O Jehova dengja e Izraelconge sudie te vodinen len, ama ola rodingje cari. Adaleske vakergje e Samoileske: „Sa o narodija okolu amende isi len carija. Amen da mangaja te ovel amen cari“. O Samoil džanlja kaj adava tano pogrešno, hem adaleske molingja pe e Jehovaske. O Jehova vakergja leske: „O manuša na otfrlinena tut, nego man. Vaker lenge kaj ka dobinen cari, ama adava cari ka rodel lendar but bukja“. Iako džanena sine adava, ola vakergje: „Nane amenge gajle. Amen mangaja cari!“

O Jehova vakergja e Samoileske kaj o prvo cari ko Izrael ka ovel jekh manuš so vikinela pe Saul. Keda o Saul gelo ko Samoil ki Rama, o Samoil pomazingja e Saule, ili čhivgja le te ovel cari adalea so čhorgja leske upro šero maslo.

Palo adava, o Samoil vikingja e Izraelcon te kheden pe te sikavel lenge e neve care. Ama, našti sine te arakhen e Saule nigde. Džanea li soske? Adaleske so garavela pe sine. Keda arakhle le, angje le maškar o narodo. O Saul sine najučo sarinendar hem sine but šužo. Tegani o Samoil vakergja: „Dikhen kaste o Jehova biringja te ovel cari“. Keda dikhle o manuša e care sine but radosna.

Ko početok, o cari, o Saul šunela sine e Samoile hem sine verno e Jehovaske. Ama, palo nesavo vreme meningja pe. Na primer, o cari na valjani sine te del žrtve. Ki jekh prilika, o Samoil vakergja e Sauleske te adžikerel le te avel, ama o Samoil na alo odma. Adaleske, o Saul odlučingja te del ov i žrtva. Sar reagiringja o Samoil keda dikhlja akava? Ov vakergja leske: „Valjangjan te šune e Jehova“. Dali o Saul taro akava siklilo kobor tano važno te ovel poslušno?

Palo nesavo vreme, keda gelo o Saul te borinel pe e Amaličanencar, o Samoil vakergja leske te mudarel sarinen. Ama, o Saul odlučingja te na mudarel e care Agag. O Jehova vakergja e Samoileske: „O Saul više na šunela man“. O Samoil sine but tažno, hem vakergja e Sauleske: „Adaleske so tu na šunea e Jehova, ov ka birinel javer cari“. Keda o Samoil irangja pe  te džal peske, o Saul astargja le tari nametka, ama i nametka cidindili taro leskoro vas. Tegani o Samoil vakergja leske: „Isto sar mi nametka so cidindili taro tlo vas, agjaar o Jehova avdive ka cidel o carstvo taro tle vasta“. O Jehova ka del o carstvo nekaske soj leske poslušno hem so mangela le.