1-2. Soske šaj te mislina kaj o Jehova na odgovorinela ko amare molitve?

 „O JEHOVA neka ovel tli najbari radost hem ka dobine lestar sa so mangela tlo vilo“ (Ps. 37:4). Kobor šužo vetuvanje! Ama dali valjani te očekujna kaj o Jehova odma ka del amen sa adava so rodaja? Soske tano šukar te puča amen akava? Razmislin bašo akala situacie. Jekh phen so nane ženimi molinela pe e Jehovaske te džal ki Škola bašo polnovremena objavitelija. Ama nakhena nekobor berša a oj panda nane vikimi. Jekh terno phral molinela e Jehova te sasljol taro jekh pharo nasvalipe te šaj poviše te pomožinel ko sobranie. Ama ov na sasljola. Jekh bračno pari molinela pe lengoro čhavo te ačhol ko čačipe. Ama o čhavo odlučinela te na služinel e Jehovaske.

² Šaj tu da molingjan e Jehova bašo nešto, ama na dobingjan adava so rodingjan. Adaleske šaj mislinea tuke kaj o Jehova odgovorinela ko e javerengere molitve, ama ko tle na. Ili šaj mislinea kaj nešto grešingjan. Jekh phen so vikinela pe Dženis b mislinela sine baš agjaar. Oj hem lakoro rom but mangena sine te služinen ko Betel hem molinena pe sine bašo adava. Oj vakerela: „Siem sine uverime kaj but sigate ka vikinen amen ko Betel“. Nakhle but berša, ama len panda na vikingje len ko Betel. I phen vakerela: „Sium sine razočarimi hem bunimi. Pučava man sine so grešingjum e Jehovaske. But puti molingjum man e Jehovaske te dža ko Betel, soske na odgovoringja ko mle molitve?“

3. Bašo so ka kera lafi ki akaja statija?

 ³ Ponekogaš šaj te puča amen dali o Jehova šunela amare molitve. Čak nesave verna sluge taro purano vreme pučena pe sine o isto (Jov 30:20; Ps. 22:2; Avak. 1:2). So šaj te uverinel tut kaj o Jehova ka šunel tle molitve? (Ps. 65:2). Te šaj te dobina odgovor prvo te dikha o sledna trin pučiba 1) So šaj te očekujna taro Jehova? 2) So očekujnela o Jehova amendar? 3) Soske šaj ka valjani te molina amen bašo nešto javer?

4. Sprema Eremija 29:12, so vetinela o Jehova kaj ka kerel?

⁴ O Jehova vetinela amenge kaj ka šunel amare molitve. (Čitin Eremija 29:12.) Amaro Devel mangela amen soske verno služinaja leske hem ov sekogaš ka šunel amare molitve (Ps. 10:17; 37:28). Ama akava na značinela kaj ov ka del amen sa so rodaja lestar. Bašo nesave bukja so rodaja lestar šaj ka valjani te adžikera dži ko nevo sveto.

5. So lela o Jehova ko predvid keda šunela amare molitve? Objasnin.

⁵ Keda šunela amare molitve, o Jehova lela ko predvid pli namera (Isa. 55:8, 9). Jekh delo tari leskiri namera tani i phuv te ovel pherdi manušencar kola so radosno ka služinen leske sar Vladeteli. Ama o Satana vakerela kaj e manušenge ka ovel pošukar ako ola korkori vladinena (1. Moj. 3:1-5). Te šaj te dokažinel kaj adava so vakerela o Satana tano hovajbe, o Jehova dozvolingja e manušenge te vladinen. Ama amen šaj jasno te dikha kaj o manušikano vladibe angja but taro problemija so isi amen avdive (Prop. 8:9). Svesna siem kaj o Jehova nane odma te cidel sa akala problemija. Ako kerela adava, nesave šaj te mislinen peske kaj o manuša šukar vladinena hem kaj tane sposobna te rešinen sa e manušengere problemija.

6. Soske valjani te ova uverime kaj o Jehova sekogaš kerela adava soj ljubezno hem pravedno?

⁶ O Jehova šaj te odgovorinel ko slična molitve ko različna načinija. Na primer, keda o cari o Ezekija sine but nasvalo molingja e Jehova te sasljarel le. O Jehova odgovoringja leske agjaar so sasljargja le (2. Car. 20:1-6). Tari javer strana, keda o apostol Pavle molingja e Jehova te cidel lestar „o karo taro telo“, verojatno nesavo problemi sastipaja, o Jehova na kergja adava (2. Kor. 12:7-9). Razmislin isto agjaar bašo apostolija o Jakov hem o Petar. O cari o Irod manglja te mudarel e soldujen. Tegani o phralja molingje pe e Petareske hem verojatno e Jakoveske da. Ama, samo o Petar sine čudoja spasimo a o Jakov sine mudardo (Apo. 12:1-11). Adaleske šaj te puča amen, soske o Jehova spasingja samo e Petare a na hem e Jakove? I Biblija na vakerela ništo bašo adava. c Ama adava ko so šaj te ova sigurna tano kaj o Jehova nikogaš na postapinela nepravedno (5. Moj. 32:4). Hem isto agjaar džanaja kaj o Jehova manglja hem e Petare hem e Jakove (Otk. 21:14). Ponekogaš o Jehova šaj nane te odgovorinel ko amare molitve ko način sar so amen očekujngjem. Ama adaleske so siem uverime kaj o Jehova sekogaš postapinela pravedno hem mangipaja, amen na sumninaja amen ko način kova so birinela te odgovorinel ko amare molitve (Jov 33:13).

7. So trudinaja amen te izbegina, hem soske?

⁷ Na valjani te sporedina amari situacija e javerengere situacijaja. Na primer, šaj molingjem amen bašo nešto konkretno ama na dobingjem adava so rodingjem. Pokasno doznajnaja kaj nekoj javer molingja pe baši slično buti hem dikhjola sar te phene o Jehova odgovoringja ki leskiri molitva. Jekh  phen so vikinela pe Ana doživingja nešto asavko. Lakoro rom o Metju sine nasvalo taro rako hem oj molinela sine e Jehova te sasljarel le. Ko isto vreme duj pophure phenja isto sine nasvale taro rako. I Ana but molingja pe hem ple romeske hem e duje phenjenge. O phenja sastile, ama o Metju mulo. Ko početok i Ana mislinela sine, ako o Jehova sasljargja e phenjen, soske tegani na šungja mle molitve bašo mo rom hem te sasljarel le? Džangjola pe, amen na džanaja sar sastile akala duj phenja ama džanaja kaj o Jehova ka čhivel krajo bašo sa o muke hem kaj ov edvaj adžikerela te voskresninel ple amalen so mule (Jov 14:15).

8. a) Sprema Isaija 43:2, sar poddržinela amen o Jehova? b) Sar šaj i molitva te pomožinel amenge keda nakhaja taro phare vremija? (Dikh o videoklipi I molitva dela amen sila te izdržina.)

⁸ O Jehova sekogaš ka poddržinel amen. Adaleske so but mangela amen, o Jehova na mangela te dikhel sar mučinaja amen (Isa. 63:9). Sepak ov nane te cidel sa amare problemija kola so šaj te sporedinen pe rekaja ili jagaja. (Čitin Isaija 43:2.) Ama ov vetinela kaj ka pomožinel amen te „nakha preku“ lende. Isto agjaar nane te dozvolinel o problemija so isi amen te keren amenge trajno šteta. O Jehova preku pli sila ka pomožinel amenge te istrajna (Luka 11:13; Fil. 4:13). Agjaar, ka ova uverime kaj ov sekogaš ka del amen baš adava so valjani amenge te šaj te istrajna hem te ačhova leske verna. d

9. Sar o lafija taro Jakov 1:6, 7 pomožinena amenge te dikha soske valjani te ovel amen doverba kaj o Jehova ka pomožinel amenge?

⁹ O Jehova očekujnela amendar te ovel amen doverba ki leste (Evr. 11:6). Ponekogaš amare problemija šaj te oven amenge doborom phare so našti te izdržina len. Šaj čak te počmina te sumnina amen dali o Jehova čače ka pomožinel amen. Ama i Biblija uverinela amen kaj e Devleskere silaja ka šaj „zidija te uklja“ (Ps. 18:29). Adaleske, namesto te mukha o sumnje te bajron ki amende, valjani te molina amen veraja e Jehovaske hem te ovel amen doverba kaj ov ka odgovorinel amenge. (Čitin Jakov 1:6, 7.)

10. Vaker primer bašo adava sar šaj te postapina sprema amare molitve.

¹⁰ O Jehova očekujnela amendar te postapina sprema amare molitve. Na primer, jekh phral šaj te molinel e Jehova te pomožinel leske te dobinel slobodna dive tari buti te šaj te džal ko regionalno kongres. Sar šaj o Jehova te odgovorinel ki leskiri molitva? Ov šaj te del le hrabrost te šaj te kerel lafi ple šefea. Sepak o phral ka valjani te džal te kerel lafi bašo slobodna dive. Šaj ka valjani te kerel lea lafi poviše puti. Šaj ka valjani te rodel te meninel pe nesave kolegaja te džal javer smena ki buti. Hem ako valjani, šaj čak ka lel slobodna dive bizo te ovel platimo.

11. Soske valjani poviše puti te molina amen bašo nešto soj amenge važno?

¹¹ O Jehova očekujnela poviše puti te molina amen leske bašo bukja so sekirinena amen (1. Sol. 5:17). Sar so šaj te dikha taro e Isuseskere lafija, nesave bukja bašo kola so molinaja amen nane te dobina len odma (Luka 11:9). Adaleske ma otkažin tut! Molin tut taro vilo hem poviše puti (Luka 18:1-7). Keda poviše puti molinaja amen baši nesavi buti tegani sikavaja e Jehovaske kaj adava nane samo momentalno želba. Isto agjaar sikavaja vera kaj ov šaj te pomožinel amenge.

12. a) Kova tano jekh pučibe so valjani te puča amen bašo amare molitve hem soske? b) Sar šaj te ova sigurna kaj amare molitvencar sikavaja kaj poštujnaja e Jehova? (Dikh i ramka „ Dali mle molitve sikavena kaj poštujnava e Jehova?“)

¹² Ako na dobinaja adava bašo so molingjem amen, šaj te puča amen trin pučiba. O prvo tano: „Dali molinava man baši ispravno buti?“ But puti mislinaja kaj amen džanaja soj amenge najšukar. Ama o bukja bašo so molinaja amen šaj nane o najšukar rešenie. Ako molinaja amen bašo nesavo problemi, šaj isi but pošukar rešenie taro adava so amen mislinaja. A nesave bukja bašo so molinaja šaj nane sprema e Jehovaskiri volja (1. Jov. 5:14). Te razmislina bašo primer e roditelengoro so spomningjem len angleder. Ola molingje e Jehova te kerel lengoro čhavo te ačhol ko čačipe. Iako nane pogrešno te molina amen bašo akava, sepak te ovel amen ki godi kaj o Jehova nane nikas silaja te čhivel te služinel leske. Ov mangela sarine amen, kote soj vklučime hem amare čhave, korkori te birina te služina leske (5. Moj. 10:12, 13; 30:19, 20). Adaleske, o roditelija šaj te molinen e Jehova bašo nešto javer — te pomožinel lenge te resen dži ko vilo pumare čhaveskoro te šaj te ovel pottiknimo te mangel e Jehova hem te ovel leskoro amal (Izr. 22:6; Ef. 6:4).

13. Sprema 1. Petareskoro 5:6, 7, keda ka pomožinel amen o Jehova? Objasnin.

¹³ O dujto pučibe tano: „Dali akana tano o vreme o Jehova te del man adava bašo so molinava man?“ Šaj mislinaja amenge kaj valjani odma te dobina odgovor ko amare molitve. Ama ma te bistra, o Jehova džanela keda najšukar te pomožinel amenge. (Čitin 1. Petareskoro 5:6, 7.) Keda na dobinaja odma adava bašo so molinaja, šaj te mislina  amenge kaj o odgovor tano „na“. Ama leskoro odgovor ustvari šaj te ovel „panda na“. Na primer, razmislin bašo terno phral kova so molingja pe te sasljol. Te sasljarel le sine o Jehova čudoja, tegani o Satana ka šaj sine te vakerel kaj o phral prodolžingja te služinel e Jehovaske samo adaleske so sasljargja le (Jov 1:9-11; 2:4). Osven adava, o Jehova odredingja više vreme keda ka sasljarel sa o nasvalipa (Isa. 33:24; Otk. 21:3, 4). Dži tegani, našti te očekujna o Jehova čudoja te sasljarel amen. Adaleske, o phral šaj te molinel pe bašo nešto javer, o Jehova te del le sila hem andruno mir te šaj te istrajnel iako tano nasvalo hem te prodolžinel verno te služinel leske (Ps. 29:11).

14. So šaj te sikljova tari Dženis?

¹⁴ Te razmislina baši Dženis, koja so molingja pe te džal ko Betel. Palo pandž berš oj halili kaj o Jehova odgovoringja ko lakere molitve, ama ko pojaver način. Oj vakerela: „O Jehova koristingja adava vreme te šaj te sikavel man hem te pomožinel mange te ovav pošukar hristijanka. Valjani sine te ovel man pobari doverba ki leste, te oven man pošukar navike proučibaske hem te sikljovav te ovav radosno bizi razlika kote ka služinav e Jehovaske“. Pokasno i Dženis hem lakoro rom sine vikime te služinen ki pokrainsko služba. Keda setinela pe i Dženis vakerela: „O Jehova odgovoringja ko mle molitve, ama na agjaar sar me so očekujngjum. Valjangja mange vreme te haljovav kaj o odgovor so dengja man o Jehova tano jekh but šužo poklon. But sium blagodarno so osetingjum leskoro mangipe hem šukaripe.“

15. Soske ponekogaš na valjani te ova but konkretna ko amare molitve? (Dikh hem o slike.)

¹⁵ O trito pučibe tano: „Dali valjani te molinav man bašo nešto javer?“ Šukar  tano te ova konkretna ko amare molitve. Ama te šaj te haljova koja tani e Jehovaskiri volja amenge, ponekogaš šaj amare molitve ka valjani te oven poopšta. Te razmislina bašo primer e phenjakoro so molingja pe te džal ki Škola bašo polnovremena objavitelija. Oj manglja te džal ki adaja Škola te šaj te služinel kote so isi pobari potreba. Adaleske, džikote prodolžinela te molinel pe te ovel vikimi ki Škola, oj isto agjaar šaj te molinel e Jehova te pomožinel lake te dikhel kola javera prilike isi te šaj te bajrarel pli služba (Apo. 16:9, 10). Palo adava, oj šaj te postapinel sprema pli molitva agjaar so ka pučel e pokrainsko nadgledniko dali isi nesavo sobranie paše kaske so valjani pomoš taro pionerija. Ili šaj te pišinel dži ko Betel te šaj te doznajnel kote isi pobari potreba taro objavitelija. e

16. Ko so šaj te ova uverime?

¹⁶ Sar so dikhlem ki akaja statija, šaj te ova uverime kaj o Jehova ka odgovorinel ko amare molitve ko jekh ljubezno hem pravedno način (Ps. 4:3; Isa. 30:18). Ponekogaš šaj nane te dobina o odgovor so očekujngjem le. Ama o Jehova sekogaš ka šunel amare molitve soske ov but mangela amen hem nikogaš nane te mukhel amen (Ps. 9:10). Adaleske ponadari da neka ovel amen doverba ki leste „ko sekova vreme“ agjaar so ka phrava leske amaro vilo ki molitva (Ps. 62:8).