Ko simbolično način, sarine amen panda hari ka soočina amen jekhe strašno „buraja“ — jekh „bari nevolja“ kolake so kergja lafi o Isus (Matej 24:21). Našti te naša tari akaja nevolja. Sepak, šaj te kera nešto te šaj te zaštitina amen. Soj tano adava?

Ki jekh propoved, o Isus Hristos dengja akava sovet: „Najangle roden o carstvo hem e Devleskiri pravednost“ (Matej 6:33). Sar šaj te kera adava?

Najangle roden e Devleskoro Carstvo. Adava značinela kaj e Devleskoro Carstvo valjani te ovel amenge považno taro bilo so javer (Matej 6:25, 32, 33). Soske? Adaleske so o manuša nane sposobna te rešinen o problemija ko sveto. Adava ka uspejnel samo e Devleskoro Carstvo.

Roden e Devleskiri pravednost. Valjani te trudina amen te živina sprema e Devleskere pravedna zakonija hem načelija. Soske? Ako korkori odlučinaja soj tano šukar, a soj lošno, ka oven amen lošna posledice (Izreki 16:25). Tari javer strana, ako živinaja sprema e Devleskere merilija, na samo so ka kera bahtalo e Devle nego isto agjaar adava ka ovel amare šukaripaske (Isaija 48:17, 18).

Soske tano važno sekogaš te roda e Devleskoro Carstvo hem leskiri pravednost? O Isus predupredingja te na mukha nesave bukja te len amaro vnimanie, sar na primer o pare, mislindor kaj ola ka anen amenge sigurnost. Ili te mukha o sekiracie ko životo te anen amen dži ko adava stepen te na ovel amen više vreme  te roda e Devleskoro Carstvo (Matej 6:19-21, 25-32).

O Isus vetingja amenge, kaj ako poddržinaja e Devleskoro Carstvo, ka oven amen o potrebna bukja avdive, a ki idnina ka uživina ko večna bereketija (Matej 6:33).

Iako e Isuseskere učenikija ko prvo veko rodingje najangle e Devleskoro Carstvo hem leskiri pravednost, lengere problemija na čhinavdile. Sepak, ola sine zaštitime. Ko savo način?

Adava so živingje sprema e Devleskere pravedna merilija zaštitingja len taro lošna posledice kolencar so soočinena pe sine okola so na sine poslušna e Devleske. Lengiri bari vera ko Carstvo pomožingja len te soočinen pe čak e najphare problemencar. Isto agjaar, o Devel dengja len „sila, koja so nakhavela i normalno“ te šaj te izdržinen o pharipa (2. Korinkjanite 4:7-9).

O Hristijanja ko prvo veko šungje e Isuseskiri zapoved najangle te roden e Devleskoro Carstvo. Ola segde propovedinena sine o šukar haberi bašo Carstvo (Kološanite 1:23). Ama, dali nekoj kerela adava propovedničko delo avdive?

Oja! E Jehovaskere svedokija svesna tane kaj panda hari e Devleskoro Carstvo ka uništinel akava lošno sveto. Adaleske kerena sa so šaj te oven poslušna e Isuseskere lafenge: „Akava šukar haberi bašo carstvo ka propovedinel pe ko celo sveto, bašo svedoštvo sa e narodonge, hem tegani ka avel o krajo“ (Matej 24:14).

Dali ka prifatine o šukar haberi? Pottikninaja tut te dža palo primer so mukle o manuša tari purani diz Verija. Keda o apostol Pavle propovedingja lenge o šukar haberi bašo Carstvo, ola spremno prifatingje le. Vnimatelno istražingje o Spisija te šaj te dikhen dali tano točno adava so šungje hem palo adava postapingje ko sklad adalea so siklile (Dela 17:11, 12).

Tu da šaj te kere o isto. Ako rodea najangle e Devleskoro Carstvo hem leskiri pravednost, ka ove zaštitimo panda akana, a ki idnina ka živine ko mir hem sigurnost.