Dži ko Rimjanja 5:1-21
5 Adaleske so baši amari vera o Devel vakerela kaj siem pravedna, te ačhova ko mir e Devlea preku amaro Gospodari o Isus Hristos.
2 Preku amari vera ko Isus, phravdilo amenge o drumo te šaj o Devel te sikavel amenge plo šukaripe so na zaslužinaja le. Šaj te ova radosna, soske isi amen nadež kaj ka dobina i slava koja so dela la o Devel.
3 Na samo adava, nego amen šaj te ova radosna hem keda siem ko nevolje, soske džanaja kaj o nevolje kerena te ova istrajna.
4 Amari istrajnost, anela dži ko adava o Devel te prifatinel amen, hem adava so o Devel prifatinela amen, dela amen nadež.
5 A i nadež nane te razočarinel amen, soske e Devleskoro mangipe phergja amare vile preku pli sila,* koja soj amenge dendi.
6 Panda džikote siem sine grešna,* o Hristos mulo bašo lošna manuša, ko vreme kova so sine odredimo bašo adava.
7 Retko kaj nekoj ka merel bašo pravedno manuš, ama bašo šukar manuš, šaj nekoj bi ovela spremno te merel.
8 A o Devel sikavgja amenge plo mangipe agjaar so o Hristos mulo amenge, panda džikote siem sine grešnikija.
9 Adaleske akana, keda o Devel vakerela baši amende kaj siem pravedna preku e Isuseskoro rat, šaj te ova panda posigurna kaj ka ova spasime tari e Devleskiri holi.
10 Iako siem sine e Devleske dušmanja, amen ulem leskere amala* adaleske so leskoro Čhavo mulo amenge. Hem akana keda siem e Devleskere amala,* šaj te ova panda posigurna kaj ka ova spasime adaleske so o Isus tano dživdo.
11 Adava so o Devel kergja preku amaro Gospodari, o Isus Hristos, kerela amen radosna, soske preku leste amen akana ulem e Devlea amala.*
12 Adaleske, sar so preku jekh manuš o grevo khuvgja ko sveto hem preku o grevo o meribe, agjaar o meribe širingja pe ko sa o manuša, soske sarine grešingje.
13 O grevo sine ko sveto angleder o Zakoni. Ama ni jekhe manuše našti te krivinel pe kaj kergja grevo keda nane zakoni.
14 Sepak, o meribe vladinela sine sar cari taro e Adameskoro vreme dži ko e Mojseeskoro vreme, čak upro okola kola so na grešingje sar so grešingja o Adam, kova so sine slično okolea so valjani sine te avel.
15 Ama e Devleskoro poklon nane isto sar e Adameskoro grevo. Bašo grevo jekhe manušeskoro, but manuša mule. Ama e Devleskoro šukaripe so na zaslužinaja le hem leskoro poklon, tane but pobare. Soske, preku adava poklon o Devel bute manušenge dela bare blagoslovija. Adava poklon o Devel dengja amen preku jekhe manušeskoro šukaripe so na zaslužinaja le, e Isus Hristoseskoro.
16 O poklon taro Devel hem o grevo jekhe manušeskoro, isto agjaar razlikujnena pe ko akava da: o grevo jekhe manušeskoro angja dži ko adava sa o manuša te oven osudime sar kriva, a o poklon so dengja o Devel, otkeda o manuša but grešingje, angja dži ko adava o Devel butenge te vakerel kaj tane pravedna.
17 Preku o grevo adale jekhe manušeskoro, o meribe vladinela sar cari. Ama e Devleskoro šukaripe so na zaslužinaja le hem leskoro poklon so dela le amenge te šaj te ova pravedna, tane pobare hem pošukar. Okola so dobinena akala bukja taro Devel, ka živinen hem ka vladinen sar carija preku akava jekh manuš, o Isus Hristos.
18 Adaleske, sar so preku jekh grevo, sa o različna manuša tane osudime te meren, agjaar preku jekh pravedno postapka, o Devel vakerela sa e različna manušenge kaj tane pravedna hem adaleske dobinena životo.
19 Soske, sar so preku jekhe manušeskiri neposlušnost, but džene ule grešna, agjaar preku jekhe manušeskiri poslušnost, but džene ka oven pravedna.
20 O Zakoni sine dendo te sikavel kobor o manuša sine grešna. Ama keda o manuša kergje but grevija, tegani o Devel sikavgja lenge panda poviše plo šukaripe so na zaslužinaja le.
21 Isto sar o grevo so vladingja sar cari zaedno e meribaja, agjaar e Devleskoro šukaripe so na zaslužinaja le, akana vladinela sar cari preku i pravednost, te šaj o manuša te dobinen večno životo preku o Isus Hristos, amaro Gospodari.
Footnotes
^ Ili: „preku o sveti duh“. Dikh ko rečniko baši „Devleskiri sila“.
^ Doslovno: „slaba“.
^ Doslovno: „smiringjem amen e Devlea“.
^ Doslovno: „keda smiringjem amen e Devlea“.
^ Doslovno: „akana smiringjem amen e Devlea“.
