1. So valjani sine te kerel nekoj ako mangela sine te kerel lafi e carea tari Persija?

ZAMISLIN tuke kaj živinea ki Persija angleder okolu 2.500 berš. Mangea te kere lafi e carea bašo nešto važno, hem adaleske džaja ki carsko diz Suza. Ama, angleder te kere lafi e carea mora te ovel tut leskiri dozvola. Ako probinea te dža ki leste bizi leskiri dozvola, šaj te ove mudardo! (Est. 4:11).

2. Sar mangela o Jehova te dikha ko adava so šaj te kera lea lafi?

² Kobor siem blagodarna so o Jehova nane sar adava persisko cari! Iako o Jehova tano but pobaro taro sekova manušikano vladeteli, šaj te kera lea lafi ko sekova vreme. Ov sekogaš tano spremno te šunel amen. Na primer, iako e Jehova isi le bare titule sar soj Baro Stvoriteli, Semokjno hem Najbaro Gospodari, ov mangela sarine amen te vikina le „mo Dad“ (Mat. 6:9). Kobor siem bahtale so ov mangela te osetina amen doborom paše lea!

3. Soske šaj te vikina e Jehova „mo Dad“, hem so ka dikha ki akaja statija?

³ Isi amen pravo te vikina e Jehova „mo Dad“ soske lestar avela amaro životo (Ps. 36:9). Adaleske soj tano amaro Dad, dolžna siem te šuna le. Ako keraja adava so ov rodela amendar, ka oven amen but bereketija (Evr. 12:9). Ko adala bereketija tano vklučimo o večno životo, bizi razlika dali ko nebo ili ki Phuv. Ama, o Devel avdive da dela amen šuže bereketija. Ki akaja statija ka dikha sar o Jehova panda akana sikavela kaj tano amaro Dad  so grižinela pe amenge, hem soske šaj te ova sigurna kaj nane te mukhel amen ni ki idnina. Ama, najangle te dikha soske amaro Dad soj ko nebo but mangela amen hem grižinela pe amenge.

4. Soske nesavenge tano pharo te dikhen e Jehova sar pumaro Dad?

⁴ Dali tuke pharo te dikhe ko Devel sar tlo Dad? Nesave mislinena kaj na vredinena keda ka sporedinen pe e Jehovaja. Pharo lenge te verujnen kaj o Semokjno Devel interesinela pe lenge lično. Ama, amaro Dad so grižinela pe amenge, na mangela te razmislina agjaar. Ov dengja amen životo hem mangela te ova lea paše. Otkeda kergja lafi bašo akava, o apostol Pavle objasningja okolenge so šunena le sine ki Atina kaj o Jehova „nane dur nikastar amendar“ (Dela 17:24-29). O Devel mangela sekova jekh amendar te osetinel pe slobodno te kerel lea lafi isto sar jekh čhavo so osetinela pe slobodno te kerel lafi ple roditelea kova so but mangela le.

5. So sikljovaja taro iskustvo jekhe phenjakoro?

⁵ Javerenge šaj nane lokho te dikhen e Jehova sar pumaro Dad soske lengoro lično dad na sikavgja lenge skoro nisavo mangipe hem vnimanie. Na primer, jekh amari phen vakergja: „Mo dad sine but nasilno mancar. Keda počmingjum te proučinav i Biblija, sine mange pharo e Devle te dikhav sar mlo nebesno Dad. Ama, otkeda zapoznajngjum e Jehova, sa adava meningja pe“. Dali tu da osetinea tut agjaar? Ako oja, ov sigurno kaj o Jehova tuke da šaj te ovel o najšukar Dad so postojnela.

6. Sprema Matej 11:27, ko savo način o Jehova pomožingja amenge te dikha le sar amaro Dad soj pherdo mangipaja?

⁶ O Jehova pomožingja amenge te dikha le sar amaro Dad soj pherdo mangipaja adalea so mukhlja ki Biblija te oven pišime e Isuseskere lafija hem postapke. (Čitin Matej 11:27.) O Isus doborom sovršeno sikavela sine e Jehovaskere osobine so šaj sine te vakerel: „Koj dikhlja ma man, dikhlja me Dade da“ (Jovan 14:9). Ov but puti kerela sine lafi bašo Jehova kaj postapinela sar Dad. Ko štar evangelija, o Isus koristingja o lafi „Dad“ bašo Jehova okolu 165 puti. Soske kerela sine adava? Te šaj te pomožinel e manušenge te haljoven kaj o Jehova čače tano Dad kova so but mangela amen (Jovan 17:25, 26).

7. So sikljovaja bašo Jehova taro način sar postapinela sine ple Čhavea?

⁷ Razmislin so sikljovaja bašo Jehova taro način sar postapinela sine ple Čhavea. O Jehova sekogaš šunela sine e Isuseskere molitve. Na samo so šunela len sine, nego hem odgovorinela sine ki lende (Jovan 11:41, 42). Bizi razlika save pharipa sine le, o Isus sekogaš osetinela sine o mangipe hem i poddrška ple Dadeskiri (Luka 22:42, 43).

8. Ko save načinija o Jehova grižingja pe e Isuseske?

⁸ O Isus priznajngja kaj leskoro Dad stvoringja le hem kaj taro Jehova zavisinela leskoro životo. Ki jekh prilika ov vakergja: „Me živinava preku o Dad“ (Jovan 6:57). E Isuse sine le celosno doverba ko plo Dad, hem o Jehova grižinela pe sine bašo leskere telesna potrebe. Ama soj najvažno, o Devel grižinela pe sine bašo leskere duhovna potrebe (Mat. 4:4).

9. Sar o Jehova sikavgja e Isuseske kaj tano Dad so grižinela pe leske hem but mangela le?

⁹ Adaleske soj tano Dad so grižinela pe, o Jehova manglja o Isus te ovel celosno sigurno kaj ov poddržinela le (Mat. 26:53; Jovan 8:16). Iako na zaštitingja le tari sekoja dukh, o Devel pomožingja leske te izdržinel o nevolje. O Isus sine sigurno kaj sekoja nevolja so šaj ka ovel le tani samo privremeno (Evr. 12:2). O Jehova sikavgja leske kaj mangela le  adalea so šunela le sine, dela le sine adava soj leske potrebno, sikavela le sine hem pomožinela le sine (Jovan 5:20; 8:28). Akana te dikha sar amaro Dad soj ko nebo grižinela pe amenge da ko slično način.

10. Sprema Psalm 66:19, 20, sar o Jehova sikavela kaj mangela amen?

¹⁰ O Jehova šunela amare molitve. (Čitin Psalm 66:19, 20.) Ov na mangela te čhiva amenge granice ko molitve. Namesto adava, pottikninela amen sekogaš te molina amen leske (1. Sol. 5:17). Šaj te molina amen leske ko sekova vreme, bizi razlika kote siem. O Devel nikogaš nane previše zafatimo te šaj te šunel amen. Namesto adava, ov sekogaš spremno šunela amare molitve. Keda haljovaja kaj o Jehova šunela amare molitve, mangaja le panda poviše. O psalmisti vakergja: „Mangava e Jehova, soske ov šunela mlo glaso“ (Ps. 116:1).

11. Sar o Jehova odgovorinela ko amare molitve?

¹¹ Amaro Dad na samo so šunela amare molitve nego hem odgovorinela ki lende. O apostol Jovan uverinela amen: „Bilo so te roda, ako tano sprema leskiri volja, ov šunela amen“ (1. Jov. 5:14, 15). Džangjola pe, o Jehova šaj nane te odgovorinel amenge agjaar sar so adžikeraja. Ov džanela so čače valjani amenge, adaleske ponekogaš na dela amen adava so rodaja, ili palem, na dela le amenge odma (2. Kor. 12:7-9).

12-13. Ko save načinija amaro nebesno Dad grižinela pe bašo amare potrebe?

¹² O Jehova grižinela pe amenge. Ov da kerela adava so rodela taro sa o dada te keren (1. Tim. 5:8). O Devel dela o bukja so valjani leskere čhavenge te šaj te živinen. Ov na mangela previše te sekirina amen bašo adava so ka ha, so ka urava hem dali ka ovel amen than kaj te živina (Mat. 6:32, 33; 7:11). Sar jekh roditeli pherdo mangipaja, o Jehova isto agjaar grižingja pe te oven amen o bukja so ka valjanen amenge ki idnina.

¹³ Soj najvažno, o Jehova grižinela pe bašo amare duhovna potrebe. Preku plo Lafi, vakergja amenge o čačipe baši peste, baši pli namera, baši smisla e životoskiri hem bašo adava so ka slučinel pe ki idnina. Panda taro početok keda šungjem bašo čačipe, ov sikavgja amenge lično interes agjaar so pomožingja amen te zapoznajna le preku amare roditelija ili preku nekoj javer. Osven adava, o Jehova ponadari da pomožinela amenge preku amare starešine kola so but grižinena pe amenge hem preku javera zrela phralja hem phenja ko sobranie. Isto agjaar, sar delo tari leskiri duhovno familija, dobinaja pouke preku o sostanokija. Ko akala hem ko javera načinija, ov sikavela kaj tano Dad kova so grižinela pe sekole jekheske amendar (Ps. 32:8).

14. Soske o Jehova sikavela amen, hem sar kerela adava?

¹⁴ O Jehova sikavela amen. Amen na siem sar o Isus, soske siem nesovršena. Adaleske, te šaj te sikavel amen, amaro Dad soj ko nebo ukorinela amen keda valjani. Leskoro Lafi setinkerela amen: „Kas mangela o Jehova, le ukorinela“ (Evr. 12:6, 7). O Devel ispravinela amen ko but načinija. Na primer, keda ka čitina nešto ki Biblija ili ka šuna nešto ko sostanok, šaj ka haljova kaj valjani te kera nesavi promena ko amaro razmislibe ili postapke. A ponekogaš ka dobina i pomoš so valjani amenge taro starešine. Bizi razlika ko savo način o Jehova ka ispravinel amen, te na bistra kaj adava sekogaš kerela le taro mangipe (Erem. 30:11).

15. Ko save načinija o Jehova zaštitinela amen?

¹⁵ O Jehova pomožinela amen te istrajna ko nevolje. Isto sar jekh dad so but grižinela pe ple čhavenge keda lenge pharo, amaro  Dad soj ko nebo pomožinela amenge keda isi amen problemija. Ov dela amen plo sveti duh te šaj te zaštitinel amen ko duhovno pogled (Luka 11:13). O Jehova pomožinela amen hem keda siem obeshrabrime. Na primer, dengja amen but šuži nadež baši idnina koja so pomožinela amenge te istrajna ko nevolje. Ma bistre: Bizi razlika save lošna bukja ka slučinen pe, amaro Dad so grižinela pe amenge ka popravinel sekoja šteta so doživingjem la. Sekoja nevolja so isi amen tani samo privremeno, ama o bereketija so dela o Jehova tane večna (2. Kor. 4:16-18).

16. So slučingja pe keda o Adam na šungja ple Dade?

¹⁶ Panda jekh dokaz kaj o Jehova mangela amen tano o način sar postapingja keda prvo puti ule problemija ki leskiri familija ki Phuv. Adaleske so na sine poslušno ple Dadeske soj ko nebo, o Adam na sine više delo tari e Jehovaskiri bahtali familija, a ni leskere potomcija (Rim. 5:12; 7:14). Ama, o Jehova kergja nešto te šaj te pomožinel e manušenge.

17. So kergja o Jehova odma otkeda buningja pe o Adam?

¹⁷ O Jehova kazningja e Adame, ama na mukhlja leskere potomcon bizi nadež. O Devel odma vetingja kaj o poslušna manuša jekh dive palem ka oven delo tari leskiri familija (1. Moj. 3:15; Rim. 8:20, 21). Ov ispolninela adava vetuvanje preku i otkupno žrtva ple mangle Čhaveskiri, e Isuseskiri. Adalea so dengja ple Čhave amenge, o Jehova dokažingja kobor but mangela amen (Jovan 3:16).

18. Soske šaj te ova sigurna kaj o Jehova mangela amen sar ple čhave iako šaj siem lestar dur?

¹⁸ Iako siem nesovršena, o Jehova mangela te ova delo tari leskiri familija, hem na dikhela amen sar pharipa. Ponekogaš šaj ka razočarina le ili ka cida amen lestar, ama ov na otkažinela pe amendar. O Isus sikavgja kobor but mangela amen o Jehova keda vakergja  i sporedba bašo čhavo so gelo peske kher­aldan (Luka 15:11-32). O dad ki adaja sporedba nikogaš na našavgja nadež kaj o čhavo ka iranel pe. Keda dikhlja le sar iranela pe, sigate prastandilo angli leste hem phravde vastencar adžikergja le. Ako cidingjem amen taro Jehova, ama kainaja amen, šaj te ova sigurna kaj amaro Dad, soj pherdo mangipaja, ka adžikerel amen phravde vastencar.

19. Sar o Jehova ka popravinel i šteta so kergja la o Adam?

¹⁹ Amaro Dad ka popravinel celo šteta so kergja o Adam. Otkeda ov buningja pe, o Jehova odlučingja te posvojnel 144.000 manuša tari Phuv te šaj te služinen sar carija hem sveštenikija zaedno leskere Čhavea. O Isus hem adala so ka vladinen lea ka pomožinen e poslušna manušenge te oven sovršena ko nevo sveto. Otkeda ka nakhaven o posledno ispit baši poslušnost, o Devel ka del len večno životo. Tegani amaro Dad ka ovel bahtalo so celi Phuv ka ovel pherdi leskere sovršena čhavencar hem čhaencar. Adava čače ka ovel but šužo vreme!

20. Ko save načinija o Jehova sikavgja kaj but mangela amen, hem so ka dikha ki javer statija?

²⁰ O Jehova sikavgja kaj but mangela amen. Ov tano o najšukar Dad so postojnela. Šunela amare molitve hem dela amen adava so valjani amenge, hem ko materijalno hem ko duhovno pogled. O Jehova sikavela amen hem poddržinela amen. Osven adava, ka del amen but šuže bereketija ki idnina. But siem bahtale so džanaja kaj amaro Dad mangela amen hem grižinela pe amenge! Ki javer statija ka dikha ko save načinija, sar leskere čhave, šaj te sikava kaj siem blagodarna bašo leskoro mangipe.