1. Спрема 3. Јованово 3, 4, со керела амен бахтале?

ЗАМИСЛИН ТУКЕ кобор сине бахтало о апостол Јован кеда шунѓа кај окола коленге со поможинѓа те дознајнен о чачипе понадари да верно служинена е Јеховаске! Адала верна христијања, колен со о Јован дикхела лен сине сар пле духовна чхаве, соочинѓе пе буте проблеменцар. Адалеске, ов бут трудинѓа пе те керел позорали ленгири вера. Исто сар лесте, амен да сием бахтале кеда амаре чхаве или окола со сикавѓем лен башо чачипе дена завет е Јеховаске хем истрајно служинена леске. (Читин 3. Јованово 3, 4.)

2. Соске о Јован пишинѓа пле писмија?

² Ко 98 берш а.е., о Јован веројатно живинѓа ки диз Ефес или ки лакири околина. Изгледа, ов гело адари откеда сине ослободимо таро остров Патмос, коте со сине пханло. Отприлика ко адава време, водимо таро е Јеховаскоро свети дух, о Јован пишинѓа трин писмија. Ленцар мангља те поттикнинел е верна христијанен те на нашавен пли вера ко Исус хем понадари да те живинен спрема о чачипе.

3. Кола пучиба ка овен одговориме ки акаја статија?

³ О Јован, кова со сине о единствено џивдо апостоли ко крајо таро прво веко, сине секиримо башо лошно влијание со сине е ховавне учителен упро собранија * (1. Јов. 2:18, 19, 26). Адала отпадникија вакерена сине кај пенџарена е Девле, ама на икерена сине е Јеховаскере  заповедија. Ки акаја статија ка дикха саве советија денѓа лен о Јован хем ка добина одговор ко трин пучиба: Со ваљани те кера те шај те живина спрема о чачипе? Со шај те чхинавел амен те кера адава? Хем сар шај те поможина јекх јекхеске те ачхова ко чачипе?

4. Спрема 1. Јованово 2:3-6 хем 2. Јованово 4, 6, со ваљани те кера те шај те живина спрема о чачипе?

⁴ Те шај те живина спрема о чачипе, најангле ваљани те џана о чачипе таро е Девлескоро Лафи, и Библија. Освен адава, мора те „икера [е Јеховаскере] заповедија“, јавере лафенцар те ова леске послушна. (Читин 1. Јованово 2:3-6; 2. Јованово 4, 6.) О Исус сине послушно е Јеховаске ко са, хем адалеа денѓа аменге совршено пример. Ка ова послушна е Јеховаске, ако трудинаја амен ко са те џа пало е Исусескоро пример (Јован 8:29; 1. Пет. 2:21).

5. Ко со мора те ова увериме?

⁵ Те шај те живина спрема о чачипе, мора те уверина амен кај о Јехова тано о Девел е чачипаскоро. Јавере лафенцар, мора те верујна кај са адава со вакерѓа ко пло Лафи, и Библија, тано чаче. Освен адава, мора те ова цврсто увериме кај о Исус тано о ветимо Месија. Бут џене авдиве на верујнена кај ов тано помазимо сар Цари ко е Девлескоро Царство. О Јован предупрединѓа кај иси бут мануша со ховавена, кола со шај те завединен околен со нане спремна те бранинен о чачипе башо Јехова хем башо Исус (2. Јов. 7-11). Ов пишинѓа: „Кој тано ховавно ако на окова со на верујнела кај о Исус тано о Христос?“ (1. Јов. 2:22). О единствено начин те на ова ховавде тано те проучина е Девлескоро Лафи. Само аѓаар ка шај шукар те пенџара е Јехова хем е Исусе (Јован 17:3). Хем само тегани ка ова увериме кај иси амен о чачипе.

6. Која тани јекх пречка колаја со соочинена пе о терне христијања?

⁶ Са о христијања мора те пазинен те на овен ховавде таро манушикане идее хем хаљојба (1. Јов. 2:26). Посебно о терне христијања ваљани те пазинен ки акаја замка. И Алексија, * јекх пхен тари Франција кола со иси 25 берш, вакерела: „Кеда џава сине ки школа, сиум сине хари буними таро адава со сикљовава сине, посебно тари теорија баши еволуција хем таро адава со шунава сине ко предмети баши филозофија. Понекогаш адава дикхјола сине манге логично. Ама, вакерѓум  манге кај на би овела шукар те шунав само адала идее, бизо те дав шанса е Јеховаске те вакерел пло“. И Алексија проучинѓа о лил Животот — како настанал? Со еволуција или со создавање? Башо некобор курке, са лакере сумње нашавдиле. И Алексија вакерела: „Уверинѓум ман кај адава со пишинела ки Библија тано о чачипе. Хем халиљум кај, ако живинава спрема о библиска мерилија, ка овав бахтали хем ка овел ман мир“.

7. Против кова притисок мора те борина амен, хем соске?

⁷ Са о христијања, терне хем пхуре, мора те боринен пе против о притисок те живинен дволично живото. О Јован истакнинѓа кај нашти те живина спрема о чачипе хем ко исто време те живина неморално (1. Јов. 1:6). Ако мангаја о Јехова те дикхел амен сар пле амала, на смејнаја никогаш те бистра кај лескере јакхја тане секогаш упри аменде. Уствари, на постојнела тајно грево, соске о Девел дикхела са со кераја (Евр. 4:13).

8. Саво стави мора те избегина?

⁸ На смејнаја те дикха ко грево сар со дикхела о свето. О апостол Јован пишинѓа: „Ако вакераја: ’Нане амен грево‘, коркори ховаваја амен“ (1. Јов. 1:8). Ко лескоро време, о отпадникија вакерена сине кај некој шај намерно те грешинел хем сепак те ачхол шукар амал е Девлеа. Авдиве да живинаја машкар мануша колен со иси лен слично стави. Бут џене вакерена кај верујнена ко Девел, ама на прифатинена адава со ов вакерела башо грево, посебно ако керела пе лафи башо сексуално неморал. Адава со е Девлеске тано грево ола дикхена ле сар лично избор хем кај ако некој мангела, шај те живинел аѓаар.

9. Сави корист иси е тернен ако цврсто икерена пе ко библиска мерилија?

⁹ Посебно о терне христијања шај тане ко притисок те прифатинен о ставија со ленгере соученикон или колеген иси лен спрема о сексуално неморал. Баш адава случинѓа пе е Александареске. Ов вакерела: „Несаве  таро чхаја ки школа керена сине манге притисок те овел ман сексуална односија ленцар. Адалеске со на сине ман џувли, вакерена сине кај сигурно сиум хомосексуалцо“. Дали туте да иси тут слична испитија? Нека овел тут ки годи кај адава со цврсто ка икере тут ко библиска мерилија ка поможинел тут понадари да те дикхе шукар ки туте, те аракхе тло физичко хем емоционално састипе, хем тло шукар амалипе е Јеховаја. Кеда секова пути спротивставинеа тут е искушениенге, сар со накхела о време полокхо овела те кере адава сој исправно. Освен адава, ма бистре кај о Сатана тано адава со бешела пало румимо стави со иси е свето башо сексуална односија. Адалеске, кеда одбинеа те пере ко притисок, ту побединеа е Лошно (1. Јов. 2:14).

10. Сар о 1. Јованово 1:9 поможинела амен те служина е Јеховаске хем те овел амен чисто совест?

¹⁰ Амен признајнаја кај о Јехова тано адава коле со иси право те одлучинел сој исправно а сој погрешно. Хем даја са амендар те шај те на кера грево. Ама, ако случинела пе те грешина, амен признајнаја адава е Јеховаске ки молитва. (Читин 1. Јованово 1:9.) А ако кераја пхаро грево, родаја помош таро старешине колен со о Девел чхивѓа лен те грижинен пе аменге (Јак. 5:14-16). Сепак, на ваљани те мукха понадари да те мучинен амен о грешке со керѓем лен англедер. Соске? Адалеске со амаро Дад кова со грижинела пе аменге денѓа пле Чхаве сар откупно жртва те шај те овен простиме амаре гревија. Кеда вакерела кај ка простинел околенге со каинена пе башо пле гревија, о Јехова чаче мислинела адава. Значи, нане ништо со шај те чхинавел амен те служина леске хем те овел амен чисто совест (1. Јов. 2:1, 2, 12; 3:19, 20).

11. Сар шај те заштитина амен таро ховајба со шај те керен послабо амари вера?

¹¹ Мора те отфрлина о идее со ширинена лен о отпадникија. Панда откеда сине кердо о христијанско собрание, о Бенг користинела сине буте манушен кола со вакерена ховајба  те шај те чхивел сумње ки годи е Девлескере верна слугенге. Адалеске, ваљани те џана сар те проценина сој чачипе, а сој ховајбе. * Амаре душмања шај те ширинен ховајба преку интернет или социјална мреже те шај те керен послабо амари доверба ко Јехова хем амаро мангипе спрема амаре пхраља. Ма верујн ко адала ховајба, ола авена таро Сатана! (1. Јов. 4:1, 6; Отк. 12:9).

12. Соске ваљани те бајрара амаро ценење башо чачипа со сиклилем лен?

¹² Те шај те спротивставина амен ко е Сатанаскере нападија, ваљани те бајрара амари доверба ко Исус хем ки улога со иси ле ки е Девлескири намера. Исто аѓаар, ваљани те овел амен доверба ко „верно хем разборито робо“ — и единствено група мануша која со о Јехова користинела ла авдиве те шај те водинел пли организација (Мат. 24:45-47). Шај те кера позорали амари доверба аѓаар со редовно ка проучина е Девлескоро Лафи. Тегани амари вера ка овел сар каш каскере коренија тане хор ки пхув. О Павле пишинѓа нешто слично ко пло писмо џи ко собрание ко Колоси. Ов вакерѓа: „Сар со прифатинѓен е Христос Исусе, е Господаре, аѓаар живинен ко јекхипе леа! Сар со сиклилен, тумари вера ко Христос ваљани те керел тумен зорале хем силна сар каш каскере коренија тане хор ки пхув“ (Кол. 2:6, 7). Ако трудинаја амен те кера позорали амари вера, о Сатана хем окола упри касте со ов влијајнела ка нашти те керен ништо со ка чхинавел амен те живина спрема о чачипе (2. Јов. 8, 9).

13. Со ваљани те аџикера, хем соске?

¹³ Амен џанаја кај о свето ка мрзинел амен (1. Јов. 3:13). О Јован сетинкерела амен кај „цело свето тано ко васта е Лошноскере“ (1. Јов. 5:19). Сар со авела о крајо попаше, о Сатана овела са похољамо (Отк. 12:12). Освен со користинела индиректна нападија, сар сој о неморал хем о ховајба таро отпадникија, ов исто аѓаар користинела директна нападија, јавере лафенцар сурово прогонство. О Сатана џанела кај иси ле само кратко време те шај те чхинавел о проповедибе хем те пхаѓел амари вера. Адалеске, ни хари на сием изненадиме со амари проповедничко активност ко несаве пхувја тани ограничими или тани забраними. Сепак, амаре пхраља хем пхења ко адала пхувја на откажинена пе. Адалеа докажинена кај, бизи разлика сар ка нападинел амен о Сатана, амен шај те победина!

14. Вакер јекх начин сар шај те поможина амаре пхраленге хем пхењенге те ачховен ко чачипе.

¹⁴ Те шај те поможина амаре пхраленге хем пхењенге те ачховен ко чачипе, мора те ова сочувствителна (1. Јов. 3:10, 11, 16-18). Мора те манга амен на само кеда са тано шукар него исто аѓаар кеда иси проблемија. На пример, дали пенџареа некас кастар со муло некој сој леске паше, хем адалеске ваљани леске утеха или практично помош? Дали шунѓан кај несаве амаре пхраља нашавѓе скоро са со сине лен ки природно катастрофа хем кај ваљани ленге помош те шај палем те градинен о дворане или пумаре кхера? Сикаваја кобор тано баро амаро мангипе хем сочувство спрема амаре пхраља хем пхења, на само адалеа со вакераја, него сој најважно, адалеа со кераја баши ленде.

15. Спрема 1. Јованово 4:7, 8, со ваљани те кера?

¹⁵ Кеда сикаваја аменге мангипе, џаја пало пример амаре небесно Дадескоро. (Читин 1. Јованово 4:7, 8.) Јекх важно начин сар сикаваја мангипе тано аѓаар со простинаја јекх јекхеске. На пример, некој шај ка поврединел амен, а пало адава ка извининел пе аменге. Ка  сикава мангипе ако простинаја леске хем бистраја адава со керѓа аменге (Кол. 3:13). Јекхе пхралеске со викинела пе Алдо, на сине леске локхо кеда шунѓа сар јекх јавер пхрал, коле со бут ценинела сине, вакерѓа нешто со на сине љубезно башо мануша тари лескири култура. О Алдо вакерела: „Цело време молинава сине е Јехова те поможинел манге те на овел ман лошна чувствија спрема адава пхрал“. Ама, о Алдо керѓа панда нешто. Одлучинѓа те викинел е пхрале те џан заедно ки служба. Џикоте сине ки служба, е Алдо сине ле прилика те објаснинел леске кобор дукхавѓе ле лескере лафија. Ов вакерела: „Кеда вакерѓум леске сар осетинѓум ман таро лескере лафија, о пхрал извининѓа пе манге. Таро начин сар извининѓа пе манге, дикхља пе кобор сине леске жал башо адава со вакерѓа. Пало адава, палем улем шукар амала“.

16-17. Со ваљани те ова одлучна те кера?

¹⁶ О апостол Јован мангела сине бут пле пхрален хем грижинела пе сине ленге те овел лен зорали вера. Лескоро мангипе хем и грижа јасно дикхена пе ко советија со денѓа лен ко пле трин писмија. Чаче сием бахтале со џанаја кај о мурша хем о џувља кола со ка владинен заедно е Исусеа тане исто аѓаар пхерде мангипа хем грижа сар о Јован! (1. Јов. 2:27).

¹⁷ Те хаљова сериозно о советија со дикхлем ки акаја статија. Те ова одлучна те живина спрема о чачипе аѓаар со ка ова послушна е Јеховаске ко са со кераја. Проучин лескоро Лафи хем нека овел тут доверба ки лесте. Развин зорали вера ко Исус. Ма дозволин те пере ко влијание е манушикане идеенге хем ко ховајба со ширинена о отпадникија. Борин тут против о притисок те живине дволично живото хем те кере грево. Трудин тут те живине спрема е Јеховаскере уче морална мерилија. Освен адава, те поможина амаре пхраленге те ачховен зорале ки вера аѓаар со ка простина околенге со ка дукхавен амен хем ка поможина околенге со ваљани помош. Аѓаар, иако ка овен амен пхарипа, понадари да ка живина спрема о чачипе.