Mangle phraljalen hem phenjalen

Ko eftato veko a.a.e. o proroko o Ezekiel dikhlja jekh posebno vizija. Ov dikhlja jekh bari nebesno kočija koja so vodinela la o Najbaro ko celo univerzum. I kočija dvižinela pe sine but sigate hem šaj sine te meninel o pravco bizo te tiknjarel i brzina ili čak bizo te iranel! (Ezek. 1:4, 9, 12, 14, 16-27).

Akaja vizija sikavela amenge kaj o nebesno delo tari e Jehovaskiri organizacija sekogaš dvižinela pe. A so kerela o delo tari e Jehovaskiri organizacija soj tano ki Phuv? Taro službeno berš so nakhlja šaj te dikha kaj e Jehovaskoro narodo ki Phuv dvižinela pe sigate!

Akate ki Amerika i betelsko familija sine zafatimi selibaja taro Bruklin ko amaro nevo glavno sedište ko Vorvik (Njujork) hem isto agjaar ko javera betelska objektija ili ko podračje. Ko javera da podružnice ko sveto o betelska familie isto agjaar tane zafatime gradibaja hem renoviribaja. Isto agjaar nesave podružnice spojngje pe ili selingje pe. A sar tano tumencar? Iako šaj na valjani sine te selinen tumen sigurno sien sine zafatime ki služba bašo Jehova.

But siem ohrabrime keda dikhaja kaj e Devleskoro narodo ko celo sveto tano pozafatimo taro bilo keda angleder hem tano ko tek e Jehovaskere organizacijaja. But objavitelija odlučingje te selinen pe ko thana kote so isi pobari potreba. Javera počmingje te propovedinen ki javer čhib. But džene probingje nevi granka tari služba ili bajrargje pli služba ko javera načinija. Sa o verna sluge maškar kola soj o pophure hem o nasvale istrajno prastana ki trka so ingarela ko životo. Ola tane zafatime ki služba bašo Jehova hem agjaar sikavena kaj o Satana tano hovavno (1. Kor. 9:24).

Oven sigurna kaj o Jehova dikhela tumari revnost so sikavena la (Evr. 6:10). Tumaro spremno stavi setinkerela amen ko Avraam hem ki Sara. Keda sine le poviše taro 70 berš o Avraam mukhlja i diz Ur kote so bijandilo hem gelo dur ko Hanaan kote so valjani sine te živinel ko šatorija panda šel berš dži ko krajo taro plo životo. Le hem e Sara čače sine len spremno stavi! (1. Moj. 11:31; Dela 7:2, 3).

Dali tumen da isi tumen asavko spremno stavi? Sekoj so verno hem istrajno služinela e Jehovaske ko akala phare vremija kerela adava so vakergja amenge o Isus: „Džan hem keren učenikija taro manuša taro sa o narodija hem krstinen len ko anav  e Dadeskoro hem e Čhaveskoro hem e sveti duhoskoro“ (Mat. 28:19).

Adava so o Isus vakergja „džan“ sikavela kaj valjani te ova aktivna. Bahtale siem keda dikhaja kobor but bukja kergje leskere revna sledbenikija ko berš so nakhlja. Dikhjola pe kaj o Jehova dengja but baro bereketi ko propovedibe kolea so objavinela pe o šukar haberi sa e narodonge (Mar. 13:10).

But manuša prifatinena o šukar haberi. O berš so nakhlja najbaro broj taro objavitelija sine 8.340.847 hem sekova masek ko prosek vodinena pe sine 10.115.264 bibliska kursija. Jasno dikhjola kaj i nebesno kočija dvižinela pe sigate! Adaleske ponadari da keren i služba soske ačhilo panda hari vreme o manuša te spasinen pe.

Kobor samo odgovorinela akale beršeskoro stiho: „Neka ovel tut doverba ko Jehova hem ker adava soj šukar“ (Ps. 37:3). Keda šunena akala lafija hem kerena adava soj šukar agjaar so kerena sveto služba e Jehovaske sikavena kaj isi tumen doverba ki leste. Nikogaš ma bistren kaj na sien korkori. O Isus sekogaš ka ikerel pe ko ple lafija: „Me sium tumencar ko sa o dive dži ko krajo akale svetoskoro“ (Mat. 28:20).

O Jehova ponadari da ka nagradinel tumari verno služba. Bizi razlika dali adava so keraja le tano hari ili but ov ceninela keda daja amaro najšukar hem keda keraja adava taro ispravna motivija. Tegani ov tano bahtalo hem celo vilea prifatinela o bukja so keraja baši leste (2. Kor. 9:6, 7). Adaleske ponadari da ačhoven paše tumare mangle Dadea agjaar so ka molinen tumen redovno ka proučinen i Biblija ka džan ko sostanokija hem ka oven zafatime e propovedibaja.

Adaleske so e Benge isi le panda „hari vreme“ ov tano odlučno te kerel sa so šaj samo te na ačhoven verna e Jehovaske (Otk. 12:12). Ačhoven paše e Jehovaja hem o Satana nane te uspejnel ko adava (Ps. 16:8). But mangaja tumen hem ceninaja sa adava so kerena ki služba e Gospodareske ko akala posledna dive.

Tumare phralja

Vodečko telo e Jehovaskere svedokongoro