1. Соске ценинеа околен сој тане стрплива?

 САРИНЕ амен ценинаја е манушен сој тане стрплива. На пример, поштујнаја околен со шај те аџикерен нешто бизо те нервиринен пе. Ценинаја кеда о јавера тане стрплива аменцар кеда грешинаја. Исто аѓаар благодарна сием околеске со проучинѓа аменцар и Библија адалеске со сине стрпливо аменцар џикоте мучинѓем амен те сикљова, те прифатина или те применина о библиска сикљојба. А сој најважно, благодарна сием е Јеховаске адалеске сој тано стрпливо аменцар (Рим. 2:4).

2. Ко кола ситуацие шај те овел аменге пхаро те ова стрплива?

² Иако ценинаја е јаверенгири стрпливост, аменге лично шај те овел пхаро те ова стрплива. На пример, шај те овел аменге пхаро те ачхова смириме кеда иси гужва ко сообраќај, посебно ако каснинаја. Или шај сигате те хољана ако некој нервиринела амен. А понекогаш шај те овел аменге пхаро те аџикера о нево свето со ветинѓа ле о Јехова. Дали би мангеа те ове пострпливо? Ки акаја статија ка дикха со значинела те ова стрплива хем соске адава тано добором важно. Исто аѓаар ка дикха со шај те поможинел амен те ова пострплива.

3. Сар реагиринела јекх стрпливо мануш кеда некој провоциринела ле?

³ Те дикха штар начинија коте со шај те сикава стрпливост. Прво, о стрпливо мануш на хољанела сигате. Ов трудинела пе те ачховел смиримо кеда некој провоциринела ле хем на иранела ко исто начин. Исто аѓаар на понашинела пе е јаверенцар грубо кеда тано ко стрес. О израз „на хољанела сигате“ прво пути појавинела пе ко јекх стихо ки Библија коте со о Јехова тано опишимо сар „Девел сој милостиво  хем сочувствително, на хољанела сигате, пхердо тано верно мангипе хем чачипе“ (2. Мој. 34:6).

4. Сар реагиринела јекх стрпливо мануш кеда ваљани те аџикерел?

⁴ Дујто, о стрпливо мануш ачхола смиримо џикоте аџикерела. Ако нешто трајнела повише таро адава со очекујнѓа, некој сој стрпливо ка ачхол смиримо хем нане те нервиринел пе (Мат. 18:26, 27). Иси бут ситуацие коте со ваљани те ачхова смириме. На пример, кеда некој керела лафи ваљани стрпливо те шуна ле бизо те чхинава ле (Јов 36:2). Исто аѓаар, шај ка ваљани аменге стрпливост кеда поможинаја јекхе интересентеске те хаљовел несаво библиско сикљојбе или те чхинавел несаве лошно навикаја.

5. Ко кова јавер начин шај те сикава стрпливост?

⁵ Трито, о стрпливо мануш на сиѓарела. Џанѓола пе ко несаве ситуацие ваљани те реагирина сигате. Ама кеда о стрпливо мануш добинела несави важно задача на почминела ла одма бизо те размислинел, а ни на дикхела со посиг те завршинел ла. Наместо адава, прво ов бешела хем размислинела те шај те планиринел сар ка керел ла. Тегани ов одвојнела песке добором време кобор со ваљани те шај те завршинел и задача.

6. Сар јекх стрпливо мануш реагиринела кеда иси ле неволје?

⁶ Штарто, о стрпливо мануш трудинела пе те трпинел неволје бизо те жалинел пе. Ко акава поглед и стрпливост хем и истрајност тане бут поврзиме јекх јекхаја. Нормално, нане погрешно те пхрава амен несаве паше амалеске хем те вакера леске кобор аменге пхаро кеда иси амен несаво проблеми. Сепак, о стрпливо мануш ка дел пестар са те шај понадари да те истрајнел, а ко исто време те ачхол позитивно (Кол. 1:11). Сар христијања амен ваљани те сикава стрпливост ко са акала начинија. Соске? Ајде те дикха некобор причине.

7. Спрема Јаков 5:7, 8, соске и стрпливост тани добором важно? (Дикх хем и слика.)

⁷ Ако мангаја те добина вечно живото, мора те ова стрплива. Исто сар о верна слуге таро пурано време, амен да ваљани стрпливо те аџикера о Јехова те исполнинел пле ветувања (Евр. 6:11, 12). И Библија спорединела амен јекхе земјоделцоја. (Читин Јаков 5:7, 8.) Јекх земјоделцо керела бут бути те шај те фрдел семе ки пли нива хем те чхивел лаке пани. Ама, ов на џанела точно кеда о семе ка мукхел плоди. Адалеске, јекх земјоделцо стрпливо аџикерела хем иси ле доверба кај ка кхедел о плоди тари нива. Слично, амен сием зафатиме духовно активностенцар иако на џанаја ко кова диве ка авел амаро Господари (Мат. 24:42). Амен стрпливо аџикераја соске сием увериме кај о Јехова ка исполнинел адава со ветинѓа ко време кова со одрединѓа. Ако почминаја те ова нестрплива шај те уморинел амен адава со аџикераја хем аѓаар хари похари те цида амен таро Јехова. Исто аѓаар, шај те почмина те концентририна амен ко буќа кола со ка радујнен амен само кратко време. Ама ако сием стрплива ка шај те истрајна џи ко крајо хем те ова спасиме (Мих. 7:7; Мат. 24:13).

8. Сар и стрпливост поможинела амен кеда сием е јаверенцар? (Колошања 3:12, 13).

⁸ Те шај те ова паше е јаверенцар ваљани аменге стрпливост. Акаја особина поможинела амен шукар те шуна кеда о јавера керена лафи (Јак. 1:19). Исто аѓаар, и стрпливост поможинела амен те ова ко мир е јаверенцар. Ако сием стрплива нане те реагирина сигате хем те вакера нешто нељубезно кеда иси амен стрес. Исто аѓаар, и стрпливост ка поможинел амен те на хољана сигате кеда некој ка поврединел амаре чувствија. Наместо те ирана ленге ко исто начин, амен понадари да ка трпина амен јекх јекхеа хем ка простина цело вилеа. (Читин Колошања 3:12, 13.)

9. Сар и стрпливост поможинела амен кеда ваљани те ана мудра одлуке? (Изреки 21:5).

⁹ И стрпливост исто аѓаар шај те поможинел аменге те ана пошукар одлуке. Наместо те ана одлуке сигате хем бизо те мислина ваљани те одвојна аменге време те истражина саве опцие иси амен хем пало адава те размислина кола лендар би овела и најшукар. (Читин Изреки 21:5.) На пример, ако родаја бути шај те ова ко искушение те прифатина и прво бути со ка аракха, чак ако адава би значинела кај ка овел амен похари време башо духовна активностија. Ама ако сием стрплива ка одвојна аменге време те размислина башо буќа сар сој, кобор време ка лел мандар о друмо џи ки бути? Кобор саатија ка керав бути? Хем сар и бути ка влијајнел упри мли фамилија хем упро духовна буќа? Ако сием стрплива нане те ана лошна одлуке.

10. Сар јекх христијани шај те развинел стрпливост, хем сар шај понадари да те сикавел акаја особина?

¹⁰ Молин тут те ове пострпливо. И стрпливост тани особина со авела таро свети дух (Гал. 5:22, 23). Адалеске, шај те молина амен е Јеховаске башо свети дух те шај те поможинел амен те развина акаја особина. Ако аракхљоваја ки несави ситуација коте со ка овел аменге пхаро те сикава стрпливост, тегани шај те молина амен башо лескоро духо те шај те ова стрплива (Лука 11:9, 13). Исто аѓаар, шај те рода помош таро Јехова те дикха ко буќа сар со дикхела ов. Освен со ка молина амен, ваљани те да амендар са те шај те ова стрплива секова диве. Значи, ако понадари да молинаја амен баши стрпливост хем трудинаја амен  те сикава акаја особина, о Јехова ка поможинел аменге те ова стрплива иако англедер шај на сием сине асавке.

11-12. Сар сикавѓа о Јехова стрпливост?

¹¹ Размислин башо библиска примерија. Ки Библија иси бут примерија таро мануша кола со сине стрплива. Ако размислинаја баши ленде, ка шај те сикљова ко кола начинија шај те ова стрплива. Англедер те кера лафи башо несаве таро акала примерија, најангле те дикха о најбаро пример баши стрпливост, о Јехова.

¹² Ки Еденско градина, о Сатана каљарѓа е Јеховаскоро анав аѓаар со чхивѓа е Ева те сумнинел пе дали о Јехова тано праведно владетели кова со мангела лен. Наместо те уништинел одма е клеветнико, о Јехова сикавѓа стрпливост хем самоконтрола, соске џанља кај ваљани време те шај те докажинел кај ов тано о најшукар Владетели. Цело време џикоте аџикерела, ов стрпливо трпинела и лаџ со анела пе лескере анавеске. Освен адава, о Јехова стрпливо аџикерела те шај со повише мануша те овел лен и прилика те живинен вечно (2. Пет. 3:9, 15). Адалеске, џи акана милиоња мануша сине лен прилика те запознајнен ле. Ако концентриринаја амен ко шукар буќа со авена тари е Јеховаскири стрпливост, најверојатно ка овел аменге полокхо те аџикера о крајо акале светоскоро.

13. Сар о Исус совршено сикавѓа стрпливост сар пло Дад? (Дикх хем и слика.)

¹³ О Исус совршено џала пало пле Дадескоро пример хем џикоте сине ки пхув ов исто аѓаар сикавѓа стрпливост. Сигурно на сине леске секогаш локхо те сикавел акаја особина, посебно спрема о лицемерна книжникија хем о фарисеија (Јован 8:25-27). Сепак, исто сар пло Дад, о Исус на хољанѓа сигате. Ов на иранѓа ленге кеда  вреџинѓе ле хем провоциринѓе ле (1. Пет. 2:23). О Исус истрајно трпинѓа о пхарипа бизо те жалинел пе. Адалеске шај те дикха соске и Библија вакерела аменге: „Шукар размислинен башо окова со трпинѓа противибе таро муј е грешна манушенгоро“ (Евр. 12:2, 3). Адалеске со поможинела амен о Јехова, шај истрајно те трпина било саво пхарипа.

14. Со шај те сикљова тари е Авраамескири стрпливост? (Евреија 6:15). (Дикх хем и слика).

¹⁴ Со ако панда на исполнинѓе пе амаре очекувања башо крајо? Шај очекујнѓем кај о крајо ка авел англедер бут берша. Или шај дараја кај о крајо нане те авел џикоте сием џивде. Со ка поможинел амен понадари да стрпливо те аџикера? Те дикха о пример е Авраамескоро. Кеда е Аврааме сине ле 75 берш хем панда на сине ле чхаве, о Јехова ветинѓа леске: „Тутар ка керав баро народо“ (1. Мој. 12:1-4). Дали о Авраам дикхља сар исполнинела пе акава ветување? На целосно. Откеда накхља и река Еуфрат хем аџикерѓа 25 берш, е Авраамеске бијандило о Исак, а пало 60 берш бијандиле лескере унукија о Исав хем о Јаков. (Читин Евреија 6:15.) Ама о Авраам никогаш на дикхља сар лескоро потомство уло баро народо хем сар наслединѓе и Ветими пхув. Сепак, акава верно слуга сине ле паше амалипе пле Створителеа (Јак. 2:23). Кобор ка радујнел пе о Авраам кеда ка воскреснинел хем кеда ка дознајнел кај баши лескири вера хем стрпливост сине благословиме са о народија (1. Мој. 22:18). Со сикљоваја таро акава? Џикоте сием џивде шај нане те дикха сар исполнинела пе секова ветување со денѓа ле о Јехова. Ама, ако сием стрплива сар о Авраам, шај те ова сигурна кај панда акана о Јехова  ка наградинел амен а панда повише ко нево свето (Мар. 10:29, 30).

15. Каскере примерија шај те проучине?

¹⁵ Ки Библија иси јавера да примерија таро мануша со сине стрплива (Јак. 5:10). Шај ко тло лично проучибе те истражине баши ленде. b На пример, иако о Давид сине бут терно кеда сине помазимо сар идно цари упро Израел, ов мора сине те аџикерел панда бут берша англедер те овел цари. О Симеон хем и Ана верно служинѓе е Јеховаске џикоте аџикерѓе те авел о Месија (Лука 2:25, 36-38). Џикоте проучинеа акала извештаија, пробин те аракхе о одговорија ко акала пучиба: „Со шај поможинѓа акале верно слугаске те сикавел стрпливост? Сар користинѓа леске адава со сине стрпливо? Сар шај те џав пало лескоро пример?“ Исто аѓаар, шај те овел тут корист ако проучинеа башо окола со на сикавѓе стрпливост (1. Сам. 13:8-14). Шај те пуче тут: „Со анѓа лен џи ко адава те на овен стрплива? Кола сине о последице таро адава?“

16. Сар користинела аменге адава со сием стрплива?

¹⁶ Размислин соске тано корисно те ове стрпливо. Кеда сием стрплива, тегани сием порадосна хем посмириме. Значи и стрпливост шај те поможинел аменге те ова емоционално хем физичко састе. Кеда сием стрплива е јаверенцар тегани накхаја пошукар ленцар. Аѓаар ко амаро собрание ка овел јекхипе. Ако некој нервиринела амен, адава со нане те хољана сигате ка поможинел аменге те на кера панда полошно и ситуација (Пс. 37:8; Изр. 14:29). Ама најважно таро са, кеда сием стрплива амен џаја пало пример амаре небесно Дадескоро хем оваја леа попаше.

17. Ко со ваљани те ова одлучна?

¹⁷ Чаче, и стрпливост тани бут шужи особина која со користинела сариненге. Иако нане локхо секогаш те ова стрплива, адалеске со о Јехова поможинела аменге шај понадари да те развина акаја особина. Хем џикоте стрпливо аџикераја о нево свето, шај те ова увериме кај „е Јеховаскере јакхја тане упро окола со дарана лестар, упро околенде со аџикерена лескоро верно мангипе“ (Пс. 33:18). Адалеске понадари да те сикава стрпливост.