Кеда керела пе лафи башо парујбе, амен кераја адава сар со сикавела амен е Девлескоро Лафи, а адала сикљојба тане:

•   Нормално тано те жалина кеда мерела амендар некој со мангаја ле. Е Исусескере ученикија ровѓе кеда муло некој таро ленгере мангле (Јован 11:33-35, 38; Дела 8:2; 9:39). Исто аѓаар, амен на дикхаја ко парујбе сар време кеда шај те веселина амен (Проповедник 3:1, 4; 7:1-4). Амен ко адава дикхаја сар време кеда шај те сикава кај хаљоваја е манушен сој дукхавде (Римјаните 12:15).

•   О муле на џанена ништо. Бизи разлика таро кова тхан или култура аваја на кераја адетија кола со на темелинела пе ко е Девлескоро Лафи, кај и душа е мулескири понадари да живинела или кај шај те керен нешто е манушенге сој џивде (Проповедник 9:5, 6, 10). Несаве таро адала адетија тане те аракхен е мулен, те улавен хајбе е муленге, те ден жртва е муленге, те керен лафи е муленцар хем те икерен кало. Амен на кераја адала адетија, адалеске со мангаја те шуна адава со вакерела аменге о Девел: „Одвојнен тумен... хем повише ма пипинен ништо сој мелало“ (2. Коринќаните 6:17).

•   Иси надеж е муленге. И Библија вакерела аменге кај о муле палем ка живинен хем кај ка авел време кеда нане те овел више мерибе (Дела 24:15; Откровение 21:4). Акаја надеж дела амен сила кеда мерела амендар некој, исто сар со денѓа сила е христијаненге ко прво веко (1. Солуњаните 4:13).

•   Амен ваљани те ова скромна (Изреки 11:2). Кеда парунела пе некас амен на мангаја те сикава амен англо јавера хем на мангаја те дикхјол кобор сием барвале (1. Јованово 2:16). Адалеске, на организиринаја барвало парујбе те шај те воодушевина е јаверен, на пример, те кина скупа сандукија или јавера скупа буќа парујбаске.

•   На теринаја е јаверен те дикхен ко парујбе сар амен со дикхаја. Амен икераја амен ко адава со вакерела и Библија: „Секој амендар ка одговоринел коркори песке англо Девел“ (Римјаните 14:12). Ама ако иси амен прилика башо адава, амен ка да са амендар те вакера ко со верујнаја, ама адава ка кера ле шукарипаја хем ка сикава хор поштовање (1. Петрово 3:15).

 Тхан: О парујбе керела пе ко гробија, а ко несаве пхувја икерела пе говор англедер о парујбе. Адава шај те овел ко кова било тхан коте со ка мангел и фамилија, сар сој тано ки дворана, ки капела, кхере или ко гробија.

 Верско служба: О говор икерела пе те шај те дел пе сила околенге сој бут пхаро адалеа со објаснинела пе со вакерела и Библија башо мерибе хем баши надеж кај о муле ка живинен палем (Јован 11:25; Римјаните 5:12; 2. Петрово 3:13). Исто аѓаар, ко говор вакерела пе кобор шукар мануш сине адава со муло хем со шај те сикљова таро адава со сине верно е Девлеске (2. Самоилова 1:17-27).

 Ко парујбе шај те гиљавел пе гили која со темелинела пе ки Библија (Колошаните 3:16). Ко крајо вакерела пе молитва која со ка дел сила околен сој ленге бут пхаро (Филипјаните 4:6, 7).

 На кхедена пе паре: Амен на платинаја и верско служба, ни о парујбе, а ни на кхедаја паре ко амаре состанокија (Матеј 10:8).

 Кој шај те авел ко парујбе: Окола со нане е Јеховаскере сведокија шај те авен ко парујбе хем ко говор со икерела пе ки дворана. Ко са амаре состанокија шај те авел кој мангела.

 Секова е Јеховаскоро сведоко одлучинела коркори песке хем адава керела спрема пли совест која сој тани сикавди тари Библија (1. Тимотеј 1:19). Ама, на учествујнаја ко верска обичаија кола со мислинаја кај нане ко склад е Библијаја (2. Коринќаните 6:14-17).