време. О Исус вакерѓа кола важна буќа ка случинен пе ко цело свето. Амен сием сведокија кај адава чаче исполнинела пе (Мат. 24:3-12; Лука 21:10-13).

Ко склад акале пророштвоја, о Јехова поттикнинела са е манушен те одлучинен те овен леске послушна хем те служинен леске. Ов мангела е послушна манушен те овел лен пошукар живото панда акана хем те доживинен о берекетија со ка исполнинен пе ки иднина ко лескоро праведно нево свето (2. Пет. 3:13). Те шај те поможинел е манушенге те овел лен доверба ко лескере ветувања, о Јехова денѓа о хабери кова со шај те спасинел ленгоро живото — о шукар хабери башо Царство. О Исус англедер вакерѓа кај адава хабери „ка проповединел пе ко цело свето, башо сведоштво са е народонге“ (Мат. 24:14). О Девел организиринѓа пле чачутне слуген те ден „сведоштво“, јавере лафенцар, те проповединен лескоро хабери ко околу 240 пхувја. О Јехова мангела со повише мануша те шунен о предупредување хем те спасинен пе тари „бура“ со авела, кеда ов ка анел пли праведно пресуда (Соф. 1:14, 15; 2:2, 3).

Спрема адава, о најважно пучибе нане дали о Јехова дела е манушенге доволно време те шај те шунен лескере предупредувања. О доказија јасно сикавена кај ов отсекогаш керела сине адава. О важно пучибе тано: Дали ола ка шунен е Девлескоро предупредување џикоте панда иси време? Амен сием е Девлескере гласникија, адалеске понадари да те поможина со шај повише манушенге те преживинен о крајо акале светоскоро.