E Biblija isi la bari mokj te meninel o životo e manušengoro. Te dikha duj primerija bašo akava taro Rikardo hem taro Andres.

RIKARDO: Keda sine man 15 berš uljum členi ki jekh banda. Mle neve amala but vlijajngje upri mande, adaleske čhivgjum mange cel te phanljovav deš berš ko zatvor. Akava šaj izgledinela glupavo, ama ko than kote so živinava, o manuša but poštujnena adalen so sine ko zatvor. Me da mangljum te ceninen man hem te poštujnen man.

Probingjum sa o lošna bukja — droga, nemoral hem nasilstvo. Jekh rat učestvujngjum ko pukajbe. Mislingjum kaj ka mudaren man, ama spasingjum man bizo te ovel mange nešto. Palo adava, počmingjum te razmislinav poseriozno bašo adava so ka kerav mle životoja, hem odlučingjum te meninav man. Ama, sar? So šaj sine te pomožinel man?

But džene tari mli familija našti sine vazdena šero taro problemija hem na sine hič srekjna. Ama adava na sine agjaar me vujkoskere familijaja. Džanava sine kaj tane šukar manuša hem kaj živinena sprema o bibliska načelija. Ustvari, lendar šungjum kaj o Devel vikinela pe Jehova. Adaleske, kratko palo pukajbe molingjum man e Jehovaske. Spomningjum leskoro anav hem rodingjum lestar te pomožinel man. But čudingjum man keda o tajsutnoto dive jekh taro e Jehovaskere svedokija khuvgja ko mlo udar! Ov počmingja te proučinel mancar.

Sigate palo adava, sine man baro problemi. Mle purane amala but puti javinena pe sine mange hem vikinena man sine te ikljovav lencar. Odbinava len sine iako na sine mange lokho. Sium sine odlučno ponadari da te proučinav i Biblija, hem but radujnava man so kergjum adava! Mlo životo skroz meningja pe hem akana sium čače but srekjno.

Setinava man sar jekh puti ki molitva vakergjum e Devleske kaj angleder mangljum te ovav phanlo deš berš ko zatvor sar členi ki jekh banda te šaj o javera te poštujnen man. Palo adava, molingjum man te pomožinel mange te služinav leske polnovremeno najhari deš berš hem agjaar te pomožinav e javerenge isto sar mange so pomožingje. O Devel odgovoringja ki adaja molitva. Više 17 berš pobaro delo taro mlo vreme nakhavava te sikavav e manušen baši Biblija. Hem nikogaš na geljum ko zatvor!

Ama, but džene taro mlo purano društvo tane beršencar ko zatvor. A nesave mule. Keda razmislinava bašo vreme so nakhlja but sium blagodarno mle familijake kola soj tane e Jehovaskere svedokija. Ola sine spremna te živinen sprema o bibliska merilija hem te razlikujnen pe taro javera. Poštujnava len but poviše nego so poštujnava sine bilo kas tari banda. Ama angleder sa blagodarno sium e Devleske so sikavgja mange o najšukar način živibaske.

 ANDRES: Bijandiljum hem bariljum ki jekh čoroli naselba kote so i droga, te lel pe pare silaja, o mudaribe hem i prostitucija sine nešto normalno. Mlo dad sine pijanica hem zavisno tari droga. Ov hem mli daj non-stop akošena pe sine hem marena pe.

Panda taro tiknipe počmingjum te makjovav hem te drogirinav man. Po celo dive sium sine ki ulica. Čorava sine hem palo adava bikinava sine adala bukja. Keda hari bariljum mo dad probingja te ovel mancar popaše, ama ko pogrešno način. Sikavgja man te švercujnav droga hem bukja so na sine dozvolime ki phuv hem palo adava te bikinav len. Bašo kratko vreme khedingjum but pare. Ama jekh dive ali i policija ko mlo udar. Lele man hem palo adava sium sine osudimo pandž berš te phanljovav ko zatvor adaleske so probingjum te mudarav.

Jekh sabaj čitingje izvestuvanje ko zatvor, kolea so vikingje e zatvorenikon ki jekh biblisko diskusija koja so organiziringje la e Jehovaskere svedokija. Odlučingjum te džav te šaj te dikhav bašo so kerela pe lafi. Adava so šungjum sine mange logično hem adaleske počmingjum te proučinav i Biblija. E Jehovaskere svedokija na garavgje mandar o bibliska sikljojba samo te šaj te na povredinen man, nego jasno vakergje mange soj šukar a soj lošno anglo e Devleskere jakhja.

Sigate haliljum kaj valjani mange pomoš te šaj te kerav promene. Posebno keda nesave zatvorenikija počmingje te zakaninen pe mange adaleske so na svidžinela pe sine lenge adava so počmingjum te kerav. Adaleske, molingjum e Jehova te del man sila hem mudrost, a ov pomožingja man. Na samo so na daravgje man lengere zakane, nego hem khedingjum hrabrost te vakerav e javere zatvorenikonge baši Biblija.

Keda alo o vreme te mukhen man taro zatvor, doborom darandiljum sar ka snadžinav man avrijal so mangljum te ačhovav panda hari ko zatvor. Nesave zatvorenikija kerena sine mange čao vastea džikote džava mange, a nesave sine radosna hem vakergje mange: „Ajde učitele, phravdo tlo drumo“.

Darava čak te zamislinav mange savo ka ovel sine mlo životo ako na mukhava sine o Devel te sikavel man. Previše sium blagodarno e Devleske so mangela man hem so na vazdingja ple vasta mandar. a