1. Soske o vreme ko kova so živinaja tano posebno?

ŽIVINAJA ko jekh čače posebno vreme. Sar so sine vakerdo ki Biblija, o Jehova khedela bute manušen „taro sa o nacie hem plemija hem narodija hem čhibja“. Ola tane „silno narodo“ — poviše taro ofto milionija bahtale manuša kola so „služinena [e Devleske] dive hem rat“ (Otk. 7:9, 15; Isa. 60:22). Nikogaš angleder na sine doborom but manuša kola so siklile te mangen e Devle hem ple pašutnen.

2. Savo pogrešno mangipe sikavena o manuša so na služinena e Devleske? (Dikh i slika ko početok tari statija.)

² Ama, ki Biblija pišinela kaj ko amaro vreme e manušen so nane e Devleskere amala ka ovel len pogrešno mangipe kova soj tano sebično. O apostol Pavle pišingja kaj ko posledna dive o manuša „ka mangen korkori pes, ka mangen o pare“ hem „ka mangen o zadovolstvija, a na e Devle“ (2. Tim. 3:1-4). Akava sebično mangipe tano but pojaver taro mangipe bašo Devel. Adava so o manuša trudinena pe te ispolninen ple sebična celija na kerela  len bahtale, iako ola mislinena kaj ka kerel len. Adava kerela o sveto te ovel sebično hem pharo živibaske.

3. Bašo so ka kera lafi ki akaja statija, hem soske?

³ O apostol Pavle džanlja kaj sa poviše manuša ka sikaven sebično mangipe hem kaj adava ka ovel but opasno e hristijanenge. Adaleske ov dengja lenge sovet „te našen“, ili javere lafencar te ciden pe taro adala so sikavena sebično mangipe (2. Tim. 3:5). Ama, našti celosno te na ava ko kontakt asavke manušencar. Adaleske, sar šaj te zaštitina amen taro stavija e manušengere hem te trudina amen te kera e Jehovaskiri volja, o Devel e mangipaskoro? Akana ka kera lafi baši razlika so isi maškar o mangipe so o Devel mangela te ovel amen hem o mangipe soj pišimo ko 2. Timotej 3:2-4. Adava ka pomožinel amenge te ispitina amen hem te razmislina sar šaj te sikava o mangipe kova so ka kerel amen čače bahtale hem zadovolna.

4. Soske nane pogrešno te manga korkori amen?

⁴ O apostol Pavle pišingja: „O manuša ka mangen korkori pes“. Dali akava značinela kaj tano pogrešno te manga korkori amen? Na, adava tano normalno hem valjani te manga korkori amen. O Jehova kergja amen agjaar. O Isus vakergja: „Valjani te mange tle pašutne sar korkori tut“ (Mar. 12:31). Našti te manga e javere manušen ako na mangaja korkori amen. I Biblija isto agjaar vakerela amenge: „O roma da valjani te mangen pumare romnjen sar korkori pes. O rom kova so mangela ple romnja, mangela korkori pes. Soske, nikoj na mrzinela korkori pes, nego arakhela pe hem ceninela pe“ (Ef. 5:28, 29). Taro akava šaj te dikha kaj valjani dži negde te manga korkori amen.

5. Sar ka opišine e manušen kola so preterano mangena korkori pes?

⁵ Keda ko 2. Timotej 3:2 kerela lafi bašo manuša so mangena korkori pes, mislinela pe bašo mangipe so nane normalno nego sebično. Okola so preterano mangena korkori pes, mislinena baši peske poviše nego so valjani. (Čitin Rimjanite 12:3.) Ola poviše grižinena pe peske, a na e javerenge. Keda o bukja nane te ikljon sar so mangle, ola krivinena e javeren, a na pes. Jekh biblisko izučuvači sporedingja asavke manušen ežoja kova so pakjarela pe sar jekh topka, hem adalea takjarela korkori pes e kovle andrune krznoja, a e javerenge sikavela samo ple oštra bocke. Asavke manuša nane čače bahtale.

6. Kola šukar rezultatija avena taro mangipe bašo Devel?

⁶ Nesave bibliska izučuvačija mislinena kaj o Pavle najangle spomningja asavko mangipe soske adava mangipe anela dži ko lošna osobine so vakergja len palo adava. Sprotivno taro adava, o mangipe bašo Devel kerela te oven amen šukar osobine. Asavko mangipe tano povrzimo javere da osobinencar sar soj i radost, mir, strplivost,  ljubeznost, šukaripe, vera, te na holjanel pe sigate hem i samokontrola (Gal. 5:22, 23). O psalmisti pišingja: „Bahtalo tano o narodo kaskoro Devel tano o Jehova!“ (Ps. 144:15). O Jehova tano bahtalo Devel, adaleske leskoro narodo da tano bahtalo. Isto agjaar, e Jehovaskere sluge tane bahtale soske dena e javerenge, hem adalea razlikujnena pe taro manuša kola so preterano mangena korkori pes hem mislinena samo peske (Dela 20:35).

7. Kola pučiba ka pomožinen amenge te proverina kobor mangaja e Devle?

⁷ Sar šaj te džana dali počminaja poviše te manga korkori amen nego e Devle? Razmislin bašo akava sovet: „Ma keren ništo tari holi ili tari gordost, nego ponizno dikhen e javeren sar pobare tumendar hem ma dikhen samo tumenge te ovel šukar, nego isto agjaar e javerenge da“ (Fil. 2:3, 4). Šaj te puča amen: „Dali šunava akava sovet? Dali trudinava man te kerav adava so mangela o Devel? Dali trudinava man ko različna načinija te pomožinav e javerenge ko sobranie hem ki služba?“ Nane sekogaš lokho te trošina amaro vreme hem sila. Adava ka rodel amendar but te trudina amen hem te žrtvujna nesave bukja kolende so uživinaja. Ama, ništo našti te kerel amen pobahtale taro adava te džana kaj keraja i volja e Najbare Vladeteleskiri ko univerzum!

8. So kergje nesave sluge e Devleskere adaleske so mangena le?

⁸ Adaleske so mangena e Devle hem mangena te služinen leske ki pobari mera, nesave sluge e Devleskere otkažingje pe tari kariera koja so šaj sine te kerel len but barvale. Jekh phen i Erika, koja soj doktorka, biringja i pionersko služba, a na te napredujnel  ki pli kariera. Oj hem lakoro rom služingje ko nekobor phuvja. Oj vakerela: „O but iskustvija so sine amen džikote služinaja sine ki javer čhib hem o amalipa so kergjem len čače kergje amaro životo pobarvalo“. I Erika panda kerela buti sar doktorka, ama pobaro delo taro vreme hem sila koristinela le te sikavel e manušen bašo Jehova hem te pomožinel ple phralenge hem phenjenge ko sobranie. Oj vakerela kaj adava anela lake baro bahtalipe hem kerela la zadovolno.

9. Soske nane bahtale o manuša so mangena o pare?

⁹ O Pavle pišingja kaj o manuša „ka mangen o pare“. Angleder nekobor berša, jekh pioneri ki Irska kergja lafi jekhe manušea bašo Devel. O manuš phravgja plo novčaniko, ikalgja nekobor pare hem vakergja: „Akava tano mlo devel!“ Iako šaj nane te priznajnen, but manuša mislinena agjaar. Ola mangena o pare hem o bukja so šaj te kinen len. Ama, i Biblija predupredinela amen: „Koj mangela o srebro, nikogaš nane leske dovolno srebro, hem koj mangela o barvalipe, nikogaš nane leske dovolno o kjari“ (Prop. 5:10). Asavke manušenge nikogaš nane dovolna o pare. Ola sekogaš mangena poviše hem celo životo trudinena pe te kheden kobor so šaj poviše pare. Adava anela lenge „but dukha“ (1. Tim. 6:9, 10).

10. So vakerela i Biblija bašo barvalipe hem čorolipe?

¹⁰ Točno, sarinenge valjani pare. Ola šaj te služinen amenge sar zaštita (Prop. 7:12). Ama, šaj li te ova bahtale ako isi amen samo o osnovna bukja? Oja! (Čitin Propovednik 5:12.) O Agur, e Jakejeskoro čhavo, pišingja: „Ma de man ni čorolipe ni barvalipe. De man maro kobor so valjani mange“. Lokho tano te haljovel pe soske akava manuš na manglja te ovel but čorolo. Ov vakergja kaj na mangela te ovel ko iskušenie te čorel soske agjaar ka anel ladž e Devleske. Ama, soske na manglja te ovel barvalo? Ov pišingja: „Ako isi man but, ka otkažinav man tutar hem ka phenav: ’Koj tano o Jehova?‘“ (Izr. 30:8, 9). Verojatno pendžarea manušen so isi len doverba ko lengoro barvalipe, a na ko Devel.

11. So vakergja o Isus bašo pare?

¹¹ Okola so mangena o pare našti te keren e Devleskiri volja. O Isus vakergja: „Nijekh našti te služinel duje gospodarenge soske ili ka mrzinel e jekhe, a ka mangel e javere, ili ka ovel phanlo e jekhea, a e javere nane te mangel. Našti te služinen e Devleske hem e barvalipaske“. Isto agjaar vakergja: „Čhinaven te kheden tumenge barvalipe ki phuv, kote so o molco hem i ’rgja hana hem kote so čora khuvena hem čorena. Nego kheden tumenge barvalipe ko nebo, kote so ni o molco ni i ’rgja na hana hem kote so ni o čora na khuvena te čoren“ (Mat. 6:19, 20, 24).

12. Sar adava so ka vodina ednostavno životo ka pomožinel amenge te služina e Devleske? Vaker primer.

¹² But sluge e Jehovaskere trudinena pe te vodinen ednostavno životo. Ola halile kaj agjaar isi len poviše vreme te služinen e Jehovaske hem kaj tane pobahtale. O Džek, kova so živinela ki Amerika, bikingja plo baro kher hem pli firma te šaj te služinel sar pioneri ple romnjaja. Ov vakerela: „Sine mange pharo te otkažinav man taro amaro šužo kher hem taro  but šužo imot. Ama, tari javer strana, beršencar avava mange sine khere nervirimo taro problemija so sine man ki buti. A mi romni, koja soj opšto pioneri, sekogaš sine but bahtali. Oj vakerela sine: ’Isi man o najšukar šefi!‘ Akana, me da sium opšto pioneri, hem zaedno keraja buti baši isto ličnost — e Jehovaske“.

13. So šaj te pomožinel amenge te ispitina amaro stavi bašo pare?

¹³ Te šaj te ispitina amaro stavi bašo pare, valjani te ova iskrena hem te puča amen: „Dali mlo životo sikavela kaj čače verujnava ko adava so vakerela i Biblija bašo pare? Dali mange najvažno te zarabotinav pare? Dali o materijalna bukja mange považna taro mlo amalipe e Jehovaja hem e manušencar? Dali čače verujnava kaj o Jehova ka del man sa so valjani mange?“ Šaj te ova sigurna kaj ov nikogaš nane te razočarinel adalen so isi len doverba ki leste! (Mat. 6:33).

14. Sar valjani te dikha ko zadovolstvija?

¹⁴ I Biblija isto agjaar vakerela kaj ko posledna dive o manuša „ka mangen o zadovolstvija“. Isto sar so valjani uramnoteženo te dikha ki amende hem ko pare, isto agjaar valjani uramnoteženo te dikha hem ko zadovolstvija. Nesave manuša mislinena kaj valjani te otkažina amen taro sa o zadovolstvija, ama o Jehova na mangela adava. I Biblija ohrabrinela e Devleskere verna slugen: „Ha tlo maro bahtalipaja, hem pi tli mol bahtale vilea“ (Prop. 9:7).

15. So značinena o lafija „ka mangen o zadovolstvija“?

¹⁵ Ko 2. Timotej 3:4 kerela pe lafi manušenge kola so mangena o zadovolstvija hem o Devel nane lenge važno ko životo. Primetin kaj ko akava stiho na vakerela kaj o manuša ka mangen o zadovolstvija poviše nego e Devle. Adava ka značinel kaj ola hari mangena e Devle. O stiho vakerela „a na e Devle“. Jekh biblisko izučuvači pišingja: „Akava [stiho] sigurno na značinela kaj ola mangena e Devle dži ki nesavi mera. Ov značinela kaj ola ni najhari na mangena e Devle“. Akava tano seriozno predupreduvanje okolenge so mangena o zadovolstvija. I Biblija baši lende vakerela kaj „lengoro vnimanie lena... o zadovolstvija akale životoskere“ (Luka 8:14).

16, 17. Sar dikhela sine o Isus ko zadovolstvija?

¹⁶ O Isus sikavgja amenge so značinela uramnoteženo te dikha ko zadovolstvija. Ov sine ko bijav hem ki jekh bari večera (Jovan 2:1-10; Luka 5:29). Ko bijav, na sine len dovolno mol, adaleske o Isus kergja čudo agjaar so o pani ulo mol. Ki javer prilika, keda nesave manuša krivingje e Isuse kaj previše hala hem piela, ov but jasno vakergja kaj adala manuša na dikhena uramnoteženo ko bukja (Luka 7:33-36).

¹⁷ Ama, e Isuseske na sine najvažna  o zadovolstvija. O Jehova sine leske ko prvo than ko životo hem kerela sine sa so šaj te pomožinel e javerenge. Ov sine spremno te merel bare dukhencar ko stubo te šaj te spasinel e manušen. O Isus vakergja okolenge so mangle te džan pali leste: „Bahtale sien keda baši mande vredžinena tumen, progoninena tumen hem vakerena razna lošna hovavne bukja protiv tumende. Oven bahtale hem osetinen tumen but šukar, soske bari tani tumari nagrada ko nebo. Soske agjaar progoninena sine e prorokon angleder tumende“ (Mat. 5:11, 12).

18. Kola pučiba ka pomožinen amenge te ispitina kobor mangaja o zadovolstvija?

¹⁸ Sar šaj te ispitina kobor mangaja o zadovolstvija? Šaj te puča amen: „Dali i zabava mange považno taro sostanokija hem tari služba? Dali sium spremno te žrtvujnav nesave bukja kolende so uživinava te šaj te služinav e Devleske? Keda birinava zabava, dali razmislinava sar dikhela o Jehova ki adaja zabava?“ Adaleske so mangaja e Devle hem mangaja te kera leskiri volja, nane dovolno samo te na kera o bukja so džanaja kaj tane pogrešna. Isto agjaar valjani te pazina te na kera adala bukja so mislinaja kaj na mangela len o Jehova. (Čitin Matej 22:37, 38.)

19. Kola manuša nane čače bahtale?

¹⁹ Okolu 6.000 berša, e Satanaskoro sveto kerela o manuša te ciden muke. Akana, ko posledna dive, i Phuv tani pherdi manušencar kola so preterano mangena korkori pes, o pare hem o zadovolstvija. Ola mislinena samo ko adava so šaj te dobinen le hem lengere želbe tane najvažna ko lengoro životo. Ama, adala manuša nane čače bahtale! Tari javer strana, i Biblija vakerela: „Bahtalo tano o manuš kas so pomožinela o Devel e Jakoveskoro, kova so nadinela pe ko Jehova, plo Devel“ (Ps. 146:5).

20. Sar o mangipe bašo Devel kergja tut bahtalo?

²⁰ E Jehovaskere sluge čače mangena le hem lengoro broj taro berš ko berš bajrovela. Akava sikavela kaj e Devleskoro Carstvo vladinela hem kaj panda hari ka anel bereketija kola so našti ni te zamislina len amenge! Keda keraja adava so mangela o Jehova, keraja le bahtalo, a adava kerela amen da te ova čače bahtale. Okola so mangena e Jehova ka oven večno bahtale! Ki javer statija ka dikha nesave lošna osobine kola so avena taro sebično mangipe. Isto agjaar, ka dikha sar akala osobine razlikujnena pe taro šukar osobine so isi e Jehovaskere slugen.