STATIJA PROUČIBASKE 6
GILI 18 Blagodarna baši otkupnina
O Jehova prostinela — soske ceninaja adava
O Devel doborom but manglja o sveto, so dengja ple edinstveno bijame Čhave (JOVAN 3:16)
SO KA SIKLJOVA
Ka bajrara amaro cenenje bašo adava so o Jehova prostinela amare grevija agjaar so ka dikha so kergja ov te šaj ola te oven prostime.
1-2. Sar i situacija e manušengiri tani slično sar e terne manušeskiri soj spomnimo ko prvo pasus?
ZAMISLIN TUKE jekhe terne manuše kova so barilo ki jekh barvali familija. Jekh dive slučinela pe tragedija. Leskere roditelija merena ki jekh nesrekja. Akava haberi but pogodinela le. Ama, akava nane sa. Akava terno šunela panda jekh haberi kova so šokirinela le. Ov doznajngja kaj leskere roditelija ni hari na mislingje sar trošinena sine pumaro barvalipe hem adaleske mukhle leske bare dugija. Namesto te nasledinel lengoro barvalipe, ov nasledinela lengere dugija, a o manuša rodena odma te platinel adala dugija. Adava dugo tano but baro so ov nikogaš našti te iranel le.
2 Ko nesavo način, amari situacija tani slično sar akale terne manušeskiri. Amare prva roditelija, o Adam hem i Eva, sine sovršena hem živinena sine ko jekh but šužo raj (1. Moj. 1:27; 2:7-9). Šaj sine te ovel len srekjno hem but šužo životo ki celi večnost. Ama tegani sa meningja pe. Ola sine brkime taro raj hem našavgje i prilika te živinen večno. Kova nasledstvo šaj sine te mukhen pumare čhavenge? Ki Biblija pišinela: „Preku jekh manuš [o Adam] o grevo khuvgja ko sveto hem preku o grevo o meribe, hem agjaar o meribe širingja pe ko sa o manuša, soske sarine grešingje“ (Rim. 5:12). O nasledstvo so mukhlja amenge o Adam tano o grevo hem adaleske meraja. O grevo so nasledingjem le tano sar jekh baro dugo kova so nikoj amendar našti te platinel le (Ps. 49:8).
3. Soske amare grevija šaj te sporedinen pe „dugoncar“?
3 O Isus sporedingja o grevija „dugoncar“ (Mat. 6:12 fus.; Luka 11:4). Keda grešinaja, adava tano sar te phene khuvaja ko dugo anglo Jehova. O dugo bašo adava grevo valjani te platina le. Ako na platinaja adava dugo, ov šaj te ovel cidimo samo amare meribaja (Rim. 6:7, 23).
4. a) So ka ovel sa e grešnikoncar ako na dobinena pomoš? (Psalm 49:7-9). b) Ko so mislinela pe e lafea „grevo“ ki Biblija? (Dikh i ramka „ Grevo“.)
4 Dali šaj palem te dobina sa adava so našavgje o Adam hem i Eva? Amen korkori našti te kera adava. (Čitin Psalm 49:7-9.) Ako nane koj te pomožinel amen, našti te dobina nadež bašo večno životo ki idnina, a ni palem prilika bašo voskresenie. Ustvari, amaro meribe ka ovel isto sar e životnengoro (Prop. 3:19; 2. Pet. 2:12).
5. Sar amaro Dad, kova soj pherdo mangipaja, pomožingja amenge te platina bašo amare grevija? (Dikh hem .)
5 Razmislin bašo terno manuš kole so spomningjem le ko početok. Sar ka osetinel pe ako nekoj soj barvalo mangela te platinel sa leskere dugija? Sigurno akava terno manuš ka ovel but blagodarno hem ka prifatinel akava darežlivo poklon. Ko slično način amaro Dad, o Jehova kova soj pherdo mangipaja, dengja amen jekh poklon kolea so platingja o dugo bašo grevo so nasledingjem le taro Adam. O Isus objasningja akava akale lafencar: „O Devel doborom but manglja o sveto so dengja ple edinstveno bijame Čhave, te šaj sekoj so verujnela ki leste te na ovel uništimo, nego večno te živinel“ (Jovan 3:16). Isto agjaar, akava poklon dela amen prilika te ova paše amala e Jehovaja.
O Isus propovedingja o šukar haberi kaj o Jehova prostinela amare grevija preku i otkupno žrtva (Jovan 3:16). Palo adava, te šaj te del adaja otkupnina, o Isus spremno dengja plo životo sar žrtva (Dikh ko pasus 5)
6. So ka dikha ki akaja statija, hem soske?
6 Sar šaj te ovel amen korist taro akava but šužo poklon kova so pomožinela te oven prostime amare grevija? Te šaj te dobina odgovor ko akava pučibe, ka dikha akala bibliska izrazija: te smirina amen e Jehovaja, učharibe o grevija, otkupnina, spasime hem pravedna anglo e Devleskere jakhja. Ki akaja statija ka dikha so značinena ola. Adava so ka razmislina so sa kergja o Jehova te šaj te prostinel amenge, ka pomožinel amen te bajrara amari blagodarnost.
CEL: TE SMIRINA AMEN E JEHOVAJA
7. a) So javer našavgje o Adam hem i Eva? b) Sar čhave e Adameskere hem e Evakere, so valjanela amenge but? (Rimjanja 5:10, 11).
7 Osven so našavgje i prilika te živinen večno, o Adam hem i Eva našavgje plo skapoceno amalipe pumare Dadea e Jehovaja. Angleder te keren grevo, o Adam hem i Eva sine delo tari e Devleskiri familija (Luka 3:38). Ama otkeda na šungje e Jehova ola sine brkime tari leskiri familija angleder te oven len čhave (1. Moj. 3:23, 24; 4:1). Adaleske so avaja lendar, amen valjani te smirina amen e Jehovaja. (Čitin Rimjanja 5:10, 11.) Javere lafencar, valjani te počmina te ova amala e Jehovaja. O grčko lafi soj akate prevedimo sar „smiribe“ šaj te značinel „te ove amal nekasaja kova so sine tuke dušmani“. Vooduševime siem taro adava so o Jehova prvo kergja nešto te šaj te ova lea amala. Sar?
PODGOTOVKA: UČHARIBE O GREVIJA
8. So kergja o Jehova te šaj palem te ova lea amala?
8 O učharibe o grevija tano podgotovka, javere lafencar, o rešenie so angja o Jehova te šaj o grešna manuša palem te oven lea amala. Te šaj te iranel adava so našavgja o Adam, o Jehova dengja nešto so isi le isto vrednost. Ko Rimjanja 3:25, bašo adava rešenie vakerela pe kaj tano „žrtva te šaj o manuša te smirinen pe [e Devlea]“. Akava dela prilika e manušenge palem te oven amala e Jehovaja.
9. So kergja o Jehova te šaj o grevija e Izraelcongere te oven prostime?
9 Te šaj o Izraelcija te oven amala lea, o Jehova kergja nešto privremeno te šaj te prostinel lengere grevija. Ko purano Izrael, jekh puti ko berš ikerela pe sine o Dive prostibaske o grevija. Ko adava dive, o prvosvešteniko dela sine životinska žrtve bašo narodo. Džangjola pe, e životinska žrtvencar našti skroz te učharen pe nekaskere grevija soske o životne tane pohari vredna taro manuša. Ama, sa džikote o Izraelcija kainena pe sine hem dena sine o žrtve kola so o Jehova rodela len sine, ov sine spremno te prostinel lengere grevija (Evr. 10:1-4). Osven adava, o žrtve so dena sine ko Dive prostibaske o grevija hem o žrtve kola so dena sine ko javera prilike, setinkerena len sine kaj tane grešnikija hem kaj valjani lenge nešto pobaro te šaj lengere grevija te oven skroz čistime.
10. So kergja o Jehova te šaj jekh puti zasekogaš te oven prostime e manušengere grevija?
10 So kergja o Jehova te šaj zasekogaš te oven prostime e manušengere grevija? O Jehova dengja ple mangle Čhave „jekh puti zasekogaš te šaj te lel o grevija bute dženengere“ (Evr. 9:28). O Isus dengja „plo životo sar otkupnina bute dženenge“ (Mat. 20:28). Soj tani i otkupnina?
CENA: OTKUPNINA
11. a) Sprema i Biblija, soske valjangja te platinel pe otkupnina? b) Koj samo šaj sine te platinel i otkupnina?
11 Sprema i Biblija, o Jehova odlučingja kaj valjani te platinel pe otkupnina, javere lafencar odredeno cena te šaj te oven prostime amare grevija hem te ova amala lea. a Koja sine i cena so valjangja te platinel pe te šaj o manuša te dobinen adava so našavgja o Adam? O Adam hem i Eva našavgje o sovršeno životo hem i prilika te živinen večno. Adaleske, valjangja te platinel pe otkupnina kola so sine la isto vrednost sar adava so sine našavdo (1. Tim. 2:6). Šaj sine te platinel la samo vozrasno manuš kova so: 1) sine sovršeno, 2) sine le prilika te živinel zasekogaš ki phuv hem 3) sine spremno te žrtvujnel ili te otkažinel pe taro adava životo baši amenge. Samo tegani ka šaj sine adale manušeskoro životo te zameninel, ili te nadoknadinel, o životo so sine našavdo.
12. Soske o Isus šaj sine te platinel i otkupnina so valjangja?
12 Razmislin bašo trin pričine soske o Isus šaj sine te platinel i otkupnina. 1) Ov sine sovršeno — na kergja nijekh grevo (1. Pet. 2:22). 2) Adaleske, šaj sine te živinel zasekogaš ki phuv. 3) Ov sine spremno te merel hem te otkažinel pe taro adava životo baši amenge (Evr. 10:9, 10). Ov sine sovršeno, isto sar o prvo manuš o Adam, angleder te grešinel (1. Kor. 15:45). Adaleske, ple meribaja, o Isus šaj sine te učharel e Adameskoro grevo, javere lafencar te nadoknadinel adava so našavgja o Adam (Rim. 5:19). Agjaar, o Isus ulo „o posledno Adam“. Nane potreba te avel javer sovršeno manuš hem te platinel sa adava so našavgja o Adam. O Isus mulo „jekh puti zasekogaš“ (Evr. 7:27; 10:12).
13. Koja tani i razlika maškar o učharibe o grevija hem i otkupnina?
13 Tegani koja tani i razlika maškar o učharibe o grevija hem i otkupnina? O učharibe o grevija tani podgotovka so kergja la o Devel te šaj o manuša palem te oven lea amala. I otkupnina tani i cena soj platimi te šaj te čistinen pe o grevija e manušengere. Adaja cena tani pretstavimi e Isuseskere skapoceno ratea kova so sine čhordo amenge (Ef. 1:7; Evr. 9:14).
REZULTATI: SPASIME HEM PRAVEDNA ANGLO E DEVLESKERE JAKHJA
14. So ka dikha akana, hem soske?
14 Savi korist isi amen taro adava so o Jehova kergja amenge? Te šaj te dobina odgovor ko akava pučibe, ka dikha so značinena duj bibliska izrazija. Adava ka pomožinel amen te haljova savi korist isi amen taro adava so o Jehova prostinela.
15-16. a) Savo sine o rezultati adaleske so sine platimi i otkupnina? b) Sar kerela te osetina amen adava so džanaja kaj siem oslobodime taro grevo hem taro meribe?
15 I Biblija vakerela kaj adaleske so sine platimi i otkupnina, amen siem spasime, javere lafencar oslobodime. O apostol Petar objasningja akava akale lafencar: „Soske, džanena kaj na sien spasime [doslovno: otkupime; oslobodime] neštolea so rumingjovela — srebroja ili zlatoja — taro tumaro čučo životo, kova so nasledingjen le taro tumare parapapija, nego e Hristoseskere skapoceno ratea, kova soj sar rat bakhreskoro kova so nane melalo hem nane le maana“ (1. Pet. 1:18, 19).
16 Adaleske so sine platimi i otkupnina, šaj te ova oslobodime taro ropstvo e grevoskoro hem taro meribe (Rim. 5:21). Isi amen but pričine te ova blagodarna e Jehovaske hem e Isuseske adaleske so siem otkupime e Isuseskere skapoceno ratea (1. Kor. 15:22).
17-18. a) So značinela adava so o Devel dikhela ki amende sar pravedna? b) Sar koristinela amenge adava so siem pravedna anglo e Devleskere jakhja?
17 Keda o Jehova baši amende vakerela kaj siem pravedna anglo leskere jakhja, akava značinela kaj tane cidime o obvinenija protiv amende hem kaj na valjani te platina bašo amare grevija. Ama, akava na značinela kaj o Jehova na ikerela pe ko ple merilija baši pravda. O Jehova na dikhela ki amende sar pravedna adaleske so zaslužinaja adava, a ni palem na opravdinela amare grevija. Ustvari, ov mangela te prostinel amare grevija adaleske so sikavaja vera ko sa adava so kergja ov hem o Isus te šaj te den i otkupnina (Rim. 3:24; Gal. 2:16).
18 So značinela akava sekole jekheske amendar? Nesave kolende so o Devel dikhela sar pravedna tane birime te vladinen zaedno e Hristosea ko nebo hem tane vikime e Devleskere čhave (Tit 3:7; 1. Jov. 3:1). O Devel prostinela lengere grevija hem ki lende dikhela sar ka phene nikogaš na kergje adala grevija. Hem agjaar, ola pherena o uslovija te oven ko Carstvo (Rim. 8:1, 2, 30). O javera soj pravedna anglo e Devleskere jakhja, ka živinen zasekogaš ki phuv. O Jehova prostingja lengere grevija hem ola ovena leskere amala (Jak. 2:21-23). O baro mnoštvo so ka preživinel o Armagedon, ka ovel le prilika bašo večno životo (Jovan 11:26). O „pravedna“ hem okola so „nane pravedna“, kola so sovena ko grobo, ka voskresninen (Apo. 24:15; Jovan 5:28, 29). Palo nesavo vreme, sa o poslušna sluge e Jehovaskere ki phuv, „ka dobinen i slavno sloboda e Devleskere čhavengiri“ (Rim. 8:21). Kobor bare blagoslovija isi amen adaleske so o Jehova kergja nešto te šaj te oven učharde amare grevija. Edvaj dikhaja te avel o vreme keda ka ova sovršena čhave amare Dadeskere e Jehovaskere!
19. Sar amari situacija uli pošukar? (Dikh hem i ramka „ So značinela adava amenge“.)
19 Šaj te vakera kaj amari situacija sine sar e terne manušeskiri kole so spomningjem le ko početok, kova so našavgja sa hem nasledingja baro dugo so našti sine nikogaš te iranel le. Ama o Jehova pomožingja amen. Amari situacija meningja pe adaleske so o Jehova kergja nešto te šaj te učharen pe amare grevija hem sine dendi i otkupnina. Amari vera ko Isus Hristos pomožinela amen te ova spasime ili oslobodime taro grevo hem taro meribe. Isto agjaar, amare grevija šaj te oven poništime hem o Jehova te dikhel ki lende sar te phene nikogaš na kergjem len. A najvažno taro sa, akana šaj te ova paše amala amare mangle nebesno Dadea, e Jehovaja.
20. Bašo so ka kera lafi ki javer statija?
20 Keda razmislinaja bašo sa adava so kergje amenge o Jehova hem o Isus, amaro cenenje baši lende bajrola panda poviše (2. Kor. 5:15). Bizi lengiri pomoš nane sine te ovel amen nisavi nadež. Ama, so značinela sekole jekheske lično adava so o Jehova prostinela? Bašo adava ka kera lafi ki javer statija.
GILI 10 Falin tu e Jehova, amare Devle!
a Ko nesave čhibja, o lafi „otkupnina“ tano prevedimo e lafea kova so doslovno značinela „i cena bašo životo“ ili „adava so sine platimo“.
