1-2. Save situaciencar soočinena pe but Jehovaskere sluge, hem sar adava šaj te vlijajnel upri lende?

RAZMISLIN bašo akala trin situacie: Jekh terno phral doznajnela kaj isi le pharo nasvalipe. Jekh bukjarno phral so isi le poviše taro pinda berš ačhovela bizi buti hem iako trudinela pe but, našti te arakhel javer buti. Jekh verno pophuri phen našti te kerel doborom but ki služba e Jehovaske sar angleder.

² Ako tu da arakhljovea ki slično situacija, šaj mislinea tuke kaj na sian više korisno. Asavke okolnostija šaj te len tlo bahtalipe, te keren te dikhe lošno ki tute hem te ruminen tle odnosija e javerencar.

3. Sar dikhena ko manušikano životo o Satana hem adala so kontrolirinela len?

³ O sveto sikavela isto sar e Satanaskoro stavi sprema o manušikano životo. Ov otsekogaš ponašinela pe sine e manušencar sar te phene na vredinena ništo. Ni hari na žalingja e Eva keda vakergja lake kaj ka ovel slobodno ako na šunela e Devle, iako but šukar džanlja kaj i kazna bašo adava tano o meribe. O Satana celo vreme kontrolirinela o trgovsko, o političko hem o religiozno sistem akale svetoskoro. Adaleske ni hari na iznenadinela amen so but biznismenija, političarija hem verska vodačija nane len nisavo poštovanje sprema o manušikano životo hem na grižinena pe sar osetinena pe o manuša.

4. So ka dikha ki akaja statija?

⁴ Ama, o Jehova mangela te uverinel amen kaj vredinaja hem kaj ov tano amencar keda nakhaja taro phare situacie kola so šaj te keren amenge negativna čuvstvija  (Ps. 136:23; Rim. 12:3). Ki akaja statija ka dikha sar o Jehova pomožinela amenge: 1) keda siem nasvale, 2) keda isi amen finansiska problemija hem 3) keda mislinaja kaj na siem više korisna ki služba adaleske so siem phure. Ama, najangle te dikha soske šaj te ova sigurna kaj sekova jekh amendar tano skapoceno e Jehovaske.

5. So uverinela tut kaj o manuša tane skapocena e Jehovaske?

⁵ Iako siem stvorime taro pravo e phuvjakoro, amen vredinaja but poviše tari jekh šaka phuv (1. Moj. 2:7). Razmislin samo bašo nekobor bukja so uverinena amen kaj siem skapocena e Jehovaske. Ov stvoringja e manušen hem dengja len sposobnost te sikaven leskere osobine (1. Moj. 1:27). Adalea, o manuš ulo pošukar taro sa o javera materijalna bukja so stvoringja, hem čhivgja le te grižinel pe baši Phuv hem bašo životne (Ps. 8:4-8).

6. Kova javer dokaz isi amen kaj o Jehova ceninela e nesovršena manušen?

⁶ Čak otkeda grešingja o Adam, o Jehova ponadari da ceninela sine e manušen. Doborom but ceninela amen so dengja ple mangle Čhave, e Isuse, sar otkupnina bašo amare grevija (1. Jov. 4:9, 10). Adaleske so dengja adaja žrtva, o Jehova ka voskresninel okolen so mule bašo e Adameskoro grevo. Ki lende tane vklučime hem o pravedna hem okola so nane pravedna (Dela 24:15). Leskoro Lafi uverinela amen kaj siem leske skapocena bizi razlika dali siem nasvale, čorole ili phure (Dela 10:34, 35).

7. Kola javera dokazija sikavena e Devleskere slugenge kaj tane skapocena e Jehovaske?

⁷ Isi javera da pričine soske šaj te ova uverime kaj o Jehova ceninela amen. Ov dikhlja sar reagiringjem keda šungjem o šukar haberi hem privlečingja amen ki peste (Jovan 6:44). Keda počmingjem te kera čekorija te šaj te ova lea popaše, ov da kergja čekorija te šaj te ovel amencar popaše (Jak. 4:8). Isto agjaar, o Jehova dela plo vreme hem plo trudo te šaj te sikavel amen, hem adalea sikavela kobor but siem leske važna. Ov džanela save siem akana hem save šaj te ova ki idnina. Osven adava, ov dela amen sovetija hem ukorinela amen adaleske so mangela amen (Izr. 3:11, 12). Akala tane čače silna dokazija kaj siem but skapocena e Jehovaske!

8. Sar šaj o lafija taro Psalm 18:27-29 te pomožinen amenge ispravno te dikha ko amare problemija?

⁸ Iako nesave mislinena sine kaj o cari o David na vredinela ništo, ov džanlja kaj o Jehova mangela le hem poddržinela le. Adava pomožingja leske ispravno te dikhel ki pli situacija (2. Sam. 16:5-7). Ako siem obeshrabrime ili ako soočinaja amen problemencar, o Jehova šaj te pomožinel amenge pojaver te dikha ko bukja hem te nakhava sekoja prečka. (Čitin Psalm 18:27-29.) Keda džanaja kaj ov poddržinela amen, ništo našti te čhinavel amen te služina leske bahtale (Rim. 8:31). Te dikha trin konkretna situacie ko kola so na smejnaja te bistra kaj o Jehova mangela amen hem ceninela amen.

9. Save čuvstvoncar šaj borinaja amen keda siem nasvale?

⁹ Keda siem nasvale, adava šaj te vlijajnel upro amare čuvstvija hem te čhivel amen te mislina kaj na siem više korisna bašo ništo. Šaj ladžaja adaleske so o manuša dikhena kaj siem nasvale ili adaleske so zavisinaja taro javera. Čak keda o javera na dikhena kaj siem nasvale, šaj pharo amenge soske ladžaja kaj našti te kera doborom  but sar angleder. Sar ohrabrinela amen o Jehova keda nakhaja taro asavko pharo periodi?

10. Sprema Izreki 12:25, so šaj te pomožinel amenge keda siem nasvale?

¹⁰ Keda siem nasvale, „o šukar lafi“ šaj but te ohrabrinel amen. (Čitin Izreki 12:25.) I Biblija tani pherdi šukar lafencar kola so setinkerena amen kaj e Jehovaske siem skapocena iako siem nasvale (Ps. 31:19; 41:3). Ako poviše puti čitinaja adala lafija, o Jehova ka pomožinel amenge te ikljova ko krajo e negativno čuvstvoncar kola so mučinena amen adaleske so siem nasvale.

11. Sar o Jehova pomožingja jekhe phraleske?

¹¹ Te dikha o primer jekhe phraleskoro so vikinela pe Horhe. Keda sine terno, ov nasvalilo taro jekh pharo nasvalipe kova so sigate napredujnela sine. Adaleske, ov mislinela sine kaj na vredinela ništo. O Horhe vakerela: „Na mislingjum kaj ka ovel mange doborom pharo te ikljovav ko krajo e posledicencar taro nasvalipe. Soj panda pološno, ladžava sine adaleske so mlo nasvalipe sine but primetlivo anglo manuša. Džikote mlo sastipe ovela sine sa pološno, razmislinava sine kobor ka promeninel pe mlo životo. Osetinava man sine but tažno hem taro vilo molinava sine e Jehova te pomožinel mange“. Sar pomožingja leske o Jehova? O Horhe vakerela: „Adaleske so našti sine te koncentririnav man, čitinava sine samo po nekobor stihija taro Psalmija kola so sikavena kobor o Jehova grižinela pe ple slugenge. Poviše puti čitinava sine adala stihija sekova dive hem čače dena man sine bari uteha. Sar so nakhela sine o vreme, o javera počmingje te primetinen kaj asava počesto. Čak phengje mange kaj ohrabrinava len mle pozitivno stavea. Haliljum kaj o Jehova odgovoringja  ko mle molitve! Pomožingja mange te dikhav man javere jakhencar. Počmingjum poviše te mislinav ko adava so ov vakerela ki Biblija — kaj but ceninela man iako sium nasvalo“.

12. Ako sian nasvalo, so šaj te kere te šaj te dobine e Jehovaskiri pomoš?

¹² Ako tute da isi tut nesavo nasvalipe, ov sigurno kaj o Jehova džanela taro so nakhea. Molin le te pomožinel tuke te šaj ispravno te dikhe ki tli situacija. A palo adava, čitin i Biblija te šaj te setine tut ko šukar lafija kola so o Jehova dengja te oven pišime ki late. Posebno koncentririn tut ko stihija kola so sikavena kobor ov ceninela ple slugen. Agjaar ka uverine tut kaj o Jehova tano šukar sprema sarine so verno služinena leske (Ps. 84:11).

13. Sar šaj te osetinel pe jekh rom hem dad ako našavela pli buti?

¹³ Sekova rom hem dad mangela te grižinel pe bašo potrebe ple familijakere. Ama zamislin tuke kaj nesavo phral ačhola bizi buti. Iako but trudinela pe te arakhel buti, na uspejnela ko adava. Ko asavke okolnostija šaj ka mislinel kaj na vredinela. Sar ka pomožinel leske adava so ka razmislinel bašo e Jehovaskere vetuvanja?

14. Soske o Jehova ispolninela adava so vetinela?

¹⁴ O Jehova sekogaš ispolninela adava so vetinela (Is. Nav. 21:45; 23:14). Adava kerela le taro nekobor pričine. Prvo, adava ka vlijajnel upro leskoro anav, javere lafencar upro leskoro ugled. O Jehova vetingja kaj ka grižinel pe ple verna slugenge hem osetinela pe dolžno te ikerel pe ko plo lafi (Ps. 31:1-3). Osven adava, džanela kaj amen, sar delo tari leskiri familija, ka ova but razočarime ako na grižinela pe amenge. Ov vetinela kaj ka del  amen sa so valjani amenge hem ko materijalno hem ko duhovno pogled. Ništo nane te čhinavel le te ispolninel adava so vetingja! (Mat. 6:30-33; 24:45).

15. a) Save problemencar soočingje pe o hristijanja ko prvo veko? b) Ko so uverinela amen o Psalm 37:18, 19?

¹⁵ Ako na bistraja soske o Jehova ispolninela ple vetuvanja, šaj te ova uverime kaj ka pomožinel amenge keda ka oven amen finansiska problemija. Te dikha so slučingja pe e hristijanencar ko prvo veko. Keda počmingja o progonstvo protiv o sobranie ko Erusalim, sarine našle, osven o apostolija (Dela 8:1). Razmislin so značinela sine adava. O hristijanja soočingje pe čorolipaja verojatno adaleske so našavgje ple khera hem pli buti. Sepak, o Jehova na mukhlja len hem ola ponadari da služinena leske sine bahtale (Dela 8:4; Evr. 13:5, 6; Jak. 1:2, 3). Ov pomožingja adale verna hristijanenge, a ka pomožinel amenge da. (Čitin Psalm 37:18, 19.)

16. Soske šaj te mislina amenge kaj amari služba nane više doborom važno e Jehovaske?

¹⁶ Sar so phujrovaja, šaj te počmina te mislina amenge kaj našti te kera but e Jehovaske. Šaj e care e Davide da mučinena le sine ista čuvstvija keda phurilo (Ps. 71:9). Sar šaj o Jehova te pomožinel amenge?

17. So sikljovaja tari jekh phen so vikinela pe Čeri?

¹⁷ Razmislin baši jekh phen so vikinela pe Čeri. Oj sine kanimi ko jekh sostanok bašo održibe amare dvorane, ama na manglja te džal. I Čeri vakergja peske: „Phuri sium, udovica sium, hem nane man nisavi veština kolaja so ka šaj te ovav korisno e Jehovaske. Mandar nane le nisavi korist!“ I rat angleder adava sostanok, oj molingja  pe e Jehovaske taro vilo. Keda reslja ki sala o javer dive, pučela pe sine soske ustvari ali. Ama ko sostanok, jekh taro govornikija vakergja kaj amari najvažno veština tani i želba te ova sikavde taro Jehova. I Čeri vakerela: „Mislingjum mange — pa, man isi man adaja veština! Počmingjum te rovav keda haliljum kaj o Jehova odgovoringja ki mli molitva. Ov uveringja man kaj isi man nešto vredno so šaj te dav, hem kaj ov tano spremno te sikavel man!“ Keda setinela pe ko adava i Čeri vakerela: „Džikote džava sine ko sostanok osetinava man sine voznemirimi hem obeshrabrimi. Ama, keda ikliljum adathar osetinava man sine ohrabrimi hem korisno“.

18. Sar sikavela i Biblija kaj o Jehova ponadari da ceninela amari služba iako siem ko pophure berša?

¹⁸ Čak ako siem ko pophure berša, šaj te ova sigurna kaj e Jehova isi le panda buti amenge (Ps. 92:12-15). O Isus sikavgja amen kaj, bizi razlika kobor siem ograničime ili kobor tikne dikhjona amenge o bukja so keraja len, o Jehova ceninela sa so keraja baši leste ki služba (Luka 21:2-4). Adaleske, mislin ko adava so šaj te kere. Na primer, šaj te kere lafi bašo Jehova, te moline tut e phralenge hem te ohrabrine e javeren te ačhon verna. O Jehova dikhela tut sar plo sorabotniko, na bašo adava kobor kerea, nego adaleske so sian leske poslušno taro vilo (1. Kor. 3:5-9).

19. Ko so uverinena amen o lafija taro Rimjanite 8:38, 39?

¹⁹ Kobor siem blagodarna so služinaja e Jehovaske, o Devel kova so čače ceninela okolen soj leske verna! Ov stvoringja amen te kera leskiri volja, hem adaleske adava dela amen čačutni smisla ko amaro životo (Otk. 4:11). Iako e svetoske šaj na vredinaja ništo, o Jehova na ladžala amendar (Evr. 11:16, 38). Čak ako siem obeshrabrime adaleske so isi amen nesavo nasvalipe, finansiska problemija ili adaleske so siem ko pophure berša, nikogaš ma te bistra kaj ništo našti te odvojnel amen taro mangipe amare Dadeskoro soj ko nebo! (Čitin Rimjanite 8:38, 39.)