1. Sar valjani te dikha ki prednost so šaj te molina amen e Jehovaske?

 ISI AMEN jekh but skapoceno poklon, okova so stvoringja o nebo hem i phuv dozvolinela amenge te molina amen leske. Razmislin samo, šaj te phrava e Jehovaske amaro vilo ko bilo savo vreme hem ki bilo savi čhib, bizo te zakažina termini. Šaj te molina amen keda siem ki bolnica ili ko zatvor hem te ova uverime kaj ka šunel amen amaro Dad. Amen siem but blagodarna bašo akava poklon.

2. Sar sikavgja o David kaj ceninela i prednost so šaj te molinel pe?

² O cari o David but ceninela sine i prednost te molinel pe. Ki jekh gili vakergja e Jehovaske: „Mli molitva neka ovel spremimi angli tute sar temjani“ (Ps. 141:1, 2). Ko e Davideskoro vreme o sveto temjani, kova so koristinena sine o sveštenikija, sine vnimatelno spremimo (2. Moj. 30:34, 35). Isto sar okola so šukar spreminena sine o temjani, agjaar o David da manglja šukar te razmislinel bašo adava so ka vakerel e Jehovaske ki molitva. Amen da mangaja te kera o isto. Mangaja amare molitve te oven ugodna e Jehovaske.

3. Savo stavi valjani te ovel amen keda molinaja amen e Jehovaske, hem soske?

³ Keda molinaja amen e Jehovaske valjani te pazina sar keraja lafi hem te sikava hor poštovanje. Razmislin bašo vizie so dikhle len o Isaija, o Ezekiel, o Daniel hem o Jovan. Akala vizie sine različna, ama ki lende sine nešto zaedničko. Sa ola opišingje e Jehova sar veličestveno Cari. O Isaija dikhlja „sar o Jehova bešela  ko jekh učo hem vozvišeno prestol“ (Isa. 6:1-3). O Ezekiel dikhlja sar o Jehova bešela ki pli nebesno kočija hem okolu leste sine „bari svetlina... slično sar vinožito“ (Ezek. 1:26-28). O Daniel dikhlja „Okole so postojnela taro purane dive“, uravdo ko parne šeja hem taro leskoro prestol ikljola sine jag (Dan. 7:9, 10). Hem o Jovan dikhlja sar o Jehova bešela ko plo prestol hem okolu ki leste sine vinožito slično sar smaragd (Otk. 4:2-4). Džikote razmislinaja baši e Jehovaskiri bari slava, dikhaja koja bari prednost isi amen te molina amen leske hem kobor tano važno te sikava poštovanje džikote keraja adava. Ama bašo so valjani te molina amen?

4. So sikljovaja taro e Isuseskere lafija kola so vakergja len ko početok tari najpendžardi molitva so arakhljovela ko Matej 6:9, 10?

⁴ Čitin Matej 6:9, 10. Ki Propoved ki gora, o Isus sikavgja ple sledbenikon sar te molinen pe ko način kova soj prifatlivo e Devleske. Otkeda vakergja „znači, molinen tumen agjaar“, o Isus prvo spomningja nekobor važna bukja kola soj povrzime e Jehovaskere nameraja — te slavinel pe leskoro sveto anav, te avel o Carstvo kova so ka uništinel sa e Devleskere dušmanen hem te anel bereketija upri phuv hem o manuša. Ako vklučinaja akala bukja ko amare molitve, sikavaja kaj e Devleskiri namera tani amenge važno.

5. Dali tano šukar te molina amen bašo lična bukja?

⁵ Ko sledno delo tari molitva, o Isus sikavgja kaj tano isto agjaar šukar te molina amen bašo lična bukja. Šaj te molina le te del amen hajbaske adava dive, te prostinel amenge amare grevija, te zaštitinel amen taro iskušenija hem te spasinel amen taro lošno (Mat. 6:11-13). Keda molinaja e Jehova bašo akala bukja priznajnaja kaj zavisinaja lestar hem sikavaja kaj mangaja te kera leskiri volja.

6. Dali valjani te molina amen samo bašo bukja soj tane spomnime ki najpendžardi molitva? Objasnin.

⁶ O Isus na manglja leskere učenikija te povtorinen o ista lafija tari najpendžardi molitva. Ko ple javera molitve o Isus spomningja različna bukja kola so sine  leske važna ko adava vreme (Mat. 26:39, 42; Jovan 17:1-26). Amen da šaj te molina amen baši sekoja buti so mučinela amen. Keda valjani te ana nesavi odluka šaj te molina amen baši mudrost hem te ova razumna (Ps. 119:33, 34). Ako valjani te počmina nesavi phari zadača šaj te molina amen baši pomoš te haljova pošukar sar te završina la (Izr. 2:6). O roditelija šaj te molinen pe bašo pumare čhave, o čhave šaj te molinen pe bašo pumare roditelija hem sarine amen šaj hem valjani te molina amen bašo amare interesentija hem okolenge kaske so svedočinaja. Ama keda molinaja amen na valjani samo te roda o Jehova te pomožinel amenge.

7. Soske valjani te falina e Jehova ki molitva?

⁷ Na valjani te bistra te falina e Jehova ko amare molitve. Amaro Devel zaslužinela najviše te falina le soske ov tano šukar hem spremno te prostinel. Ov isto agjaar tano milostivo hem sočuvstvitelno, strplivo, pherdo mangipe hem vernost (Ps. 86:5, 15). Sigurno isi amen but pričine te falina e Jehova bašo leskere osobine hem bašo adava so kerela.

8. Kola tane nesave bukja bašo kola so šaj te blagodarina e Jehovaske? (Psalm 104:12-15, 24).

⁸ Osven so valjani te falina e Jehova ko amare molitve, amen siem isto agjaar pottiknime te blagodarina leske bašo but šuže bukja so dela amen. Na primer, šaj te blagodarina leske bašo šuže boe so dikhaja len ko lulugja, bašo različno vkusno hajbe hem bašo amare paše amala kola so kerena amen bahtale. Amaro Dad dela amen sa akava hem panda but javera bukja te šaj te ova bahtale. (Čitin Psalm 104:12-15, 24.) A soj najvažno, blagodarna siem e Jehovaske so dela amen barvali duhovno hrana hem baši but šuži nadež.

9. So šaj te pomožinel amenge te na bistra te blagodarina e Jehovaske? (1. Solunjanite 5:17, 18).

⁹ Šaj but lokheste te bistra te blagodarina e Jehovaske bašo sa so kerela amenge. So šaj te pomožinel amen te na bistra te kera adava? Šaj te kere jekh spisako taro bukja bašo kolende so molingjan tut hem palo nesavo vreme proverin  so pišingjan te šaj te dikhe sar o Jehova odgovoringja ko tle molitve. Tegani blagodarin tut baši leskiri pomoš. (Čitin 1. Solunjanite 5:17, 18.) Obično but siem bahtale hem osetinaja amen mangle keda o javera sikavena amenge kaj tane blagodarna. Slično, o Jehova tano bahtalo keda na bistraja te blagodarina leske adaleske so odgovorinela ko amare molitve (Kol. 3:15). Ama, isi javer da važno pričina bašo so valjani te blagodarina e Devleske.

10. Sprema 1. Petrovo 2:21, soske valjani te blagodarina e Jehovaske adaleske so bičhalgja e Isuse ki phuv?

¹⁰ Čitin 1. Petrovo 2:21. Valjani te blagodarina e Jehovaske adaleske so bičhalgja ple mangle Čhave te sikavel amen. Keda čitinaja bašo Isus, sikljovaja but bukja bašo Jehova hem bašo adava sar te kera le bahtalo. Ako sikavaja vera ki e Isuseskiri žrtva šaj te ovel amen paše amalipe e Jehovaja hem te ova ko mir lea (Rim. 5:1).

11. Soske molinaja amen preku e Isuseskoro anav?

¹¹ Blagodarna siem e Jehovaske so šaj te molina amen preku leskoro Čhavo. O Jehova šunela hem odgovorinela ko molitve kola soj bičhalde preku e Isuseskoro anav. O Isus vakergja: „Bilo so te roden ko mlo anav, adava ka kerav, te šaj te slavinel pe o Dad preku o Čhavo“ (Jovan 14:13, 14).

12. Koja tani javer pričina soske valjani te blagodarina e Jehovaske bašo leskoro Čhavo?

¹² O Jehova prostinela amare grevija preku e Isuseskiri otkupno žrtva. I Biblija opišinela e Isuse sar amaro „prvosvešteniko kova so bešlja ki desno strana taro prestol taro Sevišno ko nebo“ (Evr. 8:1). „Ko amaro Dad isi amen pomošniko, o Isus Hristos“ (1. Jov. 2:1). But siem blagodarna so o Jehova dengja amen Prvosvešteniko so haljola amare slabostija hem kova so kerela bukja „baši amari korist“ (Rim. 8:34; Evr. 4:15). Amen siem nesovršena hem adaleske bizo e Isuseskiri žrtva na bi šaj sine te molina amen e Devleske. Sigurno složinea tut kaj bizi razlika kobor hem te blagodarina amen e Jehovaske nikogaš nane te ovel dovolno bašo skapoceno poklon so dengja amen — ple mangle Čhave!

13. I rat angleder te merel, sar sikavgja o Isus kaj mangela ple učenikon?

¹³ I rat angleder te merel, o Isus ki jekh bari molitva molingja pe Dade te arakhel leskere učenikon taro lošno (Jovan 17:15). Adalea o Isus sikavgja kobor mangela len. Ov džanlja kaj panda hari ka ovel but mučimo, sepak ov sekirinela pe sine bašo ple učenikongoro šukaripe.

14. Sar šaj te sikava kaj mangaja amare phralen hem phenjen?

¹⁴ Slično sar o Isus, amen na koncentririnaja amen samo ko amare potrebe. Namesto adava, redovno molinaja amen amare phralenge hem phenjenge. Keda keraja agjaar tegani šunaja e Isuseskiri zapoved te manga amen jekh jekhea hem sikavaja e Jehovaske kobor but mangaja amare phralen hem phenjen (Jovan 13:34). Ma te bistra kaj amare molitve pomožinena e phralenge. E Devleskoro Lafi vakerela: „I molitva taro vilo e pravednikoskiri isi la bari sila“ (Jak. 5:16).

15. Soske valjani te molina amen e phralenge hem e phenjenge?

 ¹⁵ Valjani te molina amen e phralenge soske doživinena but nevolje. Šaj te molina e Jehova te pomožinel lenge te istrajnen keda tane nasvale, keda doživinena prirodno katastrofa, keda isi vojna, keda tane progonime ili keda doživinena javera pharipa. Šaj isto agjaar te molina amen okole phralenge so pomožinena e javerenge so nakhena taro pharo periodi. Šaj tu lično džanea nekas so nakhela taro pharo periodi. Ka ovel šukar te spomnina le ko amare molitve. Keda molinaja e Jehova bašo amare phralja sikavaja leske kaj čače mangaja len.

16. Soske valjani te molina amen okolenge so predvodinena?

¹⁶ O phralja so predvodinena ko sobranie tane but blagodarna keda spomninaja len ko amare molitve soske amare molitve pomožinena lenge. O Pavle džanela sine kaj e javerengere molitve sine leske potrebna. Ov pišingja: „Molinen tumen mange da, te šaj o Devel te pomožinel mange, keda ka phravav mo muj, hrabro te propovedinav i sveto tajna bašo šukar haberi“ (Ef. 6:19). Avdive da isi but vredna phralja kola so predvodinena. Amen sikavaja kaj mangaja len agjaar so molinaja e Jehova te nagradinel lengoro trudo.

17-18. Keda šaj ka valjani te molina amen anglo javera, hem so na valjani te bistra?

¹⁷ Ponekogaš šaj ka valjani te molina amen anglo javera. Na primer, jekh phen koja so vodinela jekh biblisko kursi šaj ka vakerel e phenjake soj laja ki služba te molinel pe. Ama i phen soj laja ki služba šaj na džanela šukar e interesentka hem adaleske šaj ka mangel te molinel pe ko krajo taro kursi. Agjaar ka džanel pošukar so te vakerel baši interesentka keda ka molinel pe.

¹⁸ Jekh phral šaj ka valjani te molinel pe ko sostanok službake ili ko sobranisko sostanok. E phralen so isi len i prednost te molinen pe na valjani te bistren koja tani i cel e sostanokoskiri. Na valjani preku i molitva te del pe sovet e sobranieske ili izvestuvanje. Obično,  bašo sostanokija tane odvime pandž minutija baši gili hem baši molitva. Adaleske, o phral so ka molinel pe na valjani te koristinel „but lafija“, posebno ko početok taro sostanok (Mat. 6:7).

19. So ka pomožinel amenge te ova spremna keda ka avel e Jehovaskoro dive baši osuda?

¹⁹ Sar so avela e Jehovaskoro dive sa popaše, i molitva valjani te ovel amenge sa považno ko amaro životo. O Isus istakningja kobor tano važno akava keda vakergja: „Ačhoven džangavde, celo vreme molinen tumen taro vilo te šaj te našen taro sa adala bukja so valjani te oven“ (Luka 21:36). Ako redovno molinaja amen, adava ka pomožinel amenge te ačhova duhovno džangavde hem agjaar ka ova spremna keda ka avel e Devleskoro dive baši osuda.

20. Sar šaj amare molitve te oven sar mirislivo temjani?

²⁰ So dikhlem dži akana? Amen but ceninaja i prednost so šaj te molina amen. O najvažna bukja bašo so valjani te molina amen tane povrzime e Jehovaskere nameraja. Isto agjaar, blagodarinaja e Devleske bašo leskoro Čhavo, bašo bereketija so ka anel o Carstvo hem molinaja amen bašo amare phralja hem phenja. O Jehova isto agjaar mangela te molina amen bašo amare fizička hem duhovna potrebe. Ako šukar razmislinaja so ka vakera ko amare molitve, sikavaja kaj ceninaja akaja but skapoceno prednost. Amare lafija ka oven sar mirislivo temjani kova soj ugodno e Jehovaske (Izr. 15:8).