Бијандо сиум ко Сан Хуан Чанкалаито, тикни диз ки држава Чиапас (Мексико). Амен сием таро народо Чол, кова со авела таро Маи. Мле родителен сине лен 12 чхаве, а ме сиум о панџто. Кеда сием сине тикне, ме хем мле пхраља хем пхења проучинаја сине и Библија е Јеховаскере сведоконцар. Ама, адава со сиклиљум на икерава ле сине ко мло живото.

 Ко 13 берш ме више дрогиринава ман сине хем чорава сине. Ко адала берша гељум манге кхералдан. Џава сине таро тхан ко јавер тхан. Ко 16 берш, почминѓум те керав бути ки јекх плантажа марихуанаја. Адари керѓум бути околу јекх берш. Јекх рат, џикоте пренесинаја сине бродеа баре количине марихуана, сием сине нападиме таро членија таро јавер наркокартел кола со сине лен бут оружје пеа. Ола почминѓе те пукајнен ки аменде. Едвај успејнѓум те спасинав ман. Пало адава, нашљум ко САД.

 Адари понадари да бикинава сине дрога хем заглавинѓум панда повише. Ко 19 берш астарѓе ман хем пханле ман ко затвор башо чорибе хем башо адава со пробинѓум те мударав некас. Ко затвор кхувѓум ки јекх банда хем понадари да понашинава ман сине насилно. Адалеске сиум сине префрлимо ко затвор коте со сине бут баро обезбедување, ко Луисбург (Пенсилванија, САД).

 Ко затвор ко Луисбург уљум панда полошно. Адалеске со сине ман тетоваже тари банда колате со сиум сине, о членија тари исто банда ко акава затвор сигате прифатинѓе ман. Сар со накхела сине о време, овава сине са поагресивно хем марава ман сине бут е јаверенцар. Јекх пути учествујнѓум кеда марѓе пе о банде ко затворско дворо. О марибе сине бут опасно, сегде летинена сине бејзбол палке хем тегија. Те шај те чхинавен амен, о стражарија фрдинѓе солзавец. Башо акава со случинѓа пе, сиум сине преместимо ко јекх посебно оддел башо опасна затвореникија. Сиум сине сар темпирими бомба хем бут акошава сине. На сине манге нисаво проблеми те марав некас, па чак уживинава сине ко адава. Мли совест ни најхари на мучинела ман сине башо мле постапке.

 Ко оддел башо опасна затвореникија, побаро дело таро диве ваљани сине те овав ки ќелија. Те шај посигате те накхел манге о време почминѓум те читинав и Библија. Јекх пути, јекх таро чуварија денѓа ман о лил Ту шај засекогаш те живине ко рај ки Пхув. * Џикоте читинава сине акава лил, сетинѓум ман ко буќа со сиклиљум лен сар чхаво џикоте проучинава сине и Библија е Јеховаскере сведоконцар. Почминѓум те размислинав башо адава кобор руминдиљум адалеске со сиум сине насилно. Размислинѓум баши мли фамилија да. Дуј таро мле пхења уле е Јеховаскере сведокија. Ко јекх моменти мислинѓум манге: „Ола ка живинен засекогаш“. Пало адава вакерѓум манге: „А соске ме да те на живинав засекогаш?“ Таро адава моменти сиум сине решимо те менинав ман.

 Сепак, џанава сине кај коркори нашти керава адала промене. Адалеске, прво ки молитва молинѓум е Јехова те поможинел манге. Пало адава, пишинѓум писмо џи ки подружница е Јеховаскере сведоконгири ко САД хем родинѓум библиско курси. И подружница грижинѓа пе о пхраља тари адаја околина те контактиринен манцар. Ко адава периоди сине манге дозволимо само те овен ман посете тари мли фамилија. Адалеске со нашти сине те посетинел ман, јекх Сведоко кова со живинела сине паше почминѓа те бичхалел манге охрабрувачка писмија хем библиско литература. Акава керѓа те шај те овав панда поодлучно те менинав ман.

 Јекх важно чекори со керѓум сине со иклиљум тари банда колате сиум сине члени бершенцар. О водачи е бандакоро исто аѓаар сине ко оддел башо опасна затвореникија. Јекх пути кеда сине амен слободна активностија ко затвор, вакерѓум леске кај мангава те овав е Јеховаскоро сведоко. Сиум сине изненадимо кеда вакерѓа манге: „Ако чаче мангеа те ове е Јеховаскоро сведоко, нане проблеми. На мангава те овел ман бути е Девлеа. Ама ако акава туке само изговор те шај те икљове тари банда, тегани џанеа со аџикерела тут“.

 О наредна дуј берша, о мануша со керена сине бути ко затвор дикхле кај ме менинава ман хем почминѓе јавер чхане те понашинен пе манцар. На пример, кеда џава сине те нанѓовав на чхивена манге сине повише лисице. Јекх стражари охрабринѓа ман те на чхинавав те керав промене. Уствари, о одговорна ко затвор одлучинѓе о последно берш тари мли казна те накхавав ле ко јекх кампи башо затвореникија коте со на сине бут обезбедување, хем адава кампи сине паше узо затвор. Ко 2004 берш, откеда накхљум 10 берш ко затвор, сиум сине ослободимо хем ингардо затворско автобусеа ко Мексико.

 Кеда ресљум ко Мексико, одма родинѓум и дворана е Јеховаскере сведоконгири. Ко прво состанок кеда гељум сиум сине уравдо ко затворска шеја — адала сине единствена пристојна шеја со сине ман. Иако сиум сине аѓаар уравдо, е Јеховаскере сведокија доџакерѓе ман шукар. Кеда дикхљум ленгоро мангипе, мислинѓум манге кај акала мора те овен о чачутне христијања (Јован 13:35). Ко состанок, о старешине грижинѓе пе некој те проучинел манцар и Библија. Пало јекх берш, ко 3 септември 2005 берш, крстинѓум ман хем уљум е Јеховаскоро сведоко.

 Ко јануари 2007 берш, почминѓум те одвојнав 70 саатија ко масек те сикавав е јаверен баши Библија. Ко 2011 берш, сиум сине ки Библиско школа башо бижениме пхраља (акана викинела пе Школа башо полновремена објавителија). Акаја школа бут поможинѓа манге те шај пошукар те завршинав мле одговорностија ко собрание.

 Ко 2013 берш, женинѓум ман јекхе пхењаја со викинела пе Пилар. Кеда вакерава лаке башо адава саво мануш сиум сине англедер, пхаро лаке те верујнел ко адава. Никогаш повише на иранѓум ман ко пурано начин сар живинава сине мло живото. Ме хем мли ромни сием увериме кај адава со менинѓум ман корендан тано доказ баши бари моќ со иси ла и Библија те менинел некаскоро живото (Римјаните 12:2).

 Мислинава кај о лафија е Исусескере сој тане пишиме ко Лука 19:10 важинена манге. Адари пишинела кај ов ало те аракхел хем те спасинел окова сој нашавдо. Повише на осетинава ман чучо хем нашавдо, хем повише на сиум опасно башо мануша ки мли околина. Адалеске со и Библија поможинѓа манге, акана шај те овел ман чачутни смисла ко живото, шукар амалипе е јаверенцар хем, најважно таро са, амалипе мле Створителеа, е Јеховаја.