1-2. Soske sekova berš siem prisutna ki Spomen-svečenost?

 OKOLU 2000 berša angleder, o Isus dengja plo životo amenge hem agjaar dengja amenge prilika te ovel amen večno životo. I rat angleder te merel, o Isus zapovedingja ple sledbenikonge te setinen pe ki leskiri žrtva agjaar so ka ikeren jekh ednostavno večera marea hem moljaja (1. Kor. 11:23-26).

² Amen šunaja e Isuseskiri zapoved adaleske so but mangaja le (Jovan 14:15). Sekova berš o kurke angleder hem pali Spomen-svečenost sikavaja amari blagodarnost adalea so odvojnaja amenge vreme te molina amen hem te razmislina bašo adava so značinela leskoro meribe. Isto agjaar radujnaja amen so šaj te bajrara amari služba te šaj te kanina so poviše manušen te oven prisutna ki akaja posebno prilika. Hem džangjola pe odlučna siem te na dozvolina ništo te čhinavel amen te ova prisutna ki Spomen-svečenost.

3. Bašo so ka kera lafi ki akaja statija?

³ Ki akaja statija ka dikha trin načinija sar e Jehovaskere svedokija dengje pestar sa te šaj te ikeren i Spomen-svečenost: 1) agjaar so ikerena i Spomen-svečenost ko način sar so o Isus vakergja lenge te ikeren la, 2) agjaar so kaninena  e javeren te aven ki Spomen-svečenost hem 3) agjaar so ikerena i Spomen-svečenost čak ko phare okolnostija.

4. Kola čačipa tane istaknime sekova berš ki Spomen-svečenost hem soske valjani but te cenina len? (Luka 22:19, 20).

⁴ Sekova berš ki Spomen-svečenost šunaja jekh biblisko govor kote so odgovorinela pe ko but pučiba. Doznajnaja soske e manušenge valjani otkupnina hem sar o meribe jekhe manušeskoro šaj te platinel o grevija bute dženengoro. Ko adava govor šunaja so pretstavinena o maro hem i mol hem koj valjani te lel taro adala simbolija. (Čitin Luka 22:19, 20.) Hem razmislinaja save bereketija ka ovel okolen so isi len nadež te živinen ki phuv (Isa. 35:5, 6; 65:17, 21-23). Amen valjani but te cenina akala čačipa soske milijarde manuša na džanena len hem ola na haljovena kobor but vredinela e Isuseskiri žrtva. Ola isto agjaar na ikerena i Spomen-svečenost ko način sar o Isus so vakergja te ikerel pe. Soske tano adava agjaar?

5. Otkeda mule poviše džene taro e Isuseskere apostolija, sar počmingje o manuša te setinen pe ko e Isuseskoro meribe?

⁵ Kratko otkeda poviše džene taro e Isuseskere apostolija mule, o hovavne hristijanja ule delo taro sobranie (Mat. 13:24-27, 37-39). Ola vakerena sine „hovavne sikajba te šaj te ciden pali peste e učenikon“ (Dela 20:29, 30). Jekh taro akala „hovavne sikajba“ kola so o hovavne hristijanja palo nesavo vreme počmingje te vakeren len sine kaj o Isus na dengja plo telo „jekh puti zasekogaš te šaj te lel o grevija bute dženengere“, nego ola vakergje kaj leskiri žrtva mora te del pe sekova puti (Evr. 9:27, 28). Avdive but manuša verujnena ko akava hovavno sikajba. Ola sekova kurko džana ki crkva, ponekogaš sekova dive, te šaj te setinen pe ki e Isuseskiri žrtva. Ola verujnena kaj džikote ikerena akava nastan o maro hem i mol ovena e Isuseskoro telo hem leskoro rat. Isto agjaar verujnena kaj e Isuseskoro telo hem o rat tane sekova puti žrtvujme keda nekoj učestvujnela ko akava nastan. O manuša taro javera religie poretko setinena pe ko e Isuseskoro meribe. But džene lendar na haljovena celosno so značinela e Isuseskiri žrtva. Nesave šaj pučena pe: „Dali e Isuseskere meribaja čače šaj te prostinen pe me grevija?“ Soske pučena pe asavko nešto? Ko nesave slučaija upri lende vlijajngje o manuša so vakerena kaj preku e Isuseskiri žrtva našti te oven prostime o grevija. Sar e Isuseskere sledbenikija pomožingje e javerenge te haljoven so značinela e Isuseskiri žrtva hem sar valjani te setinen pe ko leskoro meribe?

6. So halile jekh grupa istražuvačija e Biblijakere ko 1872 berš?

⁶ Ko 1870 berš jekh grupa istražuvačija e Biblijakere kolen so vodinela sine o Čarls Tejz Rasel počmingje temelno te istražinen i Biblija. Ola mangle te džanen so čače značinela e Isuseskiri žrtva hem sar valjani te setina amen ko leskoro meribe. Dži ko 1872 berš ola halile kaj o Isus čače dengja pe sar otkupnina sa e manušenge. Ola na garavgje akava so otkringje, namesto adava počmingje te vakeren adava e javerenge preku lila, novine hem spisanija. Hem kratko palo adava, isto sar o hristijanja taro prvo veko ola da počmingje te ikeren i Spomen-svečenost jekh puti ko berš.

7. Sar o bukja so otkringje o istražuvačija e Biblijakere koristinena amenge?

 ⁷ Avdive isi amen korist taro bukja so istražingje adala hristijanja but berša angleder. Sar? O Jehova pomožingja amenge te haljova so značinela e Isuseskiri žrtva hem so ka kerel amenge hem sa e manušenge (1. Jov. 2:1, 2). Isto agjaar doznajngjem kaj ki Biblija isi nadež bašo duj grupe manuša so kerena e Devleskiri volja — besmrtno životo ko nebo nesavenge hem večno životo ki phuv milionja manušenge. Ovaja popaše e Jehovaja keda razmislinaja kobor but mangela amen hem kobor but bari korist isi amen lično tari e Isuseskiri žrtva (1. Pet. 3:18; 1. Jov. 4:9). Adaleske slično sar amare phralja angleder, amen da kaninaja e javeren te aven ki Spomen-svečenost hem te ikera la ko način sar o Isus so sikavgja ple sledbenikon te keren adava.

8. So kergja e Jehovaskoro narodo te šaj te kaninel e javeren ki Spomen-svečenost? (Dikh i slika.)

⁸ E Jehovaskere svedokija više beršencar kaninena e javeren te aven ki Spomen-svečenost. Panda taro 1881 berš sine jekh izvestuvanje ki Stražarsko kula kolea so sine kanime o phralja hem o phenja tari Amerika te kheden pe baši akaja posebno prilika ko jekhe phraleskoro kher ko Alegeni, Pensilvanija. Pokasno sekova sobranie posebno ikerela sine i Spomen-svečenost. Ko mart 1940 berš e objavitelenge sine vakerdo kaj šaj te kaninen sekole jekhe taro podračje kova so sikavela sine interes. Ko 1960 berš o Betel prvo  puti bičhalgja ko sa o sobranija pečatime pokane baši adaja prilika. Ottegani milijarde pokane baši Spomen-svečenost sine dende. Soske doborom but trudinaja amen te kanina e javeren?

9-10. Kas isi korist taro adava so trudinaja amen te kanina e javeren ki Spomen-svečenost? (Jovan 3:16).

⁹ Jekh pričina soske kaninaja e javeren te aven ki Spomen-svečenost tani adaja so mangaja okola so avena prvo puti te doznajnen bašo adava so kergja o Jehova hem o Isus sarinenge amenge. (Čitin Jovan 3:16.) Nadinaja amen kaj adava so ka dikhen hem ka šunen ki Spomen-svečenost ka pottikninel len te mangen te sikljoven poviše hem te oven e Jehovaskere sluge. Ama e javeren da isto agjaar isi len korist.

¹⁰ Isto agjaar kaninaja okolen so čhinavgje te služinen e Jehovaske, adava keraja le te šaj te setinkera len kaj o Devel panda mangela len. But džene avena hem amen radujnaja amen so šaj te dikha len. Adava soj tane prisutna ki Spomen-svečenost setinkerela len kobor sine lenge šukar keda angleder služinena sine e Jehovaske. Te dikha e Monikakoro iskustvo. b Džikote trajnela sine i pandemija KOVID-19 oj uli palem aktivno. Otkeda prisustvujngja ki Spomen-svečenost ko 2021 berš, oj vakergja: „Akaja Spomen-svečenost sine mange nešto posebno. Prvo puti palo 20 berš geljum ki služba hem kaningjum e manušen te aven ki Spomen-svečenost. Kergjum sa so šaj te kaninav e javeren soske sium but blagodarno e Jehovaske hem e Isuseske bašo adava so kergje mange“ (Ps. 103:1-4). Bizi razlika dali o manuša ka prifatinen amari pokana ili na, amen daja amendar sa te kanina e manušen ki Spomen-svečenost soske džanaja kaj o Jehova ceninela amaro trudo.

11. Sar nagradingja o Jehova amaro trudo so kaningjem e manušen ki Spomen-svečenost? (Agej 2:7).

¹¹ O Jehova but nagradingja amaro trudo te kanina e manušen ki Spomen-svečenost. Ko 2021 berš iako sine ograničuvanja baši pandemija KOVID-19, sine amen najbaro broj prisutna dži akana 21.367.603. Adava tano skoro duj tekvaš puti poviše taro broj e Jehovaskere svedokongoro ko celo sveto. Džangjola pe, e Jehovaske nane samo važno kobor manuša tane prisutna, leske tano važno sekova jekh so avela ki Spomen-svečenost (Luka 15:7; 1. Tim. 2:3, 4). Šaj te ova sigurna kaj keda daja pokane e javerenge o Jehova pomožinela amenge te arakha okolen soj iskrena. (Čitin Agej 2:7.)

12. So šaj te kerel amenge pharo te ikera i Spomen-svečenost? (Dikh i slika.)

¹² O Isus prorokujngja kaj ko posledna dive ka oven amen phare okolnostija sar soj protivibe tari familija, progonstvo, vojne, zarazna nasvalipa hem panda but poviše bukja (Mat. 10:36; Mar. 13:9; Luka 21:10, 11). Ponekogaš ko asavke uslovija šaj te ovel amenge pharo te ikera i Spomen-svečenost. So kergje amare phralja hem phenja ko asavke situacie hem sar o Jehova pomožingja lenge?

13. Sar nagradingja o Jehova e Artemeskiri hrabrost hem odlučnost te ikerel i Spomen džikote sine ko zatvor?

¹³ Ko zatvor. Amare phralja soj phanle baši pumari vera kerena sa so šaj te ikeren i Spomen-svečenost. Te dikha e Artemeskoro iskustvo. Ko 2020 berš, o kurke angleder hem pali Spomen, ov sine čhivdo ki jekh kelija koja so sine bari samo  17 kvadratija hem kolate so sine pandž džene. Iako sine ko zatvor, ov uspejngja te lel nesave bukja te šaj te koristinel len sar simbolija baši Spomen hem planiringja te ikerel o govor baši Spomen korkori peske. Ama o javera zatvorenikija so sine lea ki kelija pušinena sine hem but akošena sine. So kergja ov? Zamolingja len ako šaj barem jekh saati te na pušinen hem te na akošen. Ov sine iznenadimo keda ola soglasingje pe ko adava. O Artem vakerela: „Pučljum len dali mangena te objasninav lenge baši Spomen-svečenost“. Iako ola vakergje kaj na mangena te šunen ništo bašo adava ama otkeda šungje hem dikhle sar o Artem ikerela i Spomen ola pučle le but bukja bašo adava.

14 So kergje o phralja te šaj te ikerel pe i Spomen iako sine i pandemija KOVID-19?

¹⁴ Ki pandemija KOVID-19. Adaleske so sine i pandemija, e Jehovaskoro narodo našti sine te ikerel i Spomen-svečenost ki dvorana ama adava na čhinavgja le te ikerel i Spomen. c Ko thana kote so  sine internet o sobranija ikergje i Spomen preku videokonferencija. A so kergje but milionja manuša so na sine len internet? Ko nesave phuvja o podružnice organiziringje ola te dikhen o govor ki televizija ili te šunen le preku radio. Isto agjaar o podružnice snimingje o govor ko poviše taro 500 čhibja te šaj čak okola soj ko izolirime thana te ikeren i Spomen. Hem o phralja ingargje akala snimke ko thana kaske so valjani sine.

15. So sikljovea taro iskustvo jekhe interesentkakoro?

¹⁵ Keda isi protivibe tari familija. Nesavenge tano najpharo te ikeren i Spomen keda protivinela pe lenge i familija. Te dikha o iskustvo jekhe interesentkakoro so vikinela pe Su. Ko 2021 berš, jekh dive angleder i Spomen, oj vakergja e phenjake so proučinela sine laja kaj adaleske so protivinena pe lake kheraldan našti te ovel ki Spomen. I phen čitingja o stiho taro Luka 22:44. Palo adava i phen objasningja lake kaj keda isi amen problemija valjani te dža palo e Isuseskoro primer agjaar so ka molina amen e Jehovaske hem ka ovel amen celosno doverba ki leste. O tajsutno dive i Su spremingja o maro hem i mol hem dikhlja i posebno sabalutni biblisko programa ki amari internet-stranica. Adaja rat oj geli ki pli soba hem šungja i Spomen preku telefoni. Palo adava pišingja e phenjake so proučinela laja: „But ohrabringjan man erati. Kergjum sa so šaj te ovav prisutno ki Spomen hem o Jehova pomožingja man. Našti opišinava kobor sium radosno hem blagodarno“. So mislinea dali o Jehova tuke da šaj te pomožinel ako arakhljovea ki slično situacija?

16. Soske siem sigurna kaj o Jehova ka nagradinel amaro trudo te ova prisutna ki Spomen-svečenost? (Rimjanite 8:31, 32).

¹⁶ O Jehova but ceninela amaro trudo te ikera i Spomen. Šaj te ova sigurna kaj ov ka del amen bereketi keda sikavaja blagodarnost bašo adava so kergja amenge. (Čitin Rimjanite 8:31, 32.) Adaleske, te ova odlučna te ova prisutna ki Spomen-svečenost akava berš, hem o kurke angleder hem pali Spomen-svečenost te bajrara amari služba.