BUT džene avdive vakerena kaj verunjena ko Devel. Ama o Isa vakergja kaj but hari manuša ka ovel len čačutni vera ko Devel. Ov phengja: „Buvlo tano o drumo so ingarela ko uništuvanje, hem but džene džana ki leste. A tesno tano o udar hem tesno tano o drumo so ingarela ko dživdipe, hem hari džene arakhena le“ (Matej 7:13, 14).

Sar o manuša avdive sikavena kaj isi len čačutni vera ko Devel? „Taro lengere plodija ka pendžaren len“, vakergja o Isa. „Sekova šukar kaš dela šukar plodi, a sekova kirno kaš dela lošno plodi“ (Matej 7:16, 17). Znači, i čačutni vera ko Devel dela „šukar plodi“. Oj kerela o manuša te sikaven osobine save so mangela o Devel. Sar sikavena adala osobine?

O manuša so isi len čačutni vera koristinena pi sila hem po avtoriteti te služinen e Devleske hem te pomožinen e javerenge. O Isa phengja: „Koj mangela te ovel baro maškar tumende neka ovel tumenge sluga“ (Marko 10:43). O čačutne vernikija nane nasilna, ni khere ni avri taro plo kher. Ola but ceninena pumare romnjen, poštunjena len hem mangipaja grižinena pe lenge. Ko e Devleskoro Lafi bešela: „Tumen romalen, mangen tumare romnjen hem ma ponašinen tumen lencar grubo“ (Kološanite 3:19). „Romalen, dživdinen tumare romnjencar agjaar sar so siklilen, ceninen len sar ponežno vazna, soske ola da sar tumende nasledinena o dari e dživdipaskoro. Te na kergjen adava, tumare molitve nane te oven šunde“ (1. Petrovo 3:7).

Isto agjaar, jekh romni so isi la čačutni vera ko Devel valjani „taro vilo te poštunjel pe rome“ (Efešanite 5:33). O romnja valjani „te mangen pe romen“ hem „te mangen pe čhaven“ (Tit 2:4). O dada hem o daja kola so i vernikija nakhavena vreme pe čhavencar hem sikavena len bašo e Devleskoro zakon hem načelija. Kote bilo te oven, khere, ki buti ili javerthe, ola poštunjena hem ceninena e javeren. Ola šunena e Devleskoro sovet: „Oven prva te sikaven poštovanje e javerenge“ (Rimjanite 12:10).

E Devleskere sluge ikerena i zapoved so i lenge dendi ko e Devleskoro Lafi: „Ma le mito“ (2. Mojseeva 23:8). Ola nikogaš na koristinena po avtoriteti te keren lošna bukja, nego dikhena sar te pomožinen e javerenge, posebno adalenge kaske so valjani te pomožinel pe. Ola šunena o sovet: „Ma bistren te keren šukaripe hem delinen adava so isi tumen e javerencar, soske asavke žrtve mangela o Devel“ (Evreite 13:16). Adaleske ola džanena kaj tane čače akala lafija so vakergja len o Isa: „Pobuter isi bahtalipe keda dela pe nego keda lela pe“ (Dela 20:35).

O manuša so verunjena ko Devel taro vilo, šunena leskoro zakon hem leskere zapovedija nane lenge phare  (1. Jovanovo 5:3). Ola džanena kaj „e Jehovaskoro zakon tano sovršeno... e Jehovaskere naredbe tane pravedna, radunjena o vilo, e Jehovaskiri zapoved tani čisto, phravela o jakhja“ (Psalm 19:7, 8).

Adaleske so isi len čačutni vera ko Devel, leskere sluge ko nisavo način na kerena razlika maškar o manuša. Ola na vazdena jekh rasa ili phuv upri javer, hem na dikhena ki savi položba tano nesavo manuš, nego ko akala bukja dikhena sar so dikhela o Devel. Leskoro Lafi vakerela: „O Devel na odvojnela e manušen, nego tari sekoja nacija prifatinela okole so darala lestar hem kerela adava so i pravedno“ (Dela 10:34, 35).

I čačutni vera ko Devel kerela o manuša ,ko sa o bukja te oven poštena‘ (Evreite 13:18). Jekh manuš so čače verunjela ko Devel nane te vakerel lošna bukja bašo javera ili te čhivel iftira e javerenge. O Dauti pišingja kaj o Devel mangela e manušen so ,na vakerena iftire pe čhibjaja. Na kerena nisavo lošnipe pe paše amaleske‘ (Psalm 15:3).

O manuša so isi len čačutni vera ko Devel verunjena samo ko adava so sikavela leskoro Lafi. Ola verunjena kaj „celo Lil avela taro Devel hem korisno tano te sikavel e manuše, te sikavel keda nešto tano pogrešno, te ispravinel sa o bukja hem te sikavel sar te dživdinel pe pravedno sar so mangela o Devel“ (2. Timotej 3:16). Ola ponašinena pe e javere manušencar agjaar so sikavena „i mudrost so avela upraldan“, koja so kerela len te oven ,čista, te mangen o mir, te oven razumna, spremna te šunen, te oven pherde šukaripaja hem te keren šukar bukja‘ (Jakov 3:17). Ola cidena pe taro adetija so na mangela o Devel, taro spiritizam hem taro idolija (1. Jovanovo 5:21).

O pekamberi o Musa vakergja: „Mang e Jehova, te Devle, sa te vilea, sa te dušaja hem sa te silaja“ (5. Mojseeva 6:5). Agjaar mangena e Devle o manuša so isi len vera ki leste. Ola poštunjena e Devleskoro anav, Jehova. Ola tane ,blagodarna e Jehovaske‘ hem veraja vakerena leskoro anav (Psalm 105:1). E Devleskere sluge isto agjaar ikerena i zapoved: „Mang te pašutne sar korkori tut“ (3. Mojseeva 19:18). Ola nane nasilna hem trudinena pe te oven ko „mir sa e manušencar“ (Rimjanite 12:18). Adava anela te ovel len mangipe maškar lende hem te radunjen pe bašo lengoro phralipe ko celo sumnal (Jovan 13:35). Šaj li te pendžare adale manušen avdive?