Dali džanljan?
Dali o manuša taro biblisko vreme koristingje o papirus te keren brodija?
O rastenie papirus
PENDŽARDO tano kaj o manuša taro purano Egipet pišinena sine ko materijali so sine kerdo taro rastenie papirus. Isto agjaar, o Grkija hem o Rimjanja pišinena sine ko papirus. * Ama, but manuša na džanena kaj o papirus na koristinela pe sine samo pišibaske, nego isto agjaar, lestar kerena pe sine brodija da.
Makete taro duj brodija kola so arakhle ki jekh egipetsko grobnica
Angleder poviše taro 2.500 berš, o proroko o Isaija pišingja kaj o manuša kola so živinena „ko podračje taro etiopska reke“ bičhalgje „pratenikija preku more te nakhen o pani brodencar taro papirus“. Isto agjaar, pokasno o Eremija prorokujngja kaj, keda ka napadinen o Vavilon, o Medijcija hem o Persijcija ka tharen „o brodija tari papirusno trska“ te šaj te čhinaven e Vaviloncon te našen (Isa. 18:1, 2; Erem. 51:32).
Adaleske so i Biblija avela taro Devel, okola so proučinena la nane iznenadime taro arheološka dokazija kola so sikavena kaj o papirus čače koristinela pe sine te keren pe brodija ko bibliska vremija (2. Tim. 3:16). So sine otkrimo? O arheolozija arakhle jasna dokazija kola so potvrdinena kaj o Egipkjanja kerena sine brodija taro papirus.
SAR KERENA PE SINE BRODIJA TARO PAPIRUS?
Ko egipetska grobnice arakhle crtime hem rezbime slike ko zido kola so sikavena sar o manuša khedena papirus hem lestar kerena brodija. O manuša čhinena sine o steblija taro papirus, phandena len sine ki kupa hem o kupe phandena sine zaedno. O steblo taro papirus isi le triagolno forma. Adaleske keda phandena pe zaedno ola tane cvrsta hem stabilna. Ko jekh lil baši istorija taro Egipet vakerela pe kaj nesave brodija taro papirus sine dugačka preku 17 metre, a ki lende sine than bašo 10 dži ko 12 vesle tari sekoja strana.
Rezbimi slika ko zido sar kerela pe brodi taro papirus
SOSKE KERENA PE SINE BRODIJA TARO PAPIRUS?
Ko Egipet, o papirus but bajrola sine ki dolina kote so thavdela sine i reka Nil. Osven adava, lokho sine te kerel pe brodija taro papirus. Čak keda o manuša počmingje te koristinen kaš te keren pe bare brodija, o ribarija hem o lovdžije ponadari da koristinena sine o papirus te keren tikne brodija.
O brodija taro papirus koristinena pe sine panda but vreme. O grčko pisateli Plutarh, kova so živinela sine negde ko početok taro 2 veko a.e., vakergja kaj nesave manuša panda kerena sine brodija taro papirus.
^ pas. 3 O rastenie papirus bajrola ko močurište hem ko mirna reke so thavdena bavno. Akava rastenie šaj te bajrol dži ko 5 metre, a leskoro steblo ko početok šaj te ovel široko 15 santimetre.
