„O PRAVEDNIKO ka dživdinel adaleske so isi le vera“, vakerela e Devleskoro Lafi (Rimjanite 1:17). Akala lafija dena but šužo vetuvanje kova so važinela tuke da. Sar adava?

Keda završingja pi zadača ki Phuv, o pekamberi o Isa, o Mesija, gelo upre ko nebo te ovel e Devlea. E Devleskoro Lafi vakerela kaj o učenikija dikhle keda „ov sine vazdimo ko nebo hem jekh oblako garavgja le taro lengere jakhja“ (Dela 1:9). Ko nebo, o Devel kergja le silno Cari. Panda hari, keda o Isa „ka resel ki pli slava hem sa o angelija lea, tegani ka bešel ko plo slavno prestol. Hem sa o narodo ka khedel pe angli leste hem ov ka odvojnel e manušen ko duj grupe, sar jekh pastiri so odvojnela e bakhren taro buznja“ (Matej 25:31, 32). Keda ka ovel adava?

E Devleskoro Lafi angleder vakergja kaj ka avel pharo vreme ki celi Phuv, a adava ka ovel znako kaj tano paše o vreme keda o Mesija ka avel te sudinel e manušenge. O Isa vakergja kaj ko adava znako ka oven akala da bukja: „Ka uštel narodo protiv narodo, hem carstvo protiv carstvo. Hem ka oven bare zemjotresija, a ko razna thana ka oven zarazna nasvalipa hem bokhalipe. O manuša ka dikhen bukja so ka daraven len.“ (Luka 21:7, 10, 11).

Avdive, amen dikhaja kaj e Isaskere lafija phergjona. Panda hari, o Isa ka avel te uništinel e lošna manušen. Ko krajo, o Beng da ka ovel uništimo! Celi Phuv ka ovel dženeti. Sa o manuša ka dživdinen ko mir jekh jekhea, čak ka oven ko mir e životnencar. „O ruv nesavo vreme ka dživdinel e bakhrea, o leopardi ka pašljol uzi tikni buzni, o telco hem o terno lavi hem o šukar parvardo životno ka oven jekh uzo jekh, hem tikno čhavo ka phiravel len. Pobuter nane te kerel pe lošnipe“ (Isaija 11:6, 9). Isto agjaar, e Devleskoro Lafi vakerela: „Nijekh taro manuša nane te vakerel: ,Nasvalo sium‘ ... Tegani o jakhja e korolengere ka phravgjon hem o kana e kašukengere ka šunen“ (Isaija 33:24; 35:5). Čak o mule palem ka dživdinen. „O Jehova ka kosel o asva taro sekova muj“ hem „meribe nane te ovel, ni žalibe, ni rojbe, ni dukha“ (Isaija 25:8; Otkrovenie 21:4). Tegani ka phergjol adava so o Devel manglja te kerel panda taro početok. Adžikerela amen but šužo dživdipe!

Kaske o Devel ka del večno dživdipe ko dženeti? E manušenge so isi len vera — čačutni vera ki leste!

Te na bistra kaj i čačutni vera avela taro adava keda točno pendžaraja e Devleskoro Lafi. Adaleske, ponadari da te sikljova bašo Devel hem bašo Isa!

Sikavaja kaj čače verunjaja ko Devel ako keraja pravedna bukja. E Devleskoro Lafi vakerela kaj i vera na sikavela pe samo lafencar nego adalea da so keraja (Jakov 2:26). Ako keraja asavke šukar bukja tegani sikavaja šukar osobine sar e Devleskere — sila, pravda, mudrost hem mangipe.  Te trudina amen ponadari da kobor so šaj pobuter te sikava akala šukar osobine!

I čačutni vera ko Devel ka anel amenge bare bereketija. Oja, oj ka anel amenge bahtalo dživdipe — akana hem zasekogaš!