1. Soske o apostol Pavle pottikningja e hristijanen so sine Evreija sa poviše te ohrabrinen pe jekh jekhea?

KO PRVO veko, o apostol Pavle dengja akava sovet e hristijanenge so sine Evreija: „Te razmislina jekh jekheske te šaj te pottiknina amen te sikava mangipe hem te kera šukaripe, hem ma te mukha amare sostanokija sar nesave so kerena, nego te ohrabrina amen jekh jekhea, sa poviše kobor so dikhena kaj avela popaše o dive“ (Evr. 10:24, 25). O phralja šaj pučena pe sine soske o Pavle vakergja lenge sa poviše te ohrabrinen pe jekh jekhea. Pohari taro pandž berš palo adava, ola halile jekh pričina soske vakergja lenge adava. Ko adava vreme, ola halile kaj e Jehovaskoro dive bašo sudo upro Erusalim sine paše hem kaj valjani te keren adava so vakergja lenge o Isus — te našen tari diz (Luka 21:20-22; Dela 2:19, 20). E Jehovaskoro dive alo ko 70 berš a.e., keda o Rimjanja uništingje o Erusalim.

2. Soske avdive valjani panda poviše te ohrabrina amen jekh jekhea?

² Avdive, amen da siem ki slično situacija. E Jehovaskoro „baro hem but strašno“ dive tano paše (Joil  2:11). O lafija so vakergja len o proroko o Sofonija važinena avdive da: „Paše tano o baro dive e Jehovaskoro! Paše tano hem avela but sigate!“ (Sof. 1:14). Adaleske, valjani „te razmislina jekh jekheske te šaj te pottiknina amen te sikava mangipe hem te kera šukaripe“ (Evr. 10:24). Valjani panda poviše te sikava interes amare phralenge hem phenjenge te šaj te ohrabrina len keda valjani lenge adava.

3. So vakergja o apostol Pavle bašo ohrabruvanje? (Dikh i slika ko početok tari statija.)

³ Ki Biblija pišinela: „O sekiracie anena pharipe e manušeske ko vilo, a o šukar lafi kerela le bahtalo“ (Izr. 12:25). Sarinenge ponekogaš valjani ohrabruvanje. O Pavle sikavgja kaj valjani ohrabruvanje okolenge da so ohrabrinena e javeren. Ov pišingja ple phralenge ko Rim: „Soske, edvaj adžikerava te dikhav tumen, te šaj te dav tumen nesavo duhovno poklon te šaj te oven zorale, javere lafencar, zaedno te ohrabrina amen, me tumare a tumen mle veraja“ (Rim. 1:11, 12). Znači, čak e Pavleske da ponekogaš valjani sine ohrabruvanje. (Čitin Rimjanite 15:30-32.)

4, 5. Kas šaj te ohrabrina avdive, hem soske?

⁴ Avdive, šaj te ohrabrina adalen so služinena polnovremeno e Jehovaske, sar soj o verna pionerija. But džene lendar kergje bare žrtve te šaj te oven pionerija. Akava isto važinela bašo misionerija, betelitija, pokrainska nadglednikija hem lengere romnja, hem okola so služinena ko preveduvačka kancelarie. Ola kerena žrtve te šaj te nakhaven poviše vreme ki služba bašo Jehova. Adaleske, valjani te ohrabrina len. Isto agjaar, isi but džene kola so ponadari da mangena te oven ki polnovremeno služba, ama lengere okolnostija na mukhena len više. Ola da tane blagodarna keda dobinena ohrabruvanje.

⁵ Kas panda šaj te ohrabrina? Šaj te ohrabrina bute phralen hem phenjen kola so biringje te ačhoven korkori adaleske so mangena te oven poslušna e Jehovaske hem te prandinen pe „samo ko Gospodari“ (1. Kor. 7:39). O romnja tane ohrabrime keda lengere roma vakerena lenge kaj mangena len hem kaj tane blagodarna bašo sa so kerena (Izr. 31:28, 31). E hristijanen so istrajnena keda isi len progonstvo ili nasvalipe isto agjaar valjani te ohrabrina len (2. Sol. 1:3-5). O Jehova hem o Isus utešinena sa akale verna phralen hem phenjen. (Čitin 2. Solunjanite 2:16, 17.)

6. Savi zadača isi e starešinen soj tane spomnime ko Isaija 32:1, 2?

⁶ Čitin Isaija 32:1, 2. Živinaja ko pharo vreme hem lokhe šaj te obeshrabrina amen. O Isus ohrabrinela amen preku o „knezija“, a adala tane o starešine — bizi razlika dali tane phralja soj pomazanikija ili taro javera bakhre. Akala verna starešine nane „gospodarija“ amare verake nego „sorabotnikija“ te šaj te ova bahtale. Ola mangena te pomožinen amenge te ova bahtale hem te ačhova verna (2. Kor. 1:24).

7, 8. Sar šaj o starešine te sikaven kaj čače grižinena pe e javerenge?

⁷ O starešine šaj te oven sar o apostol Pavle, kova so sekogaš trudinela  pe sine te ohrabrinel e phralen. Ov pišingja e phralenge taro Solun kola so sine progonime: „Pherde mangipaja tumenge, siem sine spremna te da tumen na samo o šukar haberi taro Devel nego hem amaro životo, adaleske so zamanglem tumen“ (1. Sol. 2:8).

⁸ O starešine šaj but te ohrabrinen pumare lafencar. Ama, dali adava tano sekogaš dovolno? O Pavle vakergja e starešinenge taro Efes: „Valjani te keren but buti sar asavke so pomožinena okolenge soj slaba, hem te ikeren ki godi o lafija taro Gospodari o Isus, kova so korkori vakergja: ’Poviše isi bahtalipe keda dela pe nego keda lela pe‘“ (Dela 20:35). O Pavle e phralenge vakergja: „Bahtalo ka ovav te dav tumenge sa so isi man, a isto agjaar mlo životo da“. Ov ple postapkencar sikavgja kaj tano spremno te del plo najšukar lenge (2. Kor. 12:15). Slično, o starešine valjani te ohrabrinen hem te utešinen e javeren na samo ple lafencar nego isto agjaar ple postapkencar da. Adalea sikavena kaj čače grižinena pe amenge (1. Kor. 14:3).

9. Sar šaj o starešine te den sovet ko jekh ohrabruvačko način?

⁹ Te šaj te zajakninen e phralen, o starešine ponekogaš valjani te den sovet. Tari Biblija ola šaj te sikljoven sar te keren akava ko jekh ohrabruvačko način. O Isus dengja but šukar primer sar te del pe sovet keda bičhalgja porake dži ko sobranija ki Mala Azija palo plo voskresenie. Ov dengja stroga sovetija e sobranienge ko Efes, Pergam hem Tijatira. Ama, angleder te del o sovet, ov falingja len bašo sa o šukar bukja so kerena len sine (Otk. 2:1-5, 12, 13, 18, 19). O Isus vakergja e sobranieske ki Laodikija: „Me dava ukor hem opomena sa okolenge so mangava len. Adaleske ov revno hem kain tut“ (Otk. 3:19). O starešine trudinena pe te oven sar o Isus keda dena sovet.

10. Sar šaj sarine te zajaknina jekh jekhe?

¹⁰ Nane samo o starešine adala so valjani te ohrabrinen e javeren. O Pavle pottikningja e hristijanen te keren lafi bašo „adava soj šukar, te šaj te izgradinel e javeren keda valjani hem te koristinel“ lenge (Ef. 4:29). Sekoj amendar valjani te džanel so valjani e javerenge te šaj te pomožinel lenge. O Pavle pišingja e hristijanenge so sine Evreija: „Ispravinen o umorna vasta hem o slaba kočaka hem ispravinen o drumija kolende so phirena tumare pre, te šaj o pro soj slabo te na šininel pe, nego te sasljol“ (Evr. 12:12, 13). Sarine amen, pa čak o čhave da, šaj te zajaknina hem te ohrabrina jekh jekhe amare lafencar.

11. So pomožingja e Martake keda sine razočarimi?

¹¹ Jekh phen so vikinela pe Marta nesavo vreme sine razočarimi. * (Dikh i fusnota.) Oj pišingja: „Jekh dive, otkeda molingjum man bašo ohrabruvanje, arakhljum jekhe pophure phenja koja so sikavgja mange mangipe hem sočuvstvo, a adava but valjangja mange tegani. Vakergja mange kaj oj da nakhlja taro asavko nešto, hem osetingjum man kaj na sium korkori“. Adaja phen verojatno ni na halili kobor but lakere lafija pomožingje e Martake!

12, 13. Sar šaj te primenina o sovet taro Filipjanite 2:1-4?

 ¹² O Pavle pišingja e hristijanenge ko Filipi: „Adaleske, ako isi tumen nesavo ohrabruvanje ko Hristos, ako isi tumen nesavi uteha pottiknimi taro mangipe, ako isi tumen nesavo jekhipe ko duho, ako isi tumen nesave nežna čuvstvija hem sočuvstvo, keren te ovav celosno bahtalo agjaar so složno ka razmislinen hem ka ovel tumen o isto mangipe, ka oven celosno ko jekhipe, ka razmislinen isto. Ma keren ništo tari holi ili tari gordost, nego ponizno dikhen e javeren sar pobare tumendar hem ma dikhen samo tumenge te ovel šukar, nego isto agjaar e javerenge da“ (Fil. 2:1-4).

¹³ Sarine valjani te roda načinija te pomožina jekh jekheske. Ako mangaja te ohrabrina amare phralen hem phenjen, valjani te ohrabrina len mangipaja, te sikava kaj grižinaja amen lenge hem te oven amen nežna čuvstvija hem sočuvstvo lenge.

14. Kova tano jekh način sar šaj te ohrabrina nekas?

¹⁴ Kerela amen bahtale keda šunaja kaj ačhovena verna okola kaske so pomožingjem angleder. O apostol Jovan pišingja: „Mange nane pobaro bahtalipe taro adava te šunav kaj mle čhave živinena sprema o čačipe“ (3. Jov. 4). But pionerija tane bahtale keda šunena kaj nekoj kaske so pomožingje te džanel o čačipe angleder but berša, panda verno služinela e Jehovaske, pa čak šaj tano pioneri. Adaleske, ako o pionerija tane obeshrabrime,  šaj te setinkera len ko sa o šukar bukja so kergje len te šaj te pomožinen e javerenge.

15. Sar šaj te ohrabrina okolen so verno služinena e Jehovaske?

¹⁵ But pokrainska nadglednikija vakergje kaj ola hem lengere romnja sine ohrabrime keda dobingje kartička baši blagodarnost otkeda posetingje nesavo sobranie. Akava isto važinela bašo starešine, misionerija, pionerija hem betelitija, kola so verno služinena e Jehovaske. Ako sikavaja lenge kaj siem blagodarna bašo adava so kerena, šaj te ohrabrina len poviše nego so mislinaja.

16. Kola ednostavna bukja šaj te ohrabrinen?

¹⁶ Šaj nane tuke lokho te kere lafi e javerencar hem adaleske mislinea kaj našti te ohrabrine len. So te kere tegani? Ustvari, na valjani te kera but bukja te šaj te ohrabrina e javeren. Probin te asa nekasaja. Ako ov da na asala tuja, adava šaj te značinel kaj isi le problemi hem valjani leske nekasaja te kerel lafi. Šaj te utešine le agjaar so ka šune le (Jak. 1:19).

17. So ohrabringja jekhe terne phrale?

¹⁷ Jekh terno phral kova so vikinela pe Henri sine but razočarimo keda nekozom džene tari leskiri familija čhinavgje te služinen e Jehovaske. Jekh lendar sine leskoro dad, kova so služinela sine sar starešina. Jekh pokrainsko nadgledniko primetingja kaj o Henri sine razočarimo hem adaleske vikingja le te džan ki kafa. Ov šukar šunela sine džikote o Henri  vakergja sar osetinela pe. O Henri halilo kaj edinstveno način sar šaj te pomožinel ple familijake te iranel pe ko čačipe sine ov te ačhovel verno. Isto agjaar sine utešimo keda čitingja o lafija taro 46 Psalm, Sofonija 3:17, hem Marko 10:29, 30.

18. a) So pišingja o cari o Solomon bašo ohrabruvanje? b) So vakergja o apostol Pavle?

¹⁸ So šaj te sikljova tari Marta hem taro Henri? Sekova jekh amendar šaj te del uteha hem ohrabruvanje jekhe phraleske ili phenjake keda valjani. O cari o Solomon pišingja: „O lafi vakerdo ko pravo vreme — kobor tano šukar! Keda nekoj tano bahtalo so dikhela tut, adava kerela o vilo bahtalo, hem o šukar haberi dela sila“ (Izr. 15:23, 30). Šaj li te setine tut nekaste so džanea kaj tano obeshrabrimo ili razočarimo? Šaj li te probine te kere nešto ednostavno, sar na primer te čitine leske tari Stražarsko kula ili tari amari internet-stranica? Isto agjaar, o Pavle vakergja kaj šaj te osetina amen pošukar keda zaedno giljavaja teokratska gilja. Ov pišingja: „Sikaven hem ohrabrinen jekh jekhe psalmencar, falbena gilencar bašo Devel, giljaven gilja obožavibaske ko način so sikavela blagodarnost, giljaven taro vilo e Jehovaske“ (Kol. 3:16; Dela 16:25).

19. Soske tano sa považno o ohrabruvanje, hem so valjani te kera?

¹⁹ Kobor soj popaše e Jehovaskoro dive, doborom považno tano te ohrabrina amen jekh jekhea (Evr. 10:25). Ka ova bahtale ako keraja adava so vakergja o Pavle: „Ohrabrinen tumen maškar tumende hem pomožinen tumen jekh jekhea, sar so više hem kerena“ (1. Sol. 5:11).