E DEVLESKORO Lafi sikavela kaj e Devle isi le but šukar osobine, hem agjaar pomožinela amenge te pendžara le. Na primer, vakerela amenge bašo štar glavna osobine e Devleskere — sila, pravda, mudrost, hem mangipe. Te dikha sekoja jekh lendar.

O Jehova vakergja e Ibrahimeske (Avraameske): „Me sium o Semokjno Devel“ (1. Mojseeva 17:1). Nikas nane sar e Devleskiri sila, ov šaj te kerel sa hem leskere sila nane la krajo. Pe silaja, o Devel kergja celi vselena.

O Devel nikogaš na koristinela pi sila lošna bukenge, ov sekova puti koristinela la bašo korisna bukja hem kobor so valjani. Keda koristinela la, ov ko isto vreme sikavela pravda, mudrost hem mangipe.

O Jehova but mangela pe silaja te pomožinel pe verna slugenge. E Devleskoro Lafi vakerela: „O Jehova pe jakhencar rodela ki celi phuv te sikavel pi sila ki korist okolenge so služinena leske celo vilea“ (2. Letopisi 16:9). Na mangaja li te ova paše asavke Devlea kova tano but silno hem kova so mangela te pomožinel amen?

„O Jehova mangela i pravda“ (Psalm 37:28). Ov najšukar džanela so i pravedno hem sekogaš kerela adava so i ispravno.

O Devel mrzinela i nepravda. Ov „na odvojnela e manušen hem na priminela mito“ (5. Mojseeva 10:17). Ov tano protiv okola so anena pharipe e javerenge, a pomožinela okolenge so nane koj te braninel len, sar so i ,o udovice ili o čhave bizo dad‘ (2. Mojseeva 22:22). E Devleske sa o manuša tane ista. Ko leskoro Lafi vakerela: „O Devel na odvojnela e manušen, nego tari sekoja nacija prifatinela okole so darala lestar hem kerela adava so i pravedno“ (Dela 10:34, 35).

E Jehovaskiri pravda tani sovršeno. Ov ni but na premukhela, ni nane but strogo. Ov kazninela okolen so na kajnena pe keda grešinena, a sikavela milost okolenge so kajnena pe. Ko e Devleskoro Lafi tergjola: „O Jehova tano sočuvstvitelno hem šukar, na holjanela sigate hem pherdo tano milost. Nane zasekogaš te pamtinel o greške, ni nane te ovel holjamo zasekogaš. Na postapinela amencar spored amare grevija hem na iranela amenge adava so zaslužinaja bašo amare greške“ (Psalm 103:8-10). O Devel isto agjaar, pamtinela o šukar bukja so kerena leskere verna sluge hem dela len nagrada. Na zaslužinela li asavko pravedno Devel te verunja ki leste?

E Jehovastar avela i mudrost. Ko leskoro Lafi bešela: „O kobor tane but bare o bereketija so avena taro Devel hem but tane hor leskiri mudrost hem o džandipe!“ (Rimjanite 11:33). Leskiri mudrost tani najbari hem nane la krajo.

E Devleskiri mudrost šaj but šukar te dikhel pe taro bukja so kergja len. Ko e Devleskoro Lafi pišinela: „Kobor but tane o bukja so kergjan len, Jehova! Sa tane mudro kerde tutar“ (Psalm 104:24).

E Devleskoro Lafi isto agjaar sikavela amenge leskiri mudrost. O cari o Dauti (David) pišingja: „Ki pouka e Jehovaskiri šaj te verunjel pe, oj kerela mudro okole so nane iskusno“ (Psalm 19:7). Zamislin — amen šaj te sikljova tari e Devleskiri bari mudrost! Ka kera li adava?

E Jehovaskiri glavno osobina tani o mangipe. „O Devel tano mangipe“, vakerela amenge leskoro Lafi (1. Jovanovo 4:8). Sa so kerela, kerela taro mangipe.

O Devel sikavgja amenge po mangipe ko but načinija adalea so dengja amen but šukar bukja.  Ko leskoro Lafi vakerela: „Kergja šukaripe, dengja tumen bršim taro nebo hem vremija keda i phuv dela but plodija, phergja tumare vile hajbaja hem bahtalipaja“ (Dela 14:17). Čače, „sekova šukar dari hem sovršeno poklon avela upraldan, soske hulela taro Dad so kergja o nebesna svetlija“ (Jakov 1:17). Jekh taro najvredna poklonija tano e Devleskoro Lafi. Adathe o Devel sikavela amenge savo tano Ov hem sikljovaja bašo leskere zakonija hem načelija pherde mangipaja. „To lafi tano čačipe“, vakergja o Isa ki molitva (Jovan 17:17).

O Devel, isto agjaar pomožinela keda isi amen problemija. „Frde to pharipe e Jehovaske, hem ov ka pomožinel tut. Nikogaš nane te mukhel o pravedno manuš te sopkinel pe“ (Psalm 55:22). Ov prostinela amare grevija. Ko e Devleskoro Lafi pišinela: „Tu, Jehova, sian šukar hem spremno sian te prostine, bari tani ti milost sprema sa okolende so rodena tu“ (Psalm 86:5). O Devel nudinela amenge večno dživdipe. Ov vetinela kaj „ka kosel sekoja asvin taro [e manušengere] jakhja, hem meribe nane te ovel, ni žalibe, ni rojbe, ni dukha“ (Otkrovenie 21:4). Dali ka irana leske bašo leskoro mangipa? Ka sikava li kaj amen da mangaja le?

O Devel mangela šukar te pendžara le. Leskoro Lafi ohrabrinela amen: „Oven paše e Devlea, hem ov ka ovel paše tumencar“ (Jakov 4:8). O Devel vakergja e verno pekambereske, e Ibrahimeske, kaj tano ,leskoro amal‘ (Isaija 41:8). O Jehova mangela tu da te ove leskoro amal.

Kobor pobuter sikljovaja bašo Devel, doborom popaše ka ova lea hem ka ova pobahtale. Ko e Devleskoro Lafi pišinela: „Bahtalo tano o manuš“ kova so „uživinela ko e Jehovaskoro zakon, čitinela hem razmislinela leskere zakoneske dive hem rat“ (Psalm 1:1, 2). Adaleske, ponadari da te sikljova taro e Devleskoro Lafi. Te razmislina leskere osobinenge hem bašo bukja so kerela len. Te sikava kaj mangaja e Devle agjaar so ka kera adava so sikljovaja, soske leskoro Lafi vakerela: „Te mangel pe e Devle značinela te ikeren pe leskere zapovedija, a leskere zapovedija nane phare“ (1. Jovanovo 5:3). Adaleske, šukar tano te molina amen agjaar sar so pišinela ko e Devleskoro Lafi: „Jehova, de man te pendžarav te drumija, sikav man te drumenge. Sikav man te džav ko to čačipe“ (Psalm 25:4, 5). Tegani ka dikha kaj o Devel „nane dur nikastar amendar“ (Dela 17:27).