1. So vakerela but puti i Biblija bašo ukor?

KO SO mislinea keda šunea o lafi „ukor“? But džene mislinena ki kazna, ama o ukor tano but poviše nego samo kazna. I Biblija vakerela kaj o ukor tano bašo amaro šukaripe hem ponekogaš spomninela pe zaedno e pendžaribaja hem e životoja, a isto agjaar osobinencar sar soj i mudrost hem o mangipe (Izr. 1:2-7; 4:11-13). O ukor taro Devel sikavela kaj ov mangela amen hem kaj mangela te živina večno (Evr. 12:6). Iako o ukor ponekogaš šaj te značinel hem kazna, ov nikogaš nane surovo ili ki amari šteta. Ustvari, o najvažno značenje e lafeskoro „ukor“ tani i pouka, isto sar jekh dad so dela pouka ple mangle čhaveske.

2, 3. Soske šaj te vakerel pe kaj o ukor šaj te ovel hem pouka hem kazna? (Dikh i slika ko početok tari statija.)

² Razmislin bašo akava primer. Jekh tikno čhavo khelela peske sine topkaja khere. Leskiri daj vakergja leske: „Mo čhavo, džanea kaj na valjani te khele tuke andre e topkaja! Šaj te phage nešto“. Ama ov na šungja la hem ponadari da khelgja peske. Tegani, e topkaja khuvgja ki  vazna hem oj phagili! Sar ukoringja le leskiri daj? Oj dengja le pouka agjaar so objasningja leske soske sine pogrešno adava so kergja. Oj manglja ov te haljovel kaj bašo leskoro šukaripe tano te šunel ple roditelen hem kaj lengere pravilija tane potrebna hem razumna. Te šaj te pomožinel leske te haljovel i pouka, oj odlučingja kaj valjani te kazninel le agjaar so nesavo vreme ka lel lestar i topka. Akava na svidžingja pe leske, ama pomožingja leske te pamtinel kaj ako na šunela ple roditelen, ka oven le posledice.

³ Sar hristijanja, amen siem delo taro e Devleskoro kher (1. Tim. 3:15). Amare Dade e Jehova isi le pravo te odlučinel soj ispravno, a soj pogrešno, hem te del amen ukor keda na šunaja le. Isto agjaar, ako amare postapke anena amenge posledice, o ukor so dela le o Jehova mangipaja ka pomožinel amenge te pamtina kobor tano važno te šuna le (Gal. 6:7). O Devel but mangela amen hem na mangela te cida muke (1. Pet. 5:6, 7).

4. a) Sar mangela o Jehova te sikava e javeren? b) Bašo so ka kera lafi ki akaja statija?

⁴ Keda daja ukor soj temelimo ki Biblija šaj te pomožina amare čhaveske ili interesenteske te ovel sledbeniko e Isuseskoro. Koristinaja i Biblija te sikava len te džanen soj ispravno hem te pomožina lenge te haljoven hem te ikeren sa adava so zapovedingja o Isus (Mat. 28:19, 20; 2. Tim. 3:16). O Jehova mangela ola agjaar te oven sikavde te šaj ola da te pomožinen javerenge te džan palo Isus. (Čitin Tit 2:11-14.) Akana te kera lafi bašo trin važna pučiba: 1) Sar o ukor taro Devel tano dokaz kaj ov mangela amen? 2) So šaj te sikljova taro manuša so sine ukorime taro Devel? 3) Sar šaj te ova sar o Jehova hem leskoro Čhavo keda valjani te da ukor?

5. Sar o ukor taro Devel tano dokaz kaj ov mangela amen?

⁵ O Jehova popravinela amen hem sikavela amen adaleske so mangela amen. Ov mangela te ačhova lea paše hem te živina večno (1. Jov. 4:16). Ov nikogaš na vredžinela amen hem na kerela te osetina amen kaj na vredinaja (Izr. 12:18). O Jehova dikhela amare šukar osobine hem poštujnela amari slobodno volja. Dali o ukor so dobinaja le preku i Biblija, o publikacie, o roditelija ili o starešine sikavela tuke kaj o Jehova mangela amen? Ustvari, keda o starešine probinena te popravinen amen ko jekh ljubezno način panda angleder te haljova kaj kergjem nešto pogrešno, ola sikavena e Jehovaskoro mangipe upri amende (Gal. 6:1).

6. Sar o ukor tano dokaz bašo e Devleskoro mangipe čak keda nekastar valjani te len pe nesave odgovornostija?

 ⁶ Ponekogaš o ukor tano poviše nego samo te del pe sovet. Ako nekoj kergja seriozno grevo, ov poviše na pherela o uslovija te oven le nesave odgovornostija ko sobranie. Čak keda slučinela pe asavko nešto, o ukor sikavela kaj o Devel mangela le. Na primer, adava šaj te pomožinel leske te haljovel kobor tano važno poviše te proučinel i Biblija, te razmislinel bašo adava so sikljovela hem te molinel pe. Agjaar ka šaj te ovel panda popaše e Jehovaja (Ps. 19:7). Sar so ka nakhel o vreme, šaj palem ka oven le o odgovornostija so sine le angleder. Čak o isklučuvanje tano dokaz bašo e Jehovaskoro mangipe soske adava arakhela o sobranie taro lošno vlijanie (1. Kor. 5:6, 7, 11). Isto agjaar, adaleske so o ukor taro Jehova tano sekogaš pravedno, o isklučuvanje šaj te pomožinel okoleske so grešingja te haljovel kobor tano seriozno leskoro grevo hem te kainel pe (Dela 3:19).

7. Koj sine o Ševna hem koja lošno osobina uli le?

⁷ Te šaj te haljova kobor tano važno o ukor, ka kera lafi bašo duj manuša kola so dobingje ukor taro Jehova. O prvo tano o Ševna, Izraelco kova so živingja ko vreme e careskoro o Ezekija, a o dujto tano o Gream, phral taro amaro vreme. O Ševna sine upraviteli ko carsko dvoro e Ezekijaskoro hem sine le baro avtoriteti (Isa. 22:15). Ama, ov ulo gordo hem manglja o javera te dikhen le kaj tano važno. Ov čak kergja peske skupo grobo hem vozinela pe sine ko luksuzna kočie (Isa. 22:16-18).

8. Sar o Jehova ukoringja e Ševna, hem savo sine o rezultati?

⁸ Adaleske so o Ševna probingja te ovel slavno, o Devel lelja lestar leskiri odgovornost hem dengja la e  Elijakimeske (Isa. 22:19-21). Akava slučingja pe keda o asirsko cari o Senahirim planiringja te napadinel o Erusalim. Palo adava, o Senahirim bičhalgja jekh grupa službenikija hem bari vojska te šaj te daravkerel e Evreen hem te čhivel e Ezekija te predajnel pe (2. Car. 18:17-25). O Ezekija bičhalgja e Elijakime hem javere duje muršen te keren lafi e službenikoncar. Jekh taro adala duj murša sine o Ševna, kova so tegani služinela sine sar pisari. Akava sikavela kaj o Ševna verojatno na osetingja pe povredimo hem na žalinela pe sine, nego siklilo te ovel ponizno. Ov sine spremno te prifatinel zadače so sine pohari važna. Kola trin pouke šaj te sikljova taro adava so slučingja pe e Ševnaske?

9-11. a) Kola važna pouke šaj te sikljova taro Ševna? b) Soske ohrabrinela tut adava sar o Jehova postapingja e Ševnaja?

⁹ Prvo, adava so o Ševna našavgja i odgovornost so sine le setinkerela amen kaj „i gordost anela propast“ (Izr. 16:18). Šaj isi amen posebna odgovornostija ko sobranie, hem o javera šaj dikhena amen sar važna. Dali tegani ka ačhova ponizna? Na valjani te bistra kaj sekoja sposobnost so isi amen ili sekoja šukar buti so keraja la tani adaleske so o Jehova pomožinela amenge (1. Kor. 4:7). O apostol Pavle pišingja: „Vakerava sekaske tumendar te na mislinel baši peste poviše taro adava so valjani te mislinel, nego te mislinel baši peste razumno“ (Rim. 12:3).

¹⁰ Dujto, taro strogo ukor so dengja o Jehova e Ševnaske verojatno šaj te haljova kaj ov verujngja kaj o Ševna šaj te meninel pe (Izr. 3:11, 12). Akaja tani šukar pouka okolenge so našavgje nesavi odgovornost ki e Devleskiri organizacija. Namesto te oven holjame hem te osetinen pe povredime, ola valjani ponadari da te den plo najšukar e Jehovaske. Ola šaj te dikhen ko ukor sar dokaz kaj o Jehova mangela len. Te na bistra kaj amaro Dad ka nagradinel okolen so ačhovena ponizna. (Čitin 1. Petrovo 5:6, 7.) O ukor so o Jehova mangipaja dela le amenge šaj te oblikujnel amen ako siem ponizna hem siem sar kovli glina ko leskere vasta.

¹¹ Trito, šaj but te sikljova taro način sar o Jehova postapingja e Ševnaja. Keda dela ukor, o Jehova adalea sikavela kaj mrzinela o grevo, ama hem kaj mangela okole so grešingja. O Jehova dikhela o šukar ko manuša. Ako sian roditeli ili starešina, dali džaja palo primer e Jehovaskoro keda valjani te de ukor? (Juda 22, 23).

12-14. a) Sar reagirinena nesave keda dobinena ukor taro Jehova? b) Sar e Devleskoro Lafi pomožingja jekhe phraleske te meninel plo stavi, hem savo sine o rezultati?

¹² Žalno tano adava so nesave manuša tane doborom but povredime keda ka dobinen ukor so čak cidena pe taro Devel hem taro sobranie (Evr. 3:12, 13). Ama, dali adava značinela kaj nikoj našti te pomožinel lenge? Te razmislina bašo Gream, kova so sine isklučimo hem palo nesavo vreme palem iramo ko sobranie. Ama, nesavo vreme otkeda sine iramo, ov čhinavgja te džal ki služba hem ko sostanokija. Jekh starešina trudingja pe te ovel lea amal. Palo nekobor berša, o Gream pučlja adale starešina dali šaj te proučinel i Biblija lea.

¹³ O starešina setinela pe: „E Greame sine le problemi adaleske so  sine gordo. Ov kritikujnela sine e starešinen kola so angje i odluka te ovel isklučimo. Adaleske, nekobor puti proučingjem stihija kola so kerena lafi baši gordost hem o posledice so avena latar. O Gream počmingja pojasno te dikhel pe ki simbolično ajna — e Devleskoro Lafi — hem ni najhari na svidžingja pe leske adava so dikhlja! Adava but vlijajngja ki leste! Otkeda halilo kaj tari jekh ’greda‘ — i gordost — našti sine te dikhel kaj o problemi tano ki leste, ko leskoro kritizersko stavi, počmingja sigate te meninel pe. Počmingja redovno te avel ko sostanokija, hor te proučinel e Devleskoro Lafi hem sekova dive te molinel pe. Isto agjaar, počmingja te grižinel pe bašo duhovna potrebe ple familijakere, a leskiri romni hem o čhave sine but bahtale bašo adava“ (Luka 6:41, 42; Jak. 1:23-25).

¹⁴ O starešina isto agjaar vakergja: „Jekh dive, o Gream vakergja nešto so but pogodingja man: ’Beršencar džanava o čačipe, a sium sine hem pioneri. Ama čak akana šaj te vakerav kaj čače mangava e Jehova‘“. Palo kratko vreme, o Gream dobingja zadača te služinel mikrofonencar ko sostanokija, hem sine but bahtalo bašo adava. O starešina vakergja: „Taro leskoro primer sikliljum kaj keda nekoj tano ponizno anglo Devel agjaar so ka prifatinel leskoro ukor, nane krajo bašo bereketija!“

15. So mora te kera ako mangaja o javera te prifatinen o ukor so daja le lenge?

¹⁵ Ako mangaja te ova šukar učitelija, prvo mora te ova šukar učenikija (1. Tim. 4:15, 16). Slično, ako o Jehova dengja tut odgovornost te de ukor, mora te ačhove ponizno hem te mukhe ov te vodinel tut ko životo. Keda o javera ka dikhen kaj sian ponizno, ka poštujnen tut hem ka ovel lenge polokho te prifatinen sovet ili ukor tutar. Te dikha o primer e Isuseskoro.

16. So šaj te sikljova taro Isus bašo adava sar te da ukor hem sar te sikava?

¹⁶ O Isus sekogaš sine poslušno ple Dadeske, čak keda adava sine but pharo (Mat. 26:39). Ov vakerela sine adalenge so šunena le kaj o bukja so sikavela len hem i mudrost so isi le tane taro Devel (Jovan 5:19, 30). O Isus sine ponizno hem poslušno, adaleske sine le sočuvstvo keda sikavela sine e javeren. O iskrena manuša uživinena sine te oven uzi leste. (Čitin Luka 9:11.) E Isuseskere ljubezna lafija ohrabrinena sine okolen so sine obeshrabrime hem slaba (Mat. 12:20). Ov ko jekh ljubezno način dengja ukor ple apostolenge iako šaj sine te holjanel lenge so akošena pe sine bašo adava koj tano lendar najbaro (Mar. 9:33-37; Luka 22:24-27).

17. Kola osobine ka pomožinen e starešinenge šukar te grižinen pe e sobranieske?

¹⁷ Sekova puti keda o starešine  dena ukor kova so temelinela pe ki Biblija, ola valjani te džan palo e Isuseskoro primer. Agjaar ola ka sikaven kaj mangena te oven vodime taro Devel hem taro leskoro Čhavo. O apostol Petar pišingja: „Oven pastirija e Devleskere stadoske soj tumenge doverimo, šukar grižinen tumen leske, na silaja, nego dobrovolno sar so mangela o Devel; na alčna te šaj te dobinen nešto, nego celo vilea; na sar gospodarija upro okola soj e Devleskoro nasledstvo, nego oven primer e stadoske“ (1. Pet. 5:2-4). Keda o starešine spremno šunena e Devle hem e Isuse, adava tano bašo lengoro hem e javerengoro šukaripe (Isa. 32:1, 2, 17, 18).

18. a) So adžikerela o Jehova taro roditelija? b) Sar o Devel pomožinela e roditelenge?

¹⁸ O ista načelija važinena ki familija da. O Jehova vakergja e poglavarenge: „Ma keren gnevna tumare čhaven, nego den len opomene hem vospitinen len agjaar sar so vakerela o Jehova“ (Ef. 6:4). Kobor tani seriozno akaja buti? Ko Izreki 19:18 pišinela: „Vospitin tle čhave džikote isi nadež, hem ma ov odgovorno bašo leskoro meribe“. O Jehova dengja e roditelenge i odgovornost te den ukor ple čhavenge. Ako na kerena adava, tegani ka odgovorinen angli leste! (1. Sam. 3:12-14). Ama, o Jehova ka del len mudrost hem sila ako molinena le te pomožinel lenge hem ako mukhena leskoro Lafi hem o sveti duh te vodinen len. (Čitin Jakov 1:5.)

19, 20. a) Kola bereketija ka oven amen ako prifatinaja o ukor taro Devel? b) Bašo so ka kera lafi ki javer statija?

¹⁹ Ako prifatinaja o ukor taro Devel hem trudinaja amen te ova sar o Jehova hem o Isus keda daja ukor, ka oven amen but bare bereketija! Ka ovel mir ko amare sobranija hem familie, hem sarine ka osetinen pe mangle, cenime hem bezbedna. Akava džinegde pomožinela amen te zamislina amenge savo mir hem bahtalipe adžikerela amen ko vreme so avela (Ps. 72:7). O ukor taro amaro Dad o Jehova spreminela amen te živina večno zaedno sar jekh familija kolate so isi mir hem jekhipe. (Čitin Isaija 11:9.) Ako na bistraja akava, ka haljova kaj o ukor tano jekh but šukar način sar o Devel sikavela amenge mangipe.

²⁰ Ki javer statija, ka sikljova nešto poviše bašo ukor ki familija hem ko sobranie. Ka dikha sar šaj korkori te ukorina amen. Isto agjaar, ka sikljova sar šaj te izbegina nešto so dukhala but poviše taro bilo kova ukor so ka dobina le.