1, 2. а) Сар о начин сар постапинела о Јехова тано различно таро начин сар постапинена о мануша кола со иси лен моќ? б) Башо со ка кера лафи ки акаја статија?

О МАНУША кола со иси лен моќ бут пути „господаринена упро“ јавера хем чак мучинена лен (Мат. 20:25; Проп. 8:9). О Јехова никогаш на керела адава! Иако ов тано о Семоќно, и најсилно личност ко универзум, ов тано бут обѕирно е несовршена манушенцар. Ов тано љубезно хем важно леске сар осетинаја амен хем со ваљани аменге. Ов на бистрела кај сием несовршена хем џанела амаре ограничувања, адалеске никогаш на родела амендар те кера повише таро адава со шај (Пс. 103:13, 14).

² Ки Библија иси бут извештаија колендар со дикхјола кобор обѕирно тано о Јехова пле народоја. Ка дикха трин асавке примерија: Прво, сар о Јехова љубезно поможинѓа е тикне Самоилеске те вакерел и осуда е првосвештеникоске е Илијеске. Дујто, сар о Јехова сине стрпливо е Мојсејеа кеда мислинѓа кај нашти те икалел е Израелцон  таро Египет. Хем трито, сар о Јехова сине обѕирно е Израелцонцар кеда иклиле таро Египет. Џикоте дикхаја акала извештаија, те размислина со сикљоваја башо Јехова хем сар шај те џа пало лескоро пример.

3. Која чудно бути случинѓа пе е Самоилеске, хем со шај те пуча амен? (Дикх и слика ко почеток тари статија.)

³ О Самоил почминѓа те служинел ко свето шатори кеда сине бут тикно (1. Сам. 3:1). Јекх рат, откеда гело те совел, случинѓа пе нешто бут чудно. * (Дикх и фуснота.) (Читин 1. Самоилова 3:2-10.) Ов шунѓа јекх гласо сар викинела ле ко анав. О Самоил мислинѓа кај адава тано о пхуро првосвештенико о Илиј. Адалеске одма уштило, прастандило ки лесте хем вакерѓа леске: „Аке сиум, викинѓан ман!“ Ама о Илиј вакерѓа леске: „Ме на викинѓум тут“. Откеда панда дуј пути случинѓа пе акава, о Илиј халило кај о Девел викинела е Самоиле. Адалеске о Илиј вакерѓа е Самоилеске со те вакерел кеда јавер пути ка шунел о гласо, хем о Самоил керѓа адава. Шај пучаја амен: „Соске о Јехова панда о прво пути на вакерѓа е Самоилеске кај ов викинела ле?“ И Библија на вакерела аменге адава. Ама, шај о Јехова постапинѓа аѓаар соске сине леске важно сар ка осетинел пе о Самоил.

4, 5. а) Со керѓа о Самоил кеда о Јехова пхенѓа леске те вакерел јекх порака е Илијеске? б) Со сикљоваја башо Јехова таро акава извештај?

⁴ Читин 1. Самоилова 3:11-18. Ко е Јеховаскоро закони сине заповед о чхаве те поштујнен е попхурен, посебно адален со сине лен несаво авторитети (2. Мој. 22:28; 3. Мој. 19:32). Адалеске пхаро тано те замислина аменге сар о тикно Самоил џала ко Илиј сабајле, хем храбро вакерела леске и силно осуда таро Девел. И Библија вакерела аменге кај о Самоил дарала сине те вакерел и визија е Илијеске. Ама, о Девел јасно сикавѓа е Илијеске кај ов викинела сине е Самоиле. Адалеске, о Илиј вакерѓа е Самоилеске те на гаравел ништо таро адава со вакерѓа леске о Девел. Ов сине послушно е Илијеске хем вакерѓа леске са.

⁵ Адава со вакерѓа леске о Самоил на ваљани сине те изненадинел ле соске англедер да „јекх Девлескоро мануш“ вакерѓа леске слична лафија (1. Сам. 2:27-36). Таро акава извештај сикљоваја кобор обѕирно хем мудро тано о Јехова.

6. Со сикљоваја таро начин сар о Девел поможинѓа е Самоилеске?

⁶ Дали сиан терно? Ако оја, о извештај башо терно Самоил шај бут те охрабринел тут соске сикавела кај о Јехова хаљовела тле проблемија хем чувствија. Шај сиан лаџутно хем нане туке локхо те проповедине околенге сој тане попхуре тутар или те ове појавер таро тле врсникија. Ама шај те ове сигурно кај о Јехова мангела те поможинел туке. Адалеске молин тут леске  хем вакер сар точно осетинеа тут (Пс. 62:8). Размислин хор башо примерија јавере да терненгере сој пишиме ки Библија. Исто аѓаар, кер лафи јавере пхраленцар хем пхењенцар сој ко тле берша, или сој попхуре тутар, а кола со накхле таро слична проблемија сар тле. Ола шај те вакерен туке сар поможинѓа ленге о Јехова, понекогаш чак ко начин со ни на аџикерѓе ле.

7, 8. Сар сикавѓа о Јехова кај леске важно сар ка осетинел пе о Мојсеј?

⁷ Кеда е Мојсеје сине ле 80 берш, о Јехова денѓа ле јекх бут пхари задача — те ослободинел е Израелцон таро ропство ко Египет (2. Мој. 3:10). Адалеске со ов 40 берш сине пастири ко Мадијам, акаја задача веројатно сине шок е Мојсејеске. О Мојсеј вакерѓа: „Кој сиум ме те џав ко фараони хем те икалав е Израелцон таро Египет?“ Ама, о Јехова уверинѓа е Мојсеје: „Ме ка овав туја“ (2. Мој. 3:11, 12). Исто аѓаар ветинѓа леске кај о старешине таро Израел ка шунен ле. Ама, о Мојсеј палем пучља: „А со ако на верујнена ман хем на шунена ман?“ (2. Мој. 3:18; 4:1). Акале лафенцар о Мојсеј уствари вакерѓа кај о Јехова шај грешинела. Ама о Јехова сине стрпливо е Мојсејеа. Ов чак денѓа ле сила те керел чудија. Уствари, о Мојсеј тано о прво мануш каске со и Библија пишинела кај сине ле асавки сила (2. Мој. 4:2-9, 21).

⁸ Чак пало са акава, е Мојсеје сине ле панда јекх изговор. Вакерѓа кај нашти те керел шукар лафи. Адалеске о Девел вакерѓа леске: „Ка овав туја џикоте кереа лафи хем ка сикавав тут со те вакере“. Дали ко крајо о Мојсеј прифатинѓа и задача? На, ов молинѓа е Девле те бичхалел некас јавере. Тегани о Јехова хољанѓа. Ама, леске понадари да сине важно сар осетинела пе о Мојсеј хем адалеске бичхалѓа е Ароне те керел лафи ко анав е Мојсејескоро (2. Мој. 4:10-16).

9. Сар е Јеховаскири стрпливост хем љубезност поможинѓе е Мојсејеске те овел шукар водачи?

 ⁹ Со сикљоваја таро акава извештај башо Јехова? Адалеске сој тано Семоќно, ов шај сине те даравкерел е Мојсеје хем те теринел ле те овел леске послушно. Наместо адава, о Јехова сине стрпливо хем љубезно, а исто аѓаар уверинѓа пле скромно хем понизно слуга кај ка овел леа. Дали акава начин е Јеховаскоро успејнѓа? Оја. О Мојсеј уло шукар водачи е Девлескере народоске. Ов трудинела пе сине те овел љубезно хем обѕирно е јаверенцар, исто сар со сине о Јехова леа (4. Мој. 12:3).

10. Со ка постигнина ако трудинаја амен те ова обѕирна сар о Јехова?

¹⁰ Со шај те сикљова таро акава извештај авдиве? Ако сиан ром, родители или старешина, иси тут несаво авторитети упро јавера. Адалеске, бут тано важно те трудине тут те постапине сар о Јехова аѓаар со ка ове обѕирно, љубезно хем стрпливо тле ромњаја, тле чхавенцар хем е пхраленцар ко собрание (Кол. 3:19-21; 1. Пет. 5:1-3). Ако трудинеа тут те постапине сар о Јехова хем о Исус Христос — о Побаро Мојсеј — ка кере те овел полокхо е јаверенге те авен ки туте хем те керен туја лафи, а адава ка дел тут прилика те охрабрине лен (Мат. 11:28, 29). Исто аѓаар, ка ове ленге шукар пример (Евр. 13:7).

11, 12. Сар о Јехова поможинѓа е Израелцонге те осетинен пе безбедна џикоте икљона сине таро Египет?

¹¹ Ко 1513 берш а.а.е., повише таро трин милионија Израелција геле песке таро Египет. Машкар ленде сине чхаве, попхуре, хем веројатно несаве со сине насвале или инвалидија. Добором баре групаке мануша ваљанела сине јекх љубезно хем обѕирно водачи. О Јехова сине баш асавко водачи кова со водинела лен сине преку о Мојсеј. Адалеске о Израелција осетинена пе сине безбедна џикоте мукхена сине пумаро тхан колесте со дикхена сине сар кхер (Пс. 78:52, 53).

¹² Сар поможинѓа о Јехова пле народоске те осетинел пе безбедно? Сар прво, кеда о Израелција иклиле таро Египет о Јехова керѓа ола те овен организириме сар групе војникија (2. Мој. 13:18). Адава со сине организириме ко асавко начин уверинѓа лен кај ленгере Девле иси ле целосно контрола упри ситуација. Исто аѓаар, те шај те сикавел ленге кај тано ленцар, о Јехова „облакоја водинѓа лен дивескоро, а е светлоја тари јаг цело рат“ (Пс. 78:14).  Акала доказија уверинѓе лен кај о Јехова тано ленцар, а баш адава ваљанѓа ленге.

13, 14. а) Сар грижинѓа пе о Јехова е Израелцонге ко Црвено Море? б) Сар сикавѓа о Јехова кај тано бут помоќно таро Египќанија?

¹³ Читин 2. Мојсеева 14:19-22. Замислин туке кај сиан е Израелцонцар. Сиен ки стапица. И египетско војска тани пали туменде, а о Црвено Море англи туменде. Тегани о Девел керела нешто. О стубо таро облако сој англи туменде префрлинела пе пало тумаро логори, машкар туменде хем о Египќанија. Акана ола тане ки темница, ама ко тумаро логори иси светлина! Тегани дикхеа е Мојсеје сар пружинела пло вас упро Црвено Море хем почминела те пхудел јекх силно источно бавлал која со пхравела јекх бувло друмо џи ки јавер страна. Тегани ту, тли фамилија хем тле животне ко организиримо начин пхирена ко дно таро море заедно е јавере манушенцар. Џикоте пхиреа, чудинеа тут со и пхув нане чикали хем на лизгала. Ој тани шуки хем зорали хем шај локхе те пхирел пе ки лате. Адалеске, чак о најбавна машкар туменде шај безбедно те ресен ки јавер страна.

¹⁴ Читин 2. Мојсеева 14:23, 26-30. Џикоте случинела пе са акава, о фараони кова со сине гордо хем на сине разумно, почминела те авел пали туменде. Тегани о Мојсеј панда јекх пути пружинела пло вас упро море хем о дуј ѕидија таро пани почминена те перен. О пани учхарела е фараоне хем лескере војска. Нијекх лендар на ачхило џивдо! (2. Мој. 15:8-10).

15. Со сикљоваја башо Јехова таро акава извештај?

 ¹⁵ Таро акава извештај сикљоваја кај о Јехова тано Девел е редоскоро — особина која со поможинела аменге те осетина амен безбедна (1. Кор. 14:33). Исто сар јекх пастири кова со мангипаја грижинела пе башо пло стадо, о Јехова ко конкретна начинија грижинела пе пле слугенге. Ов аракхела лен хем заштитинела лен таро ленгере душмања. Акава уверинела амен хем дела амен утеха џикоте аваја са попаше ко крајо таро акава свето! (Изр. 1:33).

16. Сави корист шај те овел амен ако размислинаја башо начин сар о Јехова спасинѓа е Израелцон?

¹⁶ Авдиве да о Јехова грижинела пе башо пло народо сар група. Ов поможинела ленге те ачховен леа паше хем заштитинела лен таро ленгере душмања. Ов понадари да ка керел адава ки бари неволја која со бут сигате авела (Отк. 7:9, 10). Адалеске, бизи разлика дали тане терне или пхуре, састе или насвале, е Девлескере народо нане те астарел ле паника или те дарал џикоте трајнела и бари неволја. * (Дикх и фуснота.) Уствари, ола ка керен нешто бут појавер! Ка сетинен пе ко е Исусескере лафија: „Испрајнен тумен хем вазден тумаре шере, соске паше тано о време кеда о Девел ка спасинел тумен“ (Лука 21:28). Чак кеда ка овен нападиме таро Гог — коалиција таро народија која со ка овел бут помоќно таро фараони — е Девлескере слуге ка овен увериме кај о Јехова ка заштитинел лен (Езек. 38:2, 14-16). Соске? Адалеске со џанена кај о Јехова на менинела пе. Ов палем ка докажинел кај тано грижливо хем обѕирно Спасители пле народоскоро (Иса. 26:3, 20).

17. а) Соске тано корисно те проучина о библиска извештаија башо адава сар о Јехова грижинѓа пе пле слугенге? б) Со ка дикха ки јавер статија?

¹⁷ Ки акаја статија дикхлем некобор примерија башо адава сар о Јехова сикавѓа обѕирност хем љубезност џикоте грижинѓа пе, водинѓа хем спасинѓа пле слуген. Џикоте размислинеа башо асавке извештаија, трудин тут те сикљове нешто нево башо Јехова аѓаар со ка роде деталија кола со англедер на приметинѓан лен. Кобор повише сикљовеа башо е Јеховаскере шуже особине тло мангипе баши лесте ка овел побаро хем тли вера ки лесте ка овел позорали. Ки јавер статија ка сикљова ко кола начинија шај те постапина сар о Јехова аѓаар со ка сикава обѕирност ки фамилија, ко собрание хем ки служба.