DALI ponekogaš osetinea kaj valjani korkori te borine tut e problemencar? Amen živinaja ko „but pharo vreme“ hem adava šaj te kerel te osetina amen korkori hem obeshrabrime (2. Tim. 3:1). Sepak, na valjani korkori te borina amen e problemencar so isi amen ko životo. I Biblija vakerela kaj tano važno te oven amen čačutne amala ko phare dive (Izr. 17:17).

E apostol Pavleske but koristinela sine adava so nesave taro leskere amala sine lea ko leskere misionerska patuvanja (Kol. 4:7-11). Džikote sine ko zatvor ko Rim, e Pavleskere amala kerena sine zadače kola so ov lično na bi šaj sine te kerel len. Na primer, o Epafrodit angja e Pavleske nesave bukja kola so bičhalgje leske o phralja taro Filipi (Fil. 4:18). O Tihik bičhalela sine o pismija e Pavleskere ko različna sobranija (Kol. 4:7). Adaleske so leskere amala pomožinena sine leske, o Pavle šaj sine te ohrabrinel e sobranien čak keda sine phanlo ko jekh kher, a hem pokasno keda sine ko zatvor. Sar šaj avdive tu te ove čačutno amal?

Avdive da isi phralja hem phenja kola so sikavena so značinela te ovel pe čačutno amal. Razmislin sar jekh phen sikavgja kaj tani čačutni amalin e Elizabetake, koja so služinela sar opšto pioneri ki Španija. Keda lakere dajake arakhle rako, kova so sine ki posledno faza, i phen bičhalela sine e Elizabetake but ohrabruvačka porake kola so temelinena pe sine ko bibliska stihija. I Elizabeta vakerela: „Akala porake sekova dive dena man sine sila hem pomožinena man sine te na osetinav man korkori“ (Izr. 18:24).

Šaj te kera pozoralo o amalipe amare phralencar hem phenjencar adalea so ka pomožina lenge te džan ki služba hem ko sostanokija. Na primer, šaj te nudine prevoz nesave pophure phraleske ili phenjake bašo sostanok ili baši služba. Ako kerea adava, tu ka ohrabrine len, ama ola da ka ohrabrinen tut (Rim. 1:12). Ama, nesave phralja hem phenja našti te ikljoven kher­aldan. Sar šaj te pomožine lenge da?

Nesave taro amare phralja hem phenja našti te aven ko sostanok ki dvorana adaleske soj nasvale ili taro javera pričine. Te dikha o primer e Davideskoro koleske so arakhle limfon. Poviše taro šov masek, ov priminela sine hemoterapija. Ko adava vreme, o David hem leskiri romni i Lidija sine prisutna ko sostanokija onlajn.

Sar poddržinena len sine lengere amala ko sobranie? Palo sekova sostanok, nesave phralja hem phenja kola so sine ki dvorana trudinena pe sine te keren lafi e Davidea hem e Lidijaja preku videokonferencija. Osven adava, keda o David hem i Lidija ka komentirinen sine, pokasno  dobinena sine ohrabruvačka porake taro phralja hem phenja. Adava pomožingja e Davideske hem e Lidijake te na osetinen pe doborom osamena.

Šaj te planirina te dža ki služba nesave phralea ili phenjaja so našti te ikljol kher­aldan. Šaj ka valjani te kera nesave tikne promene te šaj te sorabotina lencar. Agjaar ka sikava lenge kaj na bistergjem len (Izr. 3:27). Šaj te odvojne vreme te šaj zaedno te pišinen pismija ili te svedočinen preku telefoni. Okola so našti te ikljon kheral, šaj te vklučinen pe ko sostanok baši služba preku videokonferencija. O David hem i Lidija tane but blagodarna so lengoro sobranie pomožinela len ko adava. O David vakerela: „Dovolno sine adava so siem sine amare grupaja propovedibaske hem adava so šaj sine te šuna o kratka diskusie hem i molitva te šaj te ova ohrabrime“. Ponekogaš šaj te puče nesave phralen, kola so našti te ikljoven kher­aldan, dali bi mangena te ingare lende khere nesave interesente te šaj te proučinen.

Keda sorabotinaja amare phralencar hem phenjencar kola so našti te ikljon kheral, pošukar zapoznajnaja len hem lengere šuže osobine hem agjaar ovaja popaše lencar. Na primer, keda sian ki služba asavke objavitelencar hem dikhea kobor šukar koristinena e Devleskoro Lafi te šaj te resen dži ko nekaskoro vilo, tu verojatno panda poviše ceninea len. Adalea so ka pomožine tle phralenge hem phenjenge te džan ki služba hem te oven prisutna ko sostanokija ka oven tut poviše amala (2. Kor. 6:13).

E Pavle dela sine le bari uteha adava so leskoro amal o Tit sine lea (2. Kor. 7:5-7). Akava primer setinkerela amen kaj šaj te da uteha amare phralenge hem phenjenge na samo amare ohrabruvačka lafencar nego hem adalea so ka ova lencar hem ka kera sa so šaj te pomožina lenge (1. Jov. 3:18).

Amare phralja hem phenja ki Rusija tane but šukar primer bašo adava so značinela te pomožina amen maškar amende. Razmislin bašo Sergej hem leskiri romni i Tatjana. Otkeda i policija khuvgja ko lengoro kher te keren pretres sine ingarde ki policisko stanica te ispitinen len. E Tatjana mukhle la prvo taro zatvor hem irangja pe khere. O Sergej vakerela: „Samo so [i Tatjana] reslja khere, jekh hrabro phen odma posetingja la. Palo adava, ale javera da amare phralja hem phenja hem pomožingje amenge te sredina o stani adaleske so i policija rasturingja le.

O Sergej ponadari vakerela: „Otsekogaš mangava sine o stiho taro Izreki 17:17, kote so pišinela: ’O čačutno amal sikavela mangipe ko sekova vreme hem phral ovela ko phare dive‘. Akala lafija panda poviše značinena mange akana ko progonstvo, keda i pomoš taro amala but valjanela mange. O Jehova dengja man hrabra amala kola soj uzi mande“. a

Adaleske so isi amen sa pophare okolnostija, valjanena amenge amala kolendar so ka šaj te roda pomoš. Ola panda poviše ka valjanen amenge ki bari nevolja. Adaleske, te da amendar sa te šaj te ova čačutne amala panda avdive! (1. Pet. 4:7, 8).