Dali mangea te ovel tut pobari korist taro lično proučibe? Ake nekobor predlogija so šaj te pomožinen tuke pošukar te koncentririne tut keda proučinea:

• Birin šukar than. Ako šaj, arakh than so nane le but bukja hem so isi le pobari svetlina. Šaj te beše ko astali ili šaj te birine nesavo udobno than avrijal.

• Arakh than kote so ka šaj te ove korkori. O Isus molingja pe rano sabajle „ko jekh than kote so šaj sine te ovel korkori“ (Mar. 1:35). Ako našti te ove skroz korkori, šaj te vakere tle kherutnenge ili tle cimereske keda ka proučine hem te zamoline len te na smetinen tut ko adava vreme.

• Ačhov koncentririmo. Izbegin bukja kola so šaj te len tlo vnimanie. Ako proučinea ko telefoni ili ko tablet, ačhav o zvuko te šaj na smetinen tut o porake ili čhiv le ko avionsko režim. Ako setinea tut kaj valjani nešto te kere, pišin tuke negde adava te šaj te kere le pokasno. Ako perela tli koncentracija, ker pauza te šaj te phire ili te mrdine hari.