O Josafat, o cari ki Juda, uništingja ki celo phuv sa o žrtvenikija hem o idolija e Vaaleskere. Ov manglja o manuša te džanen e Jehovaskere zakonija. Adaleske bičhalgja knezija hem levitija te sikaven sa e narodo ki Juda bašo akala zakonija.

O narodija so sine paše uzi Juda darana sine te napadinen la soske džanena sine kaj o Jehova tano lencar. Ola čak ingargje poklonija e Josafateske. Ama, palo nesavo vreme, o Moavcija, o Amoncija hem o manuša so živinena sine ko Seir khedingje pe te borinen pe protiv i Juda. O Josafat džanlja kaj valjani leske e Jehovaskiri pomoš. Dengja naredba sa o murša, o džuvlja hem o čhave te aven ko Erusalim. Anglo sa o narodo, molingja pe: „Jehova, bizi tute našti te pobedina. Molinaja tut vaker amenge so te kera“.

O Jehova odgovoringja ki akaja molitva: „Ma daran, me ka pomožinav tumen. Samo redinen tumen, tergjoven hem dikhen sar me ka spasinav tumen“. Sar o Jehova spasingja len?

Tajsutno dive, sabajle, o Josafat biringja grupa peačija hem vakergja lenge te džan angli vojska. Ola cidingje taro Erusalim ko than kote so valjani sine te borinen pe, adava than vikinela pe sine Tekoja.

Džikote o peačija radosno falinena sine e Jehova ko celo glaso, o Jehova borinela pe sine bašo plo narodo. Ov kergja o Moavcija hem o Amoncija te oven doborom bunime so počmingje te mudaren pe maškar peste, hem nijekh lendar na ačhilo dživdo. Ama, o Jehova zaštitingja e manušen tari Juda, e vojnikon hem e sveštenikon. Sa o manuša so živinena sine ko phuvja okolu lende šungje bašo adava so kergja o Jehova, hem halile kaj o Jehova panda zaštitinela ple narodo. Sar o Jehova spasinela ple narodo? Ko but načinija. Te šaj te kerel adava, na valjani leske pomoš taro manuša.