Бијандиљум ко 1935 берш ко Дарластон. Адава тано јекх подрачје тари Англија коте со сине бут кало чуро ко воздух таро бут фабрике со сине адари. Кеда сине ман околу 4 берш, ме родителија почминѓе те проучинен и Библија е Јеховаскере сведоконцар. Кеда сине ман околу 14 берш уверинѓум ман кај акава тано о чачипе хем крстинѓум ман ко 1952 берш кеда сине ман 16 берш.

Отприлика ко адава време почминѓум те сикљовав занати ки јекх бари фабрика која со производинела сине алатија хем делија башо моторија врданге. Почминѓум те добинав обука те шај те овав секретари хем бут уживинава сине ки адаја бути.

Кеда јекх покраинско надгледнико замолинѓа ман те водинав о собраниско проучибе о лил ко мло собрание Виленхол ваљани сине те одлучинав дали ка прифатинав адава. Ама адаја на сине локхи одлука. Ко адава периоди џава сине ко дуј собранија. Ко работна диве џава сине ко собрание кова со сине попаше узи ми бути ко Бромсгров кова со сине 32 километрија дур таро мло кхер. А ко викендија кеда џава манге сине кхере, џава сине ко собрание ко Виленхол.

Адалеске со мангава сине те поддржинав е Јеховаскере организација, прифатинѓум и задача таро покраинско надгледнико. Иако адава значинела сине кај ваљани те мукхав и бути колате со бут уживинава сине. Никогаш на пељум пишмани со мукхљум о Јехова те водинел ман ко живото хем адалеске шај сине те уживинав ко бут буќа.

Џикоте сиум сине ко собрание Бромсгров запознајнѓум јекхе шуже духовно пхења која со викинела пе Ен. Лелем амен ко 1957 берш хем заедно уживинѓем џикоте служинѓем сар општа пионерија, специјална пионерија, ки патувачко служба хем ко Бетел. Ој анѓа манге баро бахталипе ко живото.

Ко 1966 берш сием сине викиме те ова ко 42-то класи ки школа Гилеад хем сием сине бут бахтале. Сием сине бичхалде ко Малави, коле со  бут џене опишинена ле сар о тато вило е Африкакоро, соске о мануша тане љубезна хем гостопримлива. Ама амен на очекујнѓем кај ка нашти те ачхова адатхе.

Ко 1 февруари 1967 берш реслем ко Малави. О прво масек накхлем повише време те сикљова и чхиб. Хем пало адава почминѓем и покраинско служба. Возинаја сине џипи колеске со мислинела пе сине кај шај те возинел сегде, па чак преку реке. Ама адава на сине чаче, леа шај сине те возина само преку тхана коте со сине плитко пани. Понекогаш живинаја сине ко колибе кола со сине керде тари чик хем пус, а тело крови ваљани сине те чхива церада те шај те на капинел пани андре. Адава на сине баш локхо начин те почминел пе е задачаја, ама уживинаја сине ки лате.

Ко април халиљум кај панда хари ка овел амен проблеми е владаја. Ко радио шунѓум јекх говор таро претседатели таро Малави о Др. Хастингс Банда. Ов вакерела сине кај е Јеховаскере сведокија на платинена данок хем кај керена проблемија е владаке. Џанѓола пе, адава со вакерѓа на сине точно. Сарине амен џанлем кај о проблеми сине адава со амен на мангаја сине те мешина амен ки политика хем со одбинаја сине те кина членска книшке.

Септември ко новине читинѓем кај о претседатели обвининѓа е пхрален кај керена сегде проблемија. Ов ко јекх политичко конгрес вакерѓа кај лескири влада ка потпишинел јекх резолуција колаја со ка забранинен пе о активностија е Јеховаскере сведоконгере. Акаја забрана почминѓа те важинел ко 20 октомври 1967 берш. Кратко пало адава, ки подружница але полицајција хем службеникија башо имигрантија те пханден и подружница хем те бркинен е мисионерен тари пхув.

 Откеда сием сине трин диве ко затвор бичхалѓе амен ко Маврициус, кова со сине Британско колонија. Ама о властија адари на дозволинѓе аменге те ачхова сар мисионерија. Адалеске сием сине бичхалде ки Родезија (акана пенџарди сар Зимбабве). Кеда реслем адари, керѓем лафи јекхе службеникоја башо имигрантија кова со на мангља те дел амен престој ки адаја пхув. Ов вакерѓа аменге: „Бркинѓе тумен таро Малави, на дозволинѓе туменге те ачховен ко Маврициус, хем акана авена акате соске нане тумен кај те џан?“ И Ен почминѓа те ровел. Сар ка пхене нигде на мангена амен сине! Ко адава моменти мангава сине те џав манге кхере ки Англија. Ко крајо дозволинѓа аменге те накхава и рат ки подружница, ама вакерѓа аменге кај о тајсутно диве мора те јавина амен ки ленгири централа. На сине амен више сила, ама понадари да мукхлем о буќа е Јеховаске ко васта. О следно палоручко бут изненадинѓем амен со добинѓем дозвола те ачхова ко Зимбабве сар посетителија. Никогаш нане те бистрав сар осетинѓум ман адава диве, уверимо сиум сине кај о Јехова водинела о буќа!

Ки подружница ко Зимбабве служинава сине ко одделение баши служба кова со грижинела пе сине башо Малави хем Мозамбик. Е пхрален таро Малави сине лен баро прогонство. Дело тари мли бути сине те превединав о извештаија со добинаја лен сине таро покраинска надгледникија со служинена сине ко Малави. Јекх рат, џикоте керава сине касно бути, рунѓум кеда читинѓум башо насилство со доживинена сине амаре пхраља хем пхења. * Ама тари јавер страна, сиум сине бут охрабримо тари ленгири верност, вера хем истрајност (2. Кор. 6:4, 5).

Керѓем са те шај о пхраља со ачхиле ко Малави хем окола со нашле ко Мозамбик те овел лен библиско литература. О преведувачко тими баши чхиб Чичева, која со највише керела пе сине лафи ко Малави, сине префрлимо ки јекхе пхралескири бари фарма ко Зимбабве. Ов керѓа ленге кхера хем канцеларие. Адари шај сине те продолжинен е важно задачаја, те превединен библиско литература.

Организиринѓем о покраинска надгледникија таро Малави секова берш те присуствујнен ко областно конгрес со икерела пе сине ко Зимбабве ки чхиб Чичева. Адари ола добинена сине о нацртија башо говорија. Кеда иранена пе сине ко Малави, ола пренесинена сине е пхраленге хем е пхењенге о поуке таро адала говорија кобор со шај пошукар. Јекх берш џикоте о надгледникија сине ко Зимбабве, успејнѓем те организирина школа башо именујме пхраља те шај те охрабрина лен.

Ко Февруари 1975 берш гељум те посетинав е пхрален таро Малави со нашле ко кампија ко Мозамбик. Адала пхраља сине ко чекор е Јеховаскере организацијаја хем применинена сине о неве упатствија башо адава те овел старешинство ко собрание. О неве старешине организиринѓе бут духовна активностија, ола икерена сине јавна говорија, дискутиринена сине башо е дивескоро стихо, икерена сине и Стражарско кула хем чак сине лен конгресија. Организиринѓе о кампија баш сар ко конгресија. Сине лен оддел чистибаске, делибаске храна хем баши безбедност. Адала пхраља успејнѓе те керен бут бути адалеске со о Јехова денѓа лен берекети, хем откеда посетинѓум лен сиум сине бут охрабримо.

Покасно ко 1979 берш, и подружница тари Замбија почминѓа те грижинел пе башо Малави. Ама ме понадари да бут пути мислинава сине е пхраленге таро Малави хем молинава ман сине ленге хем јавера да керена сине адава. Сар члени таро Одбор е подружницакоро ко Зимбабве сине ман прилика некобор пути те дикхав ман е пхраленцар таро светско седиште хем е пхраленцар со предводинена сине ко Малави, Јужно Африка хем Замбија. Секова пути пучаја амен сине о исто пучибе: „Со шај панда те кера е пхраленге таро Малави?“

Сар со накхела сине о време са похари сием сине прогониме. О пхраља со нашле таро Малави  похари почминѓе те иранен пе, а окола пхраља со ачхиле ко Малави на сине више добором прогониме сар англедер. О околна државе похари почминѓе те дозволинен е Јеховаскере сведоконге те проповединен хем те овел лен состанокија хем исто аѓаар цидена сине о забране со сине против ленде. Ко 1991 берш ко Мозамбик случинѓа пе о исто. Ама пучаја амен сине: „Кеда ко Малави е Јеховаскере сведокија ка овен целосно слободна?“

Пало несаво време и политичко ситуација ко Малави менинѓа пе хем ко 1993 берш и влада цидинѓа и забрана башо е Јеховаскере сведокија. Кратко пало адава, керава сине лафи јекхе мисионереа хем ов пучља ман: „Ка иране ли тут ко Малави?“ Тегани сине ман 59 берш хем адалеске одговоринѓум леске: „На, ме сиум више пхуро!“ Ама адава исто диве добинѓем порака таро Водечко тело коте со пишинела сине дали шај те ирана амен ко Малави.

Уживинаја сине ки амари задача ко Зимбабве хем адалеске на сине аменге локхо те ана јекх одлука. Адатхе сием сине бут време хем керѓем аменге бут шукар амала. О Водечко тело љубезно вакерѓа аменге кај шај те ачхова ко Зимбабве ако мангаја адава. Значи, локхе шај сине те бирина ко кова друмо ка џа хем те ачхова ко Зимбабве. Ама размислинѓум башо Авраам хем и Сара, сар ола мукхле пумаро удобно живото ко попхуре берша те шај те шунен е Јеховаскоро водство (1. Мој. 12:1-5).

Одлучинѓем те шуна о водство тари е Јеховаскири организација хем ко 1 февруари 1995 берш иранѓем амен ко Малави, точно о исто диве пало 28 берш кеда прво пути реслем адари. Формиринѓа пе о Одбор е подружницакоро, коте со сиум сине ме хем јавера дуј пхраља хем одма почминѓем те организирина амаре активностија ки адаја пхув.

О Јехова денѓа пло берекети хем и активност ки адаја пхув бут сигате напредујнѓа! О број е објавителенгоро бут сигате барило таро околу 30.000 ко 1993 берш ко повише таро 42.000 ко 1998 берш. * О Водечко тело одобринѓа те градинел пе неви подружница која со ка грижинел пе башо потребе ко подрачје. Кинѓем 12 хектарија тхан ко Лилонгве хем сиум сине јекх таро членија ко Одбор градибаске.

 Ко Мај 2001 берш, о пхрал Гај Пирс таро Водечко тело одржинѓа о говор башо свечено отварање е неве Бетелескоро. Сине присутна 2000 Сведокија, хем о побаро дело сине крстиме повише таро 40 берш. Адала верна пхраља хем пхења бершенцар доживинѓе баро прогонство џикоте сине ки забрана. Ко материјално поглед сине чороле, ама ко духовно поглед ола сине бут барвале. Акана сине бут бахтале со шај сине те дикхен о нево Бетел. Хем џикоте пхирена сине цело Бетел, гиљавена сине теократска гиља ко афричко стили. Адава керѓа о цело настан те овел о најшужо нешто со доживинѓум ле џи акана. Адава сине доказ кај о Јехова дела баро берекети околенге со верно истрајнена ко неволје.

Откеда сине завршимо о Бетел, почминѓум те добинав задаче те овел ман говорија башо посветибе о дворане. Е собраниен таро Малави сине лен корист тари програма башо градибе дворане ко тхана коте со иси лен ограничиме средствија. Англедер, несаве собранија кхедена пе сине состаноконге ко тикне колибе кола со сине керде таро каш еукалиптус. О кровија сине учхарде трскаја, а бешибаске сине лен дугачка клупе. А акана о пхраља керѓе бут бути те шај коркори те пекен о цигле ко печке коленцар со градинена сине бут шуже дворане. Ама бешибаске о пхраља повише мангле сине те користинен клупе него столице, баш сар со вакерела јекх изрека, „секогаш иси тхан панда јекхе џенеске ки клупа“.

Сиум сине воодушевимо исто аѓаар те дикхав сар о Јехова поможинела пле народоске те бајрол ко духовно поглед. Посебно воодушевинѓе ман о терне пхраља тари Африка кола со сине спремна те поможинен хем сигате те сикљовен хем те применинен адава башо со сине обучиме. Ола прифатинѓе повише одговорностија ко Бетел хем ко собранија. О собранија панда повише сине охрабриме таро неве именујме покраинска надгледникија, колендар со побаро дело сине ко брако. Акала брачна парија одлучинѓе те на овен лен чхаве те шај те служинен е Јеховаске ки побари мера, иако сине лен притисок таро јавера хем ко несаве случаија тари фамилија.

Пало 52 берш ки Африка, сине ман проблемија састипаја. О Одбор е подружницакоро денѓа препорака те ова префрлиме ко Бетел ки Британија хем о Водечко тело одобринѓа адава. Сием сине разочариме со мора сине те мукха и задача која со бут мангаја ла сине, ама и бетелско фамилија ки Британија бут грижинела пе аменге ко акала пхуре берша.

Уверимо сиум кај адава со мукхљум о Јехова те водинел ман ко живото сине и најшукар одлука со анѓум ла. Кој џанела кај ка овав сине те овел ман сине доверба ки манде. О Јехова секогаш џанела сине со ваљани манге те шај те испрајнел мле друмија (Изр. 3:5, 6). Сар терно бут мангава сине те џанав сар функциониринела јекх бари фирма. Ама е Јеховаскири организација денѓа ман јекх кариера колате со уживинѓум панда повише. Најбаро задоволство сине манге, хем понадари да тано, те служинав е Јеховаске.