1. Savi nadež dengja amenge o Jehova?

 O JEHOVA dengja amen jekh but šuži nadež bašo večno životo. Nesaven isi len nadež kaj ka živinen sar besmrtna duhovna ličnostija ko nebo (1. Kor. 15:50, 53). Ama poviše džene amendar isi amen nadež kaj ka živina večno ki phuv kote so ka ova bahtale hem saste (Otk. 21:3, 4). Bizi razlika dali nadinaja amen te živina ko nebo ili ki phuv, amari nadež amenge but skapoceno.

2. Ko so temelinela pe amari nadež, hem soske šaj te vakera adava?

² O lafi „nadež“ soj koristimo ki Biblija, šaj te značinel „te očekujnel pe kaj nešto šukar ka slučinel pe“. Amen siem sigurna kaj amari nadež baši idnina ka ispolninel pe soske o Jehova dengja la amenge (Rim. 15:13). Džanaja so vetingja amenge hem isto agjaar džanaja kaj ov sekogaš ačhola ko plo lafi (4. Moj. 23:19). Uverime siem kaj e Jehova isi le hem i želba hem i mokj te kerel sa so vetingja. Adaleske, amari nadež nane samo jekh fantazija ili nešto so amen bi mangaja te slučinel pe, nego oj temelinela pe ko čačutne dokazija hem tani realno.

3. Bašo so ka kera lafi ki akaja statija? (Psalm 27:14).

³ Amaro nebesno Dad mangela amen hem ov mangela te verujna leske. (Čitin Psalm 27:14.) Keda isi amen cvrsto nadež ko Jehova ka šaj te izdržina nevolje hem te ova hrabra hem bahtale bizi razlika so ka slučinel pe amenge. Akana te dikha sar i nadež zaštitinela amen. Prvo, te dikha soske baši nadež vakerela pe kaj tani sar kotva hem sar šlemi. Palo adava ka dikha sar šaj te kera pozorali amari nadež.

4. Sar i nadež tani sar kotva? (Evreite 6:19).

⁴ Ko plo pismo dži ko Evreija o apostol Pavle sporedingja  i nadež kotvaja. (Čitin Evreite 6:19.) O Pavle but puti patujnela sine brodea hem adaleske džanela sine kaj o kotve koristinena pe te šaj o brodi te ačhol ko jekh than hem ma te ciden le o branija. Ki jekh prilika džikote patujnela sine brodea slučingja pe jekh bari bura. Tegani ov dikhlja sar o mornarija frdena kotve ko pani te šaj o brodi te ačhol stabilno hem ma te khuvel ko karpe (Dela 27:29, 39-41). Isto sar i kotva so pomožinela e brodeske te ačhol ko jekh than agjaar amari nadež pomožinela amenge te ačhova paše uzo Jehova hem te na cida amen lestar keda ka oven amen problemija kola soj sar bare bure. Amari cvrsto nadež pomožinela amenge te nakha preku bare nevolje soske siem uverime kaj avena pomirna vremija. Na valjani te bistra kaj o Isus predupredingja amen kaj ka ova progonime (Jovan 15:20). Znači, adava so razmislinaja baši amari nadež pomožinela amenge ponadari da verno te služina e Jehovaske.

5. Sar i nadež pomožingja e Isuseske iako džanlja kaj ka ovel mučimo hem mudardo?

⁵ I nadež pomožingja e Isuseske te ačhovel verno iako džanlja kaj ka ovel but mučimo hem ko krajo ka merel. Ko Pentakost 33 a.e., o apostol Petar citiringja jekh proroštvo taro psalmija kova so but šukar opišinela kobor smirimo hem uverimo sine o Isus: „A me ka živinav ki nadež soske džanava kaj nane te mukhe man ko grobo nane ni te dozvoline o telo tle verno slugaskoro te kirnjol... ka phere man bare bahtalipaja keda ka tergjovav angli tute“ (Dela 2:25-28; Ps. 16:8-11). Iako o Isus džanlja kaj ka merel, le sine le cvrsto nadež kaj o Devel ka voskresninel le hem kaj ka ovel lea palem zaedno ko nebo (Evr. 12:2, 3).

6. So vakergja jekh phral baši nadež?

⁶ Amari nadež pomožingja bute phralenge hem phenjenge te istrajnen. Te dikha o primer jekhe verno phraleskoro tari Anglija kova so vikinela pe Leonard Čin. Ki prvo svetsko vojna ov sine phanlo soske na manglja te džal ki vojska. Duj masek sine phanlo ki samica hem palo adava mora sine te kerel but phari buti. Ov pokasno pišingja: „Mo iskustvo pomožingja mange te haljovav kobor but valjani amenge i nadež te šaj te istrajna. Ko adava isto šaj te pomožinel amenge o primer e Isuseskoro, e apostolengoro hem e prorokongoro hem isto agjaar isi amen o but šuže vetuvanja so arakhljona ki Biblija. Sa akava dela amen bari nadež baši idnina hem dela amen sila te šaj te istrajna“. I nadež akale phraleske sine sar kotva hem amenge da šaj te ovel.

7. Sar amari nadež ovela pozorali keda isi amen problemija? (Rimjanite 5:3-5; Jakov 1:12).

⁷ Amari nadež ovela pozorali keda istrajnaja ko nevolje hem keda dikhaja sar o Jehova pomožinela amenge hem kaj tano zadovolno amendar. (Čitin Rimjanite 5:3-5; Jakov 1:12.) Znači, amari nadež akana tani but pozorali nego ko početok keda prifatingjem o šukar haberi. O Satana mangela o problemija te peraven amen ama o Jehova pomožinela amen te izdržina ko sekova problemi.

8. Sar i nadež tani sar šlemi? (1. Solunjanite 5:8).

⁸ I Biblija isto agjaar sporedinela amari nadež jekhe šlemea. (Čitin 1. Solunjanite 5:8.) Jekh vojniko phiravela šlemi te šaj te zaštitinel plo šero taro neprijatelija kola so mangena te khuven le. Ki amari duhovno vojna amen valjani te zaštitina amari godi taro e Satanaskere napadija. Ov  bombardirinela amen bute bukjencar te šaj te iskušinel amen hem te ruminel amaro razmisluvanje. Isto sar o šlemi so zaštitinela jekhe vojnikoskoro šero, agjaar amari nadež zaštitinela amaro razmisluvanje te šaj te ačhova verna e Jehovaske.

9. So slučinela pe e manušencar adaleske so nane len nadež?

⁹ I nadež bašo večno životo ka pomožinel amenge te ana mudra odluke. Tari javer strana ako amari nadež počminela pohari te slabonel hem razmislinaja samo bašo amare želbe, šaj te počmina pohari te bistra amari cel, o večno životo. Te dikha o primer nesave hristijanengoro so živinena sine ko purano Korint. Ola našavgje pumari vera ko jekh but važno vetuvanje taro Devel — i nadež bašo voskresenie (1. Kor. 15:12). O Pavle pišingja kaj o manuša so nane len nadež živinena samo avdiveseske (1. Kor. 15:32). Hem baš avdive bute dženen so nane len nadež ko e Devleskere vetuvanja živinena samo avdiveseske hem kerena sa so šaj samo te zadovolinen pumare želbe. Ama amen isi amen doverba ko e Jehovaskere vetuvanja baši idnina. Amari nadež tani sar simbolično šlemi kova so zaštitinela amaro razmisluvanje hem pomožinela amen te na razmislina samo baši amenge soske adava šaj te ruminel amaro amalipe e Jehovaja (1. Kor. 15:33, 34).

10. Sar i nadež zaštitinela amen taro pogrešno razmisluvanje?

¹⁰ Amari nadež isto agjaar zaštitinela amen taro negativno razmisluvanje sar soj kaj tano džabe te kera e Jehovaskiri volja. Na primer nesave šaj te mislinen peske: „Me nikogaš nane te ovav maškar okola so ka živinen večno. Me na sium šukar manuš. Nikogaš nane te uspejnav te kerav adava so o Devel mangela“. Ako setinaja amen, e Joveskoro hovavno amal o Elifaz vakergja leske nešto slično. Ov phengja: „Soj tano o manuš so merela pa te ovel čisto?“ Ov ponadari bašo Devel vakergja: „Ov na verujnela ple sveta slugenge, čak ni o nebo nane čisto anglo leskere jakhja“ (Jov 15:14, 15). Akala sine bare hovajba. Na valjani te bistra kaj o Satana garavela pe palo asavke razmisluvanja. Ov džanela kaj ako nonstop razmislinea ko asavko način tu ka počmine te našave tli nadež. Adaleske otfrlin asavke hovajba hem koncentririn tut ko e Jehovaskere vetuvanja. Nikogaš ma sumnin tut kaj ov mangela te živine večno hem kaj ka pomožinel tuke te uspejne ko adava (1. Tim. 2:3, 4).

11. Soske valjani te ova strpliva džikote adžikeraja amari nadež te ispolninel pe?

¹¹ Nane sekogaš lokho te ovel amen zorali nadež. Šaj te počmina te ova nestrpliva džikote adžikeraja o Devel te ispolninel ple vetuvanja. Ama adaleske so o Jehova tano večno, adava so amenge dikhjola sar but vreme e Jehovaske tano kratko (2. Pet. 3:8, 9). Ov sigurno ka ispolninel pli namera hem adava ko najšukar način ama šaj nane te kerel adava keda amen očekujnaja. So ka pomožinel amenge ponadari da te ovel amen cvrsto nadež džikote strplivo adžikeraja o Devel te ispolninel ple vetuvanja? (Jak. 5:7, 8).

12. Sprema Evreite 11:1, 6, sar i nadež tani povrzimi e veraja?

¹² Amari nadež ka ovel zorali ako ačhovaja paše e Jehovaja soske ov tano adava so ka ispolninel amari nadež. Ustvari, te šaj te ovel amen nadež mora te verujna kaj o Jehova postojnela hem kaj „nagradinela okolen so rodena le revno“. (Čitin Evreite  11:1, 6.) So porealno amenge o Jehova doborom poviše ka ova uverime kaj ov ka kerel sa adava so vetingja. Akana te dikha nekobor praktična načinija sar šaj te ova panda popaše e Jehovaja hem agjaar te kera amari nadež panda pocvrsto.

13. Sar šaj te ova paše e Devlea?

¹³ Molin tut e Jehovaske hem čitin leskoro Lafi. Iako amen našti te dikha e Jehova sepak šaj te ova lea paše. Šaj te kera lea lafi ki molitva hem te ova uverime kaj ka šunel amen (Erem. 29:11, 12). Šaj te šuna le agjaar so ka čitina leskoro Lafi hem hor ka razmislina bašo adava so čitinaja. Džikote čitinaja bašo adava sar o Jehova grižingja pe ple verna slugenge ko purano vreme, amari nadež ka bajrol panda poviše. Sa soj pišimo ko e Devleskoro Lafi „pišimo tano te šaj te sikljova hem te ovel amen sila te istrajna, te šaj te ovel amen nadež“ (Rim. 15:4).

14. Soske tano šukar te razmislina so kergja o Jehova e javerenge?

¹⁴ Razmislin bašo adava sar o Jehova ispolningja ple vetuvanja. Te dikha so kergja o Devel bašo Avraam hem baši Sara. Ola sine but phure te šaj te ovel len čhave, sepak o Devel vetingja lenge kaj ka ovel len čhavo (1. Moj. 18:10). Sar reagiringja o Avraam keda sine lenge dendo vetuvanje kaj ka ovel len čhavo? Ki Biblija pišinela: „Le sine le vera kaj ka ovel dad bute narodonge“ (Rim. 4:18). Iako o Avraam na džanlja sar ka ispolninel pe akava vetuvanje, sepak sine uverimo kaj o Jehova ka ačhol ko plo lafi. Hem čače, o Jehova na razočaringja akale verno manuše (Rim. 4:19-21). Asavke izveštaija sikavena amenge kaj sekogaš šaj te ovel amen doverba ko Jehova kaj ka ispolninel ple vetuvanja čak keda adava dikhjola amenge nevozmožno.

15. Soske valjani te razmislina bašo adava so dži akana kergja baši amende o Jehova?

 ¹⁵ Razmislin bašo adava so kergja o Jehova baši tute. Razmislin bašo vetuvanja taro e Devleskoro Lafi kola so ispolningje pe ko tlo životo. Na primer, o Isus vetingja kaj leskoro Dad ka del tut o osnovna bukja so valjani tuke (Mat. 6:32, 33). O Isus isto agjaar uveringja tut kaj o Jehova ka del tut plo sveti duh ako molinea le bašo adava (Luka 11:13). O Jehova ikergja pe ko plo lafi. Verojatno šaj te setine tut ko javera da vetuvanja kola so ispolningja len tuke lično. Na primer, ov vetingja kaj ka prostinel tuke, kaj ka utešinel tut hem kaj ka del tut duhovno hrana (Mat. 6:14; 24:45; 2. Kor. 1:3). Keda razmislinea bašo adava so o Jehova kergja baši tute dži akana, tegani tli nadež ka ovel pocvrsto bašo adava so ka kerel baši tute ki idnina.

16. Soske i nadež tani skapoceno poklon?

¹⁶ I nadež bašo večno životo tani but skapoceno poklon taro Devel. Edvaj adžikeraja adala dive kola so sigurno ka aven. Amari nadež tani sar kotva koja so ikerela amen cvrsto te šaj te izdržina nevolje, progonstvija hem čak te na dara taro meribe. Oj tani sar šlemi, zaštitinela amare misle te šaj te otfrlina adava soj pogrešno hem te kera adava soj ispravno. Akaja nadež tari Biblija kerela amen te ova popaše e Devlea hem sikavela amenge kobor but mangela amen ov. Amare šukaripaske tano ako ikeraja cvrsto amari nadež.

17. Soske amari nadež kerela amen bahtale?

¹⁷ O apostol Pavle ohrabringja e phralen taro Rim e lafencar „oven bahtale baši tumari nadež“ (Rim. 12:12). O Pavle sine bahtalo soske sine sigurno kaj ako ačhovela verno ka dobinel večno životo ko nebo. Amen da šaj te ova bahtale baši amari nadež soske siem sigurna kaj o Jehova ka ispolninel ple vetuvanja. Baš sar so vakergja o psalmisti: „Bahtalo tano o manuš so nadinela pe ko Jehova, plo Devel, okova so sekogaš ačhovela verno“ (Ps. 146:5, 6).