1. Savo sovet dengja o apostol Petar e hristijanenge hem soske šaj te mislina kaj adava sovet našti te primeninel pe?

 BIZI razlika dali isi amen nadež te živina ko nebo ili tele ki Phuv, sarinen amen šaj te ovel amen korist taro sovet so o apostol Petar dengja la e pomazime hristijanenge taro prvo veko. O Petar pišingja: „Sar soj tano sveto okova so vikingja tumen, tumen da oven sveta ko sa so kerena soske tano pišimo: ’Oven sveta soske me sium sveto‘“ (1. Pet. 1:15, 16). Taro akala lafija sikljovaja kaj šaj te dža palo e Jehovaskoro primer, o najšukar primer baši svetost. Amen na samo so šaj, nego hem mora te ova sveta ko sa so keraja. Šaj mislinaja amenge kaj našti te kera adava adaleske so siem nesovršena. O Petar da grešingja ama leskoro primer sikavel amenge kaj šaj te ova sveta.

2. Bašo kola pučiba ka dobina odgovorija ki akaja statija?

² Ki akaja statija ka dobina odgovor ko akala pučiba: Soj tani i svetost? So sikljovaja tari Biblija baši e Jehovaskiri svetost? Sar šaj te ova sveta ko sa so keraja? Hem sar tane povrzime i svetost hem amaro amalipe e Jehovaja?

3. So bi vakerena but manuša baši nekaske soj sveto ama kote šaj te arakha točna informacie?

³ Keda kerela pe lafi baši nekaste soj sveto but manuša mislinena ki nekaste so na asala, kova so sekogaš uravela religiozna šeja hem tano but seriozno. Ama, okola soj sveta ni hari nane asavke. I Biblija bašo Jehova, kova soj sveto, vakerela kaj tano „bahtalo Devel“ (1. Tim. 1:11). A okola so obožavinena le tane isto agjaar bahtale (Ps. 144:15). O Isus osudinela sine okolen so uravena sine posebna šeja hem kerena sine šukar bukja te šaj o javera te dikhen len (Mat. 6:1; Mar. 12:38). Sar čačutne hristijanja amen džanaja so značinela te ovel pe sveto taro adava so sikljovaja tari Biblija. Uverime siem kaj o Devel mangela amen hem kaj nikogaš nane te rodel amendar te kera nešto  so našti keraja. Znači keda o Jehova vakerela amenge: „Oven sveta“, tegani šaj te ova sigurna kaj šaj te kera adava. Džangjola pe, angleder te ova sveta ko sa so keraja valjani prvo te haljova soj tani i svetost.

4. So značinena o lafija „sveto“ hem „svetost“?

⁴ Soj tani i svetost? Ki Biblija o lafija „sveto“ hem „svetost“ obično koristinena pe baši moralno hem religiozno čistota. Akala lafija isto agjaar koristinena pe keda nekoj tano birimo te služinel e Devleske. Javere lafencar, amen siem sveta ako siem moralno čista, ako obožavinaja e Jehova ko ispravno način hem ako isi amen paše amalipe lea. Blagodarna siem soske iako siem nesovršena, a o Jehova tano sveto, sepak ov mangela te ovel paše amal amencar.

5. So šaj te sikljova taro verna angelija bašo Jehova?

⁵ O Jehova tano sveto hem čisto ko sa. Akava doznajnaja le taro adava so vakergje o serafimija — angelija soj tane paše uzo e Jehovaskoro prestol. Nesave lendar vakergje: „Sveto, sveto, sveto tano o Jehova o zapovedniko e vojskengoro“ (Isa. 6:3). Džangjola pe, te šaj te ovel len paše amalipe e Devlea kova soj tano sveto o angelija da mora te oven sveta hem ola tane sveta. Adaleske keda o Jehova bičhalela sine jekhe angele tele ki Phuv te vakerel nesavo haberi adava than ovela sine sveto. Adava slučingja pe keda o Mojsej sine uzi grmuška so thabljola sine (2. Moj. 3:2-5; Is. Nav. 5:15).

6-7. a) Sprema 2. Mojseeva 15:1, 11, sar o Mojsej istakningja e Devleskiri svetost? b) So potsetinela sine e Izraelcon kaj o Devel tano sveto? (Dikh i slika tari naslovno strana.)

⁶ Otkeda o Mojsej vodingja e Izraelcon taro Crveno more, ov istakningja lenge kaj lengoro Devel, o Jehova, tano sveto. (Čitin 2. Mojseeva 15:1, 11.) A o Egipkjanja kola so obožavinena sine e hovavne devlen ni hari na sine sveta. Ni o Hanaancija kola so obožavinena sine e hovavne devlen na sine sveta. Ko lengoro obožavibe sine vklučimo te den pumare čhaven sar žrtva hem te oven len odvratna seksualna odnosija (3. Moj. 18:3, 4, 21-24; 5. Moj. 18:9, 10). Ama, o Jehova tano but porazlično taro akala hovavne devela, ov nikogaš na bi rodela nešto asavko taro ple sluge. Lestar avela i svetost! Te šaj o Izraelcija te na bistren akava, o prvosvešteniko phiravela sine jekh zlatno pločka ko turbani kote so sine pišime o lafija: „I svetost pripadinela e Jehovaske“ (2. Moj. 28:36-38).

⁷ Okolenge so dikhena sine adaja pločka sine jasno kaj o Jehova tano čače sveto. Ama, so ako nesavo Izraelco nikogaš na dikhlja adaja pločka adaleske so našti sine te avel paše uzo prvosvešteniko? Dali ov ponadari da ka džanel sine kaj o Jehova tano sveto? Oja. Sa o Izraelcija šungje akaja poraka keda sine čitimo o zakoni anglo murša, džuvlja hem čhave (5. Moj. 31:9-12). Ako tu bi ovea sine prisutno adathe ka šune sine o lafija: „Me sium o Jehova, tumaro Devel. Oven sveta soske me sium sveto. Mora te oven sveta angli mande soske me, o Jehova, sium sveto!“ (3. Moj. 11:44, 45; 20:7, 26).

8. So sikljovaja tari 3. Mojseeva 19:2 hem taro 1. Petrovo 1:14-16?

⁸ Akana ka dikha nešto so vakergja o Jehova kaj valjani te čitinel pe sa e Izraelconge kova so arakhljola ki 3. Mojseeva 19:2. O Jehova vakergja e Mojseeske: „Vaker sa e Izraelconge: ‘Oven sveta soske me, o Jehova, tumaro Devel sium sveto‘“. O Petar najverojatno citiringja akava stiho keda vakergja e hristijanenge te oven sveta. (Čitin  1. Petrovo 1:14-16.) Džangjola pe, amen na siem više telo e Mojseeskoro zakoni. Sepak, adava so pišingja o Petar potvrdinela adava so siklilem tari 3. Mojseeva 19:2, kaj o Jehova tano sveto hem okola so mangena le valjani te trudinen pe te oven sveta. Adava važinela sarinenge, bizi razlika dali isi amen nadež te živina ko nebo ili ko raj ki Phuv (1. Pet. 1:4; 2. Pet. 3:13).

9. Savi korist ka ovel amen ako razgledinaja o 19 poglavje tari 3. Mojseeva?

⁹ Adaleske so mangaja te kera amare Devle bahtalo, mangaja te sikljova sar te ova sveta. O Jehova dela amen praktična sovetija te šaj te džana sar te kera adava. Jekh taro adala sovetija šaj te arakha len ki 3. Mojseeva 19 poglavje. Jekh evrejsko izučuvači kova so vikinela pe Markus Kališ pišingja: „Akava poglavje na samo soj tano najvažno poglavje tari celo 3. Mojseeva, nego isto agjaar taro sa o pandž lila e Mojseeskere“. Te dikha nekobor stihija taro akava poglavje kote so isi but šuže sovetija bašo nesave podračja taro sekojdnevno životo. Džikote keraja adava, šukar tano ma te bistra kaj o 19 poglavje tari 3. Mojseeva počminela e lafencar: „Oven sveta!“.

10-11. Sprema 3. Mojseeva 19:3, so valjani te kera hem soske tano adava važno?

¹⁰ Otkeda vakergja e Izraelconge kaj valjani te oven sveta, o Jehova isto agjaar vakergja: „Sekova jekh tumendar valjani te poštujnel pe daja hem pe dade, me sium o Jehova, tumaro Devel“ (3. Moj. 19:2, 3).

¹¹ Jasno tano kaj valjani te šuna e Devleskiri zapoved te poštujna amare roditelen. Setin tut so vakergja o Isus keda jekh manuš pučlja le: „Savo šukaripe mora te kerav te šaj te dobinav večno životo?“ Jekh delo taro e Isuseskoro odgovor sine kaj valjani te poštujnel pe dade hem pe daja (Mat. 19: 16-19). O Isus čak osudingja e fariseen hem e knižnikon soske ola na mangena sine te grižinen pe hem te poštujnen pe roditelen. Agjaar, ola „kergje e Devleskoro Lafi te na ovel le nisavi vrednost“ (Mat. 15:3-6). Ko e Devleskoro Lafi sine vklučimi i pandžto taro deš zapovedija hem o lafija so arakhljona ki 3. Mojseeva 19:3 (2. Moj. 20:12). Hem sar so  dikhlem, na valjani te bistra kaj i zapoved so arakhljola ki 3. Mojseeva 19:3 — te poštujnel pe e daja hem e dade — tani dendi odma pali izjava: „Oven sveta, soske me, o Jehova, tumaro Devel sium sveto“.

12. Sar šaj te sikava kaj šunaja i zapoved tari 3. Mojseeva 19:3?

¹² Keda ka razmislina baši e Jehovaskiri zapoved te poštujna amare roditelen, šaj ka puča amen: „Dali poštujnava me roditelen?“ Ako mislinea kaj angleder na kergjan dovolno, šaj te čhive tuke cel akana te ove pošukar ko adava. Našti te irane o vreme, ama akana šaj te isprajne i situacija agjaar so ka nakhe poviše vreme tle roditelencar hem ka pomožine lenge poviše. Šaj li te grižine tut lenge poviše ko materijalno hem duhovno pogled, ili te ohrabrine len hem te utešine len keda valjani lenge adava? Ako kerea akava, tegani ka ove poslušno ki zapoved so arakhljola ki 3. Mojseeva 19:3.

13. a) Kova javer sovet arakhljola ki 3. Mojseeva 19:3? b) Sar šaj amen avdive te dža palo e Isuseskoro primer soj pišimo ko Luka 4:16-18?

¹³ O lafija so arakhljona ki 3. Mojseeva 19:3 sikavena amen nešto javer da bašo adava sar te ova sveta. Adathe tano spomnimo te ikerel pe o sabat. O hristijanja avdive na valjani te ikeren pe ko Zakoni, adaleske amen na valjani te ikera o sabat. Sepak, šaj but te sikljova taro adava sar o Izraelcija ikergje o sabat hem savi korist sine len taro adava. O sabat sine vreme bašo odmor tari buti hem vreme so valjani sine te odvojnen le bašo duhovna bukja. * Adaleske, adava dive o Isus džala sine ki sinagoga ki pli diz hem čitinela sine taro e Devleskoro Lafi. (2. Moj. 31:12-15; Čitin Luka 4:16-18.) I zapoved soj pišimi ki 3. Mojseeva 19:3, „ikeren mle dive bašo odmor“, valjani te pottikninel amen te odvojna amenge vreme taro sekojdnevna aktivnostija te šaj te ovel amen poviše vreme bašo duhovna bukja. Dali mislinea kaj valjani te kere nesave promene ko akava podračje? Ako redovno odvojnea tuke vreme bašo duhovna bukja, tegani ka ove popaše amal e Jehovaja, a adava tano but važno te šaj te ove sveto.

14. Kova osnovno čačipe tano istaknimo ko celo 19 poglavje tari 3. Mojseeva?

¹⁴ Ko 19 poglavje tari 3. Mojseeva, but puti spomninela pe jekh osnovno čačipe kova so šaj te pomožinel amenge te ačhova sveta. O štarto stiho završinela e lafencar: „Me sium o Jehova, tumaro Devel“. Akala ili slična lafija, arakhljovena 16 puti ko akava poglavje. Akava setinkerela amen ki prvo zapoved: „Me sium o Jehova, tlo Devel... Ma te oven tut javera devela osven mandar“ (2. Moj. 20: 2, 3). Sekova hristijani kova so mangela te ovel sveto, mora te ovel sigurno kaj nikoj ili ništo nane te ovel leske považno taro leskoro amalipe e Devlea. Adaleske so phiravaja o anav e Jehovaskere svedokija, mora te ova odlučna te izbegina te kera nešto so šaj te ladžakerel leskoro sveto anav (3. Moj. 19:12; Isa. 57:15).

15. Ko so valjani te pottikninen amen o stihija tari 3. Mojseeva 19 poglavje keda kerela pe lafi bašo žrtve?

¹⁵ O Izraelcija sikavgje kaj o Jehova tano lengoro Devel agjaar so sine leske poslušna ko zapovedija. Ki 3. Mojseeva 18:4 pišinela: „Postapinen sprema mle zakonija, ikeren tumen ko mle odredbe hem živinen  sprema lende. Me sium o Jehova, tumaro Devel“. Ko 19 poglavje isi nesave taro akala odredbe e Izraelconge. Na primer, ko stihija 5-8, 21 hem 22, tane spomnime o životinska žrtve. O Izraelcija valjani sine te den adala žrtve ko način kolea so nane sine te meljaren adava soj sveto e Jehovaske. Akala stihija valjani te pottikninen amen te manga te ugodina e Jehovaske hem te falina le agjaar so ka da žrtve soj leske prifatliva, sar so siem pottiknime ko Evreite 13:15.

16. Kova načelo setinkerela amen baši razlika maškar okola so služinena e Devleske hem okola so na služinena leske?

¹⁶ Te šaj te ova sveta, valjani te ova spremna te razlikujna amen taro javera. Ama adava šaj te ovel pharo. Ponekogaš o součenikija, o kolege, i familija so nane Jehovaskere svedokija hem javera, šaj ka probinen te ubedinen amen te kera nešto soj pogrešno anglo Jehova. Ako kerena adava, valjani te ana jekh but važno odluka. So šaj te pomožinel amen te ana i ispravno odluka? Te dikha jekh delo taro načelo so arakhljovela ki 3. Mojseeva 19:19. Adathe pišinela: „Ma uraven šeja soj tane kerde taro duj različna materijalija“. Akaja zapoved pomožingja e Izraelconge te razlikujnen pe taro javera nacie. Adaleske so na siem više telo e Mojseeskoro zakoni, amen šaj te urava šeja taro različna materijalija, sar soj pamuko hem poliester, volna hem svila. Ama na mangaja te ova sar o manuša so na verujnena hem na ikerena pe ko bibliska merilija, čak adala manuša te oven amare součenikija, kolege ili familija. Džangjola pe, amen mangaja amare familija hem mangaja te sikava mangipe e javerenge. Ama keda anaja važna odluke ko amaro životo, tegani siem spremna te razlikujna amen taro javera. Adava tano but važno, soske ako mangaja te ova sveta tegani valjani te ova odvojme bašo Devel (2. Kor. 6:14-16; 1. Pet. 4:3, 4).

17-18. Koja važno pouka šaj te sikljova tari 3. Mojseeva 19:23-25?

¹⁷ O lafija: „Me sium o Jehova, tumaro Devel“ valjani sine te setinkeren e Izraelcon kaj valjani sine te čhiven pumaro amalipe e Jehovaja ko prvo than ko životo. Ki 3. Mojseeva 19:23-25 doznajnaja jekh način sar valjani sine te keren adava. (Čitin.) Razmislin bašo adava so značinena sine akala lafija e Izraelconge otkeda khuvgje ki Vetimi phuv. Ako jekh manuš sadinela sine kaš, tegani ov na smejnela sine trin berš te hal o plodi taro adava  kaš. A ko štarto berš, o plodija taro adava kaš valjani sine te del len ko e Jehovaskoro svetilište. Čak ko pandžto berš šaj sine te hal taro leskere plodija. Akava zakoni valjani sine te pomožinel e Izraelconge te haljoven kaj na valjani te čhiven pumare potrebe ko prvo than. Valjani sine te ovel len doverba kaj o Jehova ka grižinel pe lenge hem valjani sine te čhiven o obožavibe ko prvo than. O Jehova ka obezbedinel sine lenge dovolno hajbaske. Isto agjaar, o Devel pottikningja len te den prilogija ko svetilište — than kote so obožavinela pe sine e Devle.

¹⁸ O zakoni kova soj spomnimo ki 3. Mojseeva 19:23-25 setinkerela amen ko e Isuseskere lafija kola so spomningja len ki Propoved ki Gora. Ov vakergja: „Ma sekirinen tumen so ka han ili so ka pien“. O Isus isto agjaar vakergja: „Tumaro Dad soj ko nebo džanela kaj valjani tumenge sa akala bukja“. O Devel ka grižinel pe amenge isto sar so grižinela pe e čiriklenge (Mat. 6:25, 26, 32). Isi amen doverba ko adava. Hem bizo te istaknina anglo javera pomožinaja okolenge so isi len pharipa. Isto agjaar, siem bahtale so šaj te da prilog bašo e dvoranakere trošakija. O Jehova dikhela keda siem darežliva hem ka nagradinel amen bašo adava (Mat. 6:2-4). Keda siem darežliva, sikavaja kaj halilem i pouka tari 3. Mojseeva 19:23-25.

19. So sikliljan taro stihija so arakhljona ki 3. Mojseeva?

¹⁹ Amen dikhlem samo nesave delija tari 3. Mojseeva 19 poglavje hem adava pomožingja amenge te haljova sar šaj te ova sveta sar amaro Devel. Amen sikavaja kaj trudinaja amen „te ova sveta ko sa so keraja“, agjaar so džaja palo leskoro primer (1. Pet. 1:15). But džene kola so na služinena e Jehovaske primetinena adava šukar ponašibe ko e Devleskoro narodo. Ustvari adava pottikningja nesaven te slavinen e Jehova (1. Pet. 2:12). Ama isi panda but bukja so šaj te sikljova tari 3. Mojseeva 19 poglavje. Ki sledno statija ka kera lafi bašo javera stihija taro isto poglavje kola so ka pomožinen amenge te haljova ko kola javera načinija šaj „te ova sveta“ sar so pottikningja amen o Petar.