О МАНУША

Со вакерела и Библија: О Девел „на створинѓа и пхув џабе, него керѓа ла те живинел пе ки лате“ (ИСАИЈА 45:18).

И ПХУВ

Со вакерела и Библија: „Јекх поколение џала, јавер авела, а и пхув ачховела засекогаш“ (ПРОПОВЕДНИК 1:4).

СО ЗНАЧИНЕЛА АКАВА: Спрема и Библија и Пхув никогаш нане те овел уништими хем секогаш ка овел некој со ка живинел ки лате. Ама, ко со мислинела пе кеда вакерела пе кај ка овел уништимо о свето?

РАЗМИСЛИН: И Библија спорединела о крајо акале светоскоро адалеа со уло ко е Ноескере диве. Ко адава време и Пхув сине пхерди насилно манушенцар (1. Мојсеева 6:13). Ама, о Ное сине праведно мануш. Адалеске, о Девел спасинѓа е Ное хем лескере фамилија, ама уништинѓа е лошна манушен ко Потоп. Башо адава време и Библија вакерела: „Адава свето сине уништимо хем потопимо пањеа“ (2. Петрово 3:6). Акава сине о крајо адале светоскоро. Ама, со сине уништимо? И Пхув на сине уништими, него о лошна мануша со живинена сине ки лате. Значи, кеда и Библија спомнинела о крајо е светоскоро, адава на значинела кај ка овел уништими и Пхув, него о лошна мануша тари Пхув хем са о лошна буќа со керена лен авдиве.

О ПРОБЛЕМИЈА ХЕМ О ЛОШНИПЕ

Со вакерела и Библија: „Панда хари, о лошно нане те овел више. Ка дикхе ко лескоро тхан, а ов нане те овел адатхе. А о кротка ка наслединен и пхув, хем ка уживинен ко баро мир“ (ПСАЛМ 37:10, 11).

СО ЗНАЧИНЕЛА АКАВА: О Потоп кова со сине ко е Ноескере диве, на уништинѓа о лошнипе засекогаш. Пало Потоп, о лошна мануша понадари да керена сине лошнипа е јаверенге. Ама, панда хари о Девел ка уништинел са о лошнипе. Сар со вакерѓа о псалмисти: „О лошно нане те овел више“. О Девел ка уништинел о лошнипе преку пло Царство — е Девлескири влада, која со ка владинел таро небо упро послушна мануша.

РАЗМИСЛИН: Дали о мануша кола со владинена авдиве ки Пхув ка овен бахтале башо е Девлескоро Царство? И Библија вакерела кај нане те овен бахтале. Ола ка овен против е Девлескоро Царство (Псалм 2:2). Тегани со ка овел? Е Девлескоро Царство ка уништинел са о манушикане владе хем ов ка владинел засекогаш (Даниел 2:44). Ама, соске ка овен уништиме о манушикане владе?

Со вакерела и Библија: „О мануш кова со пхирела нашти те управинел пле друмоја.“ (ЕРЕМИЈА 10:23).

СО ЗНАЧИНЕЛА АКАВА: О мануша нане створиме те владинен упро јавера мануша. Ола на владинена шукар хем нашти решинена е манушенгере проблемија.

РАЗМИСЛИН: Ки енциклопедија Britannica Academic пишинела кај о властија нашти „те решинен о проблемија сар сој тано, о чоролипе, бокхалипе, насвалипе, природна катастрофе, војне хем насилство“. Адатхе понадари пишинела: „Несаве верујнена кај шај те овен о проблемија засекогаш решиме ако ко цело свето владинела само јекх влада“. Ама, чак кеда би кхедена пе са о манушикане владе, тегани е светоја понадари да би владинена сине несовршена мануша кола со нашти те решинен о проблемија сој спомниме поупре. Само е Девлескоро Царство тани влада која со иси ла моќ засекогаш те решинел о проблемија ки цело Пхув.

Адалеске, спрема адава со вакерела и Библија, о шукар мануша на ваљани те даран таро адава со ка овел уништимо о лошно свето хем о лошна буќа сој тане ки лесте. Наместо адава, амен едвај аџикераја те овел уништимо акава лошно свето хем те овел заменимо е Девлескере бут шуже неве светоја!

Кеда ка овел адава? О библиско одговор башо акава пучибе ка дикха ки следно статија.