1-2. а) Спрема Изреки 16:31, сар ваљани те дикха ко амаре попхуре пхраља хем пхења? б) Ко кола пучиба ка добина одговор ки акаја статија?

КО ЈЕКХ парко ко САД, о мануша шај те аракхен дијамантија џикоте пхирена. Ама, акала дијамантија нане обработиме. Адалеске о мануша со дикхена акала дијамантија шај на хаљовена кај ола тане бут скапоцена бара.

² Слично сар акала дијамантија, амаре верна пхуре пхраља хем пхења тане бут скапоцена. Е Девлескоро Лафи спорединела о парне бала јекхе крунаја. (Читин Изреки 16:31; 20:29.) Ама, понекогаш шај те на приметина лен. О терне со хаљовена кобор врединена амаре попхуре пхраља хем пхења ка добинен нешто сој поскапоцено таро дословно барвалипе. Ки акаја статија ка добина одговор ко трин пучиба: Соске о Јехова дикхела е попхуре пхрален хем пхењен сар скапоцена? Саво тхан иси лен ки е Јеховаскири организација? Со шај те кера те шај те сикљова таро ленгоро пример?

3. Ко склад е лафенцар таро Псалм 92:12-15, соске амаре попхуре пхраља хем пхења тане скапоцена е Јеховаске?

³ Амаре попхуре пхраља хем пхења тане скапоцена е Јеховаске. О Јехова шукар пенџарела лен хем ценинела ленгере бут шуже особине. Ов тано бахтало кеда о попхуре пренесинена и мудрост е потерненге со ола стекнинѓе ла џикоте служинена сине е Јеховаске (Јов 12:12; Изр. 1:1-4). О Јехова исто аѓаар ценинела ленгири истрајност (Мал. 3:16). Иако сине лен проблемија ко живото ола сепак ачхиле верна е Јеховаске. Ленгири надеж баши иднина акана  тани позорали него кеда прво пути шунѓе башо чачипе. Хем о Јехова мангела лен соске ола чак ко пхурипе понадари вакерена е јаверенге башо лескоро анав. (Читин Псалм 92:12-15.)

4. Со шај те охрабринел амаре попхуре пхрален хем пхењен?

⁴ Ако сиан јекх таро попхуре пхраља хем пхења, ов сигурно кај о Јехова на бистрела адава со керѓан англедер (Евр. 6:10). Сиан сине бут ревно ки служба, хем адава керела е Јехова бахтало. Ту истрајнѓан кеда сине тут проблемија — чак пхаре проблемија — сиан сине послушно хем икерѓан тут ко библиска мерилија. Верно грижинѓан тут башо важна задаче ки е Јеховаскири организација хем денѓан обука е јаверенге. Денѓан тло најшукар те шај те прилагодине тут ко бут промене со керѓа е Јеховаскири организација. Поддржинѓан хем охрабринѓан околен сој тане ки полновремено служба. О Јехова бут мангела тут адалеске со сиан верно! Ов ветинела кај „нане те мукхел околен сој тане леске верна“ (Пс. 37:28). Хем денѓа лафи кај чак кеда ка парњон тле бала ов ка поддржинел тут (Иса. 46:4). Значи, ма мислин кај адалеске со пхуриљан на сиан више важно ки е Јеховаскири организација. Ту сиан бут скапоцено!

5. Со на ваљани те бистрен о попхуре пхраља хем пхења?

⁵ О попхуре шај те овен бут корисна ки е Јеховаскири организација. Иако шај нане више силна сар англедер, лен иси лен баро искуство со стекнинѓе ле бершенцар. Сар со дикхаја таро примерија таро пурано време хем таро амаро време, о Јехова шај понадари да бут те користинел лен ко различна начинија.

6-7. Вакер библиска примерија таро попхуре со добинѓе берекетија адалеске со сине верна е Јеховаске.

⁶ Ки Библија иси шукар примерија таро верна мануша со понадари да служинѓе е Јеховаске кеда пхуриле. На пример, е Мојсее сине ле околу 80 берш кеда почминѓа те служинел сар пророко хем водачи е Израелцонгоро. Кеда е Даниеле шај сине ле  повише таро 90 берш, о Јехова понадари да користинела ле сине сар пророко. Слично, о Јован кеда пишинѓа о лил Откровение шај сине ле околу 90 берш.

⁷ Бут јавера верна слуге на сине позната, хем адалеске шај о јавера на приметинена лен сине. Сепак, о Јехова приметинѓа лен хем наградинѓа лен адалеске со сине верна. На пример, „о праведно хем верно“ мануш, о Симеон, кратко тано спомнимо ки Библија, ама о Јехова џанела сине кој тано хем наградинѓа ле адалеа со денѓа ле и предност те дикхел е Исусе сар бебе хем те пророкујнел баши лесте хем баши лескири дај (Лука 2:22, 25-35). Исто аѓаар, размислин баши удовица и Ана, која со служинела сине сар пророчица. Иако сине ла 84 берш, ој „никогаш на пропуштинела сине те џал ко храми“. Адалеске о Јехова наградинѓа ла аѓаар со ој да ки јекх прилика дикхља е Исусе кеда сине бебе. О Симеон хем и Ана сине бут скапоцена е Јеховаске (Лука 2:36-38).

8-9. Со керена понадари да о удовице ки е Јеховаскири организација?

⁸ Ко амаро време, бут попхуре слуге тане шукар пример е потерненге. Те дикха о пример тари пхен Лоес Дидур. Ла сине ла 21 берш кеда почминѓа те служинел сар специјално пионери ки Канада. Пало адава, ој хем лакоро ром о Џон служинѓе бут берша ки патувачко служба. Пало адава, служинѓе ко Бетел ки Канада повише таро 20 берш. Кеда сине ла 58 берш, ој хем о Џон сине каниме те служинен ки Украина. Со керѓе ола? Дали мислинѓе кај тане бут пхуре те служинен ки јавер пхув? Ола геле ки Украина хем о Џон сине именујмо те служинел ко Одбор е подружницакоро. Пало ефта берш о Џон муло, ама и Лоес одлучинѓа те ачхол адари. Акана ла иси ла 81 берш, хем ој панда верно служинела ко Бетел ки Украина, коте со сарине мангена ла.

⁹ О удовице сар и Лоес шај нане добором приметиме таро јавера сар кеда ленгере рома сине џивде. Сепак, ола тане бут скапоцена. О Јехова бут ценинела е пхењен кола со бершенцар поддржинѓе пумаре ромен хем акана понадари да верно служинена е Јеховаске (1. Тим. 5:3). Ола исто аѓаар охрабринена е тернен.

10. Саво шукар пример денѓа о Тони?

¹⁰ О пхуре пхраља хем пхења со живинена ко старски дом тане исто аѓаар бут скапоцена. На пример, јекх пхрал со викинела пе Тони живинела ко старски дом. Ов крстинѓа пе ки Пенсилванија (САД), ко август 1942 берш, кеда сине ле 20 берш. Кратко пало адава викинѓе ле те џал ки војска, ама адалеске со одбинѓа пханле ле дуј текваш берш ко затвор. Ов хем лескири ромни и Хилда бајрарѓе пумаре дује чхавен ко чачипе. Бершенцар о Тони служинѓа сар  претседавачко надгледнико ко трин собранија (акана пенџардо сар координатор ко старешинство) хем служинѓа сар покраинско надгледнико. Посетинела сине јекх затвор хем адари водинела сине состанокија хем библиска курсија. Иако акана иси ле 98 берш, о Тони панда тано активно ки служба е Јеховаске. Ов понадари да дела пло најшукар те служинел е Јеховаске заедно е пхраленцар хем е пхењенцар таро лескоро собрание.

11. Сар ка сикава кај аменге скапоцена адала со живинена ко старски дом или коркори?

¹¹ Сар шај те сикава кај поштујнаја е попхурен сој тане ко старски дом или со живинена коркори? Секогаш кеда иси прилика, о старешине шај те поможинен ленге те овен присутна или те шунен о состанокија хем те проповединен. Шај те сикава кај лично грижинаја амен ленге аѓаар со ка посетина лен, или ка јавина амен ленге. Посебно мангаја те сикава внимание е попхуренге со живинена дур таро пумаро собрание. На ваљани те бистра лен! Несаве попхуре пхраленге хем пхењенге шај нане локхо те керен пестар лафи, или мислинена кај адава нане соодветно. Ама, бут ка охрабрина амен ако одвојнаја ленге време, пучаја лен пучиба хем ако шунаја лен џикоте вакерена аменге о шуже искуствија со доживинѓе лен ки е Јеховаскири организација.

12. Со шај те аракха ко амаро собрание?

¹² Шај ка изненадина амен кеда ко амаро собрание ка аракха попхуре пхрален хем пхењен со иси лен шуже искуствија. На пример, и пхен Хариет верно служинѓа бут берша ко пло собрание ко Ну Џерси (САД). Пало адава, гели те живинел ки пли чхај. О пхраља хем пхења таро нево собрание одвојнѓе песке време пошукар те запознајнен ла хем халиле кај ој тани бут скапоцено. Ој охрабринела лен сине аѓаар со вакерела ленге сине искуствија тари служба кеда запознајнѓа о чачипе околу ко 1925 берш. Ко адава време, кеда џала сине те проповединел, ој секогаш лела сине пеа јекх четка данденге соске шај сине те пханден ла. Уствари, ко 1933 берш, ој сине пханли дуј пути ко затвор по јекх курко. Лакоро ром со на сине Сведоко, поддржинела ла сине адалеа со ов грижинѓа пе ленгере трине чхавенге кеда ој сине ко затвор. Асавке верна попхуре сар и Хариет сигурно заслужинена те овен цениме!

13. Саво тхан иси е попхурен ки е Јеховаскири организација?

¹³ Амаре попхуре пхраља хем пхења тане бут важна ки е Јеховаскири организација. Ола дикхле сар о Јехова ко различна начинија денѓа берекети пле организацијаке хем ленге. Ола сиклиле бут важна поуке таро грешке со керѓе лен ко пумаро живото. Дикх ки ленде сар „извор тари мудрост“ хем сикљов таро ленгоро искуство (Изр. 18:4). Ако одвојнеа туке време пошукар те запознајне лен, тли вера ка бајрол хем бут ка сикљове!

14. Спрема 5. Мојсеева 32:7, сој тане поттикниме о терне те керен?

¹⁴ Кер ту о прво чекори те кере лафи е попхуренцар. (Читин 5. Мојсеева 32:7.) Точно, шај на дикхена више шукар, шај побавно пхирена хем шај нашти више шукар те керен лафи, ама ола панда мангена те овен активна ки служба башо Јехова хем керѓе песке јекх „шукар анав“ англи лесте (Проп. 7:1). Ма бистре соске о Јехова ценинела  лен. Понадари да сикав ленге поштовање. Ов сар о Елисеј. Ов сине упорно те ачхол паше узо Илија хем адалеске трин пути вакерѓа леске: „Нане те мукхав тут“ (2. Цар. 2:2, 4, 6).

15. Саве пучиба шај те пуча е попхурен?

¹⁵ Сикав искрено интерес е попхуренге аѓаар со љубезно ка пуче лен пучиба (Изр. 1:5; 20:5; 1. Тим. 5:1, 2). На пример, шај те пуче лен: „Кеда сиан сине терно, со уверинѓа тут кај аракхљан о чачипе? Сар о буќа со случинѓе пе туке поможинѓе тут те ове попаше е Јеховаја? Со поможинѓа туке те ачхове бахтало ки служба е Јеховаске?“ (1. Тим. 6:6-8). Пало адава, шун лен шукар џикоте раскажинена туке!

16. Сави корист ка овел е потернен хем е попхурен ако керена лафи јекх јекхеа?

¹⁶ Кеда јекх потерно хем попхуро керена лафи, о солдуј шај те охрабринен пе (Рим. 1:12). Тумен о потерне ка овен панда посигурна кај о Јехова грижинела пе пле народоске, хем о попхуре ка осетинен пе мангле. Ола ка овен бахтале те раскажинен туменге сар о Јехова денѓа лен берекетија.

17. Соске шај те вакера кај о попхуре сој верна овена пошуже сар накхена о берша?

¹⁷ Обично о физичко шужипе е бершенцар нашавѓовела, ама окола сој верна е Јеховаскере, овена са пошуже англи лесте (1. Сол. 1:2, 3). Соске? Адалеске со бершенцар дозволинѓе е Девлескоро духо те обучинел лен хем те поможинел лен те развинен бут шуже особине. Со повише запознајнаја амаре попхурен, поштујнаја лен хем сикљоваја лендар, добором поскапоцена ка овен аменге!

18. Со ка дикха ки следно статија?

¹⁸ О собрание овела посилно на само кеда о потерне ценинена е попхурен, него исто аѓаар кеда о попхуре ценинена е потернен. Ки следно статија ка дикха сар шај о попхуре те сикавен кај ценинена е тернен ко собрание?