1. Соске шај о Исус спорединѓа пле следбеникон бакхренцар?

 О ИСУС спорединѓа песте јекхе пастиреа, а пле следбеникон бакхренцар, те шај те сикавел кобор паше тано ленгоро однос (Јован 10:14). Акаја споредба баш одговоринела. О бакхре џанена пле пастире хем адалеске шунена лескоро гласо. Јекх туристи дикхља баш акава. Ов вакерела: „Манглем те сликина несаве бакхрен хем адалеске пробинѓем те викина лен те авен попаше. Ама ола на але соске на џанена сине амаро гласо. Тегани, јекх чхаво со сине ленгоро пастири само со викинѓа лен геле пали лесте“.

2-3. а) Сар е Исусескере следбеникија сикавѓе кај шунена лескоро гласо? б) Со ка дикха ки акаја хем ки следно статија?

² Адава со дикхља о туристи сетинкерела амен ко е Исусескере лафија со вакерѓа лен пле бакхренге, јавере лафенцар пле следбениконге. Ов вакерѓа: „Ола ка шунен мло гласо“ (Јован 10.16). Ама о Исус тано ко небо. Тегани сар шај те шуна ле? Јекх начин сар шунаја амаре Господарескоро гласо тано аѓаар со применинаја ко амаро живото о буќа со сикавѓа лен (Мат. 7:24, 25).

³ Ки акаја хем ки следно статија ка кера лафи башо несаве таро е Исусескере сикљојба. Сар со ка дикха, о Исус сикавѓа амен кола буќа ваљани те чхинава те кера а кола буќа ваљани те кера. Прво, ка дикха дуј буќа кола со о шукар пастири вакерѓа аменге те чхинава те кера.

4. Спрема Лука 12:29, соске шај те ова секириме?

⁴ Читин Лука 12:29. О Исус поттикнинѓа пле следбеникон те чхинавен те секиринен пе башо пумаре материјална  потребе. Џанаја кај е Исусескере советија тане секогаш мудра хем башо амаро шукарипе. Амен мангаја те применина акава совет, ама понекогаш шај те овел аменге пхаро те кера адава. Соске?

5. Соске шај некој те овел секиримо башо пле материјална потребе?

 ⁵ Несаве шај те секиринен пе башо адава дали ка овел лен хајбаске, шеја урајбаске или тхан живибаске. Ола шај живинена ки чороли пхув коте сој пхаро те аракхел пе бути. Шај нане ленге локхо те заработинен доволно паре те шај те грижинен пе пумаре фамилијаке. Или адава со керела сине бути ки фамилија шај муло хем акана нане више некој со ка грижинел пе финансиски е фамилијаке. Исто аѓаар, бут џене нашавѓе пли бути баши пандемија КОВИД-19 (Проп. 9:11). Ако несаве таро акала буќа или нешто јавер случинѓа пе аменге, тегани сар шај те шуна е Исусескоро упатство те чхинава те секирина амен?

6. Објаснин со случинѓа пе ки јекх прилика е апостол Петареске.

⁶ Ки јекх прилика, о апостол Петар хем о јавера апостолија сине ко чамцо ко Галилејско Море џикоте сине јекх бари бура. Тегани дикхле е Исусе сар пхирела упро пани хем о Петар вакерѓа леске: „Господаре, ако сиан ту, заповедин манге те авав џи ки туте упро пани!“. Откеда о Исус вакерѓа леске: „Ава!“, о Петар иклило таро чамцо хем почминѓа те пхирел упро пани џи ко Исус. Приметин со случинѓа пе пало адава. Кеда дикхља и бура, дарандило хем почминѓа те батинел, адалеске викинѓа: „Господаре, спасин ман!“ О Исус пружинѓа пло вас, астарѓа ле хем спасинѓа ле. Ма те бистра кај о Петар шај сине те пхирел упро пани са џикоте дикхела сине ко Исус. Ама кеда  иранѓа пе те дикхел ки бура, дарандило хем почминѓа те батинел (Мат. 14:24-31).

7. Со шај те сикљова таро е Петарескоро пример?

⁷ Амен шај те сикљова таро е Петарескоро пример. Кеда иклило таро чамцо хем почминѓа те пхирел ко пани, ов на очекујнѓа кај и бура ка лел лескоро внимание хем кај ка почминел те батинел. Ов мангља те пхирел упро пани хем те џал џи ко Исус. Ама наместо те дикхел ко Исус, ов почминѓа те секиринел пе баши бура. Авдиве амен нашти те пхира упро пани, ама ваљани аменге вера те шај те истрајна ко проблемија исто сар е Петареске со ваљани сине вера те шај те пхирел упро пани. Ако на дикхаја ко Јехова хем ко лескере ветувања амари вера шај те слабонел хем аѓаар духовно те батина. Адалеске, бизи разлика саве симболична буре ка авен ко амаро живото, мора понадари да те дикха ко Јехова хем те овел амен доверба кај ов шај те поможинел аменге. Сар шај те кера адава?

8. Со шај те поможинел аменге те на ова претерано секириме башо амаре материјална потребе?

⁸ Наместо те ова претерано секириме башо проблемија, ваљани те овел амен доверба ко Јехова. Ма те бистра кај амаро мангло Дад, о Јехова, ветинела аменге кај ка грижинел пе башо амаре материјална потребе ако чхиваја о духовна буќа ко прво тхан (Мат. 6:32, 33). Ов секогаш икерела пе ко пло лафи (5. Мој. 8:14, 15, 16; Пс. 37:25). Ако о Јехова дела адава сој потребно е чирикленге хем е лулуѓенге, тегани ни хари на ваљани те ова секириме башо адава со ка ха или со ка урава (Мат. 6:26-30; Фил. 4:6, 7). Исто сар о родителија со грижинена пе пумаре чхавенге адалеске со мангена лен, аѓаар амаро небесно Дад о Јехова ка грижинел пе башо амаре материјална потребе адалеске со мангела амен. Оја, шај те ова сигурна кај о Јехова ка аракхел амен!

9. Со шај те сикљова таро искуство јекхе брачно парескоро?

⁹ Размислин башо јекх искуство кова со сикавела сар шај о Јехова те грижинел пе башо амаре материјална потребе. Јекх брачно пари сој пионерија, возинѓе пумаре пуране врдаја повише таро јекх саати џи ко јекх кампи башо избеглице те лен несаве пхењен адатхар хем те ингарен лен ко состанок. О пхрал вакерела: „Пало состанок, канинѓем е пхењен аменде ко хајбе ама тегани халилем кај нане амен ништо со те да ленге“. Со случинѓа пе? О пхрал понадари вакерела: „Кеда реслем кхере, англо амаро удар дикхлем дуј баре торбе пхерде хајбаја. На џанлем кој анѓа лен, ама о Јехова грижинѓа пе аменге“. Пало несаво време, руминдило ленгоро врда кова со ваљани сине ленге баши служба. Ама на сине лен паре те поправинен ле. Сепак, ола ингарѓе о врда ко јекх механичари те шај те дикхен кобор ка коштинел лен и поправка. Адатхе ало јекх мануш хем пучља: „Каскоро врда акава?“ О пхрал вакерѓа кај тано лескоро хем кај ваљани те поправинел пе. Тегани о мануш вакерѓа: „Адава нане нисаво проблеми. Ми ромни мангела асавко врда хем баш ки асавки боја. Кобор родеа леске?“ О пхрал бикинѓа о врда е манушеске доволно паренге те шај те кинел песке јавер. Ко крајо о пхрал вакерела: „Нане ман лафија сар те објаснинав кобор сием сине бахтале ко крајо таро адава диве. Џанлем кај акава нане случајно него о Јехова поможинѓа аменге“.

10. Сар таро Псалм 37:5 дикхела пе кај на ваљани претерано те секирина амен башо материјална потребе?

¹⁰ Кеда шунаја е шукар пастире хем чхинаваја те ова претерано секириме башо  материјална потребе, шај те ова сигурна кај о Јехова ка грижинел пе аменге. (Читин Псалм 37:5; 1. Пет. 5:7.) Размислин башо ситуацие сој тане спомниме ко  панџто пасус. Џи акана, о Јехова шај грижинѓа пе башо амаре потребе преку о поглавари ки амари фамилија, или преку некасте со денѓа амен бути. Ама ако о поглавари, или амен ачхилем бизи бути, шај те ова сигурна кај о Јехова ка грижинел пе аменге ко несаво јавер начин. Акана те дикха која јавер бути поттикнинела амен о шукар пастири те чхинава те кера.

11. Спрема Матеј 7:1, 2 со вакерѓа аменге о Исус те чхинава те кера хем соске шај те овел адава пхаро?

¹¹ Читин Матеј 7:1, 2. О Исус џанља кај адалеске со о мануша тане несовршена, бут пути концентриринена пе ко е јаверенгере маане. Адалеске ов вакерѓа: „Чхинавен те судинен“. Амен шај бут трудинаја амен те на судина амаре пхрален. Ама понекогаш нане те успејна ко адава. Ако приметинаја кај понекогаш критикујнаја е јаверен, со ваљани те кера? Те шуна е Исусе хем те да амендар са те чхинаве те судина.

12-13. Сар шај е Јеховаскоро пример те поможинел амен те чхинава те судина е јаверен?

¹² Шај бут те сикљова ако размислинаја башо е Јеховаскоро пример. Ов концентриринела пе те дикхел о шукар особине ко мануша. Размислин башо адава сар постапинѓа е цареа е Давидеа кеда ов керѓа сериозна грешке. На пример, ов керѓа прељуба е Витсавеаја хем чак нарединѓа лакоро ром те овел мудардо (2. Сам. 11:2-4, 14, 15, 24). Сар последица, о Давид на керѓа штета само песке него пе фамилијаке да коте со сине вклучиме лескере јавера да ромња (2. Сам. 12:10, 11). Ки јавер прилика о Давид на сикавѓа целосно доверба ко Јехова кеда нарединѓа те керел пе попис е Израелско војскаке, иако о Јехова на нарединѓа леске адава. Ов шај керѓа акава соске сине гордо баши пли бари војска хем соске сине ле доверба кај ој ка заштитинел ле. Саво сине о резултати таро адава? Отприлика 70.000 Израелција муле таро заразно насвалипа (2. Сам. 24:1-4, 10-15).

¹³ Сар ка дикхе сине ко Давид те живине сине ко Израел ко адава време? Дали ка мислине туке сине кај ов на заслужинела о Јехова те простинел леске? Ама о Јехова на размислинѓа аѓаар. Ов концентриринѓа пе ки е Давидескири верност која со сикавѓа ла цело пло живото хем дикхља кај чаче каинѓа пе. Адалеске, о Јехова простинѓа е Давидескере сериозна гревија. О Јехова џанља кај о Давид бут мангела ле хем кај мангела те керел адава сој исправно. На сиан ли благодарно башо адава со амаро Девел концентриринела пе ко амаре шукар особине? (1. Цар. 9:4; 1. Лет. 29:10, 17)

14. Со шај те поможинел аменге те чхинава те судина е јаверен?

¹⁴ Ако о Јехова на очекујнела амендар те ова совршена, тегани амен да на ваљани те очекујна адава таро јавера. Наместо адава, ваљани те дикха о шукар особине ко јавера. Обично полокхо тано те дикха ко е јаверенгере грешке хем те критикујна лен. Ама јекх духовно мануш накхела шукар е јаверенцар, иако шај приметинела ленгере слабостија. Јекх дијаманти со нане обработимо шај на дикхјола шужо, ама о гоѓавер мануш дикхела нешто со нашти одма те дикхел пе, ов џанела кај адава дијаманти ка овел бут шужо хем скапоцено откеда ка обработинел пе. Исто сар о Јехова хем о Исус, те на концентририна амен ки е манушенгири несовршеност него те дикха ленгере шукар особине.

15. Сар адава со ка размислина башо е манушенгере околностија ка поможинел аменге те на судина лен?

 ¹⁵ Освен со ваљани те концентририна амен ко е јаверенгере шукар особине, со јавер ка поможинел амен те на судина е јаверен? Трудин тут те хаљове сар тано ленгоро живото. Размислин башо акава пример. Јекх диве џикоте сине о Исус ко храми дикхља јекхе чороле удовица сар мукхела дуј тикне паре ко храмска касе. Ов на вакерѓа: „Соске на мукхља повише паре?“ Наместо те концентриринел пе ко адава кобор денѓа акаја удовица, о Исус леља ко предвид лакере мотивија хем околностија хем пофалинѓа ла башо адава со денѓа пестар са со шај (Лука 21:1-4).

16. Со шај те сикљове таро е Вероникакоро искуство?

¹⁶ О искуство е Вероникакоро сикавела аменге кобор тано важно те размислина башо е јаверенгере околностија. Ко лакоро собрание сине јекх дај која со бајрарела сине коркори пле чхаве. И Вероника признајнела: „Мислинава манге сине кај нане редовна ко состанокија хем ки служба. Адалеске дикхава сине негативно ки ленде. Ама јекх диве сиум сине е пхењаја ки служба хем тегани ој објаснинѓа манге кобор лаке пхаро со лакере чхаве иси ле аутизам. Ој бут трудинела пе сине те грижинел пе башо пумаре физичка хем духовна потребе. Адалеске со лакоро чхаво сине насвало, понекогаш ој сине присутно ко состанокија  ко јавер собрание“. Ко крајо и Вероника вакерела: „На сиум сине свесно кобор пхаро сине лаке о живото, акана бут мангава хем ценинава акале пхења башо са со керела те шај те служинел е Јеховаске“.

17. Ко со поттикнинела амен о стихо таро Јаков 2:8, хем сар шај те кера адава?

¹⁷ Со ваљани те кера ако приметинаја кај критикујнаја несаве пхрален? На ваљани те бистра кај амен мора те манга амаре пхрален. (Читин Јаков 2:8.) Исто аѓаар, ваљани таро вило те молина е Јехова те поможинел аменге те чхинава те судина. Ка постапина спрема амаре молитве аѓаар со ка трудина амен пошукар те запознајна околе со критикујнѓем. На пример, шај те џа леа ки служба или те викина ле те авел аменде ко гости. Џикоте пошукар запознајнаја амаре пхрале, те џа пало пример е Јеховаскоро хем е Исусескоро аѓаар со ка концентририна амен ко лескере шукар особине. Адалеа ка сикава кај шунаја е шукар пастирескири заповед те чхинава те судина.

18. Сар шај те сикава кај шунаја о гласо е шукар пастирескоро?

¹⁸ Исто сар о бакхре со шунена о гласо пле пастирескоро, аѓаар е Исусескере следбеникија шунена лескоро гласо. Ако даја амендар са те чхинава претерано те секирина амен башо амаре материјална потребе хем те чхинава те судина е јаверен, тегани о Јехова хем о Исус ка ден амен берекети башо амаро трудо. Бизи разлика дали сием дело таро „тикно стадо“ или таро „јавера бакхре“, понадари да те шуна о гласо е шукар пастирескоро (Лука 12:32; Јован 10:11, 14, 16). Ки следно статија ка кера лафи башо дуј буќа коленге со о Исус вакерѓа кај лескере следбеникија ваљани те керен.