1. Sar o lafija taro 2. Korinkjanite 3:1-3 pomožinena amenge te haljova kobor bari čest tani te proučina nekasaja hem te dikha sar krstinela pe? (Dikh i slika tari naslovno strana.)

SAR osetinea tut keda nesavo interesenti taro tlo sobranie ka krstinel pe? Sigurno sian but bahtalo! (Mat. 28:19). A ako tu proučingjan lea, adava anela tuke panda pobaro bahtalipe! (1. Sol. 2:19, 20). Keda krstinela pe nekoj adava sikavela kobor trudingjan tut tu hem o javera taro sobranie te pomožinen leske te kerel adava važno čekori. Ki nesavi smisla okola so krstinena pe tane sar „pismo preporakaja“ na samo okoleske so proučingja lea nego celo sobranieske. (Čitin 2. Korinkjanite 3:1-3.)

2. a) So valjani te kera, hem soske? b) Soj tano biblisko kursi? (Dikh i fusnota.)

² Bahtale siem so dikhaja kaj ko izveštaija bašo posledna štar berša vodingje pe 10 milionja bibliska kursija * ko celo sveto. Ko sekova taro adala berša, krstinena pe sine poviše taro 280.000 manuša sar e Isuseskere učenikija. Akava sikavela kaj milionja manuša kasaja so proučinela pe i Biblija panda na rešingje te krstinen pe. Sa džikote o Jehova strplivo dela prilika e manušenge te oven e Hristoseskere učenikija, amen mangaja te da amendar sa te pomožina lenge so posigate  te krstinen pe. O vreme sigate nakhela! (1. Kor. 7:29a; 1. Pet. 4:7).

3. So ka dikha ki akaja statija?

³ Adaleske so avdive tano but važno te pomožina e manušenge te oven učenikija e Hristoseskere, o Vodečko telo pučlja e podružnicen so šaj te kerel pe te šaj te pottiknina e interesenten te krstinen pe. Ki akaja hem ki sledno statija, ka dikha so šaj te sikljova taro iskusna pionerija, misionerija hem pokrainska nadglednikija * (Izreki 11:14; 15:22). Ola objasningje so šaj te kera amen hem okola so proučinaja lencar te šaj te ovel len pobari korist taro kursi. Ki akaja statija ka dikha pandž bukja so sekova interesenti valjani te kerel len te šaj hari po hari te resel dži ko krštevanje.

4. Bašo so valjani te ova svesna ako proučinaja nekasaja anglo udar?

⁴ But amare phralja hem phenja proučinena e manušencar anglo lengoro udar. Iako ko akava način nekoj šaj te počminel te interesinel pe baši Biblija, akala razgovorija obično tane kratka hem šaj na ikerena pe sekova kurko. Te šaj te bajraren o interes e stanareskoro, nesave phralja hem phenja pučena le dali šaj te dobinen leskoro telefonsko broj, hem palo adava te javinen pe leske ili te pišinen leske nesave misle tari Biblija. Asavke razgovorija šaj te trajnen masekoncar. Dali o interesenti * čače ka napredujnel hem ka krstinel pe ako ov na vložinela poviše vreme hem trud te proučinel i Biblija? Verojatno na.

5. Sprema Luka 14:27-33, kola sporedbe e Isuseskere šaj te koristinen amenge te šaj te pomožina adalenge so proučinena amencar i Biblija?

⁵ Ki jekh prilika, o Isus objasningja so očekujnela pe nekastar so mangela te ovel leskoro učeniko. Ov dengja duj sporedbe. Jekh sine bašo manuš so mangela te kerel kula, a i dujto bašo cari so spreminela pe sine baši vojna. O Isus vakergja kaj adava so mangela te kerel i kula „prvo mora te bešel hem te računinel o trošako te dikhel dali šaj te završinel la“, a o cari „prvo mora te bešel hem te sovetinel pe“ te šaj te dikhel dali leskiri vojska uspešno ka šaj te borinel pe protiv o dušmanja. (Čitin Luka 14:27-33.) O Isus džanlja kaj sekoj so mangela te ovel leskoro učeniko valjani angleder šukar te razmislinel bašo sa soj vklučimo ki adaja odluka. Te šaj te pomožina e interesenteske  te kerel adava, valjani te pottiknina le te proučinel amencar i Biblija sekova kurko. Sar šaj te kera adava?

6. So bi šaj sine te kera te šaj te pomožina e interesenteske posigate te napredujnel?

⁶ Šaj te počmine agjaar so ka trudine tut te kere lafi e stanarea hari poviše vreme anglo udar. Ki sekoja poseta, šaj te keren lafi na samo bašo jekh, nego bašo duj bibliska stihija. Keda o stanari ka ovel spremno te kerel poviše lafi, šaj te puče le dali mangela te bešen negde hem te prodolžinen i diskusija. Taro adava so ka odgovorinel o stanari, šaj te dikhe kobor tano leske važno te proučinel i Biblija. Te šaj te pomožine leske posigate te napredujnel, šaj te puče le dali ka mangel te proučinel duj puti ko kurko. Ama, nane dovolno samo te proučinel pe jekh puti ili duj puti ko kurko.

7. Sar šaj šukar te spremine tut angleder te proučine e interesentea?

⁷ But tano važno šukar te spremine tut angleder te proučine e interesentea. Šaj te počmine agjaar so ka čitine o materijali so valjani zaedno te razgledinen le hem te phrave o bibliska stihija. Dikh kola tane o glavna misle. Razmislin bašo naslov tari lekcija, o podnaslovija, o pučiba, o stihija kote so pišinela „čitin“, o slike a isto agjaar o videoklipija kola so šaj te pomožinen e interesenteske pošukar te haljol i tema. Palo adava, adalea so ka razmisline bašo potrebe e interesenteskere, razmislin angleder sar šaj te objasnine leske o informacie ko ednostavno hem jasno način te šaj polokhe te haljovel len hem te primeninel len (Neem. 8:8; Izr. 15:28a).

8. So sikljovaja taro e Pavleskere lafija soj tane pišime ko Kološanite 1:9, 10 bašo adava kobor tano važno te molina amen amare interesentenge?

⁸ Džikote spreminea tut, molin tut e Jehovaske bašo interesenti hem bašo leskere potrebe. Molin tut o Jehova te pomožinel tuke te sikave e interesente tari Biblija ko način so ka resel dži ko leskoro vilo. (Čitin Kološanite 1:9, 10.) Trudin tut te procenine kola bukja šaj te oven leske phare te haljovel len ili te prifatinel len. Ma bistre kaj tli cel tani te pomožine leske te krstinel pe.

9. Sar šaj te pomožine e interesenteske te spreminel pe bašo proučibe? Objasnin.

⁹ Nadinaja amen kaj, ako redovno proučinela i Biblija, o interesenti ka ceninel adava so kergja o Jehova hem o Isus, hem ka mangel  te sikljovel nešto poviše (Mat. 5:3, 6). Te šaj te ovel le celosno korist taro proučibe, o interesenti valjani te koncentririnel pe ko adava so sikljola. Te šaj te pomožine leske ko adava, objasnin kobor tano važno te spreminel pe angleder te proučinen, agjaar so angleder ka čitinel o materijali hem ka razmislinel sar šaj te primeninel adava so siklilo. Sar šaj te pomožine leske te spreminel pe? Zaedno spreminen jekh poglavje ili jekh lekcija te šaj te sikave leske sar te kerel adava. * Objasnin leske sar šaj te arakhel o direktno odgovor taro pučibe, hem sikav leske sar adava so ka beležinel samo o glavna lafija ili izrazija ka pomožinel leske te setinel pe ko odgovor. Palo adava, zamolin le te del odgovor ple lafencar. Agjaar ka šaj te dikhe kobor šukar haljovela o materijali. Ama, šaj te pottiknine e interesente te kerel panda nešto.

10. Soske tano važno o interesenti te čitinel i Biblija sekova dive, hem sar šaj te ovel le najbari korist taro čitibe i Biblija?

¹⁰ Osven so proučinela sekova kurko tuja, e interesenteske ka koristinel ako sekova dive kerela nesave bukja korkori. Ov valjani te komunicirinel e Jehovaja. Sar? Agjaar so ka šunel e Jehova hem ka kerel lea lafi. Šaj te šunel e Devle agjaar so ka čitinel i Biblija sekova dive (Is. Nav. 1:8; Ps. 1:1-3). Sikav leske sar te koristinel o „Raspored bašo čitibe i Biblija“ kova so šaj te pečatinel pe tari amari internet-stranica. * Džangjola pe, te šaj te pomožine leske te ovel le najbari korist taro čitibe i Biblija, pottiknin le šukar te razmislinel bašo adava so sikljola bašo Jehova hem sar te primeninel ko plo životo adava so čitinela (Dela 17:11; Jak. 1:25).

11. Sar o interesenti ka sikljovel ispravno te molinel pe e Jehovaske, hem soske tano važno često te kerel adava?

¹¹ Ohrabrin e interesente te kerel e Jehovaja lafi agjaar so ka molinel pe sekova dive. Sar šaj te kere adava? Taro vilo molin tut e Devleske angleder te proučinen hem palo proučibe, hem spomnin e interesente ko tle molitve. Džikote šunela tle molitve, ov ka sikljovel sar iskreno hem taro vilo te molinel pe e Jehovaske hem te bičhalel ple molitve e Isuseske ko anav (Mat. 6:9; Jovan 15:16). Adava so sekova dive ka čitinel i Biblija (ka šunel e Jehova) hem ka molinel pe (ka kerel lafi e Jehovaja) sigurno ka  pomožinel leske te ovel popaše lea (Jak. 4:8). Ako isi le asavki navika, o interesenti duhovno ka napredujnel hem ka mangel te del lafi e Jehovaske kaj ka služinel leske hem ka krstinel pe.

12. Sar šaj te pomožine e interesenteske te ovel paše amal e Jehovaja?

¹² Adava so sikljola le o interesenti džikote proučinela i Biblija na valjani te ačhol leske samo ki godi, nego valjani te khuvel leske ko vilo. Soske? Amaro vilo, kote soj vklučime amare želbe, emocie hem čuvstvija, pottikninela amen te kera nešto. O Isus sikavela sine ko logično način hem adaleske o manuša mangena sine te sikljoven lestar. Ama, ola džana sine pali leste adaleske so leskere pouke resena sine dži ko lengoro vilo (Luka 24:15, 27, 32). E interesenteske, o Jehova valjani te ovel realno ličnost, nekasaja so šaj te ovel paše hem te dikhel le sar plo Dad, Devel hem amal (Ps. 25:4, 5). Džikote proučinea lea i Biblija, istaknin kobor šuže osobine isi e Devle (2. Moj. 34:5, 6; 1. Pet. 5:6, 7). Trudin tut te kere akava bizi razlika koja tema proučinena. Pomožin leske te haljovel kobor baro mangipe, šukaripe hem sočuvstvo sikavela o Jehova. O Isus vakergja kaj „i najbari hem i prvo zapoved“ tani: „Mang e Jehova, tle Devle“ (Mat. 22:37, 38). De tutar sa te pomožine e interesenteske te mangel e Jehova taro vilo.

13. Sar šaj te pomožine e interesenteske te džanel poviše bašo e Jehovaskere osobine?

¹³ Keda kerea lafi e interesentea, vaker leske soske mangea e Jehova. Akava šaj te pomožinel leske te haljol kaj ov da valjani te ovel amal e Jehovaja hem te mangel le (Ps. 73:28). Na primer, dali ki publikacija so proučinena la ili ko nesavo stiho isi nesavi misla so tuke značinela but hem otkrinela e Jehovaskoro mangipe, mudrost, pravda ili mokj? Spomnin adava e interesenteske hem vaker leske kaj adaja tani jekh taro but pričine soske mangea amare nebesno Dade. Ama, isi panda nešto so sekova interesenti valjani te kerel te šaj te krstinel pe.

14. Sar adava so pišinela ko Evreite 10:24, 25 bašo sostanokija šaj te pomožinel e interesenteske te napredujnel?

¹⁴ Sarine mangaja o interesentija te napredujnen hem jekh dive te krstinen pe. Jekh važno način sar šaj te pomožina lenge tano te ohrabrina len te aven ko amare sostanokija.  O iskusna objavitelija vakerena kaj o interesentija kola so odma počminena te aven ko sostanokija sigate napredujnena (Ps. 111:1). Nesave objavitelija objasninena e interesentenge kaj ko sostanokija ka sikljoven but javera bukja baši Biblija so nane te sikljoven ko biblisko kursi. Čitin Evreite 10:24, 25 zaedno e interesentea, hem objasnin leske savi korist ka ovel le ako avela ko sostanokija. (Čitin.) Mukh leske o videoklipi So kerela pe ki e Jehovaskere svedokongiri dvorana? * Pomožin leske te ovel odlučno te na mukhel ni jekh sostanok.

15. Sar šaj te pottiknine e interesente redovno te avel ko sostanokija?

¹⁵ So šaj te kere ako jekh interesenti panda na avela ko sostanok ili avela samo ponekogaš? Ov vooduševimo džikote vakerea leske so sikliljan sigende ko sostanok. Keda ka dikhel sar osetinea tut, adava šaj te pottikninel le te mangel te avel. De le i Stražarsko kula ili o Listija spremibaske kola so ko momenti razgledinena pe ko sostanokija. Sikav leske bašo so ka kerel pe lafi ko javer sostanok, hem puč le so bi ovela leske najinteresno. Adava so ka dikhel hem ka šunel ko prvo sostanok sigurno ka ovel but pošukar taro adava so dži akana dikhlja hem šungja ko javera thana kote so khedena pe javera religie (1. Kor. 14:24, 25). Ka zapoznajnel javeren kola soj tane šukar primer hem kola so ka pomožinen leske te napredujnel hem te krstinel pe.

16. Sar valjani te proučina e interesentencar te šaj te pomožina lenge te krstinen pe, hem so ka dikha ki sledno statija?

¹⁶ Sar valjani te proučina e interesentencar te šaj te pomožina lenge te krstinen pe? Šaj te pomožina sekole interesenteske te haljovel kobor tano važno te proučinel sekova kurko hem sekogaš šukar te spreminel pe bašo adava. Isto agjaar, mangaja te ohrabrina le te komunicirinel e Jehovaja sekova dive hem te ovel lea paše amal. Mangaja te pottiknina le te avel ko sobraniska sostanokija. (Dikh i ramka „ So valjani te keren o interesentija te šaj te krstinen pe“.) Ama, sar so ka dikha ki sledno statija, isi panda pandž bukja so šaj te kera te šaj te pomožina e interesentenge te krstinen pe.