1-2. Со ваљани постојано те кера одкеда крстинѓем амен? Објаснин.

 КОБОР пути чистинеа тло кхер? Кеда почминѓан прво пути те живине ко адава кхер сигурно керѓан генералка. Ама со ка овел ако пало адава на одржинеа о кхер? Сар со џанеа бут сигате палем ка мељарѓовел. Те шај те ачхол чисто, ваљани редовно те чистине ле.

² Слично, амен понадари да мора те трудина амен кеда керела пе лафи башо амаро размислување хем амари личност. Џанѓола пе, англедер те крстина амен бут трудинѓем амен те кера о потребна промене те шај те чистина секова мелалипе таро амаро тело хем духо (2. Кор. 7:1). Ама акана мора те икера амен ко е Павлескоро совет „понадари да те менина амен“ (Еф. 4:23). Соске тано важно постојано те кера адава? Адалеске со о мелалипе таро акава свето шај бут сигате те мељарел амен. Те шај те кера е Јеховаскири волја, мора редовно те испитина амаро размислување, амари личност хем амаре желбе.

3. Со значинела те менина амаро начин сар размислинаја? (Римјаните 12:2).

³ Со ваљани те кера те шај те менина амаро начин сар размислинаја? (Читин Римјаните 12:2.) Ваљани те кера нешто повише него само некобор шукар буќа. Мора те испитина  саве мануша сием чаче хем те кера о потребна промене те шај панда повише те живина спрема е Јеховаскере мерилија. А акава мора те кера ле постојано.

4. Со ваљани те кера те шај те на обликујнел амен акава свето?

⁴ Кеда ка ова совршена ка шај целосно те кера адава со мангела о Јехова. Ама џи тегани ваљани постојано те трудина амен те кера адава. Приметин кај ко Римјаните 12:2 о Павле вакерела кај ваљани те менина амаро начин сар размислинаја те шај те џана која тани е Девлескири волја. Наместо те дозволина о лошно свето те влијајнел упри аменде, мора те испитина амен те шај те открина кобор дозволинаја е Девлескоро размислување, а на е светоскоро, те влијајнел упро амаре целија хем одлуке.

5. Сар шај те открина кобор паше аменге е Јеховаскоро диве? (Дикх и слика.)

⁵ Те размислина баши акаја бути. О Јехова мангела те на бистра кај лескоро диве тано паше (2. Пет. 3:12). Адалеске пуч тут: „Дали мло начин сар живинава сикавела кај хаљовава кобор тано паше о крајо акале лошно светоскоро? Дали мле одлуке башо адава саво образование или сави бути ка биринав сикавена кај и служба башо Јехова тани манге најважно ко живото? Дали иси ман доверба кај о Јехова ка грижинел пе манге хем мле фамилијаке или цело време секиринава ман башо материјална буќа?“. Размислин само кобор радујнела пе о Јехова кеда дикхела кај трудинаја амен те кера лескири волја ко са (Мат. 6:25-27, 33; Фил. 4:12, 13).

6. Со ваљани понадари да те кера?

⁶ Амен ваљани редовно те испитина амаро начин сар размислинаја хем те кера о потребна промене. О Павле вакерѓа е пхраленге таро Коринт: „Испитинен тумен дали сиен ки вера, испитинен тумен те шај те  проверинен саве сиен“ (2. Кор. 13:5). Те ова ки вера вклучинела повише него те џа само понекогаш ко состанокија хем ки служба. Адава исто аѓаар вклучинела о начин сар размислинаја, амаре желбе хем амаре мотивија. Адалеске ваљани понадари да те менина амаро начин сар размислинаја аѓаар со ка читина е Девлескоро Лафи, ка сикљова те размислина сар ов со размислинела хем пало адава ка кера са сој потребно те шај те кера е Јеховаскири волја (1. Кор. 2:14-16).

7. Спрема Ефешаните 4:31, 32 со јавер ваљани те кера хем соске адава шај те овел пхаро?

⁷ Читин Ефешаните 4:31, 32. Освен со ваљани те менина амаро начин сар размислинаја, ваљани исто аѓаар те урава и неви личност (Еф. 4:24). Те шај те кера адава ваљани бут те трудина амен. На пример, мора те цида амендар о особине сар сој и неконтролирано холи хем нервоза. Соске шај те овел пхаро? Адалеске со несаве негативна особине мукле корења ки аменде. На пример и Библија вакерела кај несаве мануша локхе хољанена хем сигате нервиринена пе (Изр. 29:22). Некој со иси ле асавке лошна особине најверојатно одкеда ка крстинел пе да ка ваљани бут те трудинел пе те шај те керел промене, баш адава ка дикха ко следно искуство.

8-9. Сар е Стивенескоро искуство сикавела кај понадари да ваљани те хуљава и пурани личност?

⁸ Јекх пхрал со викинела пе Стивен сине леске пхаро те контролиринел пли холи, ов вакерела: „Иако сиум сине крстимо сине манге сепак пхаро те контролиринав ман. На пример, ки јекх прилика џикоте сиум сине ки служба таро кхер ко кхер дикхљум сар јекх мануш чорѓа о радио таро мло врда хем почминѓум пали лесте те прастав. Кеда ресљум ле ов фрдинѓа о радио хем нашља. Кеда вакерѓум е јаверенге тари група сар лељум о радио јекх старешина пучља ман: ’Стивен со би кереа те астаре ле сине? Акава пучибе керѓа те размислинав хем поттикнинѓа ман понадари да те керав бути ко мир‘“. b

⁹ Сар со дикхаја таро е Стивенескоро пример, и негативно особина шај те појавинел пе таро јекх пути, чак откеда мислинѓем кај цидинѓем ла амендар. Ако туке да случинѓа пе асавко нешто, ма обесхрабрин тут хем ма мислин кај сиан лошно христијани. Чак о апостол Павле признајнѓа: „Кеда мангава те керав адава сој шукар, о лошно тано ки манде“ (Рим. 7:21-23). Исто сар и прашина со појавинела пе понадари да ко амаро кхер, аѓаар шај те појавинен пе понадари да негативна особине ки аменде соске сием несовршена. Ваљани постојано те трудина амен те ачхова чиста. Сар шај те кера адава?

10. Сар шај те борина амен против о негативна особине? (1. Јованово 5:14, 15).

¹⁰ Вакер е Јеховаске саве негативно особинаја боринеа тут хем ов уверимо кај ка шунел тут хем ка поможинел туке. (Читин 1. Јованово 5:14, 15.) Иако о Јехова нане те керел чудо те цидел тутар адаја негативно особина сепак, ов шај те дел тут сила те шај те на сикаве ла више (1. Пет. 5:10). Исто аѓаар ваљани те постапине спрема тле молитве аѓаар со нане те кере несаве буќа коленцар со ка иране тли пурани личност. На пример, пазин саве филмија хем емисие дикхеа, ма читин нешто со ка охрабринел тут те сикаве особине со  мангеа те циде лен тутар хем ма размислин башо погрешна желбе (Фил. 4:8; Кол. 3:2).

11. Со шај те кере те шај понадари да те ураве и неви личност?

¹¹ Иако више хуљавѓан и пурани личност важно тано те на бистре те ураве и неви личност. Сар шај те кере адава? Џикоте сикљовеа башо е Јеховаскере особине чхив туке цел те џа пало лескоро пример (Еф. 5:1, 2). На пример, кеда читинеа несаво библиско извештај со истакнинела кобор о Јехова простинела, пуч тут: „Дали ме да простинава е јаверенге?“. Кеда читинеа башо е Јеховаскоро сочувство спрема окола со сине чороле, пуч тут: „Дали ме да грижинава ман е пхраленге хем е пхењенге кола со нане лен бут ко материјално поглед хем дали керава нешто башо адава?“. Понадари да менин тло начин сар размислинеа аѓаар со ка ураве и неви личност хем ов стрпливо коркори туја џикоте кереа адава.

12. Сар е Стивенескоро искуство сикавела кај и Библија шај те менинел е манушенгоро живото?

¹² О Стивен касте со спомнинѓем ле поупре, пало несаво време успејнѓа те уравел и неви личност. Ов вакерела: „Откеда крстинѓум ман, сине бут ситуацие коте со ваљани сине те контролиринав мли холи. Сиклиљум кај ваљани те цидав ман таро мануша кола со мангена те провоциринен ман, или ко јавер начин те смиринав и ситуација. Бут џене машкар коленде со сине мли ромни пофалинѓе ман адалеске со ачхиљум смиримо ко асавке ситуацие. Ме да чудинѓум ман, ама на успејнѓум коркори те керав акала промене, него сигурно сиум кај адава со применинѓум ман сикавела кај и Библија шај те менинел е манушенгоро живото“.

13. Со ка поможинел аменге те развина исправна желбе? (Галатите 5:16).

¹³ Читин Галатите 5:16. Те шај те поможинел аменге те кера адава сој исправно, о Јехова дарежливо дела аменге пло свети дух. Кеда проучинаја и Библија, тегани дозволинаја е Девлескоро духо те влијајнел упри аменде. Исто аѓаар добинаја свети дух кеда сием присутна ко состанокија. Ко асавке прилике сием амаре пхраленцар хем пхењенцар кола со исто сар аменде бут трудинена пе те керен адава сој исправно хем адава охрабринела амен (Евр. 10:24, 25; 13:7). Хем кеда таро вило молинаја амен е Јеховаске хем родаја лестар помош баши несави слабост, ов ка дел амен сила преку пло свети дух те шај понадари да те борина амен. Иако акала активностија веројатно нане целосно те циден амендар о погрешна желбе ама ола шај те поможинен аменге те овел амен сила те борина амен против ленде. Ко Галатите 5:16 пишинела: „Окола со живинена спрема о духо, нане те џан пало о погрешна желбе“.

14. Соске тано важно понадари да те развина исправна желбе?

¹⁴ Откеда развинѓем јекх шукар духовно рутина, бут тано важно те одржина ла хем понадари да те развина исправна желбе. Соске? Адалеске со јекх таро амаре душмања никогаш на совела. Адава душмани тано о искушение те кера адава сој погрешно. Чак пало крстибе шај те привлечинен амен о буќа кола со ваљани те избегина лен, сар сој о комари, о претерано пијбе алкохол хем и порнографија (Еф. 5:3, 4). Јекх терно пхрал признајнела: „Јекх таро најпхаре буќа коленцар со мора сине те боринав ман тано адава со привлечинена ман о  мурша. Мислинѓум кај акала чувствија сигате ка накхен мандар, ама ман панда иси ман о иста чувствија“. Со шај те поможинел туке ако несави погрешно желба тани бут силно?

15. Соске охрабринела амен адава со џанаја кај о јавера да боринена пе погрешна желбенцар? (Дикх и слика.)

¹⁵ Ма бистре кај на сиан коркори џикоте боринеа тут те контролирине јекх погрешно желба која сој тани бут силно. И Библија вакерела: „На аракхља тумен ни јекх искушение освен адава со сине е јавере манушен“ (1. Кор. 10:13а). Ко јекх јавер превод ко акава стихо пишинела: „На сине тумен ни јекх искушение кова со нане вообичаено е манушенге“. Акаја изјава сине пишими е пхраленге хем е пхењенге кола со живинена сине ко Коринт. Несаве лендар англедер сине неморална, хомосексуалција хем пијанице (1. Кор. 6:9-11). Дали откеда крстинѓе пе никогаш више на сине лен погрешна желбе коленцар со боринена пе сине? Сигурно на сине аѓаар. Точно тано адава кај сарине сине помазаникија ама ола сепак сине несовршена мануша. Сигурно понекогаш мора сине те боринен пе погрешна желбенцар. Акава ваљани те охрабринел амен. Соске? Бут пхраља више успејнѓе те боринен пе против о погрешна желбе. Хем адава сикавела кај амен да шај те успејна ко адава бизи разлика кобор хем те овен силна адала желбе. Адалеске шај те ачхове цврсто ки вера соске џанеа кај о иста неволје трпинена хем амаре пхраља ко цело свето (1. Пет. 5:9).

16. Сави опасност ваљани те избегина хем соске?

¹⁶ Опасно тано те мислина кај никој нашти те хаљовел амари слабост колаја со боринаја амен. Акава шај те керел те мислина кај ки амари ситуација нашти ништо те кера хем кај нане амен сила те борина амен против акала лошна желбе. Ама и  Библија вакерела аменге нешто јавер: „О Девел тано верно, хем нане те мукхел те овен искушиме повише таро адава со шај те издржинен, него ка поможинел туменге кеда иси тумен искушение те шај те издржинен ле“ (1. Кор. 10:13б). Значи, чак кеда амари желба тани силно, амен шај успешно те борина амен. Адалеске со поможинела амен о Јехова шај те избегина те кера адава сој погрешно.

17. Иако нашти те чхинава те појавинен пе погрешна желбе, со шај те контролирина?

¹⁷ Никогаш ма бистре, адалеске со сием несовршена ка појавинен пе аменге погрешна желбе. Ама кеда ка појавинен пе шај одлучно те отфрлине лен, сар со керѓа адава о Јосиф кеда одма нашља тари е Петефриескири ромни (1. Мој. 39:12). Тле погрешна желбе нашти те контролиринен тле постапке!

18-19. Саве пучиба шај те пуча амен џикоте трудинаја амен те менина амаро начин сар размислинаја?

¹⁸ Те менина амаро начин сар размислинаја значинела постојано те да амендар са те шај амаре мисле хем постапке те овен спрема е Јеховаскири волја. Те шај те кера адава ваљани редовно те испитина амен хем те пуча амен: „Дали мле животоја сикавава кај хаљовава кај живинаја ко последна диве? Дали постојано трудинава ман те уравав и неви личност? Дали дозволинава е Јеховаскоро духо те водинел мло живото те шај ма те постапинав спрема ме погрешна желбе?“

¹⁹ Џикоте испитинеа тут, ма очекујн те ове совршено него радујн тут башо напредок со керѓан. Ако дикхеа кај ваљани негде те кере бути ма обесхрабрин тут, наместо адава шун о совет со пишинела ко Филипјаните 3:16: „Ваљани понадари да те напредујна, те џа ко акава исто друмо“. Ако постапинеа спрема акава, ов уверимо кај о Јехова ка наградинел тло трудо те менине тло начин сар размислинеа.