Ко англуне статие дикхлем кај о Девел панда хари ка чхивел крајо е лошна манушенге ки пхув хем ка решинел са о проблемија. Амен шај те ова сигурна кај ка овел акава. Соске? Адалеске со ко е Девлескоро Лафи, ки Библија, иси акава ветување:

„О свето накхела“ (1. ЈОВАНОВО 2:17).

Шај те ова сигурна кај ка овен мануша со ка преживинен соске ко дујто дело таро исто стихо пишинела:

„A окова со керела е Девлескири волја ачхола засекогаш“.

Значи те шај те преживина, ваљани те кера е Девлескири волја. А те шај те џана сој тани лескири волја, најангле мора шукар те пенџара ле.

О Исус вакерѓа: „Те шај те овел лен вечно живото ваљани шукар те пенџарен тут, е јекхе чачутне Девле, хем околе со бичхалѓан ле, о Исус Христос“ (Јован 17:3). Те шај те преживина хем те живина засекогаш ваљани те пенџара е Девле. Акава значинела повише него само те џана кај постојнела или те џана само некобор буќа баши лесте. Ваљани те ова амала леа. Те шај те ова некасаја шукар амала, ваљани те одвојна леске време. О исто тано хем е Девлеа. Те дикха несаве чачипа тари Библија со ка поможинен амен те ова е Девлескере амала хем те ачхова леа паше.

Амен редовно хаја маро те шај те ачхова џивде. Ама, о Исус вакерѓа: „О мануш на живинела само таро маро, него хем таро секова лафи со икљола таро е Јеховаскоро муј“ (Матеј 4:4).

Авдиве, е Девлескере лафија аракхаја лен ки Библија. Џикоте проучинеа и Библија, ка сикљове со керѓа о Девел ко пурано време, со керела акана хем со ка керел ки иднина.

Со шај те кере ако мангеа те шуне е Девле, ама пхаро туке те чхинаве те кере адава сој тано погрешно? Тегани, адава со шукар ка пенџаре е Девле, шај те поможинел туке.

Размислин баши јекх ромни која со водинела сине неморално живото. Кеда почминѓа те проучинел и Библија, дознајнѓа баши е Девлескири заповед: „Нашен таро сексуално неморал“ (1. Коринќаните 6:18). Ој молинѓа пе е Девлеске те дел ла сила хем адалеске шај сине те чхинавел те керел акала лошна буќа. Ама, понадари да мора те боринел пе акале искушениенцар. Ој вакерела: „Кеда авена манге неморална мисле ки годи, искрено молинава ман е Јеховаске соске џанава кај коркори нашти те боринав ман. И молитва керѓа те овав попаше е Јеховаја“. Исто сар акаја ромни, милиоња мануша запознајнена е Девле. Ов дела лен и сила сој ленге потребно те шај те керен промене ко живото хем те живинен спрема лескири волја (Филипјаните 4:13).

Кобор повише сикљовеа башо Девел, добором попаше ка овел туја (Галатите 4:9; Псалм 25:14). Тегани ка шај те живине ко е Девлескоро нево свето. Ама саво ка овел о живото ко нево свето? И следно статија керела лафи башо адава.