Панда таро почеток тари манушикани историја, амаро Створители комунициринѓа е манушенцар преку о мељаикија (ангелија) хем о пекамберија. Освен адава ов одлучинѓа лескири порака хем о ветувања те овен пишиме. Адала ветувања таро Девел влијајнена упри тли иднина. Коте шај те аракхе адала ветувања авдиве?

Е Девлескири порака тани пишими ко е Девлескоро Лафи (2. Тимотеј 3:16). Сар користинѓа о Девел е пекамберен те пишинен лескири порака? Ов пренесинѓа пле мисле е писателенге, а ола пишинѓе лен (2. Петрово 1:21). Те објаснина акава јекхе примереа. Ако јекх директори вакерела пле секретареске те пишинел јекх порака ко лескоро анав, џанаја кај адаја порака тани таро директори. Слично, иако о Девел користинѓа манушен те пишинен лескири порака, адала лафија тане лескере.

Е Девлескири порака тани добором важно со мангела са о мануша те џанен баши лате хем те хаљовен ла. Авдиве лескоро „вечно шукар хабери“ тано достапно „секоле нацијаке, племеске, чхибјаке хем народоске“ (Откровение 14:6). О Девел грижинѓа пе лескоро Лафи те овел достапно, целосно или несаве делија лестар, ко повише таро 3.000 чхибја, сој тано бут повише таро било кова јавер лил.