ISI li nesavi zadača so mangea te kere ko sobranie, ama akanaske našti? Šaj nekoj javer kerela adaja zadača. Ili, šaj angleder sian sine ki polnovremeno služba. Ama, šaj adaleske so sian ko berša, isi tut problemija sastipaja, finansiska problemija ili familijarna odgovornostija našti te kere više doborom kobor so bi mangea. Ili, adaleske so sine promene ki organizacija, šaj valjangjan te čhinave nesave zadačaja so but berša kerea la sine. Bizi razlika koja tani i pričina, šaj mislinea kaj na kerea doborom but kobor so bi mangea ki služba bašo Devel. Ko asavke situacie, normalno tano ponekogaš te osetine tut razočarimo. Sepak, so šaj te pomožinel tuke te na ačhove obeshrabrimo ili holjamo? Sar šaj te ačhove bahtalo?

Taro Jovan Krstitel šaj te sikljova sar te ačhova bahtale. Ov verojatno na adžikergja adava so slučingja pe leske ki služba bašo Jehova. Šaj ni na mislingja kaj ka nakhel poviše vreme ko zatvor nego ki služba bašo Devel. Ama, ov ponadari da sine bahtalo hem ačhilo asavke stavea dži ko krajo taro plo životo. So pomožingja leske? Hem sar šaj te ačhova bahtale čak keda doživinaja nešto so razočarinela amen?

Ko 29 berš a.e., o Jovan počmingja te kerel i zadača so dengja leske o Jehova — te spreminel e narodo bašo Mesija. Ov vakerela sine: „Kainen tumen, soske paše tano o nebesno Carstvo“ (Mat. 3:2; Luka 1:12-17). But džene šukar reagiringje. Ustvari, but manuša duraldan avena sine te šunen le, a but džene sine pottiknime te kainen pe hem te krstinen pe. O Jovan isto agjaar hrabro predupredinela sine e verska vodačen so kerena pe sine pravedna kaj adžikerela len osuda taro Devel ako na menina pe (Mat. 3:5-12). O isto berš, šov masek palo adava, slučingja pe o najvažno nešto so kergja o Jovan ki pli služba — krstingja e Isuse. Ottegani, o Jovan vakerela sine e javerenge te džan palo Isus, o vetimo Mesija (Jovan 1:32-37).

E Jovane sine le važno uloga, adaleske o Isus šaj sine te vakerel: „Maškar ko bijame tari džuvli na pojavingja pe nekoj soj pobaro taro Jovan Krstitel“ (Mat. 11:11). Šaj te ova sigurna kaj o Jovan but ceninela sine o bereketija so dobingja len. Slično sar o Jovan, o avdisutne sluge e Devleskere kola so celo vilea služinena e Jehovaske dobinena but bereketija. Te dikha o primer jekhe phraleskoro so vikinela pe Teri. Ov hem  leskiri romni i Sandra nakhle poviše taro 50 berš ki polnovremeno služba. O Teri vakerela: „Kerava sine različna zadače. Služingjum sar opšto pioneri, ko Betel, palo adava sar specijalno pioneri, sar pokrainsko hem oblastno nadgledniko hem akana palem sar specijalno pioneri“. Asavke zadače anena amenge baro bahtalipe. Ama, taro e Jovaneskoro primer ka dikha kaj o bahtalipe na zavisinela taro zadače so keraja len hem kaj valjani te trudina amen te ačhova bahtale keda ka meninen pe amare okolnostija.

O Jovan Krstitel ačhilo bahtalo soske nikogaš na čhinavgja te ceninel o zadače so dobingja len taro Devel. Te dikha jekh primer. Otkeda krstingja pe o Isus, o broj e Jovaneskere sledbenikongoro počmingja te tiknjol, a o broj e Isuseskere sledbenikongoro ovela sine sa pobaro. Adaleske so sine sekirime bašo adava, e Jovaneskere učenikija vakergje leske: „Ov krstinela hem sarine džana ki leste“ (Jovan 3:26). O Jovan odgovoringja lenge: „Kaskiri tani i bori, ov tano o džamutro. A o amal e džamutreskoro, keda tergjovela hem šunela le, but tano bahtalo so šunela o glaso e džamutreskoro. Agjaar me da phergjovava bahtalipaja“ (Jovan 3:29). O Jovan na natprevaringja pe e Isusea, a ni na mislingja kaj na vredinela više adava so kerela soske e Isuseskiri uloga sine považno. Namesto adava, o Jovan ačhilo bahtalo soske ceninela sine pli uloga sar „amal e džamutreskoro“.

O stavi so sine e Jovane pomožingja leske te na našavel plo bahtalipe iako i zadača na sine leske lokhi. Na primer, ov sine nazarejco panda taro bijanibe hem adaleske sine leske zabranimo te piel mol (Luka 1:15). Keda o Isus vakergja: „Alo o Jovan, kova so ni hala sine ni piela sine“, ov manglja te sikavel kobor ednostavno životo živinela sine o Jovan. Tari javer strana, o Isus hem leskere učenikija na sine nazarejcija hem šaj sine te živinen sar o javera manuša (Mat. 11:18, 19). Isto agjaar, iako na kergja nijekh čudo, o Jovan džanlja kaj o učenikija e Isuseskere, maškar kola so sine okola so angleder džana sine palo Jovan, šaj sine te keren čudija (Mat. 10:1; Jovan 10:41). O Jovan na razmislinela sine but bašo asavke razlike nego ponadari da revno kerela sine pli zadača so dobingja la taro Jehova.

Adava so ceninaja i zadača so akana keraja la ki služba bašo Jehova, ka pomožinel amenge da te ačhova bahtale. O Teri, kole so spomningjem angleder, vakerela: „Koncentririnava man sine ki sekoja zadača so dobinava la sine ki organizacija“. Bašo životo so nakhlja le ki polnovremeno služba, ov vakerela: „Na žalinava bašo ništo. Namesto adava, isi man but šuže spomenija“.

Amaro bahtalipe ki služba bašo Devel šaj te ovel panda pobaro ako razmislinaja bašo najvažno nešto ki sekoja teokratsko zadača ili odgovornost — i čest te ova „e Devleskere sorabotnikija“ (1. Kor. 3:9). Te vakera jekh primer. Jekh skapoceno predmeti ka ačhol šužo samo ako sekogaš grižinaja amen leske. Slično agjaar, amen ka ačhova bahtale samo ako sekogaš razmislinaja kobor bari čest isi amen te sorabotina e Jehovaja. Adava ka pomožinel amenge te na sporedina amare žrtve e žrtvencar so kerena o javera. Isto agjaar, nane te mislina kaj o zadače so dela amen o Jehova tane pohari važna taro zadače so dela len e javerenge (Gal. 6:4).

O Jovan šaj sine svesno kaj nane but vreme te kerel pli zadača, ama šaj na adžikergja kaj doborom sigate ka završinel (Jovan 3:30). Ko 30 berš a.e., okolu šov masek otkeda krstingja e Isuse, o cari o Irod čhivgja e Jovane ko zatvor. Sepak, ov ponadari da svedočinela sine ko asavke okolnostija (Mar. 6:17-20). So pomožingja leske te ačhovel bahtalo iako sine le asavke promene? Ačhilo koncentririmo ko duhovna bukja.

Džikote sine ko zatvor, o Jovan dobingja izveštaija kaj sa poviše manuša sledinena e Isuse (Mat. 11:2; Luka 7:18). Ov sine uverimo kaj o Isus tano o Mesija, ama šaj pučela pe sine sar ka ispolninel o Isus sa so pišinela ko e Devleskoro Lafi bašo adava so ka kerel o Mesija. Adaleske so o Mesija valjani sine te ovel cari, o Jovan šaj pučela pe sine dali o Isus ka počminel te vladinel panda hari. Isto agjaar, šaj pučela pe sine dali o Isus ka oslobodinel le taro zatvor.  Adaleske so mangela sine te džanel poviše bašo adava so ka kerel o Isus, o Jovan bičhalgja duje ple učenikon te pučen le: „Tu li sian adava so valjani te avel ili te adžikera nekas javere?“ (Luka 7:19). Palo adava o Isus vakergja lenge te iranen pe ko Jovan hem te vakeren leske akala lafija: „O korole akana dikhena, o sakatija phirena, o leprozna čistinena pe, o kašuke šunena, o mule uštena, e čorolenge vakerela pe o šukar haberi“ (Luka 7:20-22). Keda irangje pe, o Jovan sigurno šukar šunela sine džikote vakerena leske sine bašo adava sar o Isus sasljarela sine preku čudo.

O Jovan sigurno sine ohrabrimo taro adava so vakergje leske. Adava sikavgja leske kaj o Isus ispolninela sine o proroštvija bašo Mesija. O Jovan džanlja kaj leskiri služba vredingja iako o Isus na oslobodingja le taro zatvor. Iako sine ko asavke okolnostija, e Jovane sine le pričine te ovel bahtalo.

Ako amen da isto sar o Jovan siem koncentririme ko duhovna bukja, ka šaj te ačhova bahtale hem strpliva (Kol. 1:9-11). Adaleske valjani te čitina i Biblija hem te razmislina baši late. Adava ka pomožinel amenge te na bistra kaj sa so keraja ki služba bašo Devel vredinela (1. Kor. 15:58). I Sandra vakerela: „Adava so sekova dive čitinava po jekh poglavje tari Biblija pomožinela mange te ovav popaše e Jehovaja. Pomožinela mange te mislinav ki leste a na ki mande“. Isto agjaar, šaj te razmislina bašo izveštaija tari služba so kerena amare phralja hem phenja. Adava ka pomožinel amenge te na mislina samo ko amare okolnostija, nego ko adava so kerela o Jehova. I Sandra vakerela: „E masekoskere emisie ko JW Broadcasting^® pomožinena amenge te osetina amen popaše e organizacijaja hem te ačhova bahtale ki služba so keraja la“.

Ko adava kratko vreme džikote služingja, o Jovan Krstitel propovedingja „sar e Ilijaskere duhoja hem silaja“ hem sine „obično manuš sar amende“ (Luka 1:17; Jak. 5:17). Ako džaja palo leskoro primer agjaar so ka cenina i čest so siem e Devleskere sorabotnikija hem agjaar so ka ova koncentririme ko duhovna bukja, amen da ka ačhova bahtale ki služba bašo e Devleskoro Carstvo bizi razlika so ka slučinel pe amenge ko životo.