But manuša mučinena pe sekova dive te phanden krajo krajoja. Žalno tano adava so adaleske so o sveto tano ko haos, adava ovela sa popharo. Soske?

• Keda ko nesavo than isi različna problemija o cene bašo hajbe hem bašo živibe ovena sa pobare.

• Keda isi kriza adava šaj te kerel o manuša te našaven pumari buti ili te keren buti but hari parenge.

• Ko prirodna katastrofe šaj te oven oštetime ili uništime delovna objektija, khera ili javer imot hem adaleske but džene ovena čorole.

• Ako mudro koristinea o pare tegani šaj te ove pospremno bašo nesavi phari situacija. Ma bistre, o bukja šaj te meninen pe but sigate.

• O pare so lea, so štedinea len ili javera bukja šaj više te na vredinen.

• Nesave bukja na kinena pe parencar, sar na primer i srekja hem i sloga ki familija.

Ki Biblija pišinela: „Ako isi amen hajbaske, urajbaske hem than živibaske, te ova zadovolna akale bukjencar“ (1. Timotej 6:8).

Te ova zadovolna značinela te kera razlika maškar adava so bi mangaja te ovel amen hem adava so čače valjani amenge. Akava tano posebno važno ako nane amen but pare.

Te šaj te ove zadovolno adalea so isi tut šaj ka valjani te kere nesave promene ko način sar živinea. Ako sekogaš mangea te kine tuke bukja so našti dozvolinea tuke tegani ka oven tut finansiska problemija.