1-2. Соске шај е Павлескоро пример те поможинел е старешиненге?

 О АПОСТОЛ Павле мангела сине пле пхрален хем бут трудинела пе сине те грижинел пе ленге (Дела 20:31). Адалеске о пхраља хем о пхења мангена ле сине бут. Ки јекх прилика о старешине таро Ефес рунѓе кеда шунѓе кај никогаш више нане те дикхен ле (Дела 20:37). Амаре вредна старешине исто аѓаар бут мангена пумаре пхрален хем пхењен, хем на штединена пе кеда ваљани те поможинен ленге (Фил. 2:16, 17). Ама понекогаш е старешинен иси лен несаве предизвикија. Со шај те поможинел ленге те истрајнен ко адала предизвикија?

² Амаре вредна старешине шај те размислинен башо е Павлескоро пример (1. Кор. 11:1). Ле на сине ле несави посебно сила или мудрост. О Павле да сине несовршено мануш кова со понекогаш боринела пе сине те постапинел исправно (Рим. 7:18-20). Хем сине ле некобор проблемија коленцар со ваљани сине те икљовел ко крајо. Ама о Павле на откажинѓа пе, хем понадари да сине бахтало. Кеда о старешине џана пало е Павлескоро пример, ола понадари да шај те овен бахтале џикоте служинена е Јеховаске иако иси лен проблемија. Те дикха сар.

3. Со ка дикха ки акаја статија?

³ Ки акаја статија ка дикха штар предизвикија кола со иси е старешинен: 1) те одвојнен доволно време башо проповедибе хем башо јавера одговорностија, 2) те одвојнен песке време те охрабринен е пхрален хем е пхењен, 3) ма те обесхрабринен пе башо пумаре лична слабостија хем 4) те накхен преку е јаверенгере маане. Ка дикха со поможинѓа е Павлеске хем сар шај о старешине те џан пало лескоро пример.

4. Соске понекогаш е старешиненге шај те овел пхаро те предводинен ко проповедибе?

⁴ Соске акава шај те овел пхаро. Освен со ваљани те проповединен, е старешинен иси лен бут јавера одговорностија. На пример, бут џене лендар тане претседавачија ко состанок Амаро живото хем служба хем водинена о Проучибе и Библија ки дворана. Исто аѓаар шај ваљани те икерен јавера говорија. Освен адава, накхавена бут време те шај те обучинен е слуга-помошникон хем те охрабринен е пхрален хем е пхењен (1. Пет. 5:2). Несаве старешине поможинена те градинен пе хем те одржинен пе о дворане хем јавера теократска објектија. Сепак, сар са е објавителенге, е старешиненге да и најважно бути тани те вакерен о шукар хабери (Мат. 28:19, 20).

5. Саво пример денѓа о Павле сар проповеднико?

⁵ Е Павлескоро пример. Ко Филипјаните 1:10 о Павле поттикнинѓа амен те проценина сој тано нај важно. Ов постапинѓа спрема пле лафија хем адалеске успејнѓа ки пли задача те проповединел. Леске и служба сине бершенцар најважно ко живото. Ов проповединѓа „јавно хем таро кхер ко кхер“ (Дела 20:20). Ов на проповединела сине само ко јекх одредено време или јекх диве ко курко, него користинела сине секоја прилика те шај те проповединел. На пример, џикоте аџикерела сине пле соработникон ки Атина, ов проповединѓа несаве позната манушенге хем несаве лендар уле верникија (Дела 17:16, 17, 34). Чак кеда сине пханло, о Павле проповединѓа околенге со сине леа (Фил. 1:13, 14; Дела 28:16-24).

6. Сар о Павле обучинѓа е јаверен?

⁶ О Павле користинѓа пло време најшукар со шај. Ов често лела сине пеа јаверен ки служба. На пример, ко пло прво мисионерско патување ов леља е Марко, а ко дујто е Тимотее (Дела 12:25; 16:1-4). О Павле денѓа пло нај шукар те сикавел лен сар те водинен јекх собрание, сар те овен шукар пастирија хем шукар учителија (1. Кор. 4:17).

7. Сар шај о старешине те керен адава со вакерѓа о Павле ко Ефешаните 6:14, 15?

⁷ И поука. О старешине џана пало е Павлескоро пример на само аѓаар со џана ки служба таро кхер ко кхер, него исто аѓаар сој тане спремна те проповединен ки секоја прилика. (Читин Ефешаните 6:14, 15.) Исто аѓаар, шај те проповединен кеда џана те пазаринен или ки пумари бути. Или кеда поможинена те градинел пе несаво теократско објекти, ола шај те проповединен е комшиенге или околенге кастар со кинена нешто баши дворана. Сар о Павле, о старешине шај те користинен о време кеда тане ки служба  те шај те обучинен е јаверен хем е слуга-помошникон.

8. Со ваљани понекогаш јекх старешина те керел?

⁸ О старешине на ваљани те овен добором зафатиме е задаченцар ко собрание или ки покраина со нане те овел лен време баши служба. Те шај те овен урамнотежена, о старешине понекогаш ка ваљани те одбинен несаве задаче. Откеда ка размислинен хем ка молинен пе башо адава, ола шај ка хаљон кај ако прифатинена повише задаче шај нане те овел лен време башо поважна буќа. На пример, нане те овел лен време баши фамилијарно рат секова курко, ревно те проповединен или те сикавен пумаре чхавен те проповединен. Несавенге тано пхаро те одбинен несаве задаче, ама шај те овен сигурна кај о Јехова хаљола кај мангена те овен урамнотежена ко са о буќа.

9. Со шај те овел предизвик е старешиненге те керен адалеске сој тане бут зафатиме?

⁹ Соске акава шај те овел пхаро. Е Јеховаскере народо иси ле бут неволје. Ко акала последна диве, сариненге ваљани охрабрување, поддршка хем утеха. Хем понекогаш некаске ваљани помош те шај те на грешинел (1. Сол. 5:14). Џанѓола пе, о старешине нашти те циден са о неволје таро е Јеховаскоро народо. Сепак о Јехова мангела о старешине те керен са со шај те шај те охрабринен хем те заштитинен лескере бакхрен. Сар шај о старешине сој тане бут зафатиме те одвојнен време те поможинен е пхраленге?

10. Спрема 1. Солуњаните 2:7, сар о Павле грижинела пе сине е Јеховаскере народоске ?

¹⁰ Е Павлескоро пример. О Павле сине секогаш спремно те пофалинел е пхрален хем те охрабринел лен. О старешине да ваљани те џан пало лескоро пример хем те овен љубезна е пхраленцар хем е пхењенцар. (Читин 1. Солуњаните 2:7.) О Павле уверинѓа е пхрален хем е пхењен кај мангела лен хем кај о Јехова да мангела лен (2. Кор. 2:4; Еф. 2:4, 5). О Павле сине сар амал околенцар таро собрание аѓаар со накхавела сине ленцар време. Ов сикавѓа кај иси ле доверба ки ленде аѓаар со сине ленцар искрено хем вакерела сине ленге пле секирацие хем кола тане лескере слабостија (2. Кор. 7:5; 1. Тим. 1:15). Ама адалеа на мангља те истакнинел пле проблемија, него мангела сине те поможинел е пхраленге.

11. Соске о Павле советинѓа е пхрален хем е пхењен?

¹¹ Понекогаш о Павле ваљани сине те советинел е пхрален хем е пхењен. Ама ов никогаш на керѓа адава те шај те икалел пли холи упри ленде. Наместо адава, ов дела лен сине совет адалеске со грижинела пе сине ленге. Хем мангела сине те заштитинел лен таро различна опасностија. Ов мангела сине лескоро совет те овел локхо хаљојбаске, хем те прифатинен ле. На пример, ко пло писмо џи  ко Коринќања, о Павле денѓа јекх строго совет. Откеда пишинѓа адава писмо, ов бичхалѓа е Тите те џал ки ленде. О Павле едвај аџикерела сине те дознајнел сар реагиринѓе о пхраља ко лескоро писмо. Хем кеда дознајнѓа кај прифатинѓе хем применинѓе о совет, ов сине бут бахтало (2. Кор. 7:6, 7).

12. Сар шај о старешине те зајакнинен е објавителен?

¹² И поука. О старешине шај те џан пало е Павлескоро пример аѓаар со ка накхавен време е објавителенцар. Јекх начин сар шај те керен адава тано аѓаар со ка џан порано ко состанокија те шај те овел лен охрабрувачка разговорија е јаверенцар. Бут пути доволно тане само некобор минутија те шај те охрабринел пе несаве пхрале или пхења со накхела таро пхаро периоди (Рим. 1:12; Еф. 5:16). Јекх старешина со џала пало е Павлескоро пример шај исто аѓаар те охрабринел е објавителен аѓаар со ка користинел е Девлескоро Лафи те шај те уверинел лен кај о Девел мангела лен. Освен адава, ов ка уверинел лен кај мангела лен. Ов редовно керела ленцар лафи хем родела прилике те шај те пофалинел лен. Хем кеда мора те дел совет, адава совет секогаш темелинела пе ко е Девлескоро Лафи. Ов тано директно, ама керела адава ко јекх љубезно начин адалеске со мангела о пхрал или и пхен те прифатинен адава совет (Гал. 6:1).

13. Сар шај те влијајнен упро старешине ленгере слабостија?

¹³ Соске акава шај те овел пхаро. О старешине нане совршена. Хем сар сарине ола да грешинена (Рим. 3:23). Понекогаш шај те овел ленге пхаро те овел лен исправно стави башо пумаре слабостија. Несаве добором бут концентриринена пе ко пле слабостија со обесхрабринена пе. А јавера добором сигате оправдинена пумаре грешке со мислинена кај на ваљани те керен нисаве промене.

14. Спрема Филипјаните 4:13, сар и понизност поможинѓа е Павлеске те икљол ко крајо пле слабостенцар?

¹⁴ Е Павлескоро пример. Адалеске со сине понизно, о Павле халило кај нашти коркори те боринел пе против пле слабостија. Леске ваљани сине и сила која со авела таро Девел. Англедер, о Павле сине тврдоглаво хем бут прогонинела сине е христијанен. Ама покасно, ов халило пле грешке хем сине спремно те менинел пло стави хем пли личност (1. Тим. 1:12-16). Адалеске со о Јехова поможинѓа леске, о Павле уло јекх љубезно, сочувствително хем понизно пастири. Ов сине свесно башо пле слабостија. Сепак, ле сине ле доверба кај о Јехова ка простинел леске хем одлучинѓа те на  концентриринел пе ки ленде (Рим. 7:21-25). Ов на очекујнела сине те овел совршено. Него, ов бут трудинѓа пе панда повише те развинел и христијанско личност хем понизно родинѓа помош таро Јехова те шај те исполнинел пли задача. (1. Кор. 9:27; читин Филипјаните 4:13.)

15. Саво исправно стави ваљани те овел е старешинен башо пумаре слабостија?

¹⁵ И поука. О старешине нане именујме адалеске сој тане совршена. Сепак, о Јехова очекујнела лендар те признајнен пумаре грешке хем те развинен и христијанско личност (Еф. 4:23, 24). Џикоте проучинела и Библија о старешина шај те дикхел коте ваљани те подобринел пе хем те керел о потребна промене. Ако керела адава о Јехова ка поможинел леске те овел бахтало хем те овел шукар пастири (Јак. 1:25).

16. Со шај те овел ако јекх старешина концентриринела пе ко е јаверенгере слабостија?

¹⁶ Соске акава шај те овел пхаро. Кеда о старешине накхавена бут време е пхраленцар хем е пхењенцар тегани шај полокхе те дикхен ленгере слабостија. Ако на пазинена, о старешине шај те нервиринен пе, те критикујнен лен хем те на овен ленцар љубезна. О Павле предупрединѓа е христијанен кај о Сатана мангела баш аѓаар те постапинен (2. Кор. 2:10, 11).

17. Сар дикхела сине о Павле ко пхраља хем ко пхења?

¹⁷ Е Павлескоро пример. Ов секогаш дикхела сине шукар ко пхраља хем ко пхења. Сине свесно кај ола грешинена, хем понекогаш ов лично сине повредимо таро ленгере постапке. Ама, о Павле џанља кај ако некој грешинѓа на значинела кај тано лошно мануш. Ов мангела сине е пхрален хем е пхењен хем концентриринела пе сине ко ленгере шукар особине. Ако е пхраленге хем е пхењенге на сине локхо те керен адава сој исправно, о Павле биринела сине те мислинел кај иси лен шукар мотивија хем кај само ваљани ленге помош.

18. Со сикљоваја таро адава сар о Павле поможинѓа е Еводија хем е Синтихија? (Филипјаните 4:1-3).

¹⁸ Те дикха сар о Павле постапинѓа дује пхењенцар таро собрание Филипи. (Читин Филипјаните 4:1-3.) Веројатно и Еводија хем и Синтихија на сине више амалинка адалеске со распрајнѓе пе. О Павле на сине ленцар строго хем на критикујнѓа лен, наместо адава ов концентриринѓа пе ко ленгере шукар особине. Ола сине верна пхења кола со бут време служинена сине е Јеховаске. О Павле џанља кај о Јехова мангела лен. Ле сине ле позитивно мислење башо акала пхења хем адалеске охрабринѓа лен те смиринен пе. Адалеске со о Павле концентриринела пе сине ко шукар особине е јаверенгере, ов шај сине понадари да те овел бахтало хем те овел паше амал е пхраленцар таро собрание.

19. а) Сар шај о старешине понадари да шукар те дикхен ко објавителија? б) Со шај те сикљове тари слика коте со јекх старешина поможинела те чистинел пе и дворана?

 ¹⁹ И поука. Тумен о старешине, дикхен ко шукар особине со иси е пхрален хем е пхењен. Секова јекх тано несовршено, ама секоле амендар иси ле особине кола со шај те ценина лен (Фил. 2:3). Џанѓола пе, о старешине понекогаш ка ваљани те советинен јекхе пхрале или пхења. Ама исто сар о Павле, ола трудинена пе те на концентриринен пе ко лафија хем ко постапке со шај те нервиринен лен. Наместо адава, о старешине дикхена кај адава пхрал мангела е Јехова, кај истрајнела џикоте служинела леске хем кај мангела те керел шукарипе. О старешине со дикхена позитивно ко јавера керена о пхраља хем о пхења те осетинен пе мангле ко собрание.

20. Сар шај о старешине понадари да те сикљовен таро е Павлескоро пример?

²⁰ Туменге е старешиненге бут ка поможинел ако понадари да проучинена е Павлескоро пример. Ко адава шај те поможинел туменге о лил ко Сведочи темелно за Божјето Царство. Џикоте читинеа акава лил или јавера статие коте со керела пе лафи башо лескоро пример, пуч тут: „Сар шај е Павлескоро пример те поможинел манге понадари да те овав бахтало џикоте служинава сар старешина?“

21. Ко со шај о старешине те овен сигурна?

²¹ Тумен о старешине, ма бистрен кај о Јехова на родела тумендар те овен совршена, наместо адава ов очекујнела тумендар те овен верна (1. Кор. 4:2). О Јехова бут ценинѓа е Павлескоро трудо хем лескири верност. Хем шај те овен сигурна кај о Девел исто аѓаар ценинела адава со тумен керена ки служба баши лесте. О Јехова никогаш нане „те бистрел адава со керѓен хем о мангипе со сикавѓен лескере анавеске, аѓаар со служинѓен околенге сој света хем понадари да служинена ленге“ (Евр. 6:10).