1. Сар осетинела пе о Јехова кеда несаво лескоро слуга ка иранел пе ки лесте?

КИ АНГЛУНИ статија дикхлем кај о Јехова спорединела пес шукар пастиреа кова со мангипаја грижинела пе башо секова пло бакхро хем родела секоле бакхре со нашавдило. О Јехова вакерѓа е Израелцонге кола со мукхле ле: „Иранен тумен ки манде, хем ме ка иранав ман ки туменде“. Џанаја кај ов понадари да иси ле о исто стави спрема пле слуге, адалеске со вакерела: „Ме на менинава ман“ (Мал. 3:6, 7). О Исус вакерѓа кај о Јехова хем о ангелија тане бут бахтале кеда чак јекх таро лескере слуге ка иранел пе ки лесте (Лука 15:10, 32).

2. Со ка дикха ки акаја статија?

² Те дикха трин споредбе со вакерѓа лен о Исус колендар со шај те сикљова важна поуке башо адава сар те поможина околенге со цидинѓе пе таро Јехова. Ка дикха кола особине ваљани те овен амен те шај те поможина е бакхренге со нашавдиле те иранен пе ки лесте. Хем ка дикха соске врединела те трудина амен те поддржина околен со уле неактивна те иранен пе.

3-4. Спрема Лука 15:8-10, соске и џувли внимателно родела сине и нашавди драхма?

³ Мора бут те трудина амен те шај те аракха околен со мангена те иранен пе ко Јехова. Ки јекх споредба сој тани пишими ко евангелие таро Лука, о Исус керѓа лафи баши јекх џувли која со нашавѓа нешто бут вредно — јекх драхма, јавере лафенцар сребрено паричка. Ов истакнинѓа кобор упорно хем темелно родинѓа и џувли адаја паричка. (Читин Лука 15:8-10.)

⁴ О Исус опишинѓа сар осетинѓа пе акаја џувли кеда аракхља и скапоцено драхма со нашавѓа ла. Ко лескоро  време, изгледа несаве Еврејке дена сине комплети таро деш драхме пумаре чхаенге ко диве кеда кхувена сине ко брако. Шај акаја паричка сине дело таро асавко комплети. И џувли тари споредба претпоставинела сине кај и драхма пели негде ко поди. Ој тхарѓа лампа хем почминѓа те родел ла, ама нашти сине те аракхел ла нигде соске веројатно на сине доволно светло. Адалеске, леља и метла хем внимателно шулавѓа цело кхер. Ко крајо, таро е лампакоро светло, светинѓа лакири скапоцено драхма. Кобор локхили со аракхља ла. Ој викинѓа пле амалинкен хем пле комшикен те вакерел ленге кобор тани бахтали башо адава.

5. Соске шај те овел пхаро те аракха околен со уле неактивна?

⁵ Сар со шај те дикха тари е Исусескири споредба, ваљани бут те трудина амен те аракха нешто со нашавѓем. Слично, ка ваљани бут те трудина амен те аракха околен со уле неактивна. Шај бершенцар на авена ко состанокија, или, шај селинѓе пе ко тхан коте со о пхраља на пенџарена лен. Ама, шај те ова сигурна кај несаве лендар чаче мангена те иранен пе ко Јехова. Ола мангена палем те служинен леске заедно пле пхраленцар хем пхењенцар, ама ваљани ленге амари помош.

6. Сар шај сарине таро собрание те поможинен те аракхен пе о неактивна?

⁶ Кој шај те поможинел те аракхен пе о неактивна пхраља хем пхења? Са о објавителија таро собрание, машкар кола сој хем о старешине, о пионерија хем ленгири фамилија. Дали иси тут амал или некој тари фамилија со уло неактивно? Дали аракхљан несаве неактивно пхрале или пхења џикоте сиан сине ки служба таро кхер ко кхер, или џикоте сиан сине ки служба ко прометна тхана? Вакер леске кај ако мангела некој те посетинел ле, ка овел туке мило те де лескири адреса или лескоро телефонско број е старешиненге таро тло собрание.

7. Со сикљоваја таро адава со вакерѓа јекх старешина со викинела пе Томас?

⁷ Е старешинен иси лен и најбари одговорност те аракхен адален со мангена те иранен пе ко Јехова. Сар шај те керен адава? Приметин со вакерѓа јекх старешина со викинела пе Томас. * Ов живинела ки Шпанија хем поможинѓа повише таро 40 Сведоконге те иранен пе ко собрание. О Томас вакерѓа: „Најангле пучава е пхрален хем е пхењен кола со шај џанена кај живинена окола сој неактивна таро амаро собрание. Или, палем пучава е објавителен дали пенџарена некас со чхинавѓа те авел ко состанокија. Бут џене таро собрание тане бахтале со шај те поможинен. Пало несаво време, кеда ка џав те посетинав е неактивна пхрален хем пхењен, пучава башо ленгере чхаве хем фамилија. Англедер несаве таро акала пхраља хем пхења анена сине пумаре чхавен ко состанокија, а несаве таро чхаве шај несаво време сине објавителија. Ленге да шај те поможинел пе те иранен пе ко Јехова“.

8. Ки споредба башо чхаво со гело песке кхерал, која сој пишими ко Лука 15:17-24, сар постапинѓа о дад пле чхавеа кова со каинѓа пе?

⁸ Кола особине мора те овен амен те шај те поможина околенге со мангена те иранен пе ко Јехова? Те дикха со шај те сикљова тари е Исусескири споредба башо чхаво со гело песке кхералдан. (Читин Лука 15:17-24.) О Исус објаснинѓа кај ко крајо о чхаво халило кај грешинѓа хем одлучинѓа те иранел пе кхере. О дад иклило те аџикерел ле хем силно гушинѓа ле хем аѓаар сикавѓа леске кобор бут мангела ле. Ама е чхаве мучинела ле сине и совест хем мислинела сине кај на заслужинела више те дикхел ле сар пло чхаво. О дад сикавѓа сочувство кеда лескоро чхаво искрено  вакерѓа леске сар осетинела пе, а пало адава керѓа нешто колеа со сикавѓа кај тано бахтало со иранѓа пе кхере. Ов на приминѓа ле сар слуга, него сар пло мангло чхаво. Адалеске денѓа ле шуже шеја хем керѓа гозба ки лескири чест.

9. Кола особине мора те овен амен те шај те поможина е неактивна пхраленге хем пхењенге те иранен пе ко Јехова? (Дикх и рамка „ Сар те поможина околенге со мангена те иранен пе“.)

⁹ О Јехова тано сар о дад ки адаја споредба. Ов мангела амаре неактивно пхрален хем пхењен, хем мангела ола те иранен пе ки лесте. Ако џаја пало лескоро пример, ка шај те поможина ленге те иранен пе. Ама, акава родела амендар стрпливост, сочувство хем мангипе. Соске ваљанена аменге баш акала особине, хем сар шај те сикава лен?

10. Соске тано важно те ова стрплива те шај те поможина некаске те сасљол ко духовно поглед?

¹⁰ Мора те ова стрплива адалеске со ваљани време те шај некој те сасљол ко духовно поглед. Бут џене со сине неактивна признајнена кај палем почминѓе те служинен е Јеховаске чак откеда о старешине хем о јавера таро собрание бут пути посетинѓе лен. И Ненси, јекх пхен тари Југоисточно Азија, пишинѓа: „Бут поможинѓа ман јекх паше амалин таро собрание. Мангела ман сине сар пли побари пхен. Бут пути вакерела манге сине башо шуже моментија со накхлем лен заедно. Стрпливо шунела ман сине џикоте вакерава сине сар осетинава ман, хем на мислинела пе сине дали те дел ман совет. Сикавѓа манге кај тани чаче амалин, спремно те поможинел манге ко секова време“.

11. Соске ваљани те овел амен сочувство те шај те поможина некаске со сине дукхавдо?

¹¹ О сочувство тано сар иљачи ки рана. Ов шај те сасљарел о повредиме чувствија. Несаве неактивна пхраља хем пхења, кола со англедер  бут берша сине дукхавде некастар таро собрание, панда тане хољаме башо адава. Асавке чувствија шај те овен посилна тари желба те иранен пе ко Јехова. Несаве шај мислинена кај постапинѓа пе ленцар неправедно. Сигурно бут ка значинел ленге ако некој шунела лен хем сикавела ленге кај хаљовела сар осетинена пе (Јак. 1:19). И Марија, која со англедер сине неактивно, вакерела: „Ваљани сине манге некој те шунел ман, те утешинел ман хем те дел ман шукар совет хем помош“.

12. Ки сави смисла е Јеховаскоро мангипе тано сар шело е неактивна пхраленге хем пхењенге?

¹² Ки Библија, о мангипе со осетинела о Јехова спрема пло народо тано споредимо шелеа. Ки сави смисла лескоро мангипе тано сар шело? Размислин баши акаја споредба: Замислин туке кај тасљовеа ко море коте со иси баре бранија хем некој фрдела туке појас спасибаске. Сигурно ка ове леске благодарно адалеске со адава ка поможинел туке те ачхове упро пани. Ама, о појас нане те спасинел тут. О пани тано шудро хем нане те успејне те ачхове џивдо ако на уклеа ко чамцо спасибаске. Некој ваљани те фрдел туке шело хем те влечинел тут ко чамцо. Башо Израелција кола со цидинѓе пе лестар, о Јехова вакерѓа: „Цидава лен сине е шеленцар... таро мангипе“ (Оси. 11:4). Авдиве да е Девле иси ле слична чувствија спрема окола со чхинавѓе те служинен леске хем кола со тасљона ко проблемија хем ко секирацие. Леске тано важно те џанен кај мангела лен, хем ов керела са те шај те влечинел лен ки песте е мангипаскере шеленцар. О Јехова шај те сикавел пло мангипе преку туте.

13. Сар адава со случинѓа пе е Паблоске сикавела кај о пхраликано мангипе тано бут моќно?

¹³ Важно тано те уверина е неактивна пхрален хем пхењен кај о Јехова мангела лен  хем кај амен да мангаја лен. О Пабло, сој спомнимо ки англуни статија, сине неактивно повише таро 30 берш. Ов вакерела: „Јекх сабај кеда икљовава сине кхералдан, јекх љубезно попхури пхен ачхавкерѓа ман те кера лафи. Шај сине те осетинав лакоро мангипе таро начин сар керела сине манцар лафи. Почминѓум те ровав сар тикно чхаво. Вакерѓум лаке кај о Јехова бичхалѓа ла. Ко адава моменти одлучинѓум те иранав ман ки лесте“.

14. Ки е Исусескири споредба сој пишими ко Лука 15:4, 5, со керѓа о пастири кеда аракхља е бакхре со нашавдило?

¹⁴ Ваљани понадари да те поможина хем те охрабрина околен сој неактивна чак откеда ка аракха лен. Исто сар о чхаво тари е Исусескири споредба, ленде да шај иси лен емоционално дукх колаке со ка ваљани повише време те сасљол. Освен адава, адалеске со несаво време сине ко е Сатанаскоро свето, веројатно тане слаба ко духовно поглед. Мора те поможина ленге те керен позорали пумари вера ко Јехова. Ки споредба башо бакхро со нашавдило, о Исус вакерѓа кај, кеда о пастири аракхља ле, чхивѓа ле ко пиќе хем иранѓа ле ко стадо. Ов више трошинѓа време хем сила те шај те аракхел акале бакхре. Сепак, сине леске јасно кај ка мора те пхиравел ле адалеске со ле на сине ле доволно сила те пхирел коркори. (Читин Лука 15:4, 5.)

15. Сар шај те поможина околенге сој слаба хем кола со мангена те иранен пе ко Јехова? (Дикх и рамка „ Помош која со бут врединела“.)

¹⁵ Шај ка ваљани те трошина време хем сила те шај те поможина несаве неактивна пхраленге хем пхењенге те боринен пе е проблеменцар кола со керена те овел ленге пхаро палем те служинен е Јеховаске. Ама, адалеске со иси амен и помош таро е Јеховаскоро  духо, таро лескоро Лафи хем таро публикацие со добинаја лен преку и организација, шај те поможина ленге те сасљовен ко духовно поглед (Рим. 15:1). Сар? Јекх пхрал, кова со служинела сар старешина бут берша, вакерѓа: „Бут таро неактивна пхраља хем пхења иси лен потреба некој те проучинел ленцар кеда ка одлучинен палем те служинен е Јеховаске“. * Адалеске, ако о старешине замолинена тут те проучине некасаја таро неактивна, ов спремно те поможине. Акава старешина исто аѓаар вакерѓа: „О објавители ваљани те овел паше амал, некој касте со о неактивно пхрал или пхен ка овел ле доверба“.

16. Котар џанаја кај поможинена амен о ангелија?

¹⁶ Иси бут искуствија кола со сикавена кај о ангелија поможинена амен те аракха е неактивна пхрален хем пхењен кола со бут мангена те иранен пе ко Јехова (Отк. 14:6). На пример, о Силвио таро Еквадор искрено молинѓа е Јехова те поможинел ле палем те служинел леске. Џикоте молинела пе сине, дуј старешине ѕвонинѓе ко лескоро удар. Панда тари адаја прво посета, ола спремно почминѓе те ден ле и потребно помош те шај те иранел пе ко Јехова.

17. Сар ка осетина амен ако поможинаја е пхраленге хем е пхењенге сој духовно слаба?

¹⁷ Ако поможинаја е пхраленге хем е пхењенге сој духовно слаба те иранен пе ко Јехова, амен да ка ова бут бахтале. Приметин со вакерела јекх пионери кова со посебно трудинела пе те поможинел околенге сој неактивна: „Понекогаш едвај икерава ман те на ровав таро бахталипе! Бут сиум бахтало кеда размислинава кај о Јехова спасинѓа панда јекхе пле мангле бакхре таро е Сатанаскоро свето, хем кај ман сине ман чест те соработинав е Јеховаја“ (Дела 20:35).

18. Ако цидинѓан тут таро Јехова, ко со шај те ове уверимо?

¹⁸ Ако цидинѓан тут таро Јехова, ов уверимо кај ов панда мангела тут. Ов мангела те иранен тут ки лесте. Точно, ка ваљани бут те трудине тут те шај те кере адава. Ама, ма бистре кај, слично сар о дад тари е Исусескири споредба, о Јехова едвај аџикерела те иране тут хем ка аџикерел тут пхравде вастенцар.