1. So vakergja o Jehova bašo amaro dušmani otkeda o Adam hem i Eva grešingje?

O ADAM džanlja kaj o sapa našti te keren lafi. Adaleske, keda doznajngja kaj jekh sap kergja lafi e Evaja, šaj halilo kaj adava ustvari sine nesavo duhovno suštestvo (1. Moj. 3:1-6). O Adam hem i Eva na džanle koj sine akava duhovno suštestvo. Ama, o Adam odlučingja te ovel tari strana adale jabandžijaskiri hem te buninel pe protiv plo Dad kova so mangela le (1. Tim. 2:14). O Jehova počmingja odma te vakerel poviše informacie bašo akava lošno dušmani hem vetingja kaj ko krajo ka ovel uništimo. Ama o Jehova predupredingja kaj dži tegani, akava duhovno suštestvo kova so kergja lafi preku o sap, ka protivinel pe sarinenge so mangena e Devle (1. Moj. 3:15).

2, 3. Koja šaj tani i pričina soske o Jehova vakergja hari bukja bašo Satana angleder te avel o Mesija?

² O Jehova nikogaš na vakergja amenge o anav e angeleskoro so buningja pe protiv leste. * (Dikh i fusnota.) Čak palo 2.500 berša otkeda buningje pe protiv leste ki  edensko gradina, o Jehova vakergja koj tano adava dušmani (Jov 1:6). Ov tano pendžardo sar „Satana“, so značinela „protivniko“. O lafi Satana spomninela pe samo ko trin lila ko Hebrejska spisija — 1. Letopisi, Jov hem Zaharija. Soske bašo akava dušmani tano vakerdo doborom hari angleder te avel o Mesija?

³ Ko Hebrejska spisija o Jehova na dengja but informacie bašo Satana hem bašo adava so kerela sine ov. I glavno cel taro akava delo e Biblijakoro tano te pomožinel e manušenge te pendžaren e Mesija hem te sledinen le (Luka 24:44; Gal. 3:24). Keda alo o Mesija, o Jehova preku leste hem leskere učenikija vakergja poviše informacie bašo Satana hem bašo angelija kola so gele tari leskiri strana. * (Dikh i fusnota.) Akava tano soodvetno soske o Jehova ka koristinel e Isuse hem e pomazanikon te uništinel e Satana hem leskere sledbenikon (Rim. 16:20; Otk. 17:14; 20:10).

4. Soske na valjani preterano te dara taro Beng?

⁴ O apostol Petar bašo Satana vakergja kaj tano sar „lavi so vikinela keda tano bokhalo“, a o Jovan vakergja kaj tano „sap“ hem „ažderi“ (1. Pet. 5:8; Otk. 12:9). Ama, amen na valjani preterano te dara taro Beng. Leskiri mokj tani ograničimi. (Čitin Jakov 4:7.) Zaštitinena amen o Jehova, o Isus hem o verna angelija. Šaj te borina amen protiv amaro dušmani adaleske so ola pomožinena amenge. Ama, valjani te džana o odgovorija bašo trin važna pučiba: Kobor bari mokj isi e Satana? Sar probinela o Satana te vlijajnel upro javera? Hem kola bukja našti te kerel len? Te odgovorina ko akala pučiba hem te dikha so šaj te sikljova.

5, 6. Soske o manušikane vlade našti te keren o promene kola so najviše valjanena e manušenge?

⁵ But angelija gele tari e Satanaskiri strana hem buningje pe protiv o Devel. Angleder o Potop, nesave lendar pele ko iskušenie e Satanaskoro te oven len seksualna odnosija džuvlencar. I Biblija opišinela akava ko simbolično način keda vakerela kaj o ažderi lelja pea jekh tretina taro zvezde (1. Moj. 6:1-4; Juda 6; Otk. 12:3, 4). Keda mukhle e Devleskere familija, ola biringje o Satana te kontrolirinel len. Na valjani te mislina kaj akala buntovnikija tane grupa so nane organizirimi. Ko nevidlivo duhovno sveto, o Satana kergja peske vlada koja so imitirinela e Devleskoro Carstvo. Ov korkori pes kergja pe cari hem organiziringja e demonen, dengja lenge mokj hem kergja len svetska vladetelija (Ef. 6:12).

⁶ O Satana koristinela pli organizacija te kontrolirinel o manušikane vlade. Akava džanaja taro adava  so sikavgja e Isuseske „sa o carstvija e svetoskere“ hem vakergja leske: „Ka dav tut sa akaja vlast hem lengiri slava, adaleske soj mange dendi, hem me dava la kaske so me mangava“ (Luka 4:5, 6). Iako but vlade kerena šukar bukja bašo ple gragjanija hem nesave vladetelija iskreno mangena te pomožinen e narodoske, nijekh manušikano vladeteli našti te kerel o promene kola so najviše valjanena e manušenge (Ps. 146:3, 4; Otk. 12:12).

7. Osven so koristinela o vlade, sar o Satana koristinela i hovavni religija hem o trgovsko sistem? (Dikh i slika ko početok tari statija.)

⁷ O Satana hem o demonija isto agjaar koristinena i hovavni religija hem o trgovsko sistem te šaj te hovaven „celo sveto“ (Otk. 12:9). Preku i hovavni religija, o Satana vakerela hovajba bašo Jehova, pa čak probingja te garavel e Devleskoro anav (Erem. 23:26, 27). Adaleske, nesave iskrena manuša so mislinena kaj služinena e Devleske, ustvari služinena e demonenge (1. Kor. 10:20; 2. Kor. 11:13-15). Isto agjaar, o Satana koristinela o trgovsko sistem te hovavel e manušen. Jekh hovajbe tano kaj o pare hem o materijalna bukja kerena e manušen bahtale (Izr. 18:11). Okola so verujnena ko akava hovajbe celo plo životo tane robija e barvalipaske namesto te služinen e Devleske (Mat. 6:24). Čak ako nekogaš mangena sine e Devle, lengoro mangipe bašo materijalna bukja ulo doborom silno so lengoro mangipe bašo Devel našavdilo (Mat. 13:22; 1. Jov. 2:15, 16).

8, 9. a) Kola duj pouke šaj te sikljova taro postapke e Adameskere, e Evakere hem e buntovna angelengere? b) Soske koristinela amenge adava so džanaja kaj o Satana vladinela e svetoja?

⁸ Taro postapke e Adameskere, e Evakere hem e buntovna angelengere šaj te sikljova duj važna pouke. Prvo, sikljovaja kaj isi samo duj strane hem kaj mora te birina samo jekh. Ili ka ačhova verna e Jehovaske ili ka dža tari e Satanaskiri strana (Mat. 7:13). Dujto, sikljovaja kaj okola so džana tari e Satanaskiri strana dobinena samo privremeno korist. Na primer, o Adam hem i Eva dobingje prilika korkori te odlučinen soj tano ispravno, a soj pogrešno. O demonija dobingje odredeno mokj upro manušikane vlade (1. Moj. 3:22). Ama, keda nekoj birinela te ovel tari e Satanaskiri strana, sekogaš isi le lošna posledice. Nane trajna koristija! (Jov 21:7-17; Gal. 6:7, 8).

⁹ Soske koristinela amenge adava so džanaja kaj o Satana vladinela e svetoja? Adava pomožinela amenge te dikha ispravno ko svetska vlade hem pottikninela amen te propovedina o šukar haberi. Džanaja kaj o Jehova mangela te poštujna e vlasten (1. Pet. 2:17). Ov adžikerela amendar te poštujna lengere zakonija sa džikote adala zakonija na džana protiv leskere merilija (Rim. 13:1-4). Ama, isto agjaar džanaja kaj na valjani te mešina amen ki politika hem nikogaš na valjani te poddržina nesavi političko partija ili nesave manušikane vladetele (Jovan  17:15, 16; 18:36). Adaleske so haljovaja kaj o Satana probinela te garavel e Devleskoro anav hem te meljarel leskoro ugled, keraja sa te šaj te pomožina e manušenge te šunen o čačipe bašo Jehova. Amen siem gorda so phiravaja e Devleskoro anav hem so koristinaja le. O mangipe bašo Devel tano but poskapoceno nego o mangipe bašo pare ili o materijalna bukja (Isa. 43:10; 1. Tim. 6:6-10).

10-12. a) Save mamke šaj koristingja o Satana te iskušinel nesave angelen? b) So sikljovaja taro lošno primer e buntovna angelengoro?

¹⁰ O Satana koristinela delotvorna metode te šaj te vlijajnel upro javera. Te šaj te čhivel len te keren ov so mangela, ponekogaš koristinela mamke te iskušinel len, a ponekogaš probinela te daravkerel len.

¹¹ Te dikha kobor delotvorno koristingja mamke o Satana te šaj te hovavel bute angelen. Ov verojatno dikhela len sine but vreme te šaj te džanel solea šaj te iskušinel len. Nesave angelija astargje pe ki mamka hem sine len seksualna odnosija džuvlencar. Lengere čhave sine nasilna džinija kola so postapinena sine surovo e manušencar (1. Moj. 6:1-4). Osven o nemoral, o Satana šaj probingja te iskušinel adale angelen adalea so vetingja lenge kaj ka del lenge vlast upro sa o manuša. Ko akava način, o Satana šaj manglja te čhinavel te avel o potomstvo e džuvljakoro (1. Moj. 3:15). Ama, o Jehova na mukhlja adava. Ov kergja te ovel Potop hem adalea rumingja o planija e Satanaskere hem e demonengere.

¹² So šaj te sikljova taro akava? O nemoral hem i gordost tane but delotvorna mamke. O angelija kola so gele tari e Satanaskiri strana, angleder adava ola but berša služingje e Jehovaske. Ama, but džene lendar mukhle ki lende te bajroven pogrešna želbe kola so ule but silna. Amen da avdive na valjani te bistra kaj bizi razlika kobor vreme služinaja e Jehovaske, o pogrešna želbe šaj te mukhen korenja ko amaro vilo (1. Kor. 10:12). Adaleske valjani sekogaš te proverina so isi ko amaro vilo hem te otfrlina  o nemoralna misle hem i gordost! (Gal. 5:26; čitin Kološanite 3:5.)

13. Koja tani javer mamka so koristinela la o Satana hem sar šaj te izbegina la?

¹³ Panda jekh mamka so koristinela o Satana tano te manga te interesina amen bašo natprirodna sile. Avdive ov probinela te čhivel e manušen te interesinen pe bašo demonija preku i hovavni religija hem preku i zabava. O filmija, o kompjuterska igre hem javera vrste zabava šaj te keren o spiritizam te dikhjol privlečno. Sar šaj te izbegina akaja mamka? Na valjani te adžikera e Devleskiri organizacija te del amen spisako koja zabava tani šukar, a koja lošno. Mora te vežbina amari sovest te šaj te ana šukar odluke kola so temelinena pe ko e Jehovaskere načelija (Evr. 5:14). Ako amaro mangipe bašo Devel nane licemerno, ka ana mudra odluke (Rim. 12:9). O licemerno manuš vakerela jekh, a kerela javer. Adaleske keda birinaja zabava, šaj te puča amen: „Dali ikerava man ko načelija bašo kola so sikavava e javeren? So ka mislinen o manuša kasaja so proučinava ili o manuša so posetinava len keda bi dikhena sine savi zabava birinava?“ Ako ikeraja amen ko načelija kolenge so sikavaja e javeren, polokhe ka otfrlina e Satanaskere mamke (1. Jov. 3:18).

14. Sar šaj o Satana te probinel te daravkerel amen hem so ka pomožinel amenge te ačhova zorale?

¹⁴ O Satana isto agjaar probinela te daravkerel amen te šaj te na ačhova verna e Jehovaske. Na primer, šaj ka vlijajnel upro vlastija te zabraninen amaro propovedibe. Ov šaj te vlijajnel upro amare kolege ili součenikija te asan amenge adaleske so ikeraja amen ko bibliska načelija (1. Pet. 4:4). O Satana šaj te vlijajnel čak upri amari familija so nane Svedokija. Ola šaj taro šukar namere ka probinen te čhinaven amen te dža ko amare sostanokija (Mat. 10:36). Sar šaj te ačhova zorale keda protivinela pe amenge o Satana? Na valjani te iznenadina amen keda o Satana napadinela amen, soske ov tano ki vojna amencar (Otk. 2:10; 12:17). Isto agjaar, na valjani te bistra koja tani i najvažno buti: O Satana vakerela kaj  služinaja e Jehovaske samo keda amenge lokho hem kaj ka irana dumo e Devleske keda ka ovel amenge pharo (Jov 1:9-11; 2:4, 5). Isto agjaar, mora sekogaš te molina e Jehova te del amenge sila. Te na bistra kaj o Jehova nikogaš nane te mukhel amen (Evr. 13:5).

15. Dali šaj o Satana silaja te čhivel amen te kera nešto so na mangaja? Objasnin.

¹⁵ O Satana našti silaja te čhivel e manušen te keren nešto so na mangena (Jak. 1:14). But džene ko sveto ni na džanena kaj tane tari e Satanaskiri strana. Ama, keda nekoj ka šunel bašo čačipe valjani te birinel dali ka ovel tari e Jehovaskiri ili tari e Satanaskiri strana (Dela 3:17; 17:30). Ako siem odlučna te ova poslušna e Jehovaske, o Satana našti te kerel te na ova verna e Jehovaske (Jov 2:3; 27:5).

16, 17. a) So javer našti te keren o Satana hem leskere demonija? b) Soske na valjani te dara te molina amen ko glaso e Jehovaske?

¹⁶ Isi javera da bukja kola so o Satana hem o demonija našti te keren. Na primer, i Biblija nikogaš na vakerela kaj ola šaj te čitinen amare misle hem amaro vilo. Adava šaj te keren samo o Jehova hem o Isus (1. Sam. 16:7; Mar. 2:8). Znači, valjani li te dara kaj ako keraja lafi ili molinaja amen ko glaso o Satana hem o demonija ka šunen amen hem ka koristinen adala informacie protiv amende? Na. Soske vakeraja agjaar? Razmislin baši akaja sporedba: Na daraja te kera šukar bukja ki služba bašo Jehova samo adaleske so o Beng šaj te dikhel amen. Slično, na valjani te dara te molina amen ko glaso samo adaleske so o Beng šaj te šunel amen. Isto agjaar, ki Biblija isi but primerija taro e Devleskere sluge kola so molingje pe ko glaso, a nigde na pišinela kaj ola darandile kaj o Beng šaj te šunel len (1. Car. 8:22, 23; Jovan 11:41, 42; Dela 4:23, 24). Ako daja amendar sa te kera lafi hem te postapina sar so mangela o Jehova, šaj te ova sigurna kaj o Jehova nane te mukhel o Beng te kerel amenge trajno šteta. (Čitin Psalm 34:7.)

¹⁷ Valjani te pendžara amare dušmane, ama na valjani preterano te dara lestar. Iako siem nesovršena, šaj te pobedina e Satana adaleske so pomožinela amenge o Jehova! (1. Jov. 2:14). Ako protivinaja amen leske, ov ka našel amendar (Jak. 4:7; 1. Pet. 5:9). Izgleda avdive o Satana posebno napadinela e ternen. Sar šaj ola te ačhoven zorale? Bašo akava pučibe ka kera lafi ki javer statija.