O MANUŠA mangena te oven radosna. Ama, adaleske so živinaja ko posledna dive, sekole jekhe amendar isi le problemija (2. Tim. 3:1). Nesave manuša našavgje pli radost adaleske so doživingje nepravda, nasvalile, našavgje pli buti, mulo lendar nekoj so mangena le ili tari nesavi javer pričina. Čak o sluge e Jehovaskere šaj te oven obeshrabrime hem hari pohari te našaven pli radost. Ako slučingja pe tuke akava, sar šaj palem te ove radosno?

Te šaj te odgovorina ko akava pučibe, prvo valjani te haljova soj tani i čačutni radost hem sar javera ačhile radosna iako sine len problemija. Palo adava, ka dikha sar šaj te ačhova radosna, pa čak te ova panda poradosna.

Te ovel pe radosno nane isto sar te ovel pe raspoložimo. Razmislin bašo akava primer: Nekoj so matilo šaj but te asal. Ama, keda ka ovel nerno, nane više te asal hem šaj ka haljovel kaj isi le panda o ista problemija. Ov sine raspoložimo samo nesavo vreme, ama adava na sine čačutni radost (Izr. 14:13).

I radost tani silno čuvstvo so isi amen ko vilo keda dobinaja ili adžikeraja nešto šukar. I radost na zavisinela taro adava save tane amare okolnostija (1. Sol. 1:6). Čak ako siem voznemirime bašo nešto, palem šaj te ova radosna. Na primer, o apostolija sine marde soske propovedinena sine bašo Isus. Ama, ola iklile radosna taro Sudsko sovet soske sine ladžakerde bašo leskoro anav (Dela 5:41). Ola na sine radosna so margje len, nego adaleske so ačhile verna e Devleske.

I radost nane osobina kolaja so bijangjovaja hem na avela korkori pestar. Soske? Adaleske so i čačutni radost tani osobina so avela taro e Devleskoro sveti duh. Ov pomožinela amenge te ovel amen „i nevi ličnost“, kolate soj vklučimi i radost (Ef. 4:24; Gal. 5:22). Keda isi amen radost, polokhe šaj te ikljova ko krajo e problemencar.

O Jehova manglja ki Phuv te oven šukar bukja, a na o lošna bukja so dikhaja len sekova dive. Ama, iako o manuša kerena lošna bukja, o Jehova na našavgja pli radost. Ki Biblija pišinela: „I sila hem i radost tane kote so bešela ov“ (1. Let. 16:27). Isto agjaar, o šukar bukja so kerena leskere sluge radujnena e Jehova (Izr. 27:11).

Šaj te dža palo primer e Jehovaskoro agjaar so nane te našava amari radost keda o bukja nane te oven agjaar sar so mislingjem. Namesto but te sekirina amen, šaj te koncentririna amen ko šukar bukja so isi amen hem strplivo te adžikera te dobina panda pošukar bukja ko vreme so avela. * (Dikh i fusnota.)

 Ki Biblija isi but primerija taro manuša so ačhile radosna iako sine len but problemija. O Avraam ačhilo radosno čak keda leskoro životo sine ki opasnost hem keda o javera manuša kerena leske sine problemija (1. Moj. 12:10-20; 14:8-16; 16:4, 5; 20:1-18; 21:8, 9). Sar uspejngja ko adava? Agjaar so razmislinela sine baši pli nadež kaj ka živinel ko nevo sveto keda ka vladinel o Mesija (1. Moj. 22:15-18; Evr. 11:10). O Isus vakergja: „Tumaro dad o Avraam but radujngja pe baši nadež kaj ka dikhel o dive keda ka avav“ (Jovan 8:56). Amen da, sar o Avraam, šaj te razmislina baši radost so ka ovel amen ko vreme so avela (Rim. 8:21).

O apostol Pavle hem o Sila isto agjaar sine len zorali vera hem ačhile radosna iako sine len bare problemija. Na primer, otkeda sine marde hem čhivde ko zatvor, ola molingje pe hem giljaja falingje e Jehova (Dela 16:23-25). O Pavle hem o Sila šaj sine te izdržinen sa adava adaleske so ponadari da razmislinena sine bašo e Devleskere vetuvanja. Isto agjaar, ola sine radosna soske džanena sine kaj cidena muke adaleske soj tane e Isuseskere učenikija. Amen da šaj te ova sar o Pavle hem o Sila ako na bistraja o šukar rezultatija so ka oven amen keda ačhovaja verna e Devleske (Fil. 1:12-14).

Avdive da isi but phralja hem phenja so ačhovena radosna iako isi len problemija. Na primer, ko noemvri 2013 berš, o silno tajfuni Hajan uništingja poviše taro 1.000 khera amare phralengere ko Filipini. O Džordž, kaskoro kher sine celosno uništimo ki diz Takloban, vakergja: „Iako slučingja pe sa adava, o phralja tane radosna. Nane man lafija te vakerav kobor siem radosna“. Ako razmislinaja bašo sa so kerela amenge o Jehova hem siem blagodarna, ka ačhova radosna čak keda isi amen bare problemija. Kola javera pričine isi amen te ova radosna?

Amari najbari pričina baši radost tano amaro amalipe e Jehovaja. Amen pendžaraja okole so vladinela ko celo univerzum. Ov tano amaro Devel, Dad hem Amal! (Ps. 71:17, 18).

Isto agjaar siem blagodarna so o Jehova dengja amen životo hem sposobnost te uživina ki leste (Prop. 3:12, 13). Adaleske so o Jehova angja amen te ova paše lea, šaj te haljova koja tani leskiri namera amencar hem isi amen smisla ko životo (Kol. 1:9, 10). Ama, but manuša na džanena koja tani i smisla e životoskiri. Te šaj te sikavel kobor tani bari i razlika, o Pavle pišingja: „’So i jakh na dikhlja hem o kan na šungja, hem so na alo e manušeske ko vilo, adava o Devel spremingja okolenge so mangena le‘. A amenge o Devel sikavgja adava te džana preku leskoro duho“ (1. Kor. 2:9, 10). Adava so haljovaja e Jehovaskiri volja hem namera, pomožinela amenge te ova radosna.

Razmislin so javer kergja o Jehova amenge. Ov kergja te šaj te oven prostime amare grevija (1. Jov. 2:12). Ov dela amen nadež te živina ko nevo sveto kova soj but paše (Rim. 12:12). Panda avdive, o Jehova dengja amen phralja hem phenja kolencar so šaj zaedno te služina leske (Ps. 133:1). Ov isto agjaar zaštitinela amen taro Satana hem taro demonija (Ps. 91:11). Ako razmislinaja bašo sa akala šuže bukja so dengja amen o Devel, ka ova poradosna (Fil. 4:4).

Dali jekh hristijani soj radosno šaj te ovel panda poradosno? O Isus vakergja: „Akava vakergjum tumenge te šaj mli radost te ovel tumende hem tumari radost te ovel celosno“ (Jovan 15:11). Akava sikavela kaj sekogaš šaj te ova poradosna. I radost šaj te sporedina la jagaja. Ako mangaja i jag te ovel pobari, valjani te čhiva poviše kašta. Ma te bistra, o sveti duh pomožinela amenge te ova radosna. Adaleske, ako mangaja te ova  poradosna valjani redovno te molina e Jehova te del amen plo sveti duh. Isto agjaar valjani hor te razmislina bašo e Devleskoro Lafi, soske sine vodimo taro sveti duh te ovel pišimo (Ps. 1:1, 2; Luka 11:13).

Javer buti so ka pomožinel amenge te ova radosna tani ako siem zafatime bukjencar kola so radujnena e Jehova (Ps. 35:27; 112:1). Soske? Ki Biblija pišinela: „Neka ovel tut dar taro čačutno Devel hem iker leskere zapovedija, soske adava tano sa o manuš so valjani te kerel“ (Prop. 12:13). Amen siem stvorime te kera e Devleskiri volja. Znači, ako služinaja e Jehovaske, čače ka uživina ko životo. * (Dikh i fusnota.)

Adava so ka trudina amen te ova poradosna ka koristinel amenge ko but načinija. Na primer, o Jehova ka ovel zadovolno amendar keda ka dikhel kaj radosno služinaja leske čak keda isi amen problemija (5. Moj. 16:15; 1. Sol. 5:16-18). Isto agjaar, adaleske so isi amen čačutni radost, na mislinaja kaj najvažno ko životo tano te oven amen materijalna bukja. Namesto adava, ka trudina amen te kera panda pobare žrtve bašo e Devleskoro Carstvo (Mat. 13:44). Hem keda ka dikha o šukar rezultatija taro adala žrtve, ka ova poradosna, ka osetina amen panda pošukar hem ka trudina amen te kera e javeren poradosna (Dela 20:35; Fil. 1:3-5).

Isto agjaar, keda siem radosna, adava šukar ka vlijajnel upro amaro sastipe. Ki Biblija pišinela: „O radosno vilo tano šukar iljači“ (Izr. 17:22). Jekh naučniko taro univerziteti ki Nebraska (Amerika) istražingja bašo sastipe hem vakergja nešto so složinela pe e Biblijaja. Ov vakergja: „Ako sian radosno hem zadovolno taro tlo životo akana, pobare tane o šanse kaj ka ovel tut pošukar sastipe ponadari“.

Znači, iako živinaja ko pharo vreme, šaj te ova čače radosna keda dobinaja o sveti duh džikote molinaja amen, proučinaja e Devleskoro Lafi hem hor razmislinaja bašo adava so čitinaja. Isto agjaar, ka ova poradosna ako razmislinaja baši sa o šukar bukja so dela amen o Jehova avdive, ako džaja palo primer e javere verna slugengoro hem ako trudinaja amen te kera e Devleskiri volja. Agjaar ka šaj upri amende te osetina o lafija soj pišime ko Psalm 64:10, kote so pišinela: „O pravedno manuš ka radujnel pe e Jehovaske, hem ov ka ovel leskoro than garajbaske“.